L̦adik ro Emãn me Rar Pokake Jeova

Ke Nebukadnezar ear bõke ruutiej ro an Juda ñan Babil̦on, ear kããlõt juon iaan rijerbal ro an etan Ashpenaz bwe en lale er. Nebukadnezar ear ba ñane bwe en kããlõt l̦adik ro me el̦apl̦o̦k aer ãjmour im mãlõtlõt iaaer aolep. L̦adik rein renaaj kar ekkatak im bõk kamminene ium̦win 3 iiõ. Men in enaaj kõpooj er ñan iien eo renaaj bõk jerbal ko reutiej ilo Babil̦on. Rar aikuj katak riit, jeje, im kõnono ilo kajin Akkad, kajin eo an RiBabil̦on ro. Rar bar aikuj m̦õñã ejja m̦õñã ko wõt me kiiñ eo im rijerbal ro an rej m̦õñã. Emãn iaan l̦adik rein kar Daniel, Hananaia, Mishael, im Azaraia. Ashpenaz ear kõm̦m̦an etaer ilo kajin Babil̦on. Ear n̦aetaer Belteshazar, Shadrak, Meshak, im Abednego. Katak kein im kamminene kein l̦adik rein renaaj bũki renaaj ke kõm̦m̦an bwe ren bõjrak jãn aer karejar ñan Jeova?

L̦adik rein emãn rar kõn̦aan pokake wõt Jeova. Rar jel̦ã bwe emo̦ aer m̦õñã ejja m̦õñã ko wõt kiiñ eo ej m̦õñã kõnke em̦õj an kar Jeova kaalikkar ilo kien ko an bwe jet iaan m̦õñã kein rettoon. Kõn men in, rar ba ñan Ashpenaz: ‘Jouj im jab kõm̦m̦an bwe kõmin m̦õñã ejja m̦õñã ko wõt kiiñ eo ej m̦õñã.’ Innem Ashpenaz ear ba ñan er: ‘El̦aññe kom̦ij jab m̦õñã im kiiñ eo eloe ami m̦õjn̦o̦ im nañinmej, enaaj m̦an ña!’

Ak ear jiktok juon l̦õmn̦ak ippãn Daniel. Ear ba ñan l̦eo ej lale er: ‘Ium̦win 10 raan, jouj im letok wõt kijemmim jãn leen jikin kallib kan̦ kab limemmim aebõj. Innem kwõn keidi kõm ippãn l̦adik ro rej m̦õñã ejja m̦õñã ko wõt kiiñ eo ej m̦õñã.’ Ear em̦m̦an l̦õmn̦ak in ippãn l̦eo ej lale er.

Ãlikin raan ko 10, Daniel im l̦adik ro jilu m̦õttan rar kajoor im ãjmourl̦o̦k jãn aolep l̦adik ro jet. Jeova ear m̦õn̦õn̦õ ippãereañ kõn aer kar pokake e. Im ear lel̦o̦k mãlõtlõt ñan Daniel bwe en kõmel̦el̦eiki pijen ko im ettõn̦ak ko.

Ke ear dedel̦o̦k an l̦adik ro ekkatak im bõk kamminene, Ashpenaz ear bõkl̦o̦k er ñan ippãn Nebukadnezar. Kiiñ in ear kõnnaan ippãer im ear lo bwe el̦apl̦o̦k an kar Daniel, Hananaia, Mishael, im Azaraia mãlõtlõt im lol̦o̦kjen̦ jãn l̦adik ro jet. Kõn men in, ear kããlõt ereañ emãn bwe ren jerbal ilo m̦weo im̦õn. Ekkã an kar kiiñ eo kajjitõk naanin kakapilõk jãn ippãereañ kõn men ko raorõk. Jeova ear kõm̦m̦an bwe ren mãlõtlõtl̦o̦k jãn aolepen rũmmãlõtlõt ro rej jerbal ñan kiiñ eo kab rianijnij ro an.

Meñe Daniel, Hananaia, Mishael, im Azaraia rar pãd ilo bar juon aelõñ, ak rar jab mel̦o̦kl̦o̦k bwe rej m̦õttan armej ro an Jeova. Kwõnaaj ke bar keememej wõt Jeova, meñe rũtto ro jinõm̦ im jem̦am̦ remaroñ jako jãn iturum̦?