Kejbãrok Kadkadin Christian Eo Ad
“Kom dri kennan ro Aõ, Jeova ej ba.” —AISEIA 43:10.
1. Kain armij rot Jehovah ej ibertok ñan e?
ÑE KWOJ bed ilo Kingdom Hall eo, reito-reitak im lale ro rej bed ibelakõm. Wõn ro kwoj lo ir ilo jikin kabuñ in? Kwomaroñ lo jodikdik ro emol burueir me rej kate ir bõk meletlet eo jen Bible eo. (Sam 148:12, 13) Bõlen, kwonaj bareinwõt lo ro bõran family ko rej kate ir ñan kabuñburuen Anij meñe rej bed ilo juõn lal eo ej kajettokjen mour in family. Kwomaroñ bareinwõt lo ritto ro, rej tiljek in kajejjet wujleplok eo air ñan Jehovah meñe rej iion abañ ko kin air ritto. (Jabõn Kennan Ko 16:31) Rein aolep emũlal air yokwe Jehovah. Im ear mõnõnõ in kalek juõn kõtan emõn ibbeir. “Ejelok armij ej maroñ itok ñõn iba,” Nejin Anij ear kamol, “elañe Jema eo E ar jilkintok Iõ E jab ibertok e.”—Jon 6:37, 44, 65.
2, 3. Etke emaroñ bin ñan ad kejbãrok juõn kadkadin Christian ekajur?
2 Jejjab mõnõnõ ke bwe jej mõttan juõn jar in armij ro me Jehovah ej buñburuen kake im ej kajerammõn ir? Ak, emaroñ bin ñan ad kejbãrok kadkadin Christian eo ad ilo “ien [kein] renana.”. (2 Timote 3:1) Men in elap an mol ibben jodikdik ro me rej rittolok ilo family ko rej Christian. “Meñe iar bed ilo kwelok ko an Christian,” juõn jodikdik ear ba, “ear ejelok ibba mejenkajjik ko ralikar ilo jitõb im, ilo mol, iar jab kaddeklok juõn kõnan ñan karejar ñan Jehovah.”
3 Jet, meñe emol air kõnan karejar ñan Jehovah, rej kõtlok bwe ijjibed ko an ro mõttair, kilan ko an lal in, im kõnan ko rejerawiwi ren kamad ir. Ñe jej bed iumin ijjibed ko, jidik kin jidik emaroñ kõmman bwe jen luji kadkadin Christian eo ad. Ñan wanjoñok, elõñ ilo lal in rainin rej watõk bwe kien ko ilo Bible kin mwil emõn rej mantin mour eo etto ak rejjab ekkar ñan lal in rainin. (1 Piter 4:4) Jet rej lemnak bwe ejjab aorõk ñan kabuñ ñan ad Anij ilo wãwen eo ekõnan. (Jon 4:24) Ilo letter eo an ñan Ri Ephesus ro, Paul ej ba bwe lal in ewõr juõn “jitõb,” ak lemnak ekajur. (Dri Epesõs 2:2) Jitõb in ej jibed armij ro ñan bõk lemnak eo an juõn jukjuk im bed eo me ejjab jelã Jehovah.
4. Ewi wãwen an kar Jesus kalikar aikwij eo bwe jen kejbãrok kadkad eo ad einwõt Ri Christian ro?
4 Bõtab, einwõt ri karejar ro an Jehovah emwij ad wujleplok ad mour, jej kile bwe enaj juõn jorrãn elap elañe jabdewõt iad—dik ak ritto—jej luji kadkadin Christian eo ad. Juõn lemnak ejimwe kin kadkadin Christian ej wawa wõt ion kien ko an Jehovah im kõtmene ko an kin kij. Men in ej eindein kinke kar kõmanman kij ilo wãwen wõt e. (Jenesis 1:26; Micah 6:8, NW) Bible eo ej keidi kadkadin Christian eo ad ñan nuknuk ko, kar kõnaki bwe aolep ren loi. Ikijen ran kein ad, Jesus ear kakkõl: “Lo Ij iwij einwõt dri kwot. Emõnõnõ eo ej ekil im drebij nuknuk ko an, bwe en jab etetal im kelwan, im rej lo an jok.”a (Reveles̃õn 16:15) Jejjab kõnan wutik kadkadin Christian im kien mwil ko ad im kõtlok bwe lal eo an Satan en nalõmed. Elañe men in ear walok, jenaj luji “nuknuk ko” ad. Juõn wãwen einwõt in enaj men in kaburomõjmõj im kajookok.
5, 6. Etke jokkin wõt juõn ilo jitõb eaorõk?
5 Juõn eñjake ekajur kin kadkadin Christian eo ad elap an jelet wãwen mour an juõn armij. Ewi wãwen? Elañe juõn ri kabuñ an Jehovah ej luji kadkadin Christian eo an, emaroñ oktak im mad, im ejelok men in tel ak mejenkajjik ko. Ekkã an Bible eo kakkõl nae juõn wãwen ebbururu einwõt in. “Bwe eo ej berre,” ri kalor eo James ear kakkõl, “ej einwõt no in lometo e makõtkit im limajnono kin kõto. Bwe armij eo en jab lemnok bwe e naj bõk jabrewõt jen Iroij; E armij buruen ruo im bororo ilo ial ko an otemjej.”—Jemes 1:6-8; Dri Epesõs 4:14; Dri Hibru 13:9.
6 Ewi wãwen jemaroñ kejbãrok kadkadin Christian eo ad? Ta eo emaroñ jibañ kij kakõmanmanlok lemnak eo ad kin jerammõn eo elap ej bed ibbed einwõt ri kabuñ ro an Iroij eo Ekajur Bõtata? Joij im etale wãwen kein tok ilal.
Kalikar Kadkadin Christian eo Am
7. Etke ewõr tokjen ñan ad akwelap ñan Jehovah bwe en melejoñe kij?
7 Kakajur wõt kõtan eo am ibben Jehovah. Men eo eaorõktata ibben juõn Ri Christian ej kõtan eo an ibben Anij. (Sam 25:14; Jabõn Kennan Ko 3:32) Elañe jej jino bere kin kadkadin Christian eo ad, e ien ñan ad lukkun etale aorõkin im mũlal in kõtan in. Ri jeje sam ear akwelap: “Kwon kalimjek iõ, O Jeova, im kamol iõ; Kwon melejoñ lemnok ko aõ im buruõ.” (Sam 26:2) Etke juõn melejoñ rot in eaorõk? Kinke jejjab maroñ make ekajete unin kõmman ko ad im kõnan ko ad remũlaltata. Jehovah wõt emaroñ melele kin armij eo iloa—unin kõmman ko ad, lemnak ko ad, im eñjake ko ad.—Jeremiah 17:9, 10, NW.
8. (a) Ewi wãwen jemaroñ bõk tokjen ilo an Jehovah melejoñe kij? (b) Ewi wãwen kwar bõk jibañ ñan kõmman wõnmanlok einwõt juõn Ri Christian?
8 Ilo ad kajitõk ibben Jehovah ñan an etale kij, jej kajitõk bwe en melejoñe kij. Emaroñ kõtlok bwe wãwen ko ren walok ñan kalikar un eo emol unin kõmman ko ad im wãwen buruõd. (Dri Hibru 4:12, 13; Jemes 1:22-25) Jej aikwij mõnõnõ kin melejoñ kein kinke rej letok ñan kij juõn ien emõn ñan ad kwalok mũlal in tiljek eo ad ñan Jehovah. Men kein remaroñ kwalok elañe jej “wãppen wõt im eyu im enjelok [ad] aikwij.” (Jemes 1:2-4) Im ñe ej melejoñe kij, jemaroñ eddeklok ilo jitõb.—Dri Epesõs 4:22-24.
9. Etke ej men in aikwij bwe jen kamol ñan kij make bwe men ko Bible ej katakin kaki remol? Kamelele.
9 Kamol ñan kwe make mol ko ilo Bible. Kadkadid einwõt ri karejar ro an Jehovah emaroñ mõjnolok elañe ejjab bin an bedbed ion jelãlokjen eo jen Jeje Ko. (Dri Pilippai 1:9, 10) Kajjojo Ri Christian—ajiri ak ritto—ej aikwij kamol ñan e make bwe men eo ej tõmak kake elukkun mol einwõt jej loe ilo Bible. Paul ear rejañ ri tõmak ro mõttan: “Komin melejoñ men ko otemjej; kejbãrok wõt men ko remõn.” (1 Dri Tessalonika 5:21) Ri Christian jodikdik ro me rej mõttan family ko rej mijak Anij rej aikwij melele bwe rejjab maroñ atartar wõt ion tõmak eo an ro jemeir im jineir. Jemen Solomon, David, ear rejañ e bwe en “jela Anij eo an jemõm, im korijer ñõn E kin buru e wãppen.” (1 Kronikel 28:9) Ejjab bwe an Solomon lo wõt wãwen eo jemen ear kalek tõmak eo an ilo Jehovah. Ear aikwij make jelã Jehovah, im ear kõmmane men in. Ear eowore Anij: “Kwon letok ñõn iõ meletlet im jelalokjen bwe in maroñ in drioij dreloñ iman ro dri ailiñ in.”—2 Kronikel 1:10.
10. Etke ejjab nana ñan kwalok kajitõk ko remol kar kajitõk kaki kin juõn un ekkar?
10 Juõn tõmak ekajur ej wawa ion jelãlokjen. “Tõmak, kin roñjake,” Paul ear ba. (Dri Rom 10:17) Ta melelen an kar ba men in? Ear melelen bwe ilo ad katak Nan in Anij, jej kakajurlok tõmak im liki eo ad ilo Jehovah, kallimur ko an, im dolul eo an. Ilo ad bõkmantak kajitõk ko jen mol in buruõd kin Bible eo emaroñ tellok ñan uak ko rej kalaplok liki eo ad. Bareinwõt, ilo Dri Rom 12:2, jej lo nan in kakabilek eo an Paul: “Komin melejoñ ta ankil an Anij emõn im kabuñburuen im wãppen.” Ewi wãwen jemaroñ kõtõbrak men in? Ilo ad “jela mol eo.” (Taitõs 1:1) Jitõbõn Jehovah emaroñ jibañ kij melele men ko remũlal bareinwõt. (1 Dri Korint 2:11, 12) Jej aikwij jar kin jibañ jen Anij ñe ebin ad melele kin juõn men. (Sam 119:10, 11, 27) Jehovah ekõnan bwe jen melele kin Nan eo an, tõmake, im bokake. Ej mõnõnõ kin kajitõk ko me jej bõkmantak kin juõn lemnak ekkar.
Bebe ñan Am Kabuñburuen Anij
11. (a) Ta kõnan eo ilo biktokin armij emaroñ juõn aujid ñan kij? (b) Ewi wãwen jemaroñ kakajurlok beran eo ad bwe jen maroñ jutak nae ijjibed ko an ro mõttad?
11 Kwon bukõt ñan am kabuñburuen Anij, jab armij. Ej biktokin armij ñan kaddek kadkadiir ilo juõn joñan ilo air mõttan juõn kumi. Aolep armij rej aikwij jerair, im ñe ej wõr ro jerair ej kõmman bwe ren mõnõnõ im jokane. Ilo ien jodikdik—im ilo yiõ ko tokelik bareinwõt—ijjibed ko jen ro mõttair remaroñ kajur, im rej kõmman bwe en walok juõn kõnan ñan anõk ak kabuñburuen ro jet. Ak ejjab aolep ien ro mõttad im ro dettad wõt rej lemnak kin emõn eo ad. Jet ien rekõnan wõt bwe juõn en koba ibbeir ilo nana ko rej kõmmani. (Jabõn Kennan Ko 1:11-19) Ñe juõn Ri Christian ej lor ijjibed ko renana an ro mõttan, ekkã an kajeoñ in noje kadkadin Christian eo an. (Sam 26:4) “Kwon jab anõk mantin lal eo ibelakõm,” ri jilek Paul ear kakkõl. (Romans 12:2, The Jerusalem Bible) Jehovah ej letok kajur eo jej aikwiji ñan jumae jabdewõt ijjibed ko jen ro ilikin ñan lor ir.—Dri Hibru 13:6.
12. Ta nan in kaiñ eo im joñok et eo emaroñ kakajur kij ñan jutak bin ilo tõmak ñe ej kitibuj liki eo ad ñan Anij?
12 Ñe ijjibed ko jen ro ilikin rej iten kokkure kadkadin Christian eo ad, jej aikwij kememej bwe tiljek eo ad ñan Anij elaplok an aorõk jen lemnak ko an armij ak kõnan ko an jarlepju in armij ro. Nan ko ilo Exodus 23:2 rej jerbal einwõt juõn nan in kakabilek ñan kejbãrok: “Kwon jab lor elõñ armij ñõn kõmõn nana.” Ke jarlepju in Ri Israel ro rar bere maroñ eo an Jehovah ñan kajejjet kallimur ko An, Caleb ear lukkun makoko in lor kõnan eo an jarlepju in armij ro. Ear liki bwe kallimur ko an Anij rekanuij mol, im ear lap an jerammõn kin jutak eo an. (Bwinbwin 13:30; Joshua 14:6-11) Eindein ke am mõnõnõ in jumae ijjibed eo an jarlepju in armij ro bwe kwon maroñ kejbãrok kõtan eo am ibben Anij?
13. Etke ej ial in meletlet ñan kejelãik ro jet kin jutak eo ad einwõt Ri Christian ro?
13 Kalikar bwe kwe kwoj juõn Christian. Jabõn kennan eo me ej ba bwe jojomar eo emõntata ej ñe jej bõk buñten nee ko moktata ej mol ñe jej jutak kin kadkadin Christian eo ad. Ke rar jelmae jumae kin jibadbad ko air ñan kõmanman ankil an Jehovah ilo ran ko an Ezra, Ri Israel ro retiljek rar ba: “Kim dri korijeran Anij in lõñ im lõl.” (Ezra 5:11) Elañe jej kõtlok bwe kõmman ko im nan in kõrraat ko relej an armij ro ren jelet kij, jemaroñ oktak im lokjenad kin mijak. Elañe ien otemjej jej kajeoñ in kabuñburuen aolep armij, men in enaj kadiklok ad bojak. Inem kwon jab kõtlok bwe ren kamijak yuk. Ej juõn men emõn ien otemjej ñan kalikar ñan ro jet bwe kwoj juõn ian Ri Kennan ro an Jehovah. Ilo juõn wãwen bin ak ej kwalok kautiej, kamelele ñan ro jet kin men ko raorõk ibbam, tõmak ko am, im jutak eo am einwõt juõn Ri Christian. Kejelãik ro jet kin bebe eo am ñan kejbãrok kien ko reutiej an Jehovah ikijen mwil ko remõn. Kalikar bwe kwojjab ebbururu ikijen tiljek eo am einwõt juõn Ri Christian. Kwalok bwe kwoj utiej buru kin kien mwil emõn ko am. (Sam 64:10) Elañe ealikar einjuõn eo am einwõt juõn Ri Christian etiljek emaroñ kakajur yuk, kejbãrok yuk, im emaroñ kamakit jet ñan kajitõk kin Jehovah im armij ro an.
14. Jej aikwij ke kõtlok bwe kajirere im jumae ko an ro jet ren kabwer kij? Kamelele.
14 Aet, jet remaroñ kajirere kake yuk ak jumae yuk. (Jud 18) Elañe ro jet rejjab uak ilo emõn kin jibadbad ko am ñan kameleleik ir kin men ko kwoj kaorõki, kwon jab ebwer. (Ezekiel 3:7, 8, NW) Jekdon ewi joñan kwoj kate yuk, kwo jamin maroñ kareel armij ro me ejelok air kõnan bwe ren reel. Kememej Pharaoh. Ejelok juõn men in kaeñtan ak men in bwilõñ—meñe mij ñan manje eo nejin—ear maroñ kareel Pharaoh ñan tõmak bwe Moses ear konono ilo etan Jehovah. Kin men in, kwon jab kõtlok bwe mijak armij en kalelñoñ yuk. Liki im tõmak ilo Anij emaroñ jibañ kij anjo ion mijak.—Jabõn Kennan Ko 3:5, 6; 29:25.
Katak Jen Ien ko Remotlok, Kalek kin Ilju im Jeklaj
15, 16. (a) Ta men in jolet eo ad ilo jitõb? (b) Ewi wãwen jemaroñ bõk tokjen jen ad kalmenlokjen kake men in jolet eo ad ilo jitõb ikijen ad kajerbal Nan in Anij?
15 Kaorõk men in jolet eo am ilo jitõb. Ilo kajerbal Nan in Anij, Ri Christian ro renaj bõk tokjen jen air kalmenlokjen kin men in jolet eo air ilo jitõb. Men in jolet in ej kitibuj mol eo ilo Nan eo an Jehovah, kejatdikdik eo kin mour indio, im jerammõn eo ñan jutak ikijen Anij einwõt ri keañ ro kin news eo emõn. Kwoj lo ke ijo kunam ibwiljin Ri Kennan ro an, ilo kumi in armij ro rejerammõn me kar lelok ñan ir jerbal in lomor eo ñan kwalok kin Ailiñ eo? Kememej, Jehovah ej e eo ej kamol: “Kom dri kennan ro Aõ.”—Aiseia 43:10.
16 Kwomaroñ kajitõkin yuk make kajitõk kein: ‘Ewi joñan an aorõk men in jolet in ilo jitõb ñan iõ? Ebwe ke aõ kaorõki ñan kõmman bwe kõmanman ankil an Anij en moktata ilo aõ mour? Kamolol eo aõ ebwe ke an kajur ñan kakajur iõ ñan jumae jabdewõt men in kabo me emaroñ tellok ñan aõ luji men in jolet in?’ Men in jolet eo ad ilo jitõb emaroñ bareinwõt letok ñan kij juõn eñjake in jokane emũlal ilo jitõb me jej lañliñ kake iloan wõt dolul eo an Jehovah. (Sam 91:1, 2) Ilo ad etale kin men in kabwilõñlõñ ko rar walok ilo bwebwenato eo an dolul eo an Jehovah ilo ran kein emaroñ kalikar ñan kij bwe ejelok jabdewõt armij ak men emaroñ jolok armij ro an Jehovah jen lal in.—Aiseia 54:17; Jeremiah 1:19, NW.
17. Ta eo elaplok ad aikwiji jen ad baj atartar wõt ion men in jolet eo ad ilo jitõb?
17 Emol, jejjab maroñ atartar wõt ion men in jolet eo ad ilo jitõb. Kij kajjojo jej aikwij kaddeklok juõn kõtan ebak ibben Anij. Elikin an kar Paul kate e ñan kalek tõmak eo an Ri Christian ro ilo Philippi, ear jeje ñan ir: “Ein drein, ro jitenburu, einwõt kom ar bokake ien otemjej, jab einwõt iman meja wõt, a kiõ elaplok ilo aõ joko, komin jerbale ami mour kin mijõk im wurirrir.” (Pilippai 2:12) Jejjab maroñ atartar ion bar juõn armij ñan ad bõk lomor.
18. Ewi wãwen makitkit ko an Christian remaroñ kakõmanmanlok kadkadin Christian eo ad?
18 Bõk kunam joñan wõt am maroñ ilo makitkit ko an Christian. Emwij kar ba bwe “jerbal elap an jelet kadkadin juõn armij.” Kar lelok ñan Ri Christian ro rainin jerbal eo eaorõk ñan kwalok kin news eo emõn kin Ailiñ in Anij emwij an jutak. Paul ear keañ: “Inem bwe ña dri jilik ñõn dri ailiñ ko, ij kaibujuij jerbal eo aõ.” (Dri Rom 11:13) Jerbal in kwalok nan eo ad ej kajenolok kij jen lal in, im ñe jej bõk kunad ilo jerbal in ej kakõmanmanlok kadkadin Christian eo ad. Ilo ad boub ilo makitkit ko jet an congregation an Christian, einwõt kwelok ko an Christian, program ko ñan kalek imõn kwelok ko, jibadbad ko ñan jibañ ro rej bed ilo aikwij, im men ko eierlok wõt, remaroñ kamũlallok kadkad ko ad einwõt Ri Christian ro.—Dri Galetia 6:9, 10; Dri Hibru 10:23, 24.
Kadkadin Ealikar Ej Bõktok Jerammõn ko Remol
19, 20. (a) Ta tokjen ko kwar lañliñ kaki kin am juõn Ri Christian? (b) Ta eo ej letok ñan kij bedbed eo kin kadkad eo ad emol?
19 Bõk jidik ien ñan kalmenlokjen kin aolep tokjen ko im jerammõn ko jej lañliñ kaki kinke jej Ri Christian ro remol. Ewõr ibbed jerammõn eo bwe Jehovah ej jelã kake kij. Ri kanan eo Malachi ear ba: “Ro rej mijak Jehovah rar konono ibben don, kajjojo ibben eo mõttan, im Jehovah ear lale im roñjake nan ko air. Im ear jino jei ilo juõn book in kememej etan ro rej mijak Jehovah im ro rej lemnak kin etan.” (Malachi 3:16, NW) Anij emaroñ watõk kij einwõt ro jeran. (Jemes 2:23) Juõn karõk ealikar, melele eo emũlal, im mejenkajjik ko remõn im keie remaroñ kaibujuij mour ko ad. Im kar letok ñan kij kejatdikdik eo kin juõn ilju eo ej indio.—Sam 37:9.
20 Kememej bwe kadkadõm eo emol im tokjen eo am rej wawa ion ewi wãwen an Anij lemnak kin yuk, ejjab kin ta eo ro jet rej lemnak kake yuk. Ro jet remaroñ ekajet kij ekkar ñan kien ko relikjap an armij. Ak yokwe eo an Anij im itoklimo eo an rej letok ñan kij bedbed eo emol kin aorõkid—bwe jej an. (Matu 10:29-31) Ilo oktan, yokwe eo ad ñan Anij emaroñ letok ñan kij kadkadin Christian eo ad elaptata im tel eo ealikartata ilo mour ko ad. “A elañe jabrewõt armij ej yokwe Anij, Anij e jela e.”—1 Dri Korint 8:3.
[Kamelele ko itulal]
a Nan kein remaroñ jitõñlok ñan eddo ko an ri lale temple mount eo ilo Jerusalem. Ilo ien waj eo ilo boñ, ear kabole temple eo ñan lale elañe Ri Levite ri waj ro rar mimij ak kiki ilo jikin waj eo air. Jabdewõt ri waj eo me ear kiki ear deñloke e kin jokwon eo an, im tile nuknuk ko an einwõt juõn kaje ekajookok.
Kwoj Kememej Ke?
• Etke eaorõk bwe Ri Christian ro ren kejbãrok kadkadin Christian eo air?
• Ewi wãwen jemaroñ kabinlok kadkadin Christian eo ad?
• Ñe jej jelmae kajitõk eo kin wõn eo jekõnan kabuñburuen, ta men ko remaroñ jibañ kij kõmman bebe eo ejimwe?
• Ewi wãwen juõn kadkadin Christian ekajur emaroñ jelet ilju eo ad einwõt Ri Christian ro?
[Pija ko ilo peij 19]
Ilo ad boub ilo makitkit ko an Christian remaroñ kakõmanmanlok kadkadin Christian eo ad