Kwalok Kautiej Kin Kwelok Ko Ad Rekwojarjar
“Rein I naj ãñinlok ir ñõn tol eo Aõ e kwojarjar, im kamõnõnõik ir ilo imõn jar eo Aõ.”—AISEIA 56:7.
1. Ta un ko ekkar ñan Jeje ko ilo Bible ewõr ibbed ñan ad kwalok kautiej kin kwelok ko ad?
JEHOVAH ear kokweloktok armij ro an, Christian ri kabit ro im ro mõttair, ñan air kabuñ ñan e ilo ‘tol eo An e kwojarjar.’ Ej kamõnõnõik ir ilo “imõn jar” eo an, temple eo an ilo jitõb, eo ej “juõn imõn jar ñõn ro dri ailiñ ko otemjej.” (Aiseia 56:7; Mark 11:17) Men kein Jehovah ear kõmmani rej kalikar bwe kabuñ eo an Jehovah ekwojarjar, erreo, im eutiej. Ilo ad kwalok kautiej kin kwelok ko ad ñan katak im kabuñ, jej kamol bwe jej bõk ejja lemnak eo wõt an Jehovah kin men ko rekwojarjar.
2. Ta eo ej kalikar bwe Jehovah ear watõk jikin kabuñ eo an ear kãlete bwe ekwojarjar, im ewi wãwen an kar Jesus kwalok bwe e bareinwõt ear kõmman eindein?
2 Ilo Israel eo etto, jikin eo Jehovah ear kãlete ñan air kabuñ ñan e rar aikwij watõke bwe ej juõn jikin ekwojarjar. Imõn kabbed eo im men ko kõbwebweien im jãbi ko rar aikwij kabiti im kokwojarjari “bwe ren kwojarjar otem kwojarjar.” (Exodus 30:26-29) Room ko ruo iloan imõn kabbed eo kar naetair “Jikin kwojarjar” im “Jikin kwojarjar otem kwojarjar.” (Dri Hibru 9:2, 3) Tokelik, temple eo ilo Jerusalem ear bõk jikin imõn kabbed eo. Kinke Jerusalem kar jikin kabuñ eo elap an Jehovah, rar naetan “jikin kwelok eo e kwojarjar.” (Nihimaia 11:1; Matu 27:53) Ke ear kõmman jerbal in kwalok nan eo an ion lal, Jesus make ear kwalok kautiej kin temple eo. Ear illu ibben armij ro kinke rar jab kwalok air kautiej temple eo. Rar kajerbale ñan kõmman business ko air iloan im einwõt juõn ial ekadu ke rar bõkto-bõktak mweiuk ko ñan bar juõn jikin ilo Jerusalem.—Mark 11:15, 16.
3. Ta eo ej kwalok kin ekwojarjarin kwelok ko an Ri Israel ro?
3 Ri Israel ro rar keini air kwelok ibben don ñan kabuñ ñan Jehovah im roñjake air konono kin Kien eo. Jet ian ran ko ilo kwojkwoj ko air rar naetan kwelok ko rekwojarjar ak kwelok ko relap, me rej kalikar kin ekwojarjarin kwelok kein. (Livitikõs 23:2, 3, 36, 37) Ilo juõn kwelok elap ilo ran ko an Ezra im Nehemiah, Ri Levi ro “rar kajelaik armij rõn kin kien” eo. Kinke “armij otemjej re jõñ ke rar roñjake nan ko an kien,” Ri Levi ro “rar kõkãjeklokjen armij otemjej, im re ba, Komin ikõñ, bwe ranin e kwojarjar.” Inem Ri Israel ro rar kememe Kwojkwoj in Imõn Kabbed eo iumin jiljilimjuõn ran ilo “lõñliñ e kanuij lap.” Bareinwõt, “ran im ran, jen ran eo mokta ñõn ran eo eliktata, e ar konono ilo buk in kien Anij. Im rar lale kwojkwoj eo iomin jiljilimjuõn ran: im ilo ran eo ken ka drualitõk, juõn kwelok e kwojarjar, ekar ñõn kien eo.” (Nihimaia 8:7-11, 17, 18) Ien kein emol air kar ien ko rekwojarjar im ro rar bed rar aikwij lukkun roñjake im kwalok air kautiej kin ien kein.
Kwelok ko Ad Rekwojarjar
4, 5. Ta wãwen ko ilo kwelok ko ad rej kamol bwe rekwojarjar?
4 Emol, rainin ejelok juõn lukkun jikin kwelok ekwojarjar an Jehovah ak juõn temple rej kajerbale ñan kabuñ ñan e. Mekarta, jen jab meloklok bwe kwelok ko kin kabuñ ñan Jehovah rej kwelok ko rekwojarjar. Jilu alen ilo juõn week, jej kwelok ibben don ñan konono im katak kin Jeje ko ilo Bible eo. Rej ‘kalikar’ kin Nan eo an Jehovah, im einwõt ilo ran ko an Nehemiah, “kemeleleik e.” (Nihimaia 8:8) Aolep kwelok ko ad rej ijjino im kajemlok kin jar, im ilo enañin aolep kwelok kein, jej al kin al in nebar ko ñan Jehovah. (Sam Ko 26:12) Kwelok ko an congregation eo emol an juõn mõttan elap ilo kabuñ eo ad im jej aikwij bojak ñan lukkun roñjake im liñõri katak ko.
5 Jehovah ej kajerammõn armij ro an ñe rej kwelok ibben don ñan air kabuñ ñan e, katak Nan eo an, im ñe rej kamao ilo lañliñ ibben Ri Christian ro mõttair. Ñe ej ien kwelok, jemaroñ liki bwe ej ‘ijo Jeova e ar kaiñi bwe jerammõn eo an’ en bed ie. (Sam Ko 133:1, 3) Jemaroñ bõk jerammõn in elañe jej bed im lukkun roñjake program eo kin katak ko lor jitõb. Bareinwõt, Jesus ear ba: “Bwe ijo ruo ak jilu rej kweloklok ilo eta, Ij ber iolapir.” Ekkar ñan eon ko ibelakin eon in, nan kein rej jerbal ñan Christian elder ro me rej kwelok ibben don ñan kamadmõdi abañ ko relap ikõtan armij ro kajjojo, ak emaroñ bareinwõt jerbal ñan kwelok ko ad. (Matu 18:20) Elañe Christ, ikijen jitõb kwojarjar, ej bed ñe Ri Christian ro rej kwelok ibben don ilo etan, jejjab aikwij watõk ke bwe kwelok kein rekwojarjar?
6. Ta eo jemaroñ ba kin jikin kwelok ko ad, ko relap im redik jimor?
6 Emol bwe Jehovah ejjab jokwe iloan temple ko pã ko rej kaleki. Bõtab, Kingdom Hall ko ad rej jikin ko kin kabuñ eo emol. (Jerbal 7:48; 17:24) Jej kwelok ie ñan katak kin Nan eo an Jehovah, jar ñan e, im al kin al in nebar ko an. Men in ej eindein bareinwõt kin Assembly Hall (jikin ko relap jej kwelok ie) ko ad. Jikin ko relaplok jej kajerbali ñan convention ko ad—einwõt auditorium (jikin roñjake program ko) ko, exhibition (jikin ko rej kwalok kin men ko armij rej kõmmani einwõt amimõno ko) hall ko, ak jikin ikkure ko relap—rej erom jikin kabuñ ko ñe jej kajerbali ñan kwelok ko ad rekwojarjar. Ien kein ñan kabuñ, relap im redik, rej tellokin ad kwalok kautiej, im men in en alikar ilo lemnak ko ad im mwilid.
Wãwen ko ñan Kwalok Kautiej kin Kwelok ko Ad
7. Ta juõn ian wãwen ko jemaroñ kwalok kautiej kin kwelok ko ad?
7 Ewõr wãwen ko ralikar jemaroñ kwalok kautiej kin kwelok ko ad. Juõn wãwen ej ikijen ad bed ilo ien eo jej al kin al ko an Ailiñ eo. Elõñ al rej ilo wãwen jar ko im kin men in jej al kaki ilo juõn wãwen ej kwalok kautiej. Ilo an elij nan ko jen Sam Ko 22, ri jilek Paul ear je kin Jesus: “I naj kwalok etõm ñõn ro jãtiõ, ilo bwiljin eklisia I naj al im nebar Yuk.” (Dri Hibru 2:12) Kin men in, jej aikwij kamineneik kij ñan ad bed ilo jea ko ad mokta jen an chairman eo kwalok kin al eo jenaj al kake inem lukkun kalmenlokjen kin melelen nan ko ñe jej al. Ñe jej al jen kwalok ejja eñjake ko wõt an ri jeje sam eo ear je: “Komin nebar Jeova. I naj kamolol Jeova kin aolepen buruõ, ilo jar an dri bebe re wãnik, im ilo jar eo elap.” (Sam Ko 111:1) Aet, al kin al in nebar ko ñan Jehovah ej juõn un emõn ñan ad mõkajtok ñan kwelok ko ad im bed ñan jemlokin.
8. Ta wanjoñok eo ilo Bible ej kwalok bwe jar ko ilo kwelok ko ad rej tellokin ad lukkun roñjaki ilo kautiej?
8 Bar juõn wãwen ej kalaplok aorõkin kwelok ko ad ilo jitõb ej ikijen jar ko jen buru rej kwaloki kin aolep ro rej bed. Juõn ien, Ri Christian ro ilo Jerusalem ilo ebeben eo kein kajuõn rar kwelok ibben don im ekkar ñan eon eo ilo kajin Greek, rar burukuk ilo air jar ñan Anij. Tokjen men in, rar wõnmanlok wõt—meñe rar jelmae matõrtõr—ñan ‘kwalok kin nan ko an Anij ilo beran.’ (Jerbal 4:24-31) Jabdewõt ro rar bed ilo ien eo renaj kar kõtlok ke bwe lemnak ko air en mad kin men ko jet ilo ien jar? Jaab, ekkar ñan eon eo ilo kajin Greek rar ‘jimor koutiej ainikeir [ak burukuk]’ ilo air jar ñan Anij. Jar ko ilo kwelok ko rej kwalok kin eñjake ko an aolep ro rej bed. Jar kein rej tellokin ad lukkun roñjaki ilo kautiej.
9. Ewi wãwen jemaroñ kwalok ad kautiej kin kwelok ko ad rekwojarjar ikijen nuknuk ko ad im wãwen mwilid?
9 Bareinwõt, jemaroñ kwalok ad kautiej kin kwelok ko ad rekwojarjar ikijen nuknuk ko jej kõnaki. Baotokid ikijen nuknuk ko ad im style in kol in bõrad rej bareinwõt kalaplok kautiej kin kwelok ko ad. Ri jilek Paul ear kakabilek: “Inem I kõnan bwe man ren jar ijo ko otemjej im kwotõk peir kwojarjar im ejelok illu ak berre. Bareinwõt, bwe kõra ren kõnõk nuknuk ko re karbõp, im ren kõkõmõnmwin im jejairunoij, im jab kanuij karilip birõkrik in bõrair, im jab kanuij kalitlit ir kin gold im bõr ko im nuknuk ko re kanuij aibujuij; A (eo ekar ñõn kõra ro rej kwalok air tõmak) kin air jerbal remõn.” (1 Timote 2:8-10) Ñe jej bed ilo kwelok ko relap rej kõmmani ilo jikin ikkure ko ejelok bõrwojiir, jemaroñ kõnak nuknuk ko rekkar ñan wãwen mejatoto eo ak rej kwalok wõt kautiej kin ien eo. Bareinwõt, kautiej eo ad kin ien eo enaj kamakit kij bwe jen jab mõñã ak meme bwil ilo ien program eo. Nuknuk ko ad rekkar im wãwen mwilid ilo ien kwelok ko rej kautiej Jehovah Anij, kabuñ eo an, im ri tõmak ro mõttad.
Mwilid Rekkar ñan Armij Ro An Anij
10. Ewi wãwen ri jilek Paul ear kwalok bwe mwil emõn ej juõn men in aikwij elap ilo kwelok ko ad?
10 Ilo 1 Dri Korint, chapter 14, jej lo nan in kakabilek eo emeletlet an ri jilek Paul kin wãwen rej aikwij kõmmane kwelok ko an Christian. Ear kajemlok nan ko an ilo an ba: “A ren kõmõn men otemjej ekar im ilo lajrõk.” (1 Dri Korint 14:40) Kwelok ko ad rej juõn mõttan eaorõk ilo makitkit ko an congregation in Christian, im mwilid ej aikwij ekkar ñan armij ro an Jehovah.
11, 12. (a) Ta eo ren kalikar ñan ajiri ro rej bed ilo kwelok ko ad? (b) Ilo wãwen et eo ekkar ajiri ro remaroñ kwalok tõmak eo air ilo kwelok ko ad?
11 Elaptata, ajiri ro rej aikwij katak kin jelã manit ilo kwelok ko ad. Christian ro jemen im jinen rej aikwij kameleleik ro nejiir bwe Kingdom Hall eo im jikin eo ewõr Congregation Book Study ie rejjab jikin ikkure. Jikin kein rej jikin kabuñ ñan Jehovah im ñan katak kin Nan eo an. King eo emeletlet Solomon ear je: “Kwon lale neõm ñe kwoj ilok ñõn imõn Anij; bwe kebaktok ñõn roñjake emõn.” (Ekklisiastis 5:1) Moses ear katakin Ri Israel ro ñan air kweloktok ibben don ritto ro im “ajiri” ro. Ear ba: “Kwon kokweloktok armij ro . . . bwe en roñjake, im bwe ren katak, im mijõk Jeova am Anij, im lali in kõmõn nan ko otemjej an kien in; im bwe ro nejir, ro rar jaje kake, ren roñjake im jela mijõk Jeova.”—Duteronomi 31:12, 13.
12 Eindein rainin, ajiri ro rej itok ñan kwelok ko ibben jemeir im jineir elaptata ñan air roñjake im katak. Ñe rejelã roñjake im melele kin katak ko relap ilo Bible, ajiri ro remaroñ bareinwõt “kwalok” kin tõmak eo air ikijen air bõk kunair im uak. (Dri Rom 10:10) Juõn ajiri edik emaroñ jino ilo an ba jejjo wõt nan ko ñan uak juõn kajitõk emelele kake. Ilo jinoin, emaroñ aikwij konono uak eo an ekkar ñan book ak magazine eo, ak tokelik, emaroñ kajeoñ in uak ilo nan ko an make. Men in ewõr tokjen im ej juõn men in kaitoktoklimo ñan ajiri eo, im uak rot kein jen buru rej kamõnõnõik buruen ro reritto ilo kwelok eo. Emol, jemen im jinen rej likit juõn joñok ñan ajiri ro ilo air make uak. Ñe emaroñ, emõn ñe ewõr an ajiri ro make Bible, book in al, im juõn copy in book eo ak magazine eo rej katak kake. Rej aikwij katak ñan kwalok kautiej kin book im magazine kein. Aolep men kein renaj kalikar ñan ajiri ro bwe kwelok ko ad rej ien ko rekwojarjar.
13. Ta kejatdikdik eo ad kin ro ej kab juõn alen air itok ñan kwelok ko ad?
13 Emol, jejjab kõnan bwe kwelok ko ad ren einwõt ien jar ko an kabuñ ko an Christendom (kabuñ ko rewan me rej ba rej Christian). Ien jar kein emaroñ ejelok jitõb in okmãnãn ak rej kwalok juõn jitõb in kowãnik ir make ak remaroñ kalap ainikien kajañjañ ko einwõt kumi in ri al ko ilo ran kein. Jekõnan bwe kwelok ko ilo Kingdom Hall ko ad ren kwalok jitõb in okmãnãn im karuwainene ak ren jab le jen joñan einwõt ibben don ko bajjek an kumi in armij ro. Jej kwelok ibben don ñan ad kabuñ ñan Jehovah, inem ien otemjej kwelok ko ad ren kwalok kautiej. Eñin kõnan eo ad bwe ñe juõn armij ej kab itok juõn alen ñan kwelok ko ad im roñjake katak ko im lo an emõn mwilid ekoba mwilin ro nejid, buruen enaj kamakit e ñan an ba: “Anij ej iolapemi.”—1 Dri Korint 14:25.
Ej Mõttan Kabuñ eo Ad Indio
14, 15. (a) Ewi wãwen jemaroñ bõprae ad ‘kejekdon mweo imõn Anij eo ad’? (b) Ewi wãwen emwij an Aiseia 66:23 wõnmanlok wõt im jejjet kitien?
14 Einwõt kar ba moktalok, Jehovah ej kokweloktok armij ro an im kalañliñ ir iloan “imõn jar” eo an, ak temple eo an ilo jitõb. (Aiseia 56:7) Armij eo etiljek Nehemiah ear kakememej Ri Jew ro mõttan bwe rej aikwij kwalok kautiej kin temple eo ilo air jurake ikijen jabawõt ko air. Ear ba: “Kim jamin kejekdron mweo imõn am Anij.” (Nehemiah 10:39) Bareinwõt, jejjab aikwij kajekdon nan in kir eo an Jehovah ñan kabuñ ñan e ilo “imõn jar” eo an.
15 Ñan kwalok kin aikwij eo bwe jen keini ad kwelok ibben don ilo kabuñ, Aiseia ear kanan: “Im ber inem, jen juõn aliñ ekãl ñõn bar juõn, im jen juõn Sabat ñõn bar juõn, kõniek otemjej e naj itok bwe en kabuñ imaõ, Jeova ej ba.” (Aiseia 66:23) Eñin men eo ej walok rainin. Kajjojo week ilo alliñ ko otemjej, Ri Christian ro emwij air wujleplok air mour rej kwelok ibben don ñan air kabuñ ñan Jehovah. Rej kõmman men in, ekoba men ko jet, ilo air bed ilo kwelok ko an Christian im bõk kunair ilo jerbal in kwalok nan. Kwoj ke juõn ian ro rej keini air ‘itok im badikdik iman Jehovah’?
16. Etke ad keini in bed ilo kwelok ko en juõn manit ebin ilo mour ko ad kiõ?
16 Aiseia 66:23 enaj jerbal ilo likieo ñan mour ilo lal eo ekãl Jehovah ear kallimur kake. Ilo ien en, “kõniek otemjej,” renaj “itok bwe en kabuñ” iman Jehovah ñan indio. Kinke kwelok ibben don ñan kabuñ ñan Jehovah ej juõn mõttan enaj to an bed ilo mour ko ad ilo jitõb ilo jukjuk im bed eo ekãl, jejjab aikwij ke kõmman bwe ad keini in bed ilo kwelok ko rekwojarjar en juõn manit ebin ilo mour ko ad kiõ?
17. Etke jej aikwiji kwelok ko ad elaplok “bwe jej lo an ran eo ebaktok”?
17 Kinke ebaktok jemlokin, jej aikwij beek ilo buruõd bwe jen keini ad bed ilo kwelok in kabuñ ko ad. Kin ad kile bwe kwelok ko ad rekwojarjar, jejjab kõtlok bwe jikin jerbal eo, kõmman katak ko jen school, ak school ilo jota en bõpraik kij jen ad keini in kwelok ibben ri tõmak ro mõttad. Jej aikwiji kakajur eo ej itok jen ad kamao ibben don. Kwelok ko ad ilo congregation eo ej letok ñan kij ien ko remõn ñan jelã kajjen don, ñan kõketak don, im ñan kamakit don ñan “yokwe im jerbal ko remõn.” Jej aikwij kalaplok ad kõmmane men in “bwe jej lo an ran eo ebaktok.” (Dri Hibru 10:24, 25) Kin men in, ien otemjej jen kwalok kautiej kin kwelok ko ad rekwojarjar ikijen ad keini in bed ilo kwelok ko, kõnak nuknuk ko rekkar, im en emõn mwilid. Ilo ad kõmmane men in, jej kwalok bwe ewõr ibbed lemnak eo an Jehovah kin men ko rekwojarjar.
Ilo Elij
• Ta eo ej kwalok bwe jej aikwij kokwojarjar kwelok ko an armij ro an Jehovah?
• Ta wãwen ko ilo kwelok ko ad rej kwalok bwe rekwojarjar?
• Ewi wãwen ajiri ro remaroñ kwalok bwe rej kautiej kwojarjar in kwelok ko ad?
• Etke jej aikwij kõmman bwe ad keini in bed ilo kwelok ko en juõn manit ebin ilo mour ko ad?
[Pija ko ilo peij 10]
Kwelok ko ñan kabuñ ñan Jehovah rej kwelok ko rekwojarjar jekdon ia eo rej bed ie
[Pija eo ilo peij 13]
Ajiri ro nejid rej bed ilo kwelok ko ñan air roñjake im katak