Anij Enaaj Buñbũruon Ippãd Ñe Jej Kwal̦o̦k Ad Tõmak

1, 2. Ta men eo epen ear wal̦o̦k ñan Jepta im jiroñ eo nejin?

JUON jiroñ ej ettõrl̦o̦k ñan ippãn jemãn bwe en wõnm̦aiki. Elukkuun m̦õn̦õn̦õ bwe jemãn ear jab jorrããn ke ear tarin̦ae. Joñan an jiroñ in m̦õn̦õn̦õ bwe rar bõk anjo̦, ear al im eb. Bõtab, jemãn ear ba im kõm̦m̦ane juon men me emaroñ kar kõm̦m̦an an bwilõñ. Jemãn ear kekõl nuknuk ko an im ear jañ im ba: “O nejũ kõrã! Kwõj rupe bũruõ!” Innem, ear ba ñane bwe em̦õj an kõm̦m̦ane juon kallim̦ur ñan Jeova me enaaj ukot wãween mour eo an jiroñ in. Kõnke ear kõm̦m̦ane kallim̦ur in, jiroñ in eban maroñ m̦are ak wõr nejin. Bõtab, jiroñ in nejin ear m̦õkaj im uwaake jemãn ilo an rõjañe bwe en kajejjet kallim̦ur eo an ñan Jeova. Naan ko an rej kaalikkar bwe ear lukkuun lõke im tõmak bwe enaaj bõk tokjãn ñe ej kõm̦m̦ane jabdewõt men Jeova ej kajjitõk ippãn ñan kõm̦m̦ane. (Ri Ekajet 11:34-36, UBS) Ke jemãn ear kile joñan tõmak eo an jiroñ in, ear lukkuun m̦õn̦õn̦õ kõnke ejel̦ã bwe Jeova enaaj buñbũruon ippãn kõn an m̦õn̦õn̦õ in kaarmejjeteik e make.

² Jepta im jiroñ eo nejin rar lukkuun lõke Jeova im karõk ko an. Rar kwal̦o̦k wõt aer tõmak ilo Jeova meñe jet iien ear jab pidodo ñan er. Rar kõn̦aan bwe Jeova en buñbũruon ippãer. Kõn men in, rar m̦õn̦õn̦õ in kaarmejjeteik jabdewõt men bwe ren maroñ kabuñbũruon Jeova.

3. Etke joñak eo an Jepta im jiroñ eo nejin emaroñ jipañ kõj ilo raan kein?

³ Ejjab aolep iien epidodo ñan kwal̦o̦k tõmak. Jej aikuj lukkuun ‘kate kõj kõn tõmak eo’ ad. (Jud 3) Joñak eo an Jepta im jiroñ eo nejin emaroñ jipañ kõj bwe jen maroñ kõm̦m̦ane men in. Erro kar kwal̦o̦k wõt aerro tõmak ilo Jeova meñe rar iioon mãlejjoñ ko. Ewi wãween aerro kar kwal̦o̦k wõt aerro tõmak?

RAR KWAL̦O̦K WÕT AER TÕMAK IM JAB L̦OOR L̦ÕMN̦AK IM KÕM̦M̦AN KO AN ARMEJ RO

4, 5. (1) Ta eo Jeova ear kakien RiIsrael ro ñan kõm̦m̦ane ñe renaaj del̦o̦ñe Ãneen Kallim̦ur eo? (2) Ekkar ñan Sam 106, ta ko rar wal̦o̦k ñan aelõñin Israel kõn aer kar jab pokake Jeova?

⁴ Men ko rar wal̦o̦k ilo tõre ko an Jepta im jiroñ eo nejin remaroñ kar kakeememej erro kajjojo raan kõn an RiIsrael ro kar jab pokake Jeova. Enañin 300 iiõ ko m̦oktal̦o̦k, Jeova ear kakien RiIsrael ro bwe ren m̦an aolep armej ro ilo Ãneen Kallim̦ur eo me rej kabuñ ñan anij ko rewaan. Bõtab, RiIsrael ro rar jab pokake. (Duteronomi 7:1-4) Elõñ iaan RiIsrael ro rar jino anõke RiKenan ro ilo aer kabuñ ñan anij ko rewaan im kõm̦m̦ani m̦anit ko rettoon.​—Riit Sam 106:34-39.

⁵ Kõn an kar RiIsrael ro jab pokake, Jeova ear jab kõjparok er jãn rũkõjdat ro aer. (Ri Ekajet 2:1-3, 11-15; Sam 106:40-43) Ilo kar tõre kein, emaroñ kar lukkuun pen ñan an baam̦le ko me rar yokwe Jeova dãpij wõt aer tiljek ñane. Bõtab, Baibõl̦ ej kwal̦o̦k bwe ewõr ro rar tiljek wõt, ãinwõt Jepta im jiroñ eo nejin, kab Elkena, Hanna, im Samuel. Rein rar kate er ñan kõm̦m̦ani wõt men ko rej kabuñbũruon Jeova.​—1 Samuel 1:20-28; 2:26.

6. Ta ko armej ro ilo lal̦ in el̦ap aer l̦õmn̦ak kaki im kõm̦m̦ani, im ta eo jej aikuj kõm̦m̦ane?

⁶ Ilo raan kein ad, l̦õmn̦ak ko im kõm̦m̦an ko an armej ro rej ãinl̦o̦kwõt RiKenan ro. El̦ap aer itoklimo kõn men ko rettoon ãinwõt l̦õñ im men ko rellãj, im el̦ap aer kõjerbal mour ko aer ñan koorl̦o̦k jããn. Bõtab, Jeova ej letok naanin kakkõl ko kõn men kein. Ekõn̦aan kõjparok kõj ãinwõt an kar kõn̦aan kõjparok RiIsrael ro jãn men ko renana. Jej ke katak jãn bõd ko an RiIsrael rein? (1 Korint 10:6-11) Jen kate kõj joñan wõt ad maroñ ñan kõjparok kõj jãn ad l̦oor wãween l̦õmn̦ak ko an armej ro ilo lal̦ in. (Rom 12:2, UBS) Jenaaj ke kate kõj joñan wõt ad maroñ ñan kõm̦m̦ane men in?

JEPTA EAR KWAL̦O̦K WÕT AN TÕMAK MEÑE EAR JAB EM̦M̦AN AN RO JET KÕM̦M̦AN ÑANE

7. (1) Ta eo ro jatin Jepta im rũtõl ro an aelõñ eo rar kõm̦m̦ane ñan Jepta? (2) Ta eo Jepta ear kõm̦m̦ane meñe ear jab jim̦we aer kõm̦m̦an ñane?

⁷ Ilo raan ko an Jepta, RiIsrael ro rar lukkuun eñtaan kõn men ko RiPilistia ro im RiAmon ro rekõn kõm̦m̦ani ñan er. Men in ear wal̦o̦k kõnke RiIsrael ro rar jab pokake Jeova. (Ri Ekajet 10:7, 8) Men in emaroñ kar juon men epen ñan Jepta. Bõtab, ebar lõñ apañ ko jet Jepta ear iiooni ippãn em̦m̦aan ro jatin im rũtõl ro an Israel. Kõnke l̦õm̦aro jatin rar ebbanbane im dike, rar kõm̦m̦an bwe en etal jãn ãneo meñe ilo m̦ool en kar e eo ej jolõte kõnke e rũttotata. (Ri Ekajet 11:1-3) Bõtab, Jepta ear jab kõtl̦o̦k bwe men in enana rar kõm̦m̦ane ñane en jelõte. Etke jejel̦ã men in? Kõnke ke rũtõl ro an aelõñ eo rar akwel̦ap ñan Jepta bwe en jipañ er, Jepta ear etal im jipañ er. (Ri Ekajet 11:4-11, UBS) Ta eo ear kõm̦akũt Jepta bwe en m̦õn̦õn̦õ in jipañ er?

8, 9. (1) Ta ko Jepta ear katak jãn Kien Moses me remaroñ kar jipañe? (2) Ta eo ear aorõkl̦o̦k ippãn Jepta?

⁸ Jepta ear juon rũttarin̦ae ekajoor, im ear bar lukkuun jel̦ã bwebwenatoun RiIsrael ro im kobban Kien Moses. Wãween an kar Jeova kõm̦m̦an ñan armej ro an ear jipañe ñan an jel̦ã l̦õmn̦ak eo an Anij kõn ta ko rejim̦we im ko rebõd. (Ri Ekajet 11:12-27) Jepta ear kõjerbal men kein ear jel̦ã ñan jipañe kõm̦m̦ani pepe ko an. Ear jel̦ã l̦õmn̦ak eo an Jeova ñe juon ej illu im ukot nana kõn nana, im ear bar jel̦ã bwe Anij ekõn̦aan bwe armej ro an ren yokwe doon. Bareinwõt, kien ko ilo Kien Moses rar jipañe ñan jel̦ã wãween an aikuj kõm̦m̦an ñan ro jet, ekoba ro rej dike ak kõjdate.​—Riit Exodus 23:5; Livitikõs 19:17, 18.

⁹ Joñak eo an Josep emaroñ kar bar jipañ Jepta. Jepta emaroñ kar jel̦ã kõn an kar Josep kwal̦o̦k tũriam̦o ñan l̦õm̦aro jein meñe rar dike. (Jenesis 37:4; 45:4, 5) Ilo an Jepta kõl̦mãnl̦o̦kjen̦ kõn joñak eo an Josep, bõlen men in emaroñ kar jipañe bwe en m̦õn̦õn̦õ in jepl̦aak im jipañ armej ro ijo jikin, im men in ear kabuñbũruon Jeova. Men eo ro jatin Jepta rar kõm̦m̦ane ñane ear lukkuun kõmetak Jepta. Meñe ãindein, ak ear aorõkl̦o̦k ippãn Jepta bwe en kokkwõjarjar etan Jeova im kõjparok armej ro an ilo an tarin̦aeik rũkõjdat ro aer. (Ri Ekajet 11:9, UBS) Jepta ear peek ilo bũruon bwe enaaj kwal̦o̦k wõt an tõmak ilo Jeova. Kõn men in, Jeova ear kajeraam̦m̦ane im RiIsrael ro jet.​—Hibru 11:32, 33.

10. Ilo raan kein, ewi wãween ad maroñ kõtl̦o̦k bwe naanin kakapilõk ko an Anij ren jipañ kõj ñan kõm̦m̦ani men ko juon Kũrjin ej aikuj kõm̦m̦ani?

¹⁰ Jenaaj ke l̦oore joñak eo an Jepta? Ñe juon iaan ro jeid im jatid ear kainepataik kõj ak jej l̦õmn̦ak bwe ejjab em̦m̦an an kõm̦m̦an ñan kõj, ta eo jenaaj kõm̦m̦ane? Eokwe, meñe jemaroñ inepata im metak ak jen jab kõtl̦o̦k bwe men in en bõbraik kõj jãn ad karejar ñan Jeova. Jejjab aikuj bõjrak jãn ad etal ñan kweilo̦k ko ak bõjrak jãn ad kõm̦m̦an iien ñan kobal̦o̦k ippãn eklejia eo. Jen anõke joñak eo an Jepta im pokake Jeova. Ad pokake Jeova enaaj jipañ kõj bwe jen anjo̦ iioon apañ ko rel̦l̦ap jej iiooni im wõnm̦aanl̦o̦k wõt ilo ad likũt juon joñak em̦m̦an ñan ro jet ãinwõt kar Jepta.​—Rom 12:20, 21; Epesõs 4:32, UBS.

AD M̦ÕN̦ÕN̦Õ IN KAARMEJJETEIK KÕJ MAKE EJ KAALIKKAR AD TÕMAK

11, 12. Ta eo Jepta ear kallim̦ur kake ñan Jeova, im ta kar mel̦el̦ein kallim̦ur eo an?

¹¹ Jepta ear jel̦ã bwe ear aikuj jipañ jãn Anij ñan kanemkwõj RiIsrael ro jãn RiAmon ro. Ear kallim̦ur ñan Jeova bwe el̦aññe Enaaj jipañe ñan bõk anjo̦, enaaj lel̦o̦k ñane armej eo m̦oktata me ej diwõjtok jãn m̦weo im̦õn ñe enaaj jepl̦aak jãn tarin̦ae. Men in enaaj kar juon “menin katok kijeek.” (Ri Ekajet 11:30, 31) Ta mel̦el̦ein men in?

¹² Jeova elukkuun dike katok kõn armej. Kõn men in, jejel̦ã bwe Jepta ear jab itõn tile armej eo im katok kake. (Duteronomi 18:9, 10, UBS) Ekkar ñan Kien Moses, juon menin katok kijeek ear juon menninmour me juon ej ajel̦o̦k aolepen ñan Jeova. Kõn men in, kallim̦ur eo Jepta ear kõm̦m̦ane ear mel̦el̦ein bwe enaaj ajel̦o̦k armej eo ñan Jeova bwe en jerbal ñane ilo im̦õn kõppãd eo toon wõt an mour. Jeova ear roñjake naan ko an Jepta im ear jipañe bwe en bõk anjo̦. (Ri Ekajet 11:32, 33, UBS) Bõtab, wõn eo Jepta enaaj kar ajel̦o̦k ñan Jeova?

13, 14. Naan ko an Jepta ilo Ri Ekajet 11:35 rej kaalikkar ta kõn tõmak eo an?

¹³ Baj l̦õmn̦ak m̦õk kõn men eo ear wal̦o̦k me jinoin katak in ej kwal̦o̦k kake. Ke Jepta ear jepl̦aak jãn tarin̦ae, armej eo m̦oktata ear wõnm̦aiki ej jiroñ eo ej make wõt nejin! Jepta enaaj ke kajejjet kallim̦ur eo an? Enaaj ke ajel̦o̦k jiroñ eo nejin ñan Jeova bwe en jerbal ñane ilo im̦õn kõppãd eo toon wõt an mour?

¹⁴ Men ko Jepta ear katak jãn Kien Moses remaroñ kar bar jipañe ilo iien in ñan kõm̦m̦ane pepe eo ejim̦we. Bõlen ear keememej naan ko ilo Exodus 23:19 me ej rõjañ armej ro an Anij bwe ren m̦õn̦õn̦õ in lel̦o̦k men ko rem̦m̦antata ippãer ñan Jeova. Ebar wõr juon kien ilo Kien Moses me ej kaalikkar bwe ñe juon ej kõm̦m̦ane juon kallim̦ur ñan Jeova, “en jab rupe kallim̦ur eo an ak en kõm̦m̦ani men ko ear kallim̦ur kaki.” (Bõnbõn 30:2, UBS) Jepta ear aikuj in kajejjete kallim̦ur eo an meñe ear jel̦ã wãween an naaj men in jelõt e im jiroñ eo nejin. Men in Jepta ear kõm̦m̦ane ear ãinl̦o̦kwõt men eo Hanna ear kõm̦m̦ane, eo me bõlen ear bar mour ilo tõre ko an. Kõnke jiroñ eo nejin Jepta enaaj jerbal ilo im̦õn kõppãd eo, mel̦el̦ein men in bwe eban wõr nejin. Kõn men in, enaaj ejjel̦o̦k en̦ enaaj jolõte ãneo ãneen Jepta im kowõnm̦aanl̦o̦k etan baam̦le eo an. (Ri Ekajet 11:34, UBS) Meñe ãindein, ak Jepta ear ba: “Em̦õj aõ kallim̦ur ñan Irooj, im ijjab maroñ ukote!” (Ri Ekajet 11:35, UBS) Jeova ear buñbũruon ippãn Jepta im ear kajeraam̦m̦ane kõn an kar kwal̦o̦k an tõmak im kaarmejjeteik juon men me el̦ap an aorõk ippãn. Kwõnaaj ke kar kõm̦m̦ane ejja men in wõt me Jepta ear kõm̦m̦ane?

15. Ta kallim̦ur eo elõñ iaad jaar kõm̦m̦ane, im ewi wãween ad maroñ kwal̦o̦k ad tõmak?

¹⁵ Ke jaar wũjlepl̦o̦k mour eo ad ñan Jeova, jaar kallim̦ur ñane bwe jenaaj kõm̦anm̦an ankilaan jekdo̦o̦n ta. Jaar jel̦ã bwe ñan ad maroñ kajejjete kallim̦ur in, ewõr iien jenaaj aikuj kaarmejjeteik kõj make. Bõtab, jenaaj ke m̦õn̦õn̦õ in kaarmejjeteik kõj make el̦aññe kar kajjitõk ippãd ñan kõm̦m̦ane juon jerbal ejjab lukkuun em̦m̦an ippãd? El̦aññe jej kaarmejjeteik kõj make im m̦õn̦õn̦õ in pokake Anij eo ad, jej kwal̦o̦k ad tõmak. Bõlen jemaroñ bũrom̦õj kõn men ko jej kaarmejjeteiki, bõtab aolep iien jeraam̦m̦an ko Jeova enaaj litok ñan kõj kõn ad pokake wõt renaaj l̦apl̦o̦k im em̦m̦anl̦o̦k jãn men ko jej kaarmejjeteiki. (Malakai 3:10) Ak ta kõn jiroñ eo nejin Jepta? Ta kar l̦õmn̦ak eo an kõn men eo jemãn ear kallim̦ur kake?

16. Ta kar l̦õmn̦ak eo an jiroñ eo nejin Jepta kõn kallim̦ur eo jemãn ear kõm̦m̦ane? (Lale pija eo ilo jinoin katak in.)

¹⁶ Kallim̦ur eo Jepta ear kõm̦m̦ane ear oktak jãn kallim̦ur eo an Hanna. Hanna ear kallim̦ur bwe enaaj lel̦o̦k Samuel, l̦adik eo nejin, bwe en jerbal ilo im̦õn kõppãd eo ãinwõt juon RũNazerait. (1 Samuel 1:11, UBS) Juon RũNazerait emaroñ m̦are ak wõr an baam̦le. Bõtab, Jepta ear ajel̦o̦k jiroñ eo nejin ãinwõt juon “menin katok kijeek.” Mel̦el̦ein bwe eban maroñ pãlele ak wõr nejin ajri. (Ri Ekajet 11:37-39) L̦õmn̦ak m̦õk kõn men in! Jiroñ eo nejin Jepta emaroñ kar m̦areik likao eo em̦m̦antata ilo ãneo kõnke jemãn ekar juon rũtõl ilo Israel. Bõtab, kiiõ enaaj aikuj jerbal ilo im̦õn kõppãd eo. Kar ta l̦õmn̦ak eo an jiroñ in kõn men in? Eokwe, naan ko an rar kaalikkar bwe ear likũt bwe an jerbal ñan Jeova en men eo eaorõktata ilo mour eo an. Jiroñ in ear ba ñan jemãn: “Kwõn kõm̦m̦ane men eo kwaar ba kwõnaaj kõm̦m̦ane ñan eõ.” (Ri Ekajet 11:36, UBS) Jiroñ in emaroñ kar kõn̦aan m̦are im bwe en wõr nejin, bõtab ear kaarmejjeteiki kõn̦aan kein an bwe en maroñ jerbal ñan Jeova. Ewi wãween ad maroñ kaarmejjeteik kõj make ãinwõt jiroñ in?

17. (1) Ewi wãween ad maroñ kwal̦o̦k ad tõmak ãinwõt Jepta im jiroñ eo nejin? (2) Ewi wãween an bokin Hibru 6:10-12 rõjañ eok ñan kaarmejjeteik eok make?

¹⁷ Elõñ to̦ujin likao im jiroñ ro jeid im jatid me rem̦õn̦õn̦õ in kaarmejjeteik kõn̦aan ko aer ñan m̦are im bwe en wõr nejier. Rem̦õn̦õn̦õ in kaarmejjeteik kõn̦aan kein aer ilo tõrein kõnke rekõn̦aan kal̦apl̦o̦k ijo kun̦aaer ñan Jeova. Bareinwõt, elõñ iaan rũtto ro jeid im jatid rej m̦õn̦õn̦õ in kaarmejjeteik iien ko aer ippãn ro nejier im ajri ro jibwier, im rej kõjerbal iien kein aer ekoba maroñ ko aer ñan kal̦apl̦o̦k ijo kun̦aaer ñan Jeova. Jet iaaer rej bõk kun̦aaer ilo jerbalin ekkal ko, ak pãd ilo Jikuul̦ eo ñan Rukwal̦o̦k Naan ro an Aelõñ Eo im em̦m̦akũt ñan eklejia ko me el̦ap aer aikuj rukwal̦o̦k naan ie. Ro jet rar kõm̦m̦an karõk ñan kal̦apl̦o̦k kun̦aaer ilo jerbalin kwal̦o̦k naan ilo allõñ eo ej wal̦o̦k Kwõjkwõj in Keememej Mej eo an Jijej im allõñ ko m̦okta im ãlikin iien in. Jeova eban mel̦o̦kl̦o̦k aolep men ko rein retiljek rej m̦õn̦õn̦õ in kaarmejjeteiki. (Riit Hibru 6:10-12.) Ak ta kõn kwe? Kwõnaaj ke maroñ kaarmejjeteik eok make bwe kwõn maroñ kal̦apl̦o̦k ijo kun̦aam̦ ñan Jeova?

TA KO JAAR KATAK?

18, 19. Ta ko jaar katak jãn bwebwenato eo ilo Baibõl̦ kõn Jepta im jiroñ eo nejin, im ewi wãween ad maroñ anõke er?

¹⁸ Ta eo ear jipañ Jepta ke ear iioon elõñ wãween ko reppen? Eokwe, ear kõtl̦o̦k bwe l̦õmn̦ak ko an Jeova ren jipañe ilo pepe ko ear kõm̦m̦ani ilo mour eo an. Ear jab l̦oor l̦õmn̦ak im kõm̦m̦an ko an armej ro me ear mour ibwiljier. Jepta ear kwal̦o̦k wõt an tõmak meñe ear jab em̦m̦an an ro jet kõm̦m̦an ñane. Jeova ear kajeraam̦m̦an Jepta im jiroñ eo nejin kõn aerro kar m̦õn̦õn̦õ in kaarmejjeteik kõn̦aan ko aer make, im Ear kõjerbal erro ñan kowõnm̦aanl̦o̦k kabuñ eo em̦ool. Bareinwõt, meñe ro jet rar bõjrak jãn aer pokake kien ko an Anij, ak Jepta im jiroñ eo nejin rar dãpij wõt aer tiljek ñan Jeova.

¹⁹ Baibõl̦ ej rõjañ kõj bwe jen “rikajjioñe ro rej bõk aer jolõt menin kallim̦ur ko, kõn tõmak im kijenmej.” (Hibru 6:12) Jen anõke Jepta im jiroñ eo nejin ilo ad kwal̦o̦k ad tõmak. Jejel̦ã bwe ñe jenaaj kõm̦m̦ane men in, Jeova enaaj buñbũruon ippãd.