Ellã Jen River Jordan

LALE mõk! Dri Israel ro rej ellã jen River Jordan! Ak ewi dren eo? Kinke ej ien an kõnan lap an wut, river eo e ar lukkun ibeblok tõreren kin drenin jet wõt minut ko mokta lok. Ak kiõ e joko dren eo! Im dri Israel ro rej ellã ion ene emõra einwõt air kar kõmõne ilo Lomalo Ekilmir! Ak dren eo e ar ilok ñõn ia? Jen lale.

Ke e ar itok ien eo bwe dri Israel ro ren ellã jen River Jordan, eñin men eo Jeova e ar ba bwe Joshua en jiroñ armij ro: ‘Pris ro ren bõk dipdip in kalimur eo im ilok iman armij ro. Ñe rej juri dren ko in River Jordan, e naj bwijrak air tor.’

Inem pris ro r’ar kwotak dipdip in kalimur eo, im inek e iman armij ro. Ke r’ar itok ñõn Jordan, pris ro r’ar juri dren ko im neir r’ar jino tutu. Emulõl dren ko im lap ae. Ak ien eo wõt r’ar juri dren ko, e jino joko air tor! Ej juõn men in kabwilõñlõñ! Jeova e ar kabwijrak dren ko. Kin men in, e mõkaj an bããtlok river eo!

Pris ro im rej inek dipdip in kalimur eo rej wonmanlok wõt ñõn iolapen river eo ion brij emõra. Kwoj lo ir ke ilo pija eo? Ke rej jutak ijin, aolepen dri Israel ro r’ar ellã jen River Jordan ion ene emõra!

Ke aolep r’ar ellã, Jeova ej ba bwe Joshua en jiroñ 12 man ro rekajur im ba: ‘Komin ilok ñõn loan river eo ñõn ijo me pris ro rej jutak im inek dipdip in kalimur eo. Komin kãlet 12 dreka ko, im kajutaki ijo komij karran ie. Inem, ilo ien ko rej itok, ñe ro nejõmi rej kajitõk melelen dreka kein, komin jiroñ ir bwe e ar bwijrak an dren ko tor ke dipdip in kalimur eo an Jeova e ar ellã jen Jordan. Dreka ko re naj kakememij kom kin men in kabwilõñlõñ in!’ Joshua e ar bareinwõt kajutak 12 dreka ko ijo me pris ro r’ar jutak ie ilo river eo.

Tokelik, Joshua e ar jiroñ pris ro im rej inek dipdip in kalimur eo im ba: ‘Komin wonliñtak jen loan river ne.’ Im ke r’ar wonliñtak, river eo e ar bar jino tor.