Man Im Kõra Eo Moktata

EWI men eo im e oktak ilo pija in? Aet, ej armij ro ie. Irro ej man im kõra eo moktata. Wõn eo e ar kõmõnmõn irro? Kar Anij. Kwo jela ke etan? Ej Jeova. Im kar naetan man im kõra eo Adam im Iv.

Eñin wãwen Jeova Anij e ar kõmõnmõn Adam. E ar bõk jet bõñõlñõl jen brij im eik juõn enbwin e wãppen jen e, juõn enbwinin man. Inem e ar ukwi botin leo, im Adam e ar jino mour.

Jeova Anij e ar lelok juõn jerbal ñõn Adam. E ar jiroñ Adam bwe en naetan aolepen men in mour ko. Bwelen e ar to an Adam lale men in mour ko bwe en kãlet ãt ko remõntata ñõn aolepeir. Ke Adam e ar naetan men in mour ko e ar jino kile juõn men. Kwo jela ke kar ta eo?

Aolep men in mour ko e ar wor mõttair. Kar wor elbõn kooman im elbõn kookõra, im kar wor laiõn kooman im laiõn kookõra. Ak ejañin wor juõn eo rajitan Adam. Inem Jeova e ar kõmõn bwe Adam en lukkun ettoñ, im e ar bõk juõn drii jen katin. Jeova e ar kajerbal drii in im kõmõn juõn kõra ñõn Adam, im e ar erõm lio belen.

Adam e ar lukkun mõnõnõ kiõ! Im baj lemnõk kin jõnan an kar mõnõnõ Iv bwe ren likit e ilo juõn jikin kallip e aibujuij bwe en jokwe ie! Kiõ irro maroñ neje im mour iben dron ilo mõnõnõ.

Jeova e ar kõnan bwe Adam im Iv ren mour in drio. E ar kõnan bwe ren kõmõn bwe aolepen lõl en aibujuij in wõt kar jikin kallip in Iden. Enañin kar lap an mõnõnõ Adam im Iv ke r’ar lemnõk in kõmõn men in! Kwon kar kõnan ke jibañ kõmõn lõl in bwe en juõn jikin kallip e aibujuij? Ak mõnõnõ eo an Adam im Iv e ar jab to an ber. Jen lale unin an kar eindrein.