Jeova Ej Kããlõt Joshua

Moses ear tõl aelõñin Israel ium̦win elõñ iiõ im kiiõ ear epaake iien eo enaaj mej. Jeova ear ba ñane: ‘Ejjab kwe eo kwõnaaj ãñinl̦o̦k RiIsrael ro ñan Ãneen Kallim̦ur eo. Ak inaaj kõtl̦o̦k bwe kwõn reilo̦k wõt im loe ãneo inaaj lel̦o̦k ñan er.’ Innem Moses ear kajjitõk ippãn Jeova bwe en bar kããlõt juon em̦m̦aan ñan an tõl im lale armej ro. Jeova ear uwaake im ba: ‘Etal ñan ippãn Joshua im ba ñane bwe e eo ij kããlõte.’

Moses ear kõnnaan ippãn armej ro im ba bwe m̦õttan jidik enaaj mej im bwe em̦õj an Jeova kããlõt Joshua bwe en ãñinl̦o̦k er ñan Ãneen Kallim̦ur eo. Innem Moses ear ba ñan Joshua: ‘Kwõn jab mijak. Jeova enaaj jipañ eok.’ Ãlikin wõt an Moses kõnnaan ippãer, ear wanlõñl̦o̦k ñan ioon Tol̦ Nibo im Jeova ear kwal̦o̦kl̦o̦k ãneo Ear kallim̦ur kake ñan Ebream, Aisak, im Jekob. Innem Moses ear mej ke ear 120 an iiõ.

Jeova ear ba ñan Joshua: ‘Kom̦win kijoone Reba Jordan im etal ñan Kenan. Inaaj jipañ eok ãinwõt aõ kar jipañ Moses. Kwõn keememej in riiti kien ko aõ aolep raan. Kwõn jab mijak. Kwõn peran. Etal im kõm̦m̦ani men ko em̦õj aõ jiroñ eok bwe kwõn kõm̦m̦ani.’

Joshua ear jilkinl̦o̦k ruo riaroñroñ ñan jikin eo etan Jeriko. Ilo katak n̦e tok juon, enaaj kwal̦o̦k ta ko rar wal̦o̦k ilo ijin. Ke riaroñroñ rein ruo rar jepl̦aak, rar kõjjel̦ãik Joshua im ba bwe elukkuun jejjet iien in ñan aer del̦o̦ñe Kenan. Ilo raan eo tok juon, Joshua ear jiroñ armej ro bwe ren pojak in em̦m̦akũt. Innem ear karõk bũrij ro me rar kotake tõptõp in bujen eo bwe ren pãd im̦aantata ilo aer etal ñan Reba Jordan. Ilo iien in, reba eo ear lukkuun ibwij. Ak ke bũrij ro rej lel̦o̦k neer ñan dãn eo, ear m̦õkaj im bõjrak an reba eo to̦o̦r im ear jino pããtl̦o̦k! Innem bũrij ro rar etal ñan iol̦apl̦ap in reba eo im jutak ie, im rar kõttar an aolep RiIsrael ro kijoone. Men in me ear wal̦o̦k emaroñ kar kakeememej er kõn men eo Jeova ear kõm̦m̦ane ilo kar Lom̦al̦o Ekilmir.

Ãlikin elõñ iiõ in aer itoitak ilo ãne jem̦aden, RiIsrael ro rej kab jino jokwe ilo Ãneen Kallim̦ur eo. Kiiõ remaroñ kalõk m̦õko im̦weer im kajutak m̦õn wia ko, jikin peejnej ko, im men ko ãierl̦o̦kwõt. Remaroñ bar kõm̦m̦an jikin aer kallib kũreep im wõjke ko remaroñ kalle, im menin eddek ko jet. Ãne in rar jokwe ie ear lukkuun em̦m̦an im wãmourur.