Ear Em̦m̦an Armej ro M̦õttan Josaia

Epen ke ñan kõm̦m̦ani men ko rejim̦we?​— Elõñ rej ba bwe epen. Baibõl̦ ej kwal̦o̦k kõn juon l̦addik me ear pen an kõm̦m̦ani men ko rejim̦we. Etan l̦addik in ej Josaia. Kõn an kar em̦m̦an armej ro m̦õttan Josaia, rar maroñ in jipañ e. Eokwe, jenaaj katak kõn wõn ro kar m̦õttan Josaia.

Etan jemãn Josaia in Amon, im ear juon kiiñ ilo juon aelõñ etan, Juda. Amon ear jab kõm̦m̦ani men ko rejim̦we. Ear lukkuun nana im ear kabuñ ñan ekjab. Ke Amon ear mej, Josaia ear erom kiiñ ilo Juda. Ralitõk an Josaia iiõ ilo iien in! Josaia ear ke nana ãinwõt kar jemãn?​— Ear jab!

Jekdo̦o̦n ñe Josaia ear lukkuun dik ak ear kõn̦aan wõt pokake Jeova. Innem, ear kõn̦aan m̦õttaik wõt armej ro me rej yokwe Jeova. Rein m̦õttan Josaia rar jipañ e ñan kõm̦m̦ani wõt men ko rejim̦we. Wõn ro kar m̦õttan Josaia?

Juon iaan armej ro m̦õttan ej Zepanaia. L̦ein kar juon ri kanaan. Zepanaia ear kõjjel̦ãik armej in Juda bwe renaaj jorrããn ñe rejjab bõjrak jãn aer kabuñ ñan ekjab. Josaia ear pokake Zepanaia im ear kabuñ wõt ñan Jeova.

Etan armej eo juon m̦õttan Josaia in Jeremaia. Eitõn joñaerro wõt juon, im erro kar lukkuun jel̦ã kajjien doon jãn ke rar dik. Erro kar lukkuun epaake doon. Joñan, ke Josaia ear mej, Jeremaia ear je juon al im kwal̦o̦k kõn an lukkuun bũrom̦õj kake. Erro kar jipañ doon ñan pokake wõt Jeova im kõm̦m̦ani men ko rejim̦we.

Ta eo kwõmaroñ kõm̦m̦ane bwe kwõn ãinwõt Josaia?​— Jekdo̦o̦n ñe ear lukkuun dik, ak ear kõn̦aan wõt kõm̦m̦ani men ko rejim̦we. Ear jel̦ã bwe ej aikuj in m̦õttaik wõt ro rej yokwe Jeova. Kwõj aikuj lale bwe armej ro kwõj m̦õttaik er rej yokwe Jeova im renaaj jipañ kwe ñan kõm̦m̦ani wõt men ko rejim̦we!