Jeova Ej Lelok Kien Ko An

TARRIN ruo aliñ elikin air ilok jen Ijipt, ro dri Israel r’ar itok ñõn Tol Sai’nai, eo rej bar naetan Ho’reb. Eñin ejja jikin eo wõt me Jeova e ar konono ñõn Moses jen wijki eo e urur. Armij ro rej kakije im ber ijin iomin jirik ien.

Ke armij ro r’ar kõttar ilõl, Moses e ar wonliñlok ion tol eo. Ijo, ion tol eo, Jeova e ar jiroñ Moses bwe E kõnan bwe ro dri Israel ren bokake E im bwe ren erõm armij ro An. Ke Moses e ar wonlõllok jen ion tol eo, e ar jiroñ ro dri Israel menko me Jeova e ar ba. Im armij ro r’ar ba bwe re naj bokake Jeova, kinke re kõnan bwe ren erõm ro dron.

Kiõ Jeova e ar kõmõn juõn men in kabwilõñlõñ. E ar kõmõn bwe en batat jabõn tol eo, im kõmõn jorur ko relap. E ar bareinwõt konono ñõn armij ro: ‘Ña Jeova ami Anij, eo e ar ãñintok kom jen Ijipt.’ Inem e ar ba: ‘Komin jab kabuñ ñõn jabrewõt bar anij ijallokiõ.’

Anij e ar lelok bar druatimjuõn nan in jiroñ ko, ak kien ko. Armij ro r’ar lukkun lelñoñ. R’ar ba ñõn Moses: ‘Kwon konono ñõn kim, kinke kim mijõk bwe elañe Anij ej konono ñõn kim, kim maroñ mij.’

Tokelik, Jeova e ar ba ñõn Moses: ‘Kwon wonliñtak ñõn ibã ion tol eo. I naj lewõj ñõn yuk ruo tebel dreka ko me I ar jeje kien ko me I kõnan bwe armij ro ren kejbaroki.’ Inem Moses e ar bar wonliñlok ion tol eo. Iomin 40 ran im 40 boñ e ar ber ijo.

E kanuij in lõñ kien ko an Anij ñõn armij ro an. Moses e ar je kien kein. Anij e ar bareinwõt lelok tebel dreka ko ruo ñõn Moses. Ion dreka kein, emwij an Anij mõke je kien ko 10 me e ar konono ñõn aolep armij ro. Emwij naetair kien ko joñoul.

Kien ko joñoul rej kien ko elap tokjeir. Ak e bar lap tokjen kien ko jet me Anij e ar lilok ñõn ro dri Israel. Juõn ian kien kein ej ba: ‘Kwon yokwe Jeova kin aolepen buruõm, aolepen am lemnõk, aolepen am, im aolepen am kajur.’ Im bar juõn ej ba: ‘Kwon yokwe dri turõm im einwõt kwe.’ Nejin Anij, Jisõs Kraist, e ar ba bwe ir kein ej kien ko relap tata me Jeova e ar lilok ñõn armij ro dron, Israel. Tokelik, je naj katak elõñ men ko kin nejin Anij im men in katakin ko an.