Joshua Ej Erõm Dri Tel Eo

MOSES e kõnan dreloñ loan Ke’nean iben dri Israel ro. Kin men in ej kajitõk: ‘Jeova, kwon kotlok bwe in kijone River Jordan im lo ene eo emõn.’ Ak Jeova ej ba: ‘Ebwe ne! Kwon jab bar kajitõk men in!’ Kwo jela ke unin an kar Jeova ba men in?

Ej kin men eo im e ar walok ke Moses e ar dreñlokwe dreka eo. Kememij, bwe irro Aron ar jab nebar Jeova. R’ar jab jiroñ armij ro bwe Jeova eo e ar bõktok dren eo jen dreka eo. Kin un in Jeova e ar ba bwe e jamin kotlok ir bwe ren dreloñ loan Ke’nean.

Inem jet aliñ elikin an mij Aron, Jeova e ar jiroñ Moses: ‘Kwon bõk Joshua, im kajutake iman I-li-e’zar pris eo im armij ro. Im iman mejeir aolep, kwon jiroñ ir bwe Joshua ej dri tel eo ekãl.’ Moses ej bokake Jeova, einwõt am maroñ loe ilo pija in.

Inem Jeova e ar jiroñ Joshua: ‘Kwon beran, im jab mijõk. Kwo naj tel dri Israel ro ñõn loan enen Ke’nean me I ar kalimur ñõn ir, im I naj ber ibõm.’

Tokelik, Jeova e ar jiroñ Moses bwe en wonliñlok ñõn jabõn Tol Ni’bo ilo enen Mo’ab. Jen ijin, Moses e maroñ reilok ion River Jordan im aluije enen Ke’nean. Jeova ej ba: ‘Eñin eneo me I ar kalimur bwe I naj lelok ñõn ro nejin Ebream, Aisak im Jekob. I ar kotlok bwe kwon loe, ak kwo jamin ilok ñõn loan.’

Ijin ion Tol Ni’bo, e mij Moses. E ar 120 yiõ ridtan. E ar kajur wõt, im e ar jab mõjinolok mejen. Armij ro r’ar lukkun buromõj im jõñ kin an mij Moses. Ak rej mõnõnõ bwe Joshua e naj tel ir kiõ.