Jen Ien Jebokwe Eo Ilo Babilõn Nõn Ien Kõkãl Worwor Ko Ilo Jerusalem

Ke r’ar jibokwe ilo Babilõn, dri Israel ro r’ar iion elõñ men in melejoñ air tõmak. R’ar jolok Sha’drak, Mi’shak im A-bed’ni-go na ilo juõn um e urur im bwil kin kijeek, ak Anij e ar lomoren ir. Tokelik, elikin an dri Mid im dri Põrsia ro bõk anjo ion Babilõn, r’ar jolok Daniel na ilo juõn roñ in kiru laiõn, ak Anij e ar bareinwõt kejbarok e ilo an kil loñin laiõn ko.

Eliktata Sairõs, kiñ in Põrsia eo e ar kotlok dri Israel ro. R’ar jeblak ñõn kabijukniir 70 yiõ elikin air kar jibokwe ilo Babilõn. Juõn ian men ko r’ar kõmõni moktata ke r’ar jeblak ñõn Jerusalem kar bwe ren jino kalek tempel eo an Jeova. Bõtap, e ar jab to tokelik im ro air dri kijirat r’ar kabwijrak jerbal eo air. Inem tarrin 22 yiõ elikin air jeblak ñõn Jerusalem, r’ar kadrerelok air jerbal ion tempel eo.

Inem, jej katak kin ien eo me Ezra e ar jeblak ñõn Jerusalem bwe en kaibujuij tempel eo. Men in kar tarrin 47 yiõ elikin an kar drerelok tempel eo. Inem, 13 yiõ elikin an Ezra jeblak, Nihimaia e ar jibañ bar kalek worwor ko an Jerusalem ke r’ar jeebeplok. Mõttõn eo ken ka LAILIM ej konono kin men ko r’ar walok iomin 157 yiõ ko.