KATAK 41
Ta eo Baibõl̦ Ej Ba kõn an Ruo Armej Babu Ippãn Doon?
Elõñ armej rãliklik in kõnnaan kõn an ruo armej babu ippãn doon. Ijoke, ejjab ettino wãween an Baibõl̦ kõnnaan kake men in, ej kõnono kake ilo juon wãween ealikkar im ilo kautiej. Men ko Baibõl̦ ej ba kõn men in ej ñan tokjãn eo ad. Jemel̦el̦e unin kõnke Baibõl̦ eo ej jãn Jeova, eo ej ri-Kõm̦anm̦an eo ad. Innem ejel̦ã ta eo em̦m̦antata ñan kõj. Ej kwal̦o̦k ñan kõj wãween an kõm̦m̦an ko ad maroñ kabuñbũruon im ta ko renaaj jipañ kõj ñan lo m̦õn̦õn̦õ kõn mour ñan indeeo.
1. Ta l̦õmn̦ak eo an Jeova kõn an ruo armej babu ippãn doon?
An ruo armej babu ippãn doon ej juon menin letok jãn Jeova. Ekõn̦aan bwe juon em̦m̦aan im juon kõrã me em̦õj aerro m̦areik doon ren lo m̦õn̦õn̦õ ilo aer babu ippãn doon. Menin letok in ejjab baj kõmaroñ rippãlele rein ñan neji wõt ak ej bar kõmaroñ er ñan kwal̦o̦k aer yokwe doon ilo juon wãween ejim̦we im ekam̦õn̦õn̦õ. Eñin unin Naanin Anij ej ba: “Kwõn m̦õn̦õn̦õ kõn lio me ear pãleem̦ jãn ke kwaar likao.” (Jabõn Kõnnaan 5:18, 19) Jeova ej kõtmãne bwe Kũrjin ro me em̦õj aer m̦are ren tiljek wõt ñan eo pãleer. Kõn men in, reban ellolo jãn eo pãleer.—Riit Hibru 13:4.
2. Ta in l̦õñ?
Baibõl̦ ej jiroñ kõj bwe “ro ri-l̦õñ . . . reban jolõte Aelõñ eo an Anij.” (1 Korint 6:9, 10) Ri-jeje Baibõl̦ ro me rar jeje ilo kajin Grik rar kõjerbale naan eo por·neiʹa ñan kõmel̦el̦eik ta in l̦õñ. Naan in ekitibuj an (1) ruo armej babu ippãn doona ak rejjañin m̦are, (2) an em̦m̦aan ñan em̦m̦aan ak kõrã ñan kõrã babu ippãn doon, im (3) ñe juon ej babu ippãn menninmour ko. Jej kabuñbũruon Jeova im bõktok el̦ap tokjãn ñan kõj make ñe jej “kõjparok [kõj] jãn l̦õñ.”—1 Tessalonika 4:3.
KAM̦WILAL̦L̦O̦K AM̦ MEL̦EL̦E
Lale ewi wãween kwõmaroñ kõjparok jãn mourin l̦õñ im wãween am̦ naaj bõk tokjãn jãn am̦ mour erreo.
3. Ko jãn l̦õñ
Juon likao etiljek etan Josep ear lukkuun kate wõt e ñan dãpij wõt an mour erreo. Riit Jenesis 39:1-12, innem bwebwenato kake kajjitõk kein:
Ta eo ear kõm̦akũt Josep ñan ko?—Lale eoon 9.
Kwõl̦ak lale, ejim̦we ke jokãlõt eo an Josep? Etke kwõj ba men in?
Ewi wãween jo̦dikdik ro remaroñ anõke Josep im ko jãn l̦õñ ilo raan kein? Kõjo̦e PIJAIN ALWÕJ eo.
Jeova ekõn̦aan bwe kõj aolep jen jum̦ae ak kõjparok jãn mourin l̦õñ. Riit 1 Korint 6:18, innem bwebwenato kake kajjitõk kein:
Ta wãween ko remaroñ tõll̦o̦ke juon ñan an l̦õñ?
Ewi wãween kwõmaroñ ko jãn l̦õñ?
4. Kwõmaroñ jum̦ae menin kapo ko
Ta eo emaroñ kõm̦m̦an bwe en pen ad jum̦ae menin kapo eo ñan l̦õñ? Kõjo̦e PIJAIN ALWÕJ eo, innem bwebwenato kake kajjitõk in:
Ke em̦m̦aan eo jeid im jatid ilo pijain alwõj eo ear kile bwe l̦õmn̦ak im kõm̦m̦an ko an remaroñ tõll̦o̦ke ñan an jab tiljek ñan lio pãleen, ta eo ear kõm̦m̦ane?
Ewõr iien ko me Kũrjin ro retiljek rej bareinwõt kate er ñan tarin̦aeik l̦õmn̦ak ko rettoon. Ta ko kwõmaroñ kõm̦m̦ani ñan kõjparok jãn am̦ wõnm̦aanl̦o̦k im l̦õmn̦ak kõn men ko rettoon? Riit Pilippai 4:8, innem bwebwenato kake kajjitõk kein:
Ta jet iaan men ko jej aikuj l̦õmn̦ak kaki?
Ñe jej riit Baibõl̦ im poub wõt ilo jerbal eo an Jeova, ewi wãween an men kein maroñ jipañ kõj ñan jab po ilo m̦anit ko rettoon?
5. Jej bõk tokjãn jãn kien ko an Jeova
Jeova ejel̦ã ta eo em̦m̦antata ñan kõj. Ej kwal̦o̦k ñan kõj wãween ad maroñ dãpij ad mour erreo im tokjãn ko jej bũki jãn ad ãindein. Riit Jabõn Kõnnaan 7:7-27 ak kõjo̦e PIJAIN ALWÕJ eo, innem bwebwenato kake kajjitõk kein:
Ewi wãween an kar likao eo likũt e make ilo juon wãween emaroñ po ie?—Lale Jabõn Kõnnaan 7:8, 9.
Ekkar ñan Jabõn Kõnnaan 7:23, 26, emaroñ wõr apañ rel̦l̦ap rej wal̦o̦k itok jãn an juon l̦õñ. Ijoke el̦aññe jej dãpij wõt ad mour erreo, ta apañ ko jenaaj kõjparok kõj jãni?
Ñe jej mour erreo, ewi wãween an men in maroñ jipañ kõj ñan m̦õn̦õn̦õ kõn mour ñan indeeo?
Jet armej rej l̦õmn̦ak bwe men eo Baibõl̦ ej ba kõn an em̦m̦aan ñan em̦m̦aan ak kõrã ñan kõrã pãd ippãn doon ejjab juon menin yokwe. Bõtab Jeova, eo me ej Anij in yokwe, ekõn̦aan bwe aolep armej ren m̦õn̦õn̦õ kõn mour ñan indeeo. Ak bwe jen maroñ bok jeraam̦m̦an in, jej aikuj mour ekkar ñan kien ko an. Riit 1 Korint 6:9-11, innem bwebwenato kake kajjitõk in:
Anij ej ke watõk bwe an em̦m̦aan ro kõn̦aan doon im an kõrã ro kõn̦aan doon, rej ke baj kõn̦aan ko wõt me rejekkar?
Kõj aolep jej aikuj kõm̦m̦an oktak ko bwe jen maroñ kabuñbũruon Anij. Ewõr ke tokjãn ad kate kõj ñan kõm̦m̦an oktak? Riit Sam 19:8, 11, innem bwebwenato kake kajjitõk kein:
Kwõl̦ak lale ekkar im jim̦we ke kien ko an Jeova kõn mour erreo? Etke kwõj ba men in?
Em̦õj an Jeova jipañ elõñ armej ñan pokake im l̦oore kien ko an kõn mour erreo. Emaroñ bar jipañ eok
JET ARMEJ REJ BA: “Ejjab nana an ruo armej babu ippãn doon, men eo wõt eaorõk ej bwe erro ej yokwe doon.”
Kwõnaaj kar ba ta?
TARLEP IN KATAK EO ILO TUKADU
An ruo armej babu ippãn doon ej juon menin letok jãn Jeova, im ear karõk bwe juon em̦m̦aan im juon kõrã me em̦õj aerro m̦areik doon ren m̦õn̦õn̦õ kake men in.
Ãlij
Mourin l̦õñ ej kitibuj ta?
Ta ko remaroñ jipañ kõj ñan jum̦ae im kõjparok jãn mourin l̦õñ?
Ewi wãween ad bok tokjãn ñe jej pokake kien ko an Jeova kõn mour erreo?
KAL̦APL̦O̦K AM̦ MEL̦EL̦E
Lale etke Anij ekõn̦aan bwe juon em̦m̦aan im juon kõrã me rekõn̦aan jokwe ippãn doon ren m̦are m̦okta.
“What Does the Bible Say About Living Together Without Marriage?” (Katak eo ilo online)
Meñe Baibõl̦ ej katakin bwe ebõd an em̦m̦aan ro pãleek doon im kõrã ro pãleek doon, ak lale etke ejjab mel̦el̦ein bwe jen dike er.
Lale wãween an kien ko an Anij ikijjeen aolep m̦anit ko kõn an ruo armej babu ippãn doon, jipañ im kõjparok kõj.
Ilo bwebwenato eo etan “They Treated Me With Dignity,” lale ta eo ear kõm̦akũt juon em̦m̦aan me ear pãleek em̦m̦aan ukot mour eo an bwe en kabuñbũruon Anij.
a Emaroñ kajjookok ñan kõnono kake men kein ilo m̦antin M̦ajel̦. Bõtab, jej aikuj lukkuun tipdiki mel̦el̦e kein bwe aolep ren mel̦el̦e kõn l̦õmn̦ak ko an Anij kõn men kein. M̦anit kein rettoon rebar kitibuj m̦anit ko jet ãinwõt babu ippãn doon, kõjerbale lo̦ñier ak lo̦kwaer ñan pãd ippãn bar juon, ak iukkure kake m̦õttan ko ilo ãnbwinnin juon eo me ejjab pãleen.