Kajeeded Ennaan eo Em̦m̦an kõn Jouj eo El̦ap an Anij

1, 2. Ewi wãween an kar rijjilõk Paul kwal̦o̦k kam̦m̦oolol kõn jouj eo el̦ap an Anij ñane?

RIJJILÕK Paul ear ba: “Jouj eo [Anij] ear letok ñan eõ ar jab jettokjãn.” (Riit 1 Korint 15:9, 10, UBS.) Paul ear lukkuun jel̦ã bwe ejjab tõllo̦kũn ñan an bõk jouj eo el̦ap an Anij kõnke ilo kar m̦okta ekõn kõjdate im m̦an Kũrjin ro.

² M̦okta wõt jãn an kar Paul mej, ear jejel̦o̦k ñan Timote im ba: “Ij kam̦m̦oolol Kũraij Jijej ad Irooj, eo Ear kõmaroñ eõ, bwe Ear watõk eõ etiljek im kadel̦o̦ñ eõ ilo jerbal in An.” (1 Timote 1:12-14) Ta jerbal in Paul ej kõnnaan kake? Ke Paul ear jejel̦o̦k ñan em̦m̦aan ro rej lale eklejia eo ilo Epesõs, ear kaalikkar ta eo ekitibuj an kõm̦m̦ane ilo jerbal in. Ear ba: “Mour eo aõ ij watõk ejjab aorõk ippa, ak in kam̦õjl̦o̦k jerbal eo kun̦aõ, im kadedel̦o̦k men eo Irooj ear letok bwe in kõm̦m̦ane, eo ej kõn kwal̦o̦k Naan eo Em̦m̦an kõn jouj an Anij.”​—Jerbal 20:24, UBS.

3. Ta jerbal eo el̦ap an aorõk kar kõmaroñ Paul bwe en kõm̦m̦ane? (Lale pija eo ilo jinoin katak in.)

³ Ta ‘ennaan eo em̦m̦an’ Paul ear kwal̦o̦k kake im ej kaalikkar jouj eo el̦ap an Jeova? Ear jiroñl̦o̦k Kũrjin ro ilo Epesõs im ba: “Em̦õj ami roñ bwe Anij, kõn an jouj, ear letok jerbal in ñan eõ ñan em̦m̦an eo ami.” (Epesõs 3:1, 2, UBS) Kar kõmaroñ Paul bwe en kwal̦o̦k kõn ennaan eo em̦m̦an ñan ro me ejjab er RiJu bwe er bareinwõt ren maroñ bõk jeraam̦m̦an eo ñan kobal̦o̦k ippãn Kũraij im tõl ilo naaj Aelõñ eo an Anij. (Riit Epesõs 3:5-8, UBS.) An Paul kar kijejeto ilo an kõm̦m̦ane jerbal eo an ej juon joñak em̦m̦an ñan Kũrjin ro ilo raan kein. Ear bareinwõt kaalikkar bwe ear jab ‘kajettokjãn’ jouj eo el̦ap an Anij ñane.

JOUJ EO EL̦AP AN ANIJ ÑAN EOK EJ KE KÕM̦AKŨT EOK?

4, 5. Etke jemaroñ ba bwe ennaan eo jej kwal̦o̦k kake “kõn Aelõñ eo” an Anij im ennaan eo ‘kõn jouj eo an Anij’ rejjab oktak jãn doon?

⁴ Ilo raan kein ãliktata, em̦õj lel̦o̦k eddo eo ñan armej ro an Jeova bwe ren kwal̦o̦k ennaan eo em̦m̦an “kõn Aelõñ eo . . . ijoko otemjej ilal̦ in, ãinwõt juon menin kam̦ool ñan armej otemjej.” (Matu 24:14, UBS) Ennaan eo jej kwal̦o̦k kake ej bar juon ‘ennaan em̦m̦an kõn jouj eo an Anij.’ Etke? Kõnke ennaan eo jej kwal̦o̦k kake ej kõn aolep jeraam̦m̦an ko jej reim̦aanl̦o̦k ñan bũki ium̦win Aelõñ eo an Anij. Jenaaj bũki jeraam̦m̦an kein itok wõt jãn jouj eo el̦ap an Jeova ñan kõj ikijjeen Kũraij. (Epesõs 1:3, UBS) Paul ear kwal̦o̦k an kam̦m̦oolol kõn jouj eo el̦ap an Jeova ilo an kijejeto ilo jerbalin kwal̦o̦k naan. Kõj kajjojo jej ke l̦oore joñak in an Paul?​—Riit Rom 1:14-16.

⁵ Ilo kar katak eo m̦oktal̦o̦k, jaar katak bwe meñe kõj rijjerawiwi ak elõñ jeraam̦m̦an ko jej bũki jãn jouj eo el̦ap an Jeova. Kõn men in, eddo eo ad ej ñan kwal̦o̦k ñan ro jet kõn yokwe eo an Jeova ñan kõj armej im wãween aer maroñ bõk tokjãn jãne. Ta jet iaan wãween ko Anij ej kwal̦o̦k an jouj me jej aikuj jipañ ro jet ñan jel̦ã kaki?

KWAL̦O̦K KÕN KATOK IN MOUR EO AN JIJEJ

6, 7. Ewi wãween ad kajeeded ennaan eo em̦m̦an kõn jouj eo el̦ap an Anij ñe jej kõmel̦el̦eik ro jet kõn katok in mour eo an Jijej?

⁶ Ilo raan kein, elõñ armej ro rejjab bũrom̦õj im ajl̦o̦k ñe rej kõm̦m̦ani men ko renana. Eñin unin rejjab kile joñan ad lukkuun aikuji katok in mour eo an Jijej. Bõtab, elõñl̦o̦k wõt armej ro rej kile bwe meñe rej kõm̦m̦an ekkar ñan kõn̦aan ko aer ak men in ejjab kõm̦m̦an aer m̦õn̦õn̦õ. Elõñ iaaer rejjab jel̦ã ta in jerawiwi, wãween an jelõt kõj, im rejjab jel̦ã ta ko rej aikuj kõm̦m̦ani bwe ren maroñ rõl̦o̦k jãn jerawiwi, bõtab rel̦ak iioon Ri Kõnnaan ro an Jeova im kõnnaan ippãer rej kab jel̦ã im mel̦el̦e kõn men kein. Ro em̦ool bũrueer el̦ap aer kam̦m̦oolol ñe rej katak im mel̦el̦e bwe kõn an Jeova l̦ap an yokwe im jouj, ear jilkintok Nejin bwe en katok kõn mour eo an ñan lo̦mo̦o̦ren kõj jãn jerawiwi im mej.​—1 Jon 4:9, 10, UBS.

⁷ Paul ear kwal̦o̦k kõn Jijej ilo an ba: “Bwe kõn bõtõktõkin Kũraij, Anij ear kanemkwõj kõj, mel̦el̦ein, ear jol̦o̦k bõd ko ad. El̦ap wõt jouj in an Anij.” (Epesõs 1:7, UBS) Katok in mour eo an Kũraij ej men eo el̦aptata an kaalikkar yokwe eo an Anij ñan kõj, im men in ej kwal̦o̦k joñan an jouj. El̦ap ad kam̦m̦oolol ke jaar katak im jel̦ã bwe ñe jenaaj kwal̦o̦k ad tõmak ilo katok in mour eo an Jijej, Jeova enaaj jeorl̦o̦k jerawiwi ko ad im enaaj erreo bõklõkõt eo ad! (Hibru 9:14, UBS) Men in ej juon ennaan em̦m̦an ñan kwal̦o̦k ñan ro jet!

JIPAÑ RO JET BWE REN EROM JERAN ANIJ

8. Bwe jen maroñ epaake Anij im erom jeran, etke jaar aikuji katok in mour eo an Jijej?

⁸ Ej ad eddo eo ñan kwal̦o̦k ñan ro jet bwe remaroñ bar ejaake juon jem̦jerã ippãn Jeova. Ilo kar m̦okta Anij ear watõk kõj ãinwõt rũkõjdat ro an kõnke jaar jab kwal̦o̦k ad tõmak ilo katok in mour eo an Jijej. Rijjilõk Jon ear ba: “Eo ej lõke Nejin, mour indeeo an; im eo ejjab lõke Nejin ejãmin lo mour, a illu an Anij ej pãd ioon.” (Jon 3:36) Bõtab, el̦ap ad kam̦m̦oolol bwe katok in mour eo an Jijej ear kõmaroñ kõj bwe jen epaake Anij im erom jeran. Paul ear ba: “M̦okta kom̦ar ettol̦o̦k jãn Anij, im kõn jerbal im l̦õmn̦ak ko ami renana kom̦ar erom rũkõjdate Anij. Ak kiiõ, kõn mej eo an Nejin ilo kanniõk, em̦õj an Anij jerãik kom̦.”​—Kolosse 1:21, 22, UBS.

9, 10. (1) Ta jerbal eo Kũraij ear lel̦o̦k ñan rũkkapit ro jatin? (2) Ewi wãween an ‘jiip ro jet’ jipañ rũkkapit ro jatin Kũraij?

⁹ Kũraij ear lel̦o̦k ñan rũkkapit ro jatin ijin ioon lal̦ juon jerbal ñan jipañ ro jet bwe “ren bareinwõt erom jeran” Anij. Paul ear kwal̦o̦k kõn jerbal in ke ear jejel̦o̦k ñan rũkkapit ro ilo tõre ko an im ba: “Anij ear kõm̦m̦an aolep men kein, im kõn Kũraij ear ukot kõj jãn ad kõjdate bwe jen erom jeran, innem ear letok kun̦aam bwe kõmin kõm̦m̦an bwe ro jet ren bareinwõt erom jeran. Eñin keeañ eo am, bwe Anij ear kõm̦m̦an bwe armej otemjej ren maroñ erom jeran kõn Kũraij. Anij ear jab watõk im kõm̦m̦an ekkar ñan jerawiwi ko aer, ak ear letok ñan kõm naan eo kõn wãween an kõm̦m̦an bwe armej ren erom jeran. Innem kõm e, kõmij kõnono waj ilo etan Kũraij, ãinwõt ñe Anij make ej akwel̦ap ñan kom̦ ilo kõm: ilo etan Kũraij kõm akwel̦ap ñan kom̦, bwe kom̦win kõtl̦o̦k bwe Anij en ukot kom̦ jãn ami kõjdate ñan ami ro jeran!”​—2 Korint 5:18-20, UBS.

¹⁰ Ro rej uwaan ‘jiip ro jet’ rej watõk bwe ej juon jeraam̦m̦an el̦ap ñan jipañ rũkkapit ro ilo jerbal in aer. (Jon 10:16) Ro rej uwaan ‘jiip ro jet’ rej ãinwõt rũkeeañ ro an Kũraij im elukkuun l̦ap ijo kun̦aaer ilo jerbalin kwal̦o̦k naan. Rej katakin armej ro kõn katak ko rem̦ool im jipañ er bwe en wõr juon aer jem̦jerã ippãn Jeova. Men in ej juon iaan wãween ko raorõk jej kõm̦m̦ani ilo ad kwal̦o̦k kõn ennaan eo em̦m̦an kõn jouj eo el̦ap an Anij.

KWAL̦O̦K ENNAAN EO EM̦M̦AN BWE ANIJ EJ ROÑJAKE JAR KO AD

11, 12. Etke ej juon ennaan em̦m̦an ñan an armej ro jel̦ã bwe remaroñ jar ñan Jeova?

¹¹ Elõñ armej rej jar kõnke men in ej kaenõm̦m̦an er, bõtab rejjab lukkuun tõmak bwe Anij ej roñjake jar ko aer. Kõn men in, rej aikuj in jel̦ã bwe Jeova ej “roñjake jar” ko an armej ro. Rijeje sam eo Devid ear ba: “O Kwe kwõj roñjake jar, ñan Kwe kanniõk otemjej enaaj itok. Jerawiwi ko rej bõk anjo̦ jãn ña, ak Kwõnaaj karreo kõm jãn nana ko am.”​—Sam 65:2, 3.

¹² Jijej ear jiroñl̦o̦k rũkal̦oor ro an im ba: “El̦aññe kom̦ naaj kajjitõk jabdewõt ilo Eta, men in Inaaj kõm̦m̦ane.” (Jon 14:14) Mel̦el̦ein bwe jemaroñ jar kõn “jabdewõt” men ekkar ñan ankilaan Jeova. Jon ear ba: “Eñin peran eo ippãd ñan E, bwe el̦aññe jej kajjitõk Ippãn kõn jabdewõt men eo ekkar ñan ankilaan, Ej roñjake kõj.” (1 Jon 5:14) Elukkuun em̦m̦an ñe jej jipañ armej ro ñan mel̦el̦e bwe jar ejjab baj juon men me ej kaenõm̦m̦an er ak ej juon wãween me remaroñ kepaake “tũroon in jouj” eo el̦ap an Jeova! (Hibru 4:16) Ilo ad katakin er bwe en jim̦we wãween aer jar, ren jel̦ã wõn eo ren jar ñane, im ren jel̦ã ta ko ren jar kaki, jemaroñ jipañ er bwe ren epaakel̦o̦k wõt Jeova im bõk kaenõm̦m̦an ilo iien ko rej iioon apañ.​—Sam 4:1; 145:18.

JOUJ EO EL̦AP AN ANIJ ILO JUKJUKUN PÃD EO EKÃÃL

13, 14. (1) Ta jeraam̦m̦an ko enaaj wõr ippãn rũkkapit ro ilo raan ko repãd im̦aan? (2) Ta jerbal eo el̦ap an em̦m̦an rũkkapit ro renaaj kõm̦m̦ane ñan armej ro?

¹³ Enaaj l̦apl̦o̦k wõt an Jeova kwal̦o̦k jouj eo an el̦ap ñan armej ro ilo naaj jukjukun pãd eo ekããl. Ke Paul ear kwal̦o̦k kõn jeraam̦m̦an eo el̦ap an ro 144,000 me Anij ear kããlõt er bwe ren tõl ippãn Kũraij ilo Aelõñ eo an Anij ilañ, ear ba: “Tũriam̦o an Anij ejjab jem̦l̦o̦k, im yokwe eo an ñan kõj ekanooj l̦ap, kõn men in, meñe ear ejjel̦o̦k mour in jetõb ilo kõj kõn ad jab pokake, ak ear kõmour kõj ilo Kũraij. Innem kõn jouj an Anij kom̦ar bõk lo̦mo̦o̦r. Ilo ad juon wõt ippãn Kũraij Jijej ear kõjerkak kõj ippãn bwe jen irooj ippãn ilo aelõñ eo an ilañ. Ear kõm̦m̦ane men in bwe en kwal̦o̦k ñan epepen ko otemjej rej itok kõn joñan an l̦ap an jouj kõn yokwe eo ear kaalikkare ñan kõj ilo Kũraij Jijej.”​—Epesõs 2:4-7, UBS.

¹⁴ Jejjab maroñ pijaikl̦o̦k men ko rekabwilõñlõñ Jeova ear kõpooji ñan rũkkapit ro ñe renaaj tõl ippãn Kũraij ilañ. (Luk 22:28-30, UBS; Pilippai 3:20, 21, UBS; 1 Jon 3:2, UBS) Jeova enaaj kaalikkar “joñan an l̦ap an jouj” el̦aptata ñan rũkkapit rein. Rein renaaj ejaakin “Jerusalem ekããl,” ak lio pãleen Kũraij. (Revelesõn 3:12; 17:14; 21:2, 9, 10) Renaaj jipañ Jijej ilo aer “kõmour ro riaelõñ ko,” mel̦el̦ein bwe renaaj tõl armej ro rej pokake bwe ren anemkwõj jãn jerawiwi im mej im kõm̦m̦an bwe ren weeppãn.​—Riit Revelesõn 22:1, 2, 17.

15, 16. Ewi wãween an naaj Jeova kaalikkar jouj eo an el̦ap ñan ‘jiip ro jet’ ilo raan ko repãd im̦aan?

¹⁵ Ilo Epesõs 2:7 (UBS), ej kwal̦o̦k bwe Anij enaaj kwal̦o̦k jouj eo an el̦ap ilo naaj “epepen ko otemjej rej itok” ak jukjukun pãd eo ekããl. Ilo naaj iien in, aolep ro ijin ioon lal̦ renaaj loe joñan jouj eo el̦ap an Jeova. (Luk 18:29, 30) Juon iaan men ko el̦aptata an naaj kaalikkar jouj eo el̦ap an Jeova ilo jukjukun pãd eo ekããl ej ñe ro remej renaaj bar mour. (Job 14:13-15; Jon 5:28, 29) Rũkarejar ro retiljek an Jeova jãn etto im rar mej m̦okta jãn an kar Kũraij katok kõn mour eo an, ekoba jiip ro jet me rej tiljek ñan mej ilo raan kein ãliktata, renaaj bar jerkak im mour bwe ren wõnm̦aanl̦o̦k wõt ilo aer karejar ñan Jeova.

¹⁶ Elõñ milien armej ro rar jaje kõn Anij renaaj bar jerkakpeje. Enaaj pel̦l̦o̦k iien ñan an rein katak kõn Jeova im kõttãik er ñan tõl eo an. Jon ear ba: “Iar lo ro remej, ro reutiej im ro rettã, ke rej jim̦or jutak im̦aan tũroon eo. Bok ko repel̦l̦o̦k, innem bar juon bok ear bar pel̦l̦o̦k, bok in rimour. Ar ekajete rimej ekkar ñan kõm̦m̦an ko aer, ãinwõt em̦õj jeje ilo bok ko. Innem lo̦meto ear kõtl̦o̦k rimej ro an. Mej, kab jikin mej, rar bareinwõt kõtl̦o̦k rimej ro aer. Im aolepeer rar ekajet ekkar ñan kõm̦m̦an ko aer.” (Revelesõn 20:12, 13, UBS) Rein renaaj jerkakpeje renaaj aikuj katak ñan l̦oore naanin kakapilõk ko an Anij ilo Baibõl̦. Renaaj bareinwõt katak ñan l̦oore naanin tõl ko ilo “bok ko” rekããl me rej kwal̦o̦k kõn ta ko Jeova ekõn̦aan bwe juon en kõm̦m̦ani bwe en maroñ mour wõt ilo Pedetaij. Naanin tõl kein rekããl jãn bok kein rej bar juon iaan wãween ko rej kaalikkar jouj eo el̦ap an Jeova.

WÕNM̦AANL̦O̦K WÕT IM KAJEEDEDL̦O̦K ENNAAN EO EM̦M̦AN

17. Ta eo jej aikuj keememej ñe jej kõm̦m̦ane jerbalin kwal̦o̦k naan?

¹⁷ Jerbal in ad ñan kwal̦o̦k kõn ennaan eo em̦m̦an kõn Aelõñ eo an Anij ej juon menin ekkaiuriur im el̦ap an aorõk ilo raan kein kõnke jem̦l̦o̦kin jukjukun pãd in ej epaaktok! (Mark 13:10) Ejjel̦o̦k pere bwe ilo ad kwal̦o̦k kõn ennaan eo em̦m̦an, jej kwal̦o̦k kõn jouj eo el̦ap an Jeova. Jej aikuj keememej men in ñe jej kwal̦o̦k naan. Ñe jej kwal̦o̦k naan, kõttõpar eo ad ej bwe jen nõbar Jeova. Ewi wãween ad kõm̦m̦ane men in? Jej kõm̦m̦ane men in ilo ad kwal̦o̦k ñan ro jet bwe aolep jeraam̦m̦an ko renaaj wal̦o̦k ilo jukjukun pãd eo ekããl rej itok wõt jãn jouj eo el̦ap an Jeova.

18, 19. Ewi wãween ad kaalikkar ad nõbar Jeova kõn jouj eo an el̦ap?

¹⁸ Ñe jej kwal̦o̦k naan ñan ro jet, jemaroñ kõmel̦el̦eik er bwe ium̦win tõl eo an Kũraij ilo Aelõñ eo an Anij, armej ro renaaj bõk aolepen jeraam̦m̦an ko jãn katok in mour eo an Kũraij im jidik kõn jidik renaaj weeppãn. Baibõl̦ ej ba: “Menin kõm̦anm̦an ko renaaj rõl̦o̦k jãn aer rũkõm̦akoko ñan wabanban, bwe ren anemkwõj ippãn ro nejin Anij ilo aer anemkwõj eaiboojoj.” (Rom 8:21, UBS) Jenaaj maroñ bõk jeraam̦m̦an kein itok wõt jãn jouj eo el̦ap an Jeova.

¹⁹ Ej juon jeraam̦m̦an el̦ap ñan kõj bwe jemaroñ kwal̦o̦k ñan ro jet kõn kallim̦ur in el̦ap an em̦m̦an ilo bokin Revelesõn 21:4, 5. Eoon kein rej ba: “[Anij] enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan; bwe men ko m̦okta rejako.” Im Jeova, eo ej jijet ioon tũroon eo ej ba: ‘Lo, Ij kõm̦m̦an men otemjej bwe ren kããl.’ Jeova ej bar ba: “Kwõn jeje, bwe naan kein retiljek im rem̦ool.” Ñe jej kijejeto ilo ad kwal̦o̦k kõn ennaan in em̦m̦an ñan ro jet, jej kaalikkar ad nõbar Jeova kõn jouj eo an el̦ap!