‘En Kwõjarjar Etan Anij’
1. Etan kweilo̦k eo el̦ap me enaaj wal̦o̦k ilo 2012? Im ej pedped ioon ta?
1 Kõj Ri Kõnnaan ro an Jeova jej lukkuun jeraam̦m̦an. Etke? Kõnke elõñ rejel̦ã kajjied ãinwõt Ri Kõnnaan ro an Jeova, eo Ekajoor Bõtata! Jeova make ear letok ñan kõj ãt in. Jãn kar iiõ eo 1931 jaar bõk ãt in, Ri Kõnnaan ro an Jeova. (Ais. 43:10) Jijej, eo ej make wõt nejin Anij ear lukkuun kaorõke etan Anij. Ear kalikkar men in ke ear katakin ri kal̦oor ro an kilen jar. Ta men eo m̦oktata ear jar kake? Kõn etan Anij. (Matu 6:9) Kweilo̦k eo el̦ap etan “En Kwõjarjar Etan Anij” me enaaj wal̦o̦k ilo 2012 ej pedped ioon naan kein an Jijej.
2. Ta ko jenaaj katak kaki ilo naaj kweilo̦k eo el̦ap?
2 Ta eo Jenaaj Katak Kake?: Ijoko me renaaj kweilo̦k el̦ap ium̦win 2 raan, renaaj roñjake katak eo “Pioneer ro Rej Kwal̦o̦k Kõn Etan Anij” ilo raan in Jãdede. Katak in enaaj kwal̦o̦k kõn un ko unin jerbal in pioneer ej juon jeraam̦m̦an el̦ap. Jenaaj roñjake juon katak me elõñ m̦õttanin. Etan katak in ej “Kõjparok Bwe Kwõn Jab Kattoon Etan Jeova.” Katak in enaaj katakin kõj kõn emãn kein kapo ko me jej aikuj kõjparok kõj jãni. Katak eo juon, etan “En Kwõjarjar Etan Anij. Etke?” enaaj uwaaki kajjitõk kein: Ta eo enaaj jipañ kõj bwe jen kijejeto in kwal̦o̦k naan meñe armej ro rejjab kõn̦aan roñjake? Im ta eo enaaj jipañ kõj ñan kakõm̦anm̦anl̦o̦k kilen ad kwal̦o̦k naan? Im ilo raan in Jabõt, enaaj wõr juon katak me ewõr emãn m̦õttanin. Katak in enaaj katakin kõj kõn ewi wãween jemaroñ kokwõjarjar etan Anij ilo ad kõnono, l̦õmn̦ak, kõm̦m̦an jokããlõt ko im ikijjeen m̦wil ko m̦wilid. Etan katak eo el̦ap ej “Jeova Naaj Kokwõjarjar Etan ilo Armagedon.” Katak in enaaj lukkuun kaitoklimoen ro rekããl.
3. Etke jej lukkuun jeraam̦m̦an? Katak ko ilo naaj kweilo̦k in el̦ap renaaj jipañ kõj bwe jen kõm̦m̦an ta?
3 M̦õttan wõt jidik Jeova naaj kokwõjarjar ãt eo etan. (Ezk. 36:23) M̦ae iien eo enaaj kõm̦m̦ane men in, jelukkuun jeraam̦m̦an bwe jej jutak ikijjeen etan Anij. Im ewõr ad maroñ ñan kõm̦m̦ani men ko im rej bõktok aiboojoj ñan ãt eo etan ikijjeen kõm̦m̦an ko ad im wãween ad kõnono. Jej tõmak bwe aolep katak ko ilo naaj kweilo̦k in el̦ap renaaj jipañ kõj kajjojo ñan ineek eddo eo ad ãinwõt ke jej ro im rej jutak ikijjeen ãt eo etan Anij.