Katak 10

Manit Ko Anij Ej Dike

En ewi eñjake eo am kin men ko Anij ej ba bwe renana? (1)

Kain mour in lũñ rot renana? (2)

En ewi lemnak eo an juõn Christian kin riap? (3) ikkure kin jãn? (3) kwot? (3) lej? (4) kajitõbtõb? (5) kadõk? (6)

Ewi wãwen juõn armij emaroñ anemkwoj jen manit ko renana? (7)

1. Ri karejar ro an Anij rej yokwe men ko remõn. Ak rej bareinwõt aikwij katak ñõn dike men ko renana. (Psalm 97:10) Ej melelen air bõprae jet manit ko me Anij ej dike. Ta jet ian manit kein?

2. Lũñ: Belele mokta jen mare, lejen, babu ibben juõn kidu, kõpã, im homosexuality (sodom) rej aolep jerawiwi ko renana nae Anij. (Leviticus 18:6; Rome 1:26, 27; 1 Korint 6:9, 10) Elañe ruo armij rejañin mare ak rej mour ibben don, rej aikwij jibel ak elañe jab rej aikwij mare.​—Hebrew 13:4.

3. Riap, Ikkure kin Jãn, Kwot: Jehovah Anij eban riap. (Titus 1:2) Armij ro rekõnan an buñburuen ibbeir rej aikwij bõprae air riap. (Jabõn Kennan 6:16-19; Kolosse 3:9, 10) Aolep wãwen ikkure kin jãn ewor jitõb in kibbon ie. Inem Christian ro rejjab bõk kwunair ilo jabdewõt wãwen ikkure kin jãn, einwõt lottery, iaikuij kin horse, im bingo. (Epesõs 5:3-5) Im Christian ro rejjab kwot. Rejjab wia ilo air jelã kake men ko ro jet rar kwoti ak bõk men ko elañe rar jab bõk melim.​—Exodus 20:15; Epesõs 4:28.

4. Illu, Lej: Illu eo kwojjab debije emaroñ tellok ñõn kõmmõn ko relej. (Genesis 4:5-8) Juõn armij elej ejjab maroñ jeran Anij. (Psalm 11:5; Jabõn Kennan 22:24, 25) Ebwid ñõn irenwõne ak ñõn ukõt nana kin men ko renana me ro jet rej kõmmõne ñõn kij.​—Jabõn Kennan 24:29; Rome 12:17-21.

5. Ekabel im Kajitõbtõb: Jet armij rej oware kajur an jitõb ro ñõn kajeoñ kemoure nañinmij ko. Ro jet rej kabele ri kijirat ro air ñõn kõmmõn air nañinmij ak meñe man ir. Kajur eo ilikin manit kein ej Satan. Inem Christian ro rej aikwij jab bõk kwunair ilo jabdewõt ian men kein. (Deuteronomy 18:9-13) Bed ebake Jehovah ej kejbarok eo emõntata nae ekabel ko an ro jet.​—Jabõn Kennan 18:10.

6. Kadõk: Ejjab nana ñõn idak jidik wine, beer ak den in alcohol ko jet. (Psalm 104:15; 1 Timothy 5:23) Ak lã jen joñan idak im kadõk rej men ko renana iman mejen Anij. (1 Korint 5:11-13; 1 Timothy 3:8) Lã jen joñan idak emaroñ kokkure ejmour eo am im kajorrãn mour in family eo am. Emaroñ bareinwõt kõmmõn an mõkaj am bo ilo men in kabo ko jet.​—Jabõn Kennan 23:20, 21, 29-35.

7. Ro rej kõmmõn men ko Anij ej ba bwe renana rejamin “bõk air jolet ailiñ in Anij.” (Galetia 5:19-21) Elañe kwoj lukkun yokwe Anij im kõnan kabuñburuen, kwomaroñ kanemkwoj yuk jen manit kein. (1 John 5:3) Katak dike men eo Anij ej ba enana. (Rome 12:9) Kamao ibben armij ro emõn manit ko air (Jabõn Kennan 13:20) Christian ro mõttam reritto remaroñ juõn unjen jibañ. (James 5:14) Ilõñin men otemjej, atartar ion jibañ jen Anij ikijen jar.​—Pilippai 4:6, 7, 13.

[Pija ko ilo peij 20, 21]

Anij ej dike kadõk, kwot, ikkure kin jãn, im kowadoñ