Josaia Ear Kaorõk Kien ko An Anij

Josaia ear kiiñ ioon aelõñin Juda ke ear 8 an iiõ. Ilo kar iien in, armej ro rar anijnij im bubu im kabuñ ñan ekjab ko. Ke ear 16 an Josaia iiõ, ear katak im kal̦apl̦o̦k an mel̦el̦e kõn wãween eo ejim̦we ñan kabuñ ñan Jeova. Ke ear 20 an iiõ, ear rupi ekjab ko im lokatok ko ilo aolepen ãneo. Im ke ear 26 an iiõ, ear jiroñ armej ro bwe ren kõkããle tampel̦ eo an Jeova.

Ilo tampel̦ eo, bũrij l̦apl̦ap eo Hilkaia, ear loe juon bok lemlem in kien ko an Jeova. Bõlen eñin kar bok eo Moses ear je. Shepan, rijjipañ eo an Josaia, ear bõkl̦o̦k bok lemlem in ñan ippãn Josaia im riitil̦o̦k ñane. Ke Josaia ej roñjake an riit, ear kile bwe armej ro rar jab pokake Jeova ium̦win elõñ iiõ ko m̦aantak. Kiiñ in ear ba ñan Hilkaia: ‘Jeova el̦ap an illu ippãd. Kwõn etal im kõnnaan ippãn Jeova bwe en kwal̦o̦ktok ñan kõj ta eo jen kõm̦m̦ane.’ Jeova ear uwaak ikijjeen juon kõrã rũkanaan etan Hõlda. Jeova ear ba: ‘Armej ro ilo Juda rar ilo̦k jãn ña. Renaaj bõk kaje ak ejjab ilo iien in Josaia ej kiiñ kõnke Josaia ej roñjake im pokake eõ.’

Ke rar kõjjel̦ãiki Kiiñ Josaia kõn naan kein an Anij, ear etal ñan tampel̦ eo im kũrl̦o̦k aolep armej ro ilo ãneo. Innem ear riitil̦o̦k kien ko an Jeova ñan er. Josaia im armej ro rar kallim̦ur bwe renaaj pokake Jeova kõn aolepen bũrueer.

Ium̦win elõñ iiõ ko, armej ro ilo Juda rar jab kõm̦m̦ane Kwõjkwõjin Kijoone eo. Ak ãlikin an kar Josaia riiti kien eo me ej ba bwe rej aikuj kõm̦m̦ane Kwõjkwõjin Kijoone eo kajjojo iiõ, ear ba ñan armej ro: ‘Jenaaj kõm̦m̦ane juon Kwõjkwõjin Kijoone ñan Jeova.’ Innem Josaia ear kõpooje elõñ menin katok ko ñan aer naaj katok kaki im ear karõk bwe en wõr juon kumi in rial ilo tampel̦ eo. Ãlikin wõt aer kõm̦m̦ane kwõjkwõj in, rar kõm̦m̦ane Kwõjkwõjin Pilawã Ejjab Uwe me 7 raan aetokan. Ej kab wõr juon Kwõjkwõjin Kijoone ãinwõt kar kwõjkwõj ko rar kõm̦m̦ani ilo raan ko an Samuel. Josaia ear lukkuun kaorõk kien ko an Anij. Kwõj ke juon eo em̦õn̦õn̦õ in katak kõn Jeova?