Enjel̦ eo An Jeova Ear Kõjparok Hezekaia

Ej kab m̦õj an aelõñin Assiria anjo̦ ioon bwij ko joñoul an Israel. Kiiõ kiiñ eo an Assiria etan Senakerib ekõn̦aan bwe bwij ko ruo ilo Juda ren bar pãd ium̦win kajoor eo an. Kõn men in, Senakerib ear anjo̦ ioon jikin ko ilo Juda, juon ilo̦k juon. Ak jikin eo me ear l̦apl̦o̦k an kõn̦aan bõke ej Jerusalem. Bõtab Senakerib ear jab jel̦ã bwe Jerusalem ear pãd ium̦win kõjparok eo an Jeova.

Kiiñ eo an Juda etan Hezekaia ear lel̦o̦k el̦ap jããn ñan Senakerib bwe ren jab ko̦kkure Jerusalem. Meñe Senakerib ear bõk jããn eo, ak ear jab bõjrak jãn an jilkinl̦o̦k kumi in tarin̦ae eo an ekajoor bwe ren itõn ko̦kkure Jerusalem. Armej ro ilo Jerusalem rar lukkuun mijak kõnke m̦õttan wõt jidik RiAssiria ro renaaj tõpare ijin jikier. Hezekaia ear ba ñan er: ‘Kom̦win jab mijak. RiAssiria ran̦ rekajoor, ak Jeova enaaj kõm̦m̦an bwe en l̦apl̦o̦k ad kajoor jãn er.’

Senakerib ear jilkinl̦o̦k Rabshake ak rũkeeañ eo an ñan Jerusalem bwe en kajjirere kake armej ro. Rabshake ear jutak inabõjin wõrwõr eo aer im ear lam̦õjl̦o̦k im ba: ‘Jeova ejjab maroñ jipañ kom̦. Kom̦win jab kõtl̦o̦k an Hezekaia kabwebweik kom̦. Ejjel̦o̦k juon anij enaaj maroñ kõjparoke kom̦ jãn kõm.’

Hezekaia ear kajjitõk ippãn Jeova bwe en kwal̦o̦k ñane ta eo en kõm̦m̦ane. Jeova ear uwaake im ba: ‘Kwõn jab kõtl̦o̦k bwe naan kan̦ an Rabshake ren kaamijake eok. Senakerib eban anjo̦ ioon Jerusalem.’ Tokãlik, Senakerib ear bar jilkinl̦o̦k jet lõta ñan ippãn Hezekaia. Ear ba ilo lõta kein an: ‘Kom̦win kõttãik kom̦ ñan kõm bwe Jeova ejjab maroñ lo̦mo̦o̦ren kom̦.’ Hezekaia ear jar im ba: ‘Jeova, jouj im lo̦mo̦o̦ren kõm bwe aolep armej ren jel̦ã bwe kwe eo kwõj Anij eo em̦ool.’ Jeova ear ba ñane: ‘Kiiñ en̦ an Assiria eban del̦o̦ñe waj Jerusalem. Inaaj kõjparoke jikin in.’

Senakerib ear lukkuun tõmak im lõke bwe Jerusalem enaaj kar pãd ium̦win kajoor eo an. Ak juon boñ, Jeova ear jilkinl̦o̦k juon enjel̦ ñan ijo me rũttarin̦ae ro an Assiria rar pãd ie itulikin wõrwõr eo an Jerusalem. Enjel̦ in ear m̦an 185,000 rũttarin̦ae! Aolep rũttarin̦ae ro rekajoor an Kiiñ Senakerib rar mej. Kõn men in, Senakerib ear jujen wõt ro̦o̦l ñan ãneo ãneen. Jeova ear kõjparoke Hezekaia im Jerusalem ãinwõt an kar kallim̦ur bwe enaaj kar kõm̦m̦ane. El̦aññe en kar kwe eo juon kwaar pãd ilo Jerusalem ilo iien in, kwõnaaj ke kar lõke Jeova?