Rut Im Neomai

ILO Baibel eo kwo naj lo juõn buk etan Rut. Ej juõn bwebwenato kin juõn famili me e ar mour ilo ien eo me ekõn wor dri ekajet ro ilo Israel. Rut ej juõn jiroñ jen enen Mo’ab; ejjab mõttõn Israel, ailiñ eo an Anij. Ak ke Rut e ar katak kin Anij eo emol, Jeova, e ar lap an yokwe e. Ne’o-mai ej juõn lilab me e ar jibañ Rut jela kin Jeova.

Ne’o-mai ej juõn kõra in Israel. Irro leo belen im lõmaro ruo nejiir r’ar emõkit ñõn enen Mo’ab ilo juõn ien me e ar ñitta Israel. Inem juõn ran e ar mij leo belen Ne’o-mai. Tokelik lõmaro nejin Ne’o-mai r’ar belek ruo jiroñ in Mo’ab, etair Rut im Or’pa. Ak elikin tarrin 10 yiõ, lõmaro ruo nejin Ne’o-mai r’ar mij. Ne’omai im limaro ruo r’ar lukkun buromõj! Ta eo Ne’o-mai enaj kõmõne kiõ?

Juõn ran, Ne’o-mai ej bebe bwe en jeblak ilo ial eo e aitok ñõn iben armij ro an. Rut im Or’pa re kõnan ber iben, im kin men in rej ilok iben lok. Ak elikin air ilok ilo ial eo iomin jirik ien, Ne’o-mai ej reilok ñõn limaro im ba: ‘Komin jeblak ñõn ijo jikõmi im berwõt iben jinõmi.’

Ne’o-mai ej mejenmaik limaro im yokyokwe ir. Ilo ien in r’ar jõñ, kin an lap air yokwe Ne’o-mai. R’ar ba: ‘Jaab! Kim naj iwõj ibõm ñõn iben armij ro am.’ Ak Ne’o-mai ej uak im ba: ‘Komij aikwij in jeblak, ro nejiõ. E naj emõnlok ñõn kom ilo jo jikõmi.’ Inem Or’pa e ar jeblak ñõn jikin. Ak Rut ejjab jeblak.

Ne’o-mai e ar reilok im ba: ‘E motlok Or’pa. Kwon bareinwõt jeblak iben lok.’ Ak Rut ej uak im ba: ‘Kwon jab akwelap ñõn iõ bwe in illok jen yuk! Kwon kotlok bwe in iwõj ibõm. Ijo kwoj ilok ielok, I naj ilok ielok, im ijo kwoj jokwe I naj jokwe. Armij ro am re naj armij ro aõ, im am Anij e naj aõ Anij. Ijo kwoj mij ie, I naj mij ie, im ijo re naj kalibwin iõ ie.’ Ke Rut e ar ba men in, e joko an Ne’o-mai akwelap bwe en jeblak ñõn ijo jikin.

Elikin jirik ien, limaro r’ar itok ñõn Israel. Ijin r’ar jino bukõt kilen airro mour. E mõkaj an Rut jino jerbal ilo melaj ko, kinke ej ien marmir wit. Juõn eman etan Bo’az ej kotlok bwe en ain wit ilo melaj ko an. Kwo jela ke wõn eo kar jinen Bo’az? Kar Re’ab in jikin kwelok eo etan Jer’i-ko.

Juõn ran, Bo’az e ar jiroñ Rut im ba: ‘Na I ar roñ kin yuk, im kin am joij ñõn Ne’o-mai. I jela kin wãwen am kar ilok jen jinõm im jemõm im ailiñ eo am im wãwen am kar iten jokwe ilo bwiljin armij ro kwo jañin jela kajiir. Jeova en kajerammõn yuk!’

Rut e ar uak im ba: ‘Kwo kanuij joij ñõn iõ, aõ karo. Kw’ar kamõnõnõik iõ kin am konono joij ñõn ña.’ E kanuij lap an Bo’az buñburuen kin Rut, im ejjab to tokelik, irro ar mare. Men in ej lukkun kamõnõnõik Ne’o-mai! Ak Ne’o-mai ej kap mõnõnõ lok wõt ke Rut im Bo’az rej keutak leo nejiir moktata, etan O’bed. Tokelik O’bed ej erõm jimaan Devid, eo im e naj lap ar katak kake tokelik.