Dri Aroñroñ Ro 12

LALE mõk leen wijki ko lõmarein rej ineki. Lale joñan an lap urur in grep ko. Aikwij bwe ruo eman ren ineke ion juõn alal. Im kwoj lo ke leen fig im pomgranet ko? Leen wijki kein re aibujuij r’ar itok jen ia? Jen eneo enen Ke’nean. Kememij, bwe Ke’nean kar jikin eo me Ebream, Aisak im Jekob r’ar jokwe ie mokta. Ak kin ñitta eo e ar walok ijin, Jekob im famili eo an, r’ar emõkit ñõn Ijipt. Kiõ, tarrin 216 yiõ ko tokelik, Moses e ar tel ro dri Israel lok ñõn Ke’nean. Rar itok ñõn juõn jikin ilo ene jemaren eo naetan Ke’desh.

Armij ro re nana rej jokwe ilo enen Ke’nean. Inem Moses e ar jilkinlok 12 dri aroñroñ, im ej jiroñ ir: ‘Komin lale jete armij ro rej jokwe ijen, im ewi joñan air kajur. Komin lale elañe emõn ke eneo ak jab ñõn kadrek men in edrek ko ie. Im komin kememij in bõktok jet leen eneo.’

Ke dri aroñroñ ro r’ar jeblak ñõn Ke’desh, rej jiroñ Moses: ‘E kanuij emõn eneo. Im ñõn kamol men in, rej kwalok jet ian leen wijki ko ñõn Moses. Ak 10 ian ro r’ar wate eneo rej ba: ‘Armij ro rej jokwe i eneo re kanuij inea im kajur. Je naj mij elañe jej kajeoñ in bõk eneo.’

Ke ro dri Israel r’ar roñ men in re lelñoñ. ‘Emõnlok ñe kim ar mij ilo Ijipt ak ijin ilo ene jemaren,’ rej ba. ‘Re naj mõn kij ilo tõrinae, im re naj bõk kõra ro beler im limaro nejir. Jen kãlet bar juõn dri tel ñõn bõk jikin Moses, im jeblak ñõn Ijipt!’

Ak ruo ian ro r’ar wate eneo rej liki Jeova, im r’ar kajeoñ in kainemõn armij ro. Etair ej Joshua im Ke’leb. Re ba: ‘Komin jab mijõk. Jeova ej iber. E jamin bin ar ilem bõk eneo.’ Ak armij ro r’ar jab roñjake. Re kõnan mõn Joshua im Ke’leb.

Men in ej lukkun kaillu Jeova, im e ar jiroñ Moses: ‘Ejelok juõn ian armij ro jen 20 yiõ ridtan im wonliñlok e naj dreloñ ilo enen Ke’nean. Emwij air lo men in kabwilõñlõñ ko I ar kõmõni ilo Ijipt im ilo ene jemaren eo, ak re jañin liki iõ. Kin men in re naj jebwabwe ilo ene jemaren 40 yiõ, mae ien e mij armij eo eliktata ian ebeben ne. Joshua im Ke’leb wõt re naj dreloñ ilo enen Ke’nean.’