KATAK KO KÕN TAITÕL̦IN BOK IN | M̦OOL KE BWE EWÕR ENJEL̦? ETKE EAORÕK BWE JEN JEL̦Ã?
Wãween An Enjel̦ Ro Maroñ Jipañ Eok
Enjel̦ ro retiljek rej lukkuun itoklimo kõn men ko rej wal̦o̦k ippãn armej, im el̦ap aer lukkuun kijejeto in kõm̦anm̦an ankilaan Jeova. Ke Anij ear kõm̦anm̦an lal̦, enjel̦ ro rar “jim̦or al, im ro nejin Anij otemjej rar lam̦õj kõn lañlõñ.” (Job 38:4, 7) Aolepen bwebwenato ko kõn enjel̦ ro rej kwal̦o̦k bwe rar kõn̦aan “liñõri” kanaan ko kõn men ko renaaj wal̦o̦k ilo raan ko im̦aan.—1 Piter 1:11, 12.
Baibõl̦ ej ba bwe ñan an jejjet ankilaan Anij, ewõr iien ko enjel̦ ro rar lukkuun jipañ kõjparok rũkarejar ro rem̦ool. (Sam 34:7) Ñan waanjoñak:
Ke Jeova ear ko̦kkure jikin ko renana ilo Sodom im Gomorra, enjel̦ ro rar jipañe Lot, eo ear wãnõk, ekoba baam̦le eo an bwe ren ko.—Jenesis 19:1, 15-26.
Im ilo Babil̦on eo etto, ke rar jol̦o̦k likao in Hibru ro jilu n̦a ilo kijeek eo, Anij ear ‘jilkinl̦o̦k enjel̦ eo an im lo̦mo̦o̦ren ro rũkarejeran.’—Daniel 3:19-28.
Ãlikin an kar em̦m̦aan eo ewãnõk, Daniel, pãd juon boñ ilo ro̦ñin l̦aiõn ko rellãj, ear kõmel̦el̦e bwe unin an kar bõk lo̦mo̦o̦r ej kõnke ‘Anij ear jilkinl̦o̦k enjel̦ eo An, im ear kiili lo̦ñiin l̦aiõn ko.’—Daniel 6:16, 22.
Jãn etto in an wõr bwebwenato ko kõn an enjel̦ ro jipañ armej ro retiljek
ENJEL̦ RO RAR JIPAÑ EKLJEIA EO AN KŨRJIN RO JINOIN
Ewõr iien enjel̦ ro an Anij rar jipañ ilo men ko rar wal̦o̦k ñan eklejia eo an Kũrjin ro jinoin, bwe en jejjet karõk eo an Jeova. Ñan waanjoñak:
Juon enjel̦ ear kõpel̦l̦o̦k kõjãmin jikin kalbuuj eo im ear jiroñ rijjilõk ro rar kalbuuj bwe ren wõnm̦aanl̦o̦k wõt im kwal̦o̦k naan ilo tampel̦ eo.—Jerbal 5:17-21.
Juon enjel̦ ear jiroñ rukwal̦o̦k naan Pilip bwe en ilo̦k ñan ial̦ eo ilo ãne jem̦aden, eo ej jãn Jerusalem l̦o̦k ñan Geza, bwe en kwal̦o̦k naan ñan RiItiopia eo ear jibadekl̦o̦k Jerusalem ñan an kabuñ.—Jerbal 8:26-33.
Ke ear jejjet iien eo Anij ear kõtl̦o̦k bwe ro rejjab RiJu ren maroñ erom Kũrjin, juon enjel̦ ear wal̦o̦k ilo juon pijen ñan kapen in rũttarin̦ae eo an Rom, etan Korniliõs, im ear jiroñe bwe en kũrl̦o̦k rijjilõk Piter ñan m̦weo im̦õn.—Jerbal 10:3-5.
Ke rijjilõk Piter ear kalbuuj, juon enjel̦ ear wal̦o̦kl̦o̦k ñan ippãn im tõle nabõjl̦o̦k jãn im̦õn kalbuuj eo.—Jerbal 12:1-11.
WÃWEEN AN ENJEL̦ RO MAROÑ JIPAÑ EOK
Ejjel̦o̦k kein kam̦ool ko rej kwal̦o̦k bwe ilo raan kein, Anij ej kõjerbal enjel̦ ro an bwe ren jipañ armej ro ilo juon wãween ekabwilõñlõñ ãinwõt aer kar kõm̦m̦ane ilo iien ko etto ãinwõt an Baibõl̦ kwal̦o̦k kaki. Ijoke, Jesus ear kwal̦o̦k kõn ta eo enaaj wal̦o̦k ilo raan kein ad ke ear ba: “Naaj kwal̦o̦k gospel in an aelõñin lañ iaolepen lal̦ kõn men in kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.” (Matu 24:14) Kwaar jel̦ã ke bwe rũkal̦oor ro an Christ rej kõm̦m̦ane jerbal in ium̦win tõl eo an enjel̦ ro?
Enjel̦ ro rej jipañ kwal̦o̦k kõn ennaan eo em̦m̦an ipel̦aakin lal̦ in
Bokin Revelesõn ej kwal̦o̦k bwe enjel̦ ro renaaj lukkuun jipañ armej ro iaolepen lal̦ in, bwe ren katak kõn Jeova Anij im kõn karõk eo an ñan armej. Rijjilõk Jon ear je men in: “Iar lo bar juon enjel̦ ej kãke imejatoto, im ippãn gospel ej indeeo, bwe en kwal̦o̦ke ñan ro rej jokwe ioon lal̦, im ñan aolep kain armej, bwij, kajin, im aelõñ. Im ej ba ilo ainikien el̦ap, ‘Kom̦win mijak Anij im lel̦o̦k aiboojoj ñan E, bwe awa in ekajet eo An emoottok; im kom̦win kabuñ ñan Eo ear kõm̦anm̦an lañ, im ãne, im lo̦meto, im un ko unin dãn.’” (Revelesõn 14:6, 7) Elõñ bwebwenato ko rej kam̦ool bwe enjel̦ ro rej rejetake jerbalin kwal̦o̦k naan eo kõn Aelõñ eo, im ej wal̦o̦k ipel̦aakin lal̦ in. Joñan ñe juon eo ear jerawiwi ej ukel̦o̦k im jepl̦aak ñan Jeova, “enjel̦ ro an Anij rej lañlõñ.”—Luk 15:10, UBS.
Ta eo enaaj wal̦o̦k ñe enaaj jem̦l̦o̦k jerbalin kwal̦o̦k naan? Enjel̦ ro rej “jarin tarin̦ae ko ilañ” renaaj rejetake Jesus Christ, eo ej Irooj an irooj ro, ñan tarin̦ae ilo “tarin̦ae eo ilo raan eo el̦ap an Anij Ekajoor Bõtata” ilo Armagedon. (Revelesõn 16:14-16, UBS; 19:14-16, UBS) Enjel̦ ro rekajoor renaaj jerbal ãinwõt ro rej kajeik armej ro ilo iien ekajet eo an Anij, im Irooj Jesus enaaj “idenon̦e ñan ro rejjab pokake gospel an ad Irooj Jesus.”—2 Tessalonika 1:7, 8.
Kõn men in, kwõn tõmak im lõke bwe enjel̦ ro rej itoklimo kõn kwe. El̦ap aer kea kõn mour ko an ro rekõn̦aan jerbal ñan Anij. Im elõñ kõttan an kar Jeova kõjerbale er bwe ren kõkajoor im kõjparok rũkarejar ro retiljek ijin ioon lal̦.—Hibru 1:14.
Innem, ewõr juon jokãlõt ekanooj aorõk kõj kajjojo jej aikuj make kõm̦m̦ane. Jenaaj ke roñjake im pokake ennaan eo em̦m̦an rej kwal̦o̦k kake ipel̦aakin lal̦ in? Ri Kõnnaan ro an Jeova ilo ijo kwõj jokwe ie, relukkuun m̦õn̦õn̦õ in jipañ eok bwe kwõn maroñ lo jipañ jãn enjel̦ ro rekajoor an Anij.