Rut im Neomi

Juon iien ke ear wal̦o̦k juon ñũta ilo Israel, juon kõrã in Israel etan Neomi ear em̦m̦akũt ñan Moab ippãn l̦eo pãleen im l̦õm̦aro ruo nejierro. Tokãlik, l̦eo pãleen Neomi ear mej. L̦õm̦aro nejin rar m̦areik jiroñ in Moab ro me etaer in Rut im Orpa. Ekabũrom̦õjm̦õj bwe tokãlik ear bar mej l̦õm̦arein nejin Neomi.

Ke Neomi ear jel̦ã bwe ejem̦l̦o̦k ñũta eo ilo Israel, ear pepe in ro̦o̦l ñan ãnin ãneen. Rut im Orpa rar etal ippãn, ak ke rar pãd ilo ial̦ eo, Neomi ear jiroñ erro im ba: ‘El̦ap amiro kar em̦m̦an ñan l̦õm̦aro nejũ im ñan ña. Ikõn̦aan bwe komiro en bar m̦are im eppãlele. Komiro en ro̦o̦l ñan Moab, aelõñ en̦ amiro.’ Innem erro kar ba: ‘El̦ap am̦ utiej ippemro! Kõm̦ro ejjab kõn̦aan etal jãn kwe.’ Ak Neomi ekar jab bõjrak jãn an ba bwe erro en ro̦o̦l. Kõn men in Orpa ear ro̦o̦l, ak Rut ear pãdwõt ippãn. Neomi ear ba ñane: ‘Orpa em̦õj an jepl̦aak ñan armej ro an im anij ko an. Kwõn jepl̦aak ippãn, im jepl̦aak ñan m̦weo im̦õn jinõm̦.’ Ak Rut ear ba ñane: ‘Iban etal jãn kwe. Armej ro am̦ renaaj armej ro aõ, im Anij eo am̦ enaaj Anij eo aõ.’ Ilo am̦ l̦õmn̦ak, ta kar eñjake eo an Neomi ke ear roñ an Rut ba men kein?

Rut im Neomi rar tõparl̦o̦k Israel ilo iien eo ke ej jino iien ae baarl̦i. Juon raan, Rut ear etal im ae bween baarl̦i jãn jikin kallib eo an Boaz, l̦eo nejin Rehab. Boaz ear roñ bwe Rut ear juon RiMoab im bwe ear jab kõn̦aan etal jãn ippãn Neomi. Ear ba ñan rijerbal ro an bwe ren kalõñl̦o̦k bween baarl̦i ko ilo jikin kallib eo bwe Rut en aini.

Ilo boñõn eo wõt, Neomi ear kajjitõk ippãn Rut im ba: ‘Kwaar jerbal ilo jikin kallib eo an wõn rainin?’ Rut ear ba: ‘Ilo jikin kallib eo an juon em̦m̦aan etan Boaz.’ Innem Neomi ear ba: ‘Boaz ej juon iaan armej ro nukũn l̦eo kar pãleõ. Kwõn jerbal wõt ilo jikin kallib eo an ippãn jiroñ ro jet im kwoban iioon jorrããn.’

Kõn men in, Rut ear jerbal wõt ilo jikin kallib eo an Boaz m̦ae iien ear jem̦l̦o̦k iien ae baarl̦i. Boaz ear lo bwe Rut ear niknik ilo jerbal im bwe ear juon kõrã elukkuun em̦m̦an. Ilo kar iien ko etto, ñe juon em̦m̦aan emej im ejjel̦o̦k nejin l̦addik, juon iaan em̦m̦aan ro nukũn emaroñ m̦areik kõrã eo kar pãleen. Kõn men in, Boaz ear m̦areiki Rut im ear wõr juon nejierro l̦addik etan Obed. Tokãlik, Obed kar jim̦m̦aan Kiiñ Devid. Ro m̦õttan Neomi rar lukkuun m̦õn̦õn̦õ, joñan rar ba: ‘Jeova ear m̦okta lewaj Rut, kõrã eo nejũm̦ me elukkuun em̦m̦an an kõm̦m̦an ñan eok, im kiiõ ewõr juon jibũm̦ l̦addik. Jen lel̦o̦k nõbar ñan Jeova.’