Kwalok Kautiej kin Jikin Kabuñ an Jehovah
1 Ñe jej bed ilo mweo imõn juõn armij, jej kwalok kautiej kin men ko mweien armij eo, jab kõmmõn jabdewõt ñõn kokkure, im jejjab kokkure manit ko rekwon an family eo. En laplok an mol ñe jej bed ilo mweo imõn Jehovah! Jej aikwij jela ekijkan emõn an armij bed im kõmmõn ilo imõn Anij. (Sam 15:1; 1 Tim. 3:15) Meñe kwelok in Christian eo ad ej bed ilo Kingdom Hall eo, mweo imõn juõn armij, ak ilo bar juõn jikin, enañin kij aolep jej kwalok kautiej ien otemjej kin jikin kabuñ eo ad einwõt e kar mweo imõn Jehovah, eo “aibujuij eo an ej ilõñin lõl im lõñ.”—Sam 148:13.
2 Jet brother ro rejjab kwalok kautiej ilo kwelok ko ilo air kõmmõn keroro ak emmakit einwõt men eo rej kwaloke ejjab aorõk. Jet ritto ro rej bwebwenato bajjõk ilo room eo ilikin jikin kwelok eo, ilo jikin kebojak eo, ak inabõj in Kingdom Hall eo ñe kwelok eo ej wõnmanlok. Ñe juõn ajiri eritto lok ej aikwij lale jatin, jet ien irro rej jino ikkure im jidik wõt an bõk tokjen jen kwelok eo. Jet jodikdik ro elikin kwelok ko rej lo air bed inabõj in Kingdom Hall eo, rej ikkure, ele jen joñan air keroro, im kõmmõn makitkit in karate ko ñõn don. Ilo jet case ko rar kokkure ainemõn an armij ro ri turiir ak kautamweik an wa ko emmakit ilo jikin park wa ko ak ilo ial.
3 Ewi Wãwen Jemaroñ Bõprae Ad Jab Kwalok Kautiej: Ilo kamolol kin utiej im an kwojarjar kabuñ eo ad, ejelok bere je jamin kõnan kamad ro jet ilo ad unojdikdik, mõñã, meme bwil, kamakit paper ko, etal ñõn mõn kebojak eo ñe ejjab men in aikwij, ak ekkã an rumij tok ñõn kwelok ko. Ro jemen im jinen me ewor air kautiej im kamolol rejamin kõtlok bwe ajiri ro nejiir ren katton carpet eo, chair ko, ak kiin Kingdom Hall eo ak mweo ijo book study eo ej walok ie. Im ejelok bere kij aolep jej errã bwe elukkun jakkar an walok mwil ko rekajookok, konono in bwebwe, ak kõmmõn kejak ko retton ilo kwelok ko ad.—Ep. 5:4.
4 Elañe ien otemjej jej kememej kin unin kwelok in Christian ko ad, jenaj kõmmõn bwe kij im ro nejid jen kwalok kautiej kin kabuñ eo an Jehovah ilo jikin eo jaar “kãlet ñõn jutak ie.”—Sam 84:10, New World Translation.