Moses Ej Dreñlokwe Dreka Eo

E MOTLOK elõñ yiõ—10 yiõ, 20 yiõ, 30 yiõ, 39 yiõ! Im dri Israel ro rej berwõt ilo ene jemaren eo. Ak iomin aolepen yiõ kein Jeova ej kejbarok ro dron. Ej najirik ir manna. Ej tel ir iomin ran kin juõn jurõn kõro, im ilo boñ kin juõn jurõn kijeek. Im iomin aolepen yiõ kein, nuknuk ko air r’ar jab mor im e ar jab metak neir.

Kiõ ej aliñ eo ken ka juõn in yiõ eo ken ka 40 jen ke r’ar ilok jen Ijipt. Dri Israel ro rej bar kakije ilo Ke’desh. Eñin jikin eo r’ar ber ie ke lõmaro 12 r’ar ilem wate enen Ke’nean tarrin 40 yiõ ko remotlok. Lio jein Moses, Mir’i-am, e mij ilo Ke’desh. Im einwõt mokta, e walok jorran ijin.

Armij ro rejjab lo limiir dren. Kin men in rej aol ñõn Moses im ba: ‘Emõnlok ñe kim ar mij. Etke kw’ar ãñintok kim jen Ijipt ñõn jikin in e nana me e jaje edrek jabrewõt men ie? Ejelok wit, fig, grep, ak pomgranet ko. Im bareinwõt ejelok dren in irak.’

Ke Moses im Aron r’ar ilok ñõn imõn kaber eo bwe ren jar, Jeova ej jiroñ Moses: ‘Kwon kokweloktok armij ro. Inem iman mejeir aolep, kwon konono ñõn dreka en ijuweo, bwe en ibep dren im kabwe aolep armij im men in mour ko air.’

Inem Moses e ar kokweloktok armij ro, im ej ba: ‘Komin roñjake, komeo komij jab liki Anij! Ta, kimro Aron aikwij in bõkwõj ñõn kom dren jen dreka in ke?’ Inem Moses e ar dreñlokwe dreka eo ruo alen kin jokwõn eo an, im elap an dren ibep jen e. E bwe dren eo ñõn an aolep armij ro im men in mour ko irak.

Ak e illu Jeova iben Moses im Aron. Kwo jela ke ta unin? Ej kinke Moses im Aron r’ar ba bwe re naj bõktok dren jen dreka eo. Ak ilo mol, Jeova e ar kõmõne. Im kinke Moses im Aron r’ar jab mol ilo airro konono kin men in, Jeova ej ba bwe e naj kajeik irro. ‘Komro jamin ãñinlok armij ro aõ ñõn loan Ke’nean,’ ej ba.

Ejjab to tokelik dri Israel ro rej ilok jen Ke’desh. Elikin jirik ien rej itok ñõn Tol Hor. Ijin, i jabõn tol eo, e mij Aron. Eor 123 yiõ ridtan ilo ien eo e mij. Dri Israel ro re kanuij buromõj, im kin men in aolepen armij ro r’ar jõñõt Aron iomin 30 ran. I-li-e’zar, leo nejin e ar erõm pris eo e utiej an ailiñ in Israel.