Emen Likao Ro Ilo Babilõn

KIÑ Neb-u-kad-nez’zar e ar bõk aolep dri Israel ro im e ar emõn air katak ilo jikul ñõn Babilõn. Tokelik, kiñ eo e ar kãlet jen bwiljeir likao ro rej mõke wot wuleo im meletlet. Emen ian likao rein kwo lo ir ijin. Juõn iair ej Daniel, im lõmaro jilu mõttõn, dri Babilõn r’ar naetair Sha’drak, Mi’shak im A-bed’ne-go.

Neb-u-kad-nez’zar ej lemnõk in katakin likao rein bwe ren jerbal ilo mweo imõn. Elikin an naj katakin ir iomin jilu yiõ, e naj bar kãlet ro wõt im rej mõke wõt meletlet bwe ren jibañ e lo mejalen abañ ko an. Kiñ eo e kõnan bwe likao rein ren kajur im ejmour ilo ien air katak. Kin men in e ar jiroñ ro dri korijeran bwe ren najirik ir ejja ekõn ko wõt im wain eo me famili eo an ej bõki.

Lale mõk likao eo Daniel. Kwo jela ke ta eo ej ba ñõn Ash’pe-naz, eo ej jeban ro dri korijeran Neb-u-kad-nez’zar? Daniel ej jiroñ e bwe ejjab kõnan mõña men ko remõn jen tebel eo an kiñ eo. Ak Ash’pe-naz ej inebata im ba: ‘Emwij an kiñ eo beek men ko kwo naj mõña im irak. Im elañe kwojjab ejmour in wõt likao ro jet, e maroñ mõn iõ.’

Kin men in, Daniel ej kebak armij eo me Ash’pe-naz ej likite bwe en lale e im lõmaro jilu jeran. ‘Kwon joij im melejoñ kim iomin 10 ran,’ ej ba. ‘Kwon letok men in edrek ko bwe kimin mõña im aibij bwe kimin irak. Inem kwon keiri kim iben likao ro jet, ro im rej mõña ekkõn ko kijen kiñ eo, im kwon lale wõn iam re naj ejmour.’

Dri lale eo ej ba e mõnõnõ in kõmõn men in. Im elikin an uñ ran ko 10, Daniel im lõmaro jilu jeran rej ejmourlok jen aolep likao ro jet. Kin men in, dri lale eo ej kotlok bwe ren mõña men in edrek ko im rejjab aikwij in mõña men ko me kiñ eo ej lilok.

Elikin jilu yiõ rej ain aolep likao ro iman Neb-u-kad-nez’zar. Elikin an konono ñõn aolepeir, kiñ eo e ar lo bwe Daniel im lõmaro jilu jeran rej mõke wõt meletlet. Kin men in, e ar bõk ir bwe ren jibañ e ilo mweo imõn. Im jabrewõt ien kiñ eo ej kajitõk iben Daniel, Sha’drak, Mi’shak, im A-bed’ne-go kajitõk ko ak lelok bwe ren kamarmir abañ ko relap, elaplok air jela 10 alen jen jabrewõt ian pris ro ak dri meletlet ro an.