KAJJITÕK 1
Wõn Ña?
TA EO KWÕNÃJ KAR KÕM̦M̦ANE?
L̦õmn̦ak m̦õk kõn waanjoñak in: Karen ej pãd ilo juon bade im ej kab 10 minit in an pãd ijo ak eroñ an juon m̦õttan kũri.
“A kwõjaam̦ jutak wõt?”
Karen el̦ak reilik, eloe ledik eo m̦õttan etan Jessica im ej jibwe ruo bato in pia. Jessica ej lel̦o̦k pia eo juon ñan Karen im ba, “Ejab kwõrũtto kiiõ ñan am̦ idaak jidik im baj limo ke?”
Karen ejjab kõn̦aan idaak ak kõnke m̦õttan Jessica ejjab kõn̦aan ba jaab ñane. Im ejjab kõn̦aan bwe ledik in m̦õttan en l̦õmn̦ak bwe ejãlimo. Bareinwõt, Jessica ej juon ledik em̦m̦an. Innem el̦aññe ej idaak, mel̦el̦ein bwe ejjel̦o̦k jorrããn ilo men in. Karen ej ba ippãn make im ba: ‘Jej baj idaak wõt. Ejjab ãinwõt ñe jej bõk men kan̦ rekkajjoor (drug).’
El̦aññe en kar kwe Karen, ta eo kwõnãj kar kõm̦m̦ane?
BÕJRAK IM L̦ÕMN̦AK!
Ñan kõm̦m̦ane juon pepe ejim̦we kõn men rot in, kwõj aikuj in jel̦ã kain armej rot kwe. Men in ej jitõñl̦o̦k ñan men ko kwõj kaorõki im tõmaki. Ilo am̦ jel̦ã kajjiem̦ make, enaaj lukkuun jipañ eok ñan am̦ make tõl mour n̦e am̦ im jab kõtl̦o̦k bwe ro jet ren kõm̦m̦ane men in ñan kwe.—1 Korint 9:26, 27.
Ta eo emaroñ jipañ eok? Eokwe, uwaak ko am̦ ñan kajjitõk kein tok jet renaaj lukkuun jipañ.
1 TA MAROÑ KO AÕ?
Am̦ jel̦ã kõn kapeel im maroñ ko am̦ im bareinwõt men ko rem̦m̦an kõn kwe, enaaj kal̦apl̦o̦k am̦ lõke eok make.
WAANJOÑAK JÃN BAIBÕL̦: Rijjilõk Paul ear je naan kein: “Bõlen ijekapeel ilo kõnono, ak ejjab ilo jel̦ãl̦o̦kjen̦.” (2 Korint 11:6, UBS) Kõn an kar Paul lukkuun jel̦ã kobban Baibõl̦, ear maroñ jutak pen wõt ke ro jet rar jum̦aiki. Ear jab kõtl̦o̦k bwe naanin kabbeerer ko aer ren kõm̦m̦an bwe en dikl̦o̦k an lõke e make.—2 Korint 10:10; 11:5.
ETALE KWE MAKE: Kwõn je juon am̦ talent ak juon men kwõjel̦ã kõm̦m̦ane.
Kiiõ kwal̦o̦k juon men elukkuun em̦m̦an kõn kwe. (Ñan waanjoñak, kwõj ke juon eo ejel̦ã l̦õmn̦ak kõn ro jet? ejouj? relõke? em̦õkaj ñan iien?)
2 TA M̦ÕJN̦O̦ KO AÕ?
Meñe juon chain emaroñ kajoor ak ñe em̦õjn̦o̦ juon iaan aen ko ie enaaj pidodo an tũm̦ im kõm̦m̦an bwe en ejjel̦o̦k tokjãn. Ejjel̦o̦k oktak, el̦aññe kwõj kõtl̦o̦k bwe kwõn po ilo m̦õjn̦o̦ ko am̦, aolep men ko rem̦m̦an kwõj kõm̦m̦ani renaaj m̦õkaj aer jako im ejjel̦o̦k tokjãer.
WAANJOÑAK JÃN BAIBÕL̦: Paul ear jel̦ã kõn m̦õjn̦o̦ ko an. Ear ba: “Aõ ej lañlõñ ilo kien Anij. Ak ij lo juon kien eo ãinjuon ej jerbal ilo ãnbwinnũ - kien in ej jum̦ae kien eo aõ l̦ol̦ãtãt ej lañlõñ kake. Ej kajipo̦kweik eõ ñan kien jerawiwi.”—Rom 7:22, 23.
ETALE KWE MAKE: Ta m̦õjn̦o̦ eo am̦ me kwõj aikuj kate eok ñan jol̦o̦ke?
3 TA KÕTTÕPAR KO AÕ?
Kwõn kar ke uwe ilo juon taxi im ba ñan taxi driver eo bwe en rauni town eo am̦ ñan ñe emaat kiaj in wa eo? Men in enaaj kar juon menin bwebwe im enaaj kar l̦ap on̦ããn!
Ta boin eo? Ej bwe kõttõpar ko rej tõl mour eo an juon armej im ilo kõkkar rej jipañe bwe en jab rauni bajjek jikin eo. Kõn an wõr am̦ kõttõpar, kwõjel̦ã ia eo kwõj etal ñane im ewõr am̦ bũl̦ããn kõn kilen am̦ maroñ tõpare ijo kwõj etal ñane.
WAANJOÑAK JÃN BAIBÕL̦: Paul ear ba: ‘Ña ij ettõr, jab ãinwõt ijaje ia eo ij etal ñane.’ (1 Korint 9:26) Ijello̦kun an kar Paul pãd bajjek ilo mour eo an, ear wõr an mejãnkajjik ak kõttõpar im ear kate e bwe en tõpari.—Pilippai 3:12-14, UBS.
ETALE KWE MAKE: Je jilu kõttõpar me kokõn̦aan nãj tõpari ilo iiõ in lal̦.
4 TA TÕMAK EO AÕ?
Ñe kwõlukkuun jel̦ã kõn kain armej rot kwe, kwõnaaj ãinwõt juon wõjke epen okran im ejjab okjak ñe ej l̦ap kõto im taibuun
Eaorõk bwe en wõr men ko kwõj tõmaki im kaorõki kõnke el̦aññe ejjel̦o̦k, innem kwõnãj ñak pepe ta eo kwõn kõm̦m̦ane. Kwõnãj ãinwõt kweet ko me rej ukot color in kilier ekkar ñan jikin eo rej pãd ie, bwe kwõn arin jo̦dikdik ro jet. Men in ej juon kõkal̦l̦e bwe kwõjjab jel̦ã kõn kwe make im kõn tõmak eo am̦.
Bõtab, ñe kõm̦m̦an ko am̦ rej pedped ioon tõmak eo am̦, kwõnaaj kõjparok kwe make jekdo̦o̦n ta eo ro jet renaaj kõm̦m̦ane.
WAANJOÑAK JÃN BAIBÕL̦: Ke Daniel ear juon jo̦dikdik, “ear pepe ilo bũruon” bwe enaaj pokake wõt kien ko an Anij jekdo̦o̦n ñe enaaj ettol̦o̦k jãn baam̦le eo an. (Daniel 1:8) Ilo an kar kõm̦m̦ane men in, ear m̦ool ñan e make. Daniel ear mour ekkar ñan tõmak eo an.
ETALE KWE MAKE: Ta tõmak eo am̦? Ñan waanjoñak: Kwõj tõmak ke ilo Anij? El̦aññe aet, etke? Ta eo ej kam̦ool ñan kwe bwe ewõr Anij?
Kwõj ke tõmak bwe kien ko an Anij kõn mour erreo rem̦m̦an ñan kwe? El̦aññe aet, etke?
Ilo jem̦l̦o̦kin, ewi iaan men kein kokõn̦aan bwe kwõn ãinwõt? Kokõn̦aan ke ãinwõt juon bõlõk me kõto ej uukito uukitak ak juon wõjke me ejjab okjak meñe el̦ap kõto im taibuun? Kal̦apl̦o̦k am̦ jel̦ã kõn kwe make, innem kwõnaaj ãinwõt wõjke eo. Im men in enaaj jipañ eok ñan uwaake kajjitõk in, Wõn ña?