Liki Jibañ Eo Jen Anij

TARRIN 50,000 armij ro r’ar ilok ilo ial eo e aitok jen Babiloñ ñõn Jerusalem. Ak ke r’ar jere lok ilo Jerusalem, e lukkun jeebeplok jikin kwelok eo. Ejelok en ej jokwe ijo ñõn jirik. Dri Israel ro rej aikwij in bar kalek men otemjej.

Juõn ian menko moktata r’ar kõmõne ej juõn lokatok. Men in ej juõn jikin eo me re maroñ katok kin men in mour ko, ak men in lelok ko, ñõn Jeova. Jet aliñ ko tokelik dri Israel ro re jino kalek tempel eo. Ak ro air dri kijirat im rej jokwe ilo ene ko ebak rejjab kõnan bwe dri Israel ro ren kaleke. Kin men in rej kajeoñ in kamijõk ir bwe ren bwijrak. Ilo jemlokin, dri kijirat rein rej kõmõn bwe kiñ eo ekãl ilo Põrsia en kõmõn juõn kien ñõn kabwijrak jerbal in ekkal eo.

Elõñ yiõ ko remotlok. Kiõ e motlok 17 yiõ jen ke dri Israel ro r’ar jeblak jen Babilõn. Jeova ej jilkinlok Heg’gai im Zek-e-rai’a, dri kanan ro an bwe ren jiroñ armij ro bwe ren bar jino ekkal. Armij ro rej liki jibañ eo jen Anij, im rej bokake dri kanan ro. Re jino bar ekkal, meñe juõn kien ej ba bwe ren jab kõmõne.

Kin men in, juõn dri utiej in Põrsia etan Tat’en-ai ej itok im kajitõk iben dri Israel ro ewi unin air maroñ kalek tempel eo. Dri Israel ro rej jiroñ e bwe ilo ien eo r’ar ber ilo Babilõn, Kiñ Sai’rõs e ar jiroñ ir: ‘Kiõ komin jeblak ñõn Jerusalem im kalek tempel eo an Jeova, Anij eo ami.’

Tat’en-ai ej jilkinlok juõn letter ñõn Babilõn im kajitõk elañe emol bwe Sai’rõs, eo e mij kiõ, e ar lukkun ba nan in. Ejjab to tokelik im e jeblak juõn letter jen kiñ eo ekaal in Põrsia. Ej ba bwe emol an kar Sai’rõs ba nan in. Im kin men in kiñ eo ej je: ‘Kwon kotlok bwe ro dri Israel ren kalek tempel eo an Anij eo air. Im Ij jiroñ yuk bwe kwon jibañ ir.’ Elikin tarrin emen yiõ e drerelok tempel eo, im dri Israel ro re kanuij mõnõnõ.

Elõñ bar yiõ ko remotlok. Kiõ e motlok tarrin 48 yiõ jen ke e ar drerelok tempel eo. Armij ro ilo Jerusalem re jeramel, im jikin kwelok eo kap tempel eo an Anij re jab kanuij aibujiuj. Ak ilo Babilõn, Ez’ra dri Israel eo, e jela ennan bwe rej aikwij in kõkãl tempel eo an Anij. Inem kwo jela ke ta eo ej kõmõne?

Ez’ra e ar ilok iben Ar-ta-xerx’es, kiñ in Põrsia eo, im kiñ in emõn ej lelok elõñ men in lelok ko non Ez’ra bwe en bõlikok ñõn Jerusalem. Ez’ra ej kajitõk iben dri Israel ro ilo Babilõn bwe ren jibañ e inek lok men in lelok kein ñõn Jerusalem. Tarrin 6,000 armij rej ba re mõnõnõ in ilok. E kanuij lap air silver im gold im menko jet re aurõk rej aikwij bõklok ibeirlok.

Ez’ra ej inebata, kinke eor lõmaro re nana ilo ial eo. Lõmarein re maroñ kajeoñ in kwoti silver im gold ko air, im mõn ir. Kin men in, Ez’ra ej ain aolep armij ro iben dron, einwõt lo ilo pija in. Inem rej jar ñõn Jeova bwe en kejbarok ir ilo ial eo air e aitok lok ñõn Jerusalem.

Jeova ej kejbarok ir. Im elikin tarrin emen aliñ in air ilok, rej tõbarlok Jerusalem, im ejelok jorran ñõn ir. Men in ejab kwalok ke bwe Jeova e maroñ kejbarok ro rej liki e bwe en jibañ ir?