Juõn Men In Mõña Ekãl

KWO jela ke ta in armij ro rej kintak e jen lõl? Ej einwõt molawi. E mouj, im e meni im biruru. Ak ejjab molawi; ej juõn men in mõña.

E motlok tarrin juõn wõt aliñ jen ke ro dri Israel r’ar ilok jen Ijipt. Rej ber ilo ene jemaren eo. Ejjab lõñ men in edrek ko ijin, inem armij ro rej aol im ba: “Emõnlok ñe Jeova e ar mõn kij ilo Ijipt. Kinke j’ar jab kwuli nae ie.”

Inem Jeova ej ba: ‘I naj kowutlok bred jen lõñ ñõn kom.’ Im eñin men eo Jeova e ar kõmõne. Jiboñ in ran eo juõn, ke ro dri Israel rar lo bwe e ar wutlok men in e mouj, r’ar kajitõk iben dron: ‘Ta in?’

Moses e ar ba: ‘Eñin kijõmi Jeova e ar lewõj bwe komin mõña.’ Armij ro rej naetan MANNA. Ein nemen wõt kek ko re meni im tõñal.

‘Komin ae jen e, jabrewõt armij, ekar ñõn an mõña,’ Moses e ar jiroñ armij ro. Inem eñin men eo r’ar kõmõne aolep jiboñ. Inem, ñe elap dret, manna eo ej berwõt ej unlok.

Moses e ar bareinwõt ba: ‘Ejelok armij en likit mõttõn mae jiboñ in ran eo juõn.’ Ak jet ian armij ro rejjab roñjake. Kwo jela ke ta eo e ar walok? Jiboñ in ran eo juõn, manna eo r’ar kejbaroke e ar obrak kin likakrõk ko, im e buol!

Bõtap eor juõn ran ilo wiik eo me Jeova e ar jiroñ armij ro bwe ren aini ruo alen manna eo. Eñin ran eo ken ka jiljino. Im Jeova e ar jiroñ ir bwe ren kejbarok mõttõn manna in ñõn ran eo juõn, kinke e jamin kowutlok e ilo ran eo ken ka jiljilimjuõn. Ke rar kejbarok manna in ñõn ran eo ken ka jiljilimjuõn, e ar jab obrak kin likakrõk ko im e ar jab buol! Men in e ar bar juõn men in kabwilõñlõñ!

Aolepen yiõ ko yiõ in an dri Israel ro ber ilo jemaren eo, Jeova e ar najirik ir kin manna.