Ewi Wãween Kõmij Jipañ Ri Tõmak ro M̦õttam ilo Iien Jorrããn ko Rel̦l̦ap?

Ñe ej wal̦o̦k jorrããn ko rel̦l̦ap, Ri Kõnnaan ro an Jeova rej m̦õkaj im jipañe ri tõmak ro m̦õttaer me jorrããn kein rel̦l̦ap rar jelõt er. Aer jipañ ej lukkuun kaalikkar bwe em̦ool aer yokwe doon. (Jon 13:34, 35; 1 Jon 3:17, 18) Ta ko kõmij kõm̦m̦ani ñan jipañ armej rein?

Kõmij jipañ ikijjeen jããn. Ke ear wal̦o̦k juon ñũta el̦ap ilo Judia, Kũrjin ro etto ilo Antiok rar jilkinl̦o̦k jããn ñan jipañ ri tõmak ro m̦õttaer. (Jerbal 11:27-30) Ãindeinl̦o̦k wõt, jet iien kõmij roñ bwe jet iaan ri tõmak ro m̦õttam ilo jet jikin ko ilo lal̦ in rej pãd ilo jorrããn. Ñe kõmij roñ kõn men in, eklejia eo kõmij pãd ie ej jilkinl̦o̦k jabawõt ko am ñan jipañ wiaik aikuj ko an ri tõmak rein m̦õttam.​—2 Korint 8:13-15.

Kõmij jipañ ilo wãween ko jet. Em̦m̦aan ro me rej lale eklejia ko ilo jikin eo me ewõr jorrããn ie rej ilo̦k im kappukot aolep Ri Kõnnaan ro an Jeova ijo im lale ej et aer pãd. Ilo jikin kein me ewõr jorrããn, kar jitõñ jet em̦m̦aan ro bwe ren loloorjake aikuj ko an ri tõmak rein. Rej loloorjake men ko ãinwõt m̦õñã, dãn in idaak ko rerreo, nuknuk, jikin jokwe, im kein taktõ ko. Elõñ Ri Kõnnaan ro an Jeova me ewõr aer kapeel ilo wãween kein rej make kõl̦l̦ã on̦aer im ilo̦k ñan jikin kein. Rej kõm̦m̦ane men in kõnke rekõn̦aan jipañ ri tõmak rein m̦õttaer im bar ñan kalõki m̦oko im Im̦õn Kweilo̦k ko rar jorrããn. Kõnke el̦ap bõrokuk ilo doulul in am im kõmij imminene in jerbal ippãn doon, men kein rej kõm̦m̦an bwe en m̦õkaj am jipañ ri tõmak ro m̦õttam ilo iien aikuj. Meñe kõmij jipañ ri tõmak ro m̦õttam, bõtab kõmij bar jipañ ro jet el̦aññe kõm maroñ, jekdo̦o̦n ta kabuñ eo aer.​—Galetia 6:10.

Kõmij kõjerbale Baibõl̦ eo ñan kaenõm̦m̦an im jipañ er bwe ren kijenmej wõt. Ñe armej ro rej iioone jorrããn ko rel̦l̦ap, el̦ap aer aikuji naan in kaenõm̦m̦an ko. Ilo iien rot kein, Jeova ej kaenõm̦m̦an im kakajoor kõm. Jeova ej “Anij in aenõm̦m̦an otemjej.” (2 Korint 1:3, 4) Kõmij m̦õn̦õn̦õ in bwebwenato ippãn armej rein kõn kallim̦ur ko jãn Baibõl̦. Kõmij kwal̦o̦k ñan er bwe m̦õttan jidik Aelõñ eo an Anij enaaj kajem̦l̦o̦k aolep jorrããn ko me rej kõm̦m̦an menin an armej ro bũrom̦õj im eñtaan.​—Revelesõn 21:4.

• Etke em̦õkaj an Ri Kõnnaan ro an Jeova jipañ ñe ej wal̦o̦k jorrããn ko rel̦l̦ap?

• Ñe ej wal̦o̦k jorrããn ko rel̦l̦ap, ewi wãween jemaroñ kaenõm̦m̦an armej ro jãn Baibõl̦?