“Kõm Kõn̦aan Iwõj Ippemi”

1, 2. (1) Ta eo Jeova ear ba bwe enaaj wal̦o̦k ilo iien kein ad? (2) Ta kajjitõk ko jenaaj etali ilo katak in? (Lale pija eo itulõñ.)

JEOVA ear ba bwe ilo iien kein ad, “joñoul riaelõñ ko renaaj etal ñan ippãn juon RiJu im ba, ‘Kõm kõn̦aan iwõj ippemi kõnke kõmar roñ ke Anij ej pãd ippemi.’” (Zekaraia 8:23, UBS) RiJu eo ej kõkkar kõn ro em̦õj an Anij kapit er kõn kajoor eo an. Baibõl̦ ej bareinwõt n̦aetan rein “Israel an Anij.” (Galetia 6:16) Riaelõñ ko 10 rej kõkkar kõn ro me kõjatdikdik eo aer ej ñan mour indeeo ioon lal̦. Rejel̦ã bwe em̦õj an Jeova kajeraam̦m̦an rũkkapit ro im rej kile bwe ej juon jeraam̦m̦an ñan kobal̦o̦k ippãer im kabuñ ñan Jeova.

² Ãinwõt rũkanaan Zekaraia, Jijej ear ba bwe armej ro an Anij renaaj bõrokuk im juon wõt. Ear ba bwe ro renaaj mour ilañ rej juon “bwij edik” im ro renaaj mour ioon lal̦ in rej ‘jiip ro jet.’ Bõtab, Jijej ear ba bwe aolep kumi kein ruo renaaj “juon wõt bwij” im renaaj l̦oor e, eo im ej aer “jabõt.” (Luk 12:32; Jon 10:16) Kõnke ewõr ruo kumi, jet remaroñ l̦õmn̦ak kõn kajjitõk kein: (1) Ro uwaan jiip ro jet rej aikuj ke jel̦ã etan aolep ro rej rũkkapit kiiõ? (2) Ej aikuj ewi wãween an rũkkapit ro l̦õmn̦ak kõn er make? (3) Ñe juon ilo eklejia eo am̦ ej jino m̦õñã bũreet im idaak wain ilo iien Kwõjkwõj ko, ej aikuj ewi wãween am̦ watõke armej in? (4) Kwõj aikuj ke inepata ñe el̦apl̦o̦k oran ro rej m̦õñã bũreet im idaak wain ilo iien Kwõjkwõj ko? Katak in enaaj uwaake kajjitõk kein.

JEJ AIKUJ KE JEL̦Ã ETAN AOLEP RO REJ RŨKKAPIT KIIÕ?

3. Etke jejjab maroñ jel̦ã wõn ro renaaj uwaan 144,000?

³ Ro rej uwaan jiip ro jet rej aikuj ke jel̦ã etan aolep ro rej rũkkapit kiiõ ilo lal̦ in? Rejjab. Etke? Kõnke ejjel̦o̦k juon en̦ elukkuun jel̦ã el̦aññe rein renaaj bõk jinõkjeej eo aer.^[1] (Lale kõmel̦el̦e eo ilo jem̦l̦o̦kin katak in.) Meñe Anij ear kũr er bwe ren mour ilañ, ak rej kab naaj bõk jinõkjeej eo aer el̦aññe rej tiljek wõt ñane. Setan ejel̦ã men in, im ej kõjerbal “rũkanaan waan” ro ñan kajjioñ “kejebwãbweik” rein. (Matu 24:24) Rũkkapit ro rejjab kajju jel̦ã el̦aññe renaaj bõk jinõkjeej eo aer, m̦ae iien Jeova ej sil er ak kaalikkar ñan er bwe em̦õj an ekajete er im lo bwe rar tiljek. Jeova ej kõm̦m̦ane sil in ãliktata ilo iien eo m̦okta wõt jãn aer mej ak m̦okta jãn an jinoe “eñtaan eo el̦ap.”​—Revelesõn 2:10; 7:3, 14.

4. Ñe jejjab maroñ jel̦ã etan aolep rũkkapit ro ilo lal̦ in kiiõ, ewi wãween ad maroñ ‘etal ippãer’?

⁴ Ñe jejjab maroñ jel̦ã etan aolep rũkkapit ro ilo lal̦ in kiiõ, ewi wãween an jiip ro jet maroñ ‘etal ippãer’? Baibõl̦ ej ba bwe riaelõñ ko 10 renaaj “etal ñan ippãn juon RiJu im ba, ‘Kõm kõn̦aan iwõj ippemi kõnke kõmar roñ ke Anij ej pãd ippemi.’” Meñe eoon in ej kõnnaan kõn juon RiJu, ak ilo an ba “ippemi,” ej kaalikkar bwe elõñl̦o̦k jãn juon armej. Mel̦el̦ein bwe RiJu eo ej kõkkar kõn aolep rũkkapit ro ãinwõt juon kumi, im ejjab jitõñl̦o̦k wõt ñan juon armej. Jiip ro jet rejel̦ã men in im rej kobal̦o̦k ippãn rein ilo aer karejar ñan Jeova. Rejjab aikuj jel̦ã etan aolep ro rej uwaan rũkkapit ro im l̦oore kajjojo iaaer. Etke? Kõnke Jijej ej ad Rũtõl, im Baibõl̦ ej ba bwe jej aikuj l̦oore wõt e.​—Matu 23:10, UBS.

EJ AIKUJ EWI WÃWEEN AN RŨKKAPIT RO L̦ÕMN̦AK KÕN ER MAKE?

5. Ta naanin kakkõl eo rũkkapit ro rej aikuj lukkuun l̦õmn̦ak kake, im etke?

⁵ Rũkkapit ro rej aikuj lukkuun l̦õmn̦ak kõn naanin kakkõl eo ilo bokin 1 Korint 11:27-29 (UBS). (Riit.) Ewi wãween an juon rũkkapit kwal̦o̦k an “jab kautiej” ñe ej m̦õñã bũreet im idaak wain ilo iien Kwõjkwõj ko? Ñe juon rũkkapit ejjab kate bwe en em̦m̦an wõt jem̦jerã eo an ippãn Jeova im ejjab tiljek ñane, armej in ejjab kwal̦o̦k kautiej ñe ej m̦õñã bũreet im idaak wain. (Hibru 6:4-6, UBS; 10:26-29, UBS) Naanin kakkõl in ej kakeememej rũkkapit ro bwe rej aikuj tiljek wõt ñe rekõn̦aan tõpar kõttõpar eo aer ñan bõk “kũr eo an Anij ilo Kũraij Jijej ñan mour eo ilañ.”​—Pilippai 3:13-16, UBS.

6. Ej aikuj ewi wãween an rũkkapit ro l̦õmn̦ak kõn er make?

⁶ Paul ear jiroñ rũkkapit ro im ba: “Ña, juon [rũkalbuuj] kõn aõ jerbal ñan Irooj, ij akwel̦ap ñan kom̦ bwe kom̦win mour ekkar ñan joñak in mour eo Anij ear likũti ke ear kũr kom̦.” Ewi wãween aer kõm̦m̦ane men in? Paul ear kõmel̦el̦e im ba: “Kom̦win ettã im ineem̦m̦an im kijenmej iien otemjej. Kom̦win kwal̦o̦k ami yokwe ilo ami jipañ doon. Kom̦win kate kom̦ joñan wõt ami maroñ, bwe kom̦win bõro wõt juon ilo Jetõb Kwõjarjar, kõn aenõm̦m̦an eo ej lukwõj kom̦ ippãn doon.” (Epesõs 4:1-3, UBS) Kajoor eo an Jeova ej jipañ rũkarejar ro an bwe en ettã bũrueer. (Kolosse 3:12) Kõn men in, rũkkapit ro rejjab l̦õmn̦ak bwe rem̦m̦anl̦o̦k im utiejl̦o̦k jãn ro jet. Rejel̦ã bwe Jeova ejjab kal̦apl̦o̦k an lel̦o̦k kajoor eo an ñan er jãn rũkarejar ro jet an. Rejjab l̦õmn̦ak bwe el̦apl̦o̦k aer jel̦ã kõn katak ko rem̦wilal̦ ilo Baibõl̦ jãn ro jet. Rũkkapit ro relukkuun ban jiroñ juon bwe en jino m̦õñã bũreet im idaak wain ilo iien Kwõjkwõj ko kõnke rej l̦õmn̦ak bwe armej in ej rũkkapit. Elukkuun ettã bũruon rũkkapit ro im rejel̦ã bwe Jeova wõt emaroñ kũr ak kããlõt armej ro ñan mour ilañ.

7, 8. (1) Ta ko rũkkapit ro rejjab kõtmãne an ro jet kõm̦m̦ani ñan er? (2) Ta ko rũkkapit ro rejjab aikuj kõm̦m̦ani, im etke?

⁷ Meñe rũkkapit ro rej watõk bwe ej juon jeraam̦m̦an bwe Anij ear kũr er ñan mour ilañ, ak rejjab kõtmãne bwe ro jet ren lukkuun kautiej er l̦e jãn joñan. (Epesõs 1:18, 19, UBS; riit Pilippai 2:2, 3, UBS.) Rebar jel̦ã bwe ñe Jeova ej kããlõt juon bwe en rũkkapit, ejjab kõm̦m̦an bwe ro jet ren jel̦ã. Kõn men in, ñe juon ej erom rũkkapit, ejjab bwilõñ ñe jet rejjab tõmak ilo jinoin bwe ej juon rũkkapit. Emel̦el̦e bwe Baibõl̦ ej jiroñ kõj bwe jen jab m̦õkaj ad tõmak juon eo ej ba bwe Anij ear jitõñe bwe en kõm̦m̦ane juon jerbal eaorõk. (Revelesõn 2:2, UBS) Kõnke rũkkapit ro rejjab kõn̦aan bwe en l̦ap jãn joñan an ro jet kautiej er, rejjab ba bwe er rũkkapit ñan ro rej kab iioon er. Ilo m̦ool, remaroñ jab ba men in ñan jabdewõt armej. Bareinwõt rejjab kõmmejãje kõn jerbal ko renaaj kõm̦m̦ani ilañ.​—1 Korint 1:28, 29, UBS; riit 1 Korint 4:6-8, UBS.

⁸ Rũkkapit ro rejjab l̦õmn̦ak bwe rej aikuj jol̦o̦k wõt iien ko aer ippãn rũkkapit ro jet, ãinwõt ñe rej uwaan juon kumi ejenolo̦k. Rejjab kajjioñ kappukot rũkkapit ro jet bwe ren kõnnaan ippãer kõn aer rũkkapit ak ain doon bwe ren katak Baibõl̦ ippãn doon. (Galetia 1:15-17, UBS) Doulul in eban kar bõrokuk el̦aññe rũkkapit ro rar kõm̦m̦ane men in. Bareinwõt, kajoor eo an Anij eban kar jerbal ippãer im jipañ er bwe ren aenõm̦m̦an im bõrokuk ippãn doon.​—Riit Rom 16:17, 18, UBS.

EJ AIKUJ EWI WÃWEEN AM̦ WATÕK ER?

9. Etke jej aikuj kõjparok wãween ad watõk ro rej m̦õñã bũreet im idaak wain ilo iien Kwõjkwõj ko? (Lale bo̦o̦k eo etan “Yokwe Ejjab Kõm̦m̦an Men ko Rejekkar.”)

⁹ Ej aikuj ewi wãween am̦ watõk rũkkapit ro jeim̦ im jatũm̦? Jijej ear jiroñ rũkal̦oor ro an im ba: “Kom̦ otemjej jemjein jemjatin.” Ear wõnm̦aanl̦o̦k im ba: “Jabdewõt eo enaaj make kautieje, naaj kõttãiki; im eo enaaj make kõttãiki, naaj kautieje.” (Matu 23:8-12) Ealikkar bwe ej juon men ebõd ñe el̦e jãn joñan ad kautiej juon armej, jekdo̦o̦n ñe ej rũkkapit im jatin Kũraij. Ñe Baibõl̦ ej kõnnaan kõn em̦m̦aan ro rej lale eklejia, ej rõjañ kõj bwe jen anõke tõmak eo aer, bõtab ej bar ba bwe jen jab karejar ñan jabdewõt armej. (Hibru 13:7) M̦ool bwe Baibõl̦ ej ba bwe ewõr jet ro im jej aikuj lukkuun “kautiej” er ilo eklejia eo. Bõtab, unin an ba men in ej kõnke rej jerbal ilo “jim̦we” im el̦ap aer kate er ilo jerbal ko aer ilo eklejia eo im aer katakin, ejjab kõnke rej rũkkapit. (1 Timote 5:17) Ñe el̦e jãn joñan ad nõbar im kautiej rũkkapit ro, remaroñ jook. Im men eo el̦apl̦o̦k an nana ej bwe jemaroñ kõm̦m̦an bwe en jino utiej bũrueer. (Rom 12:3, UBS) Ejjel̦o̦k iaad jekõn̦aan kal̦õkatip jabdewõt iaan rũkkapit ro jatin Kũraij!​—Luk 17:2.

10. Ewi wãween am̦ maroñ kwal̦o̦k kautiej ñan rũkkapit ro?

¹⁰ Ewi wãween ad kwal̦o̦k kautiej ñan ro em̦õj an Jeova kããlõt er? Juon wãween ej ilo ad jab kajjitõk ippãer kõn wãween aer kar erom rũkkapit. Men in ej aer wõt, im ejjel̦o̦k ad maroñ ñan jel̦ã. (1 Tessalonika 4:11, UBS; 1 Timote 5:13, UBS) Bareinwõt, jejjab kajjitõk ippãn ro pãleer, jineer im jemãer, ak ro jet uwaan baam̦le eo aer el̦aññe er rej bar rũkkapit. Jej aikuj keememej bwe ñe juon ej rũkkapit, ejjab mel̦el̦ein bwe ear jolõte men in jãn baam̦le eo an. (1 Tessalonika 2:12) Jej aikuj bareinwõt kõjparok kõj jãn ad kwal̦o̦k kajjitõk ko me remaroñ kõmetak ro jet. Ñan waanjoñak, jejjab aikuj kajjitõk ippãn kõrã eo pãleen juon rũkkapit kõn wãween an eñjake ñe enaaj mour indeeo ioon lal̦ in ak ejako l̦eo pãleen iturin. Jejel̦ã bwe ilo naaj jukjukun pãd eo ekããl, Jeova enaaj “kamaat” ak katõprak aolep kõn̦aan ko an aolep armej ro.​—Sam 145:16.

11. Ewi wãween ad kõjparok kõj make ñe ejjab l̦e jãn joñan ad kautiej ro jet?

¹¹ Ñe ejjab l̦e jãn joñan ad kautiej rũkkapit ro, men in enaaj kõjparok kõj. Ewi wãween? Baibõl̦ ej kwal̦o̦k bwe emaroñ wõr ro “jemjein jemjatin riab” ilo eklejia eo me remaroñ ba bwe er rũkkapit. (Galetia 2:4, 5; 1 Jon 2:19) Bareinwõt, jet rũkkapit ro remaroñ jab tiljek wõt ñan Jeova. (Matu 25:10-12; 2 Piter 2:20, 21) Innem, ñe jej kõjparok kõj bwe en jab l̦e jãn joñan ad kautiej ro jet, men in enaaj jipañ kõj bwe jen jab l̦oor jabdewõt armej, meñe rũkkapit ro ak ro jelukkuun jel̦ã kajjier ak ro eto aer karejar ñan Jeova. Ñe juon iien rein renaaj ilo̦k jãn Jeova im jab tiljek ñane, jeban luuji tõmak eo ad im jeban bõjrak jãn ad karejar ñan Jeova.

JEJ AIKUJ KE INEPATA KÕN ORAER?

12, 13. Etke jejjab aikuj inepata kõn oran ro rej m̦õñã bũreet im idaak wain ilo iien Kwõjkwõj ko?

¹² Ium̦win elõñ iiõ ko m̦oktal̦o̦k, oran ro rar m̦õñã bũreet im idaak wain ilo iien Kwõjkwõj ko ear dikl̦o̦k. Bõtab kiiõ, oran rein ej l̦apl̦o̦k wõt kajjojo iiõ. Jej aikuj ke inepata kõn men in? Jejjab. Jen lale etke.

¹³ “Anij ejel̦ã ro doon.” (2 Timote 2:19) Ro me rej bwine oran ro rej m̦õñã bũreet im idaak wain ilo iien Kwõjkwõj ko rejjab ãinwõt Jeova kõnke rejjab lukkuun jel̦ã wõn iaan rein rej lukkuun rũkkapit. Kõn men in, oran rein emaroñ kitibuj ro im rej l̦õmn̦ak bwe er rũkkapit ak ilo m̦ool rejjab. Ñan waanjoñak, jet rekõn m̦õñã bũreet im idaak wain ak tokãlik rar bõjrak. Ro jet emaroñ wõr aer nañinmej ko me rejelõt eñjake im l̦õmn̦ak ko aer im men in emaroñ kõm̦m̦an bwe ren l̦õmn̦ak bwe renaaj tõl ippãn Kũraij ilañ. Ealikkar bwe jejjab lukkuun jel̦ã oran ro rej rũkkapit kiiõ ioon lal̦ in.

14. Ta eo Baibõl̦ ej kwal̦o̦k kõn oran rũkkapit ro ilo lal̦ in ñe enaaj jinoe eñtaan eo el̦ap?

¹⁴ Enaaj wõr rũkkapit jãn aolep jikin ko ipel̦aakin lal̦ in ilo iien eo Jijej enaaj ain er ñan lañ. Baibõl̦ ej ba bwe Jijej enaaj “jilkinl̦o̦k enjel̦ ro an ñan jabõn ko emãn in lal̦ in, im renaaj ko̦kweilo̦kl̦o̦k aolepen rũkããlõt ro an jãn jabõn ñan jabõn.” (Matu 24:31, UBS) Baibõl̦ ej bar kwal̦o̦k bwe ilo raan ko ãliktata, enaaj iiet uwaan rũkkapit ro ilo lal̦ in. (Revelesõn 12:17) Bõtab, ejjab kwal̦o̦k jete naaj oraer ñe enaaj jinoe eñtaan eo el̦ap.

15, 16. Ta eo jej aikuj mel̦el̦e kake kõn ro uwaan 144,000 me Jeova ear kããlõt er?

¹⁵ Jeova ej pepe kõn ñããt eo ej kããlõt rũkkapit ro. (Rom 8:28-30) Jeova ear jino kããlõt ro rej rũkkapit ãlikin an Jijej jerkakpeje. Aolep Kũrjin ro rem̦ool ilo iien ko an rijjilõk ro remaroñ kar rũkkapit. Ium̦win elõñ bukwi iiõ ko ãlikin iien in, enañin aolep ro rar ba bwe er Kũrjin rar jab m̦oolin Kũrjin. Bõtab, ilo tõre ko, Jeova ear kããlõt wõt jet ro im rar m̦oolin Kũrjin bwe ren rũkkapit. Rar ãinwõt wiit ko me Jijej ear ba bwe renaaj eddek ibwiljin mar ko. (Matu 13:24-30, UBS) Ilo raan kein ãliktata, Jeova ej wõnm̦aanl̦o̦k im kããlõt ro im renaaj uwaan 144,000.^[2] (Lale kõmel̦el̦e eo ilo jem̦l̦o̦kin katak in.) Kõn men in, ñe Anij ej kããlõt jet iaan rein m̦okta jãn an itok jem̦l̦o̦kin, jeban pere ñan jidik pepe in an kõnke jejel̦ã bwe men ko ej kõm̦m̦ani rejim̦we. (Aiseia 45:9, UBS; Daniel 4:35; riit Rom 9:11, 16.)^[3] (Lale kõmel̦el̦e eo ilo jem̦l̦o̦kin katak in.) Jej aikuj kõjparok bwe jen jab ãinwõt rijerbal eo me ear kwal̦o̦k an inepata kõn wãween an irooj eo an kõm̦m̦an ñan ro rar jino jerbal ilo awa eo ãliktata.​—Riit Matu 20:8-15, UBS.

¹⁶ Ro im kõjatdikdik eo aer ej ñan mour ilañ ejjab aolepeer rej uwaan “rũkarejar eo etiljek im mãlõtlõt.” (Matu 24:45-47, UBS) Ãinwõt ilo iien ko an rijjilõk ro, Jeova im Jijej rej kõjerbal juon kumi edik ilo raan kein ñan naajdik elõñ ak lil̦o̦k katak ko rem̦ool ñan er. Ilo kar tõre ko an rijjilõk ro, jet wõt iaan rũkkapit ro rar je bok ko jãn Matu ñan Revelesõn. Im ilo raan kein, jet wõt iaan rũkkapit ro rej bõk eddo eo ñan lel̦o̦k katak ko rem̦ool ñan armej ro an Anij.

17. Ta ko kwaar katak jãn katak in?

¹⁷ Ta ko jaar etali ilo katak in? Jaar katak bwe em̦õj an Jeova pepe bwe enañin aolep armej ro an renaaj mour indeeo ijin ioon lal̦ im bwe ewõr jet ro im renaaj mour ilañ kõnke renaaj tõl ippãn Jijej. Jeova ej kajeraam̦m̦an aolep rũkarejar ro an, im rein ekitibuj ro renaaj mour ilañ im ro renaaj mour ioon lal̦. Jeova ekõn̦aan bwe rein aolep ren pokake kien ko an im tiljek wõt ñane. Er aolep ej aikuj ettã bũrueer. Er aolep rej aikuj juon wõt ilo aer karejar ñane im rej aikuj bõrokuk. Im er aolep rej aikuj kate er bwe en wõr wõt aenõm̦m̦an ilowaan eklejia eo. Ilo ad epaakel̦o̦k jem̦l̦o̦kin jukjukun pãd in, jen aolep jerbal ippãn doon ãinwõt juon bwij ilo ad karejar wõt ñan Jeova im l̦oore Kũraij.