Men In Kaiñtan Ko 10

KALIMJEK mõk pija kein. Kaju iair ej kwalok juõn men in kaiñtan me Jeova e ar bõktok ion Ijipt. Ilo pija eo mokta kwo maroñ lo an Aron dreñlokwe River Naial kin jokwon eo an. Ke e ar kõmõn men in, dren in river eo e ar oktak im erõm bõtõktõk. E mij iik ko ie, im e ar jino nana bwin river eo.

Kiõ, Jeova e ar kõmõn bwe frog ko ren wonliñlok jen loan River Naial. R’ar ber ijoko otemjej—ilo um ko, kenno in kõmãt ko, ilo bed ko kinien armij ro—ijoko otemjej. Ke frog ko r’ar mij, ro dri Ijipt r’ar aini ilo ejoij ko, im e buol eneo kaki.

Inem Aron e ar dreñlokwe birij kin jokwon eo an, im bõñõlñõl ko r’ar erõm kij. Kij kein r’ar einwõt kij jirik ko rej ekãki im kuk. Kij kein r’ar men in kaiñtan eo ken ka jilu ion enen Ijipt.

Men in kaiñtan ko jet r’ar jelet ro dri Ijipt wõt, im jab dri Israel ro. Eo ken ka emen kar juõn men in kaiñtan kin loñ ko re kilep im nana im r’ar kelok ñõn loan mokko imõn aolep ro dri Ijipt. Men in kaiñtan eo ken ka lailim e ar buñõt men in mour ko. Elõñ ian kau im sip im goat ko an ro dri Ijipt r’ar mij.

Tokelik, Moses im Aron r’ar bõk jirik birij in ubaj im juliñlok ilo mejatoto. E ar kõmõn bwe en eoñ wõt ko re nana ion armij im men in mour ko. Eñin kar men in kaiñtan eo ken ka jiljino.

Elikin men in Moses e ar erlokwe pein ñõn lõñ, im Jeova e ar jilkintok jorur im wut ebin. E jañin kar wor juõn ien an wutlok dren ebin ñõn joñan in ion Ijipt.

Men in kaiñtan eo ken ka drualitõk kar lokõs ko relõñ im r’ar kalibubu eneo. Mokta jen ien in e jañin kar wor einwõt. R’ar kõñi men otemjej me wut ko rebin r’ar jab kokkuri.

Men in kaiñtan eo ken ka druatimjuõn kar marok. Iomin jilu ran, marok jiliñliñ e ar kalibubu eneo, a ro nejin Israel otemjej e ar meram ilo moko imwiir.

Eliktata, Anij e ar jiroñ ro dron bwe ren kabitiktik jur in kejam ko air kin bõtõktõkin juõn kon in goat ak sip. Inem enjel eo an Anij e ar ilok ilujen Ijipt. Ke enjel eo e ar lo bõtõktõk eo, e ar jab mõn jabrewõt armij iloan mweo. Ak i mokko otemjelok me e ar ejelok bõtõktõk ion jur in kejam ko, enjel eo an Anij e ar mõn manji ro otemjej in armij im men in mour. Eñin kar men in kaiñtan eo ken ka jonõul.

Elikin men in kaiñtan in eliktata, Per’o e ar jiroñ ro dri Israel bwe ren ilok. Aolepen armij ro an Anij r’ar bojak in ilok, im ilo boñin eo wõt r’ar jino driojlok jen Ijipt.