Pijen ko kõn Ro Rej Pãd Ilañ

JEOVA EJ ANIJ EO EUTIEJTATA

“Juon tũroon em̦õj likũt e ilo lañ, im ioon tũroon eo Juon ej jijet. Im Eo ej jijet Ej ãinwõt dekã jasper im sardiõs, im iia ej kaapool̦ tũroon eo, ilo nemãmeen emerald.”​—Revelesõn 4:2, 3.

“Ear wõr meram el̦ap ipel̦aakin. Ãinwõt juon jemãluut [iia] ilo juon raanin wõt, ãindein meram eo el̦ap ipel̦aakin. Ãindein wãween aiboojoj an Jeova.”​—Ezekiel 1:27, 28.

Pijen kein rijjilõk Jon im rũkanaan Ezekiel rar loi rej jipañ kõj ñan mel̦el̦e kõn joñan aiboojoj eo an Jeova, Anij eo Eutiejtata. Rej jipañ kõj bwe en pidodo ad mel̦el̦e ilo aer kwal̦o̦k kõn jet men ko me jejel̦ã kaki kadede im jemaroñ pijaikl̦o̦k ilo l̦õmn̦ak ko ad. Jet iaan men kein rej dekã ko raorõk, juon iia, im juon tũroon eaiboojoj. Men kein rej kaalikkar ñan kõj bwe Jeova ej juon Anij ekanooj utiej im kajoor, im el̦ap an aenõm̦m̦an.

Men ko pijen kein rej kwal̦o̦k kaki kõn Anij rej juon wõt ippãn naan ko an juon iaan ro rar je bokin Sam. Ear ba: “Irooj eutiej im jen kanooj nõbare, ej tõllo̦kũn bwe jen kautieje jãn Anij otemjej. Anij ko an riaelõñ ko jet rej ekjab, ak Irooj ear kõm̦anm̦an lañ ko. Aiboojoj kab utiej rej kaapool̦e, kajoor im wõl̦eo rej pãd ilo tampel̦ eo an.”​—Sam 96:4-6, UBS.

Meñe Jeova ej Anij eo Eutiejtata, ak ekõn̦aan bwe jen kepaake ilo jar im em̦õj an kaalikkar bwe enaaj roñjake jar ko ad. (Sam 65:2) El̦ap an Anij yokwe im kea kake kõj. Joñan an m̦ool men in, rijjilõk Jon ear ba bwe “Anij yokwe.”​—1 Jon 4:8.

JIJEJ EJ PÃD IANMOON̦IN ANIJ

“[Juon iaan rũkal̦oor ro etan Stipen] ej obrak kõn Jetõb Kwõjarjar, im ej kalimjeke lañ, im lo aiboojoj an Anij, im Jijej ej jutak ianmoon̦in Anij. Im eba, ‘Lo, ij lo lañ epel̦l̦o̦k, im Nejin armej ej jutak ianmoon̦in Anij.’”​—Jerbal 7:55, 56.

M̦okta jãn an kar Stipen lo pijen in, em̦õj an kar rũtõl ro an kabuñ eo an RiJu ro liaakel̦o̦k Jijej ñan mej. Ak kiiõ Stipen ej kõnnaan ippãn ejja rũtõl rein wõt. Pijen eo ear loe ej kam̦ool bwe Jijej ear jerkakpeje im em̦õj an Anij kõm̦m̦an bwe en utiej. Rijjilõk Paul ear jeje kake men in ilo an kar ba: “[Jeova] Ear kajerkakpeje [Jijej] jãn ro remej, im kajijet E ianmoon̦in ijoko ilañ, Ekanooj utiej jãn maroñ otemjej, kab kien, kab kajoor, kab irooj, im ãt otemjej em̦õj n̦aetan, ejjab ilo lal̦ in wõt, a bareinwõt ilo eo enaaj itok.”—Epesõs 1:20, 21.

Baibõl̦ ejjab baj kwal̦o̦k wõt kõn an Jijej utiej ak ej bar kwal̦o̦k bwe el̦ap an kea kake armej ro ãinwõt an Jeova kea kake er. Ke Jijej ear kwal̦o̦k naan ijin ioon lal̦, ear kõmour ro rar nañinmej im kõjerkak ro rar mej. Bareinwõt Jijej ear kaalikkar joñan an l̦ap an yokwe Anij im armej ro ilo an kar katok kõn mour eo an. (Epesõs 2:4, 5, UBS) Kiiõ Jijej ej pãd ianmoon̦in Anij im m̦õttan jidik enaaj kõjerbal maroñ eo an ñan bõktok jeraam̦m̦an ko rel̦l̦ap ñan aolep armej ro rem̦m̦an.

ENJEL̦ RO REJ JERBAL ÑAN ANIJ

“Iar reilo̦k m̦ae iien em̦õj kajutak tũroon ko, im Eo jãn indeeo [Jeova] Ear jijet. . . . To̦ujin im to̦ujin rar karejar ñan E, im joñoul to̦ujin alen joñoul to̦ujin rar jutak im̦aan.”​—Daniel 7:9, 10.

Ilo pijen in an Daniel, ear jab lo juon wõt enjel̦ ak ear lo elõñ to̦ujin enjel̦ ro ilañ. Ejjel̦o̦k pere bwe pijen in ear loe ear lukkuun kabwilõñlõñ! Enjel̦ ro rej jetõb, im el̦ap aer kajoor im mãlõtlõt. Em̦õj kõllaajrake er ekkar ñan jerbal ko rej kõm̦m̦ani. Jet iaaer rej n̦aetaer serap im bar jet rej n̦aetaer kerub. Elõñl̦o̦k jãn 250 alen an wal̦o̦k naan in enjel̦ ilo Baibõl̦.

Jet rej tõmak bwe jet armej rej mej im erom enjel̦, bõtab ejjab m̦ool men in. Anij ear kõm̦anm̦an enjel̦ ro, im eto aer kar pãd m̦okta jãn an kar jino wõr armej. Enjel̦ ro rar lo an kar Anij kõm̦anm̦an lal̦ in im men in ear kõm̦akũt er ñan kõl̦l̦aaj ainikieer im lel̦o̦k nõbar ñan Anij.​—Job 38:4-7.

Juon iaan men ko enjel̦ ro rej kõm̦m̦ani ilo aer jerbal ñan Anij ej ilo aer jipañ ilo jerbal eo eaorõktata me ej wal̦o̦k ijin ioon lal̦ ilo raan kein. Jerbal in ej ñan kwal̦o̦k kõn ennaan eo em̦m̦an kõn Aelõñ eo an Anij. (Matu 24:14) Pijen eo rijjilõk Jon ear loe ej kaalikkar bwe enjel̦ rein rej jipañ ilo jerbal in eaorõk. Ear ba: “Iar lo bar juon enjel̦ ej kãke imejatoto, im ippãn gospel ej indeeo, bwe en kwal̦o̦ke ñan ro rej jokwe ioon lal̦, im ñan aolep kain armej, bwij, kajin, im aelõñ.” (Revelesõn 14:6) Enjel̦ ro rejjab kõnono ippãn armej ro ilo raan kein ãinwõt aer kar kõm̦m̦ane ilo iien ko m̦okta. Bõtab, ilo raan kein rej jipañ ro rej kwal̦o̦k naan kõn ennaan eo em̦m̦an bwe ren maroñ tõpar armej ro em̦ool bũrueer.

SETAN EJ TÕLPILOIK ELÕÑ MILIEN ARMEJ RO

“Rar tarin̦ae ilo lañ, Maikõl [Jijej Kũraij] im enjel̦ ro an rar tarin̦aeik tũrãikõn eo; im tũrãikõn ear tarin̦ae im enjel̦ ro ippãn, im rar jab anjo̦, im rar jab bar lo jikier ilo lañ. Im rar jol̦o̦k tũrãikõn eo el̦ap, jedpãnit erũtto, n̦aetan tepil̦ im Setan, eo ej m̦on̦e aolepen lal̦, em̦õj jol̦o̦ke ñan lal̦, im em̦õj jol̦o̦k enjel̦ ro an n̦a ippãn.”​—Revelesõn 12:7-9.

Ewõr kar juon iien ear jab aenõm̦m̦an lañ. Ilo iien ko an armej ro ruo m̦oktata, juon iaan enjel̦ ro ear kõn̦aan bwe ro jet ren kabuñ ñane. Kõn men in, ear oktak im jum̦ae Anij, im kar n̦aetan Setan. Ãt in etan ej mel̦el̦ein “Rijum̦ae.” Tokãlik, enjel̦ ro jet rar kobal̦o̦k ippãn Setan im jum̦ae Anij. Joñan an Setan im enjel̦ rein lukkuun nana, rej jum̦aik Jeova im tõlpiloik elõñ armej ñan kõm̦m̦ani men ko rej jum̦ae wãween an Jeova tõl.

Setan im enjel̦ ro ippãn relukkuun lãj im nana. El̦ap aer dike armej im rar kõm̦m̦an bwe en wal̦o̦k elõñ apañ im jorrããn ko ijin ioon lal̦. Ñan waanjoñak, Setan ear m̦an menninmour ko ekoba rũkarejar ro an kar em̦m̦aan eo etiljek etan Job. Ãlikin an kar kõm̦m̦ane men in, ear m̦an aolep ajri ro 10 nejin Job ilo an kar kõm̦m̦an bwe “juon kõto el̦ap” en ko̦kkure m̦weo rar pãd ie. Tokãlik, Setan ear “kaeñtaan Job kõn wõt ko remetak jãn lo̦piden neen ñan mo̦ñin.”—Job 1:7-19; 2:7.

Bõtab, m̦õttan jidik naaj jol̦o̦k Setan. Jãn kar iien eo kar jolal̦tak ñan lal̦ in, ejel̦ã bwe “jidik wõt iien ippãn.” (Revelesõn 12:12) Ealikkar bwe Setan enaaj jako, im men in ej juon ennaan em̦m̦an!

RO JÃN LAL̦ IN

“Kwaar [Jijej] wiaik ñan Anij kõn bõtõktõkũm̦ armej jãn aolep bwij, im kajin, aelõñ, im kain armej, im Kwaar kõm̦m̦an bwe ren kiiñ im bũrij ro; im rej kiiñ ioon lal̦.”​—Revelesõn 5:9, 10.

Ãinwõt an kar Jijej jerkakpeje ilo lal̦ in im wanlõñl̦o̦k ñan lañ, men in enaaj bar wal̦o̦k ñan jet armej. Jijej ear ba ñan rijjilõk ro an retiljek: “Ij ilen kõppojak jikimi. Im . . . Inaaj bar itok im bõk kom̦ ñan Eõ, bwe ijo Ij pãd ie, bareinwõt kom̦win pãd ie.”​—Jon 14:2, 3.

Ewõr unin an naaj jet wanlõñl̦o̦k ñan lañ. Rein renaaj irooj ippãn Jijej ilo Aelõñ ak kien eo an Anij im renaaj tõl armej ro ilo lal̦ in im bõktok jeraam̦m̦an ko ñan er. Eñin Aelõñ eo Jijej ear rõjañ rũkal̦oor ro an ñan jar kake ke ear katakin er kilen jar. Ilo jar in an ear ba: “Jememwõj ilañ, En Kwõjarjar Etam̦. En itok Am̦ aelõñ. Ren kõm̦anm̦an ankilaam̦ ãinwõt ilañ, bareinwõt ioon lal̦.”​—Matu 6:9, 10.

MEN KO RO ILAÑ RENAAJ KÕM̦M̦ANI

“Iar [rijjilõk Jon] roñ ainikien el̦ap jãn tũroon eo, im ej ba, ‘Lo, im̦õn Anij ej ippãn armej ran̦, . . . im Enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan; bwe men ko m̦okta rejako.’”​—Revelesõn 21:3, 4.

Pijen in ej kwal̦o̦k kõn iien eo ñe Jijej im ro rar wanlõñl̦o̦k ñan lañ renaaj irooj ilo Aelõñ eo an Anij. Ilo naaj iien in, Aelõñ eo an Anij enaaj jol̦o̦k Setan jãn an irooj ioon lal̦ in im kõm̦m̦an bwe lal̦ in en juon pedetaij. Aolep men ko rej kõm̦m̦an an armej bũrom̦õj im eñtaan renaaj jako. Joñan, ejjel̦o̦k en̦ enaaj bar mej.

Ak ta kõn elõñ pilien armej ro me remej bõtab reban wanlõñl̦o̦k ñan lañ? Eokwe ilo naaj raan ko im̦aan, rein renaaj bar mour im bõk jeraam̦m̦an eo ñan mour indeeo ilo Pedetaij eo ijin ioon lal̦.​—Matu 5:5.