Juõn Lemnak An Anij Kin Mour Erreo

“Ña Jeova, am Anij, Eo eor tokjen An katakin yuk, Eo ej tel yuk ilo ial eo emõn kwon etal ie.”​—AISEIA 48:17.

1, 2. (a) Ewi wãwen an armij lemnak kin babu ibben don ilo mour erreo? (b) Ta lemnak eo ewõr ibben Christian ro kin babu ibben don ilo mour erreo?

RAININ, ilo elõñ mõttan ko ilo lal in, mantin mour erreo emwij an oktak im armij rej watõke einwõt juõn men an juõn armij make bebe kake. Armij rej lemnak kin kõtan babu ko an jiroñ im likao ibben don einwõt juõn wãwen kwalok yokwe ñan kajju buru ilo jabdewõt ien rej kõnan, im jab einwõt juõn men in aikwij ikõtan wõt rimare ro ruo ñan don. Eñjake eo air in bwe elañe ejelok en ej metak, ejelok bwid ilo bebe eo an armij eo make kin wãwen mwilin. Ilo lemnak eo air, ren jab ekajete armij ro ilo wãwen ko kin mour erreo, elaptata ñe ej itok ñan babu eo an ruo armij ibben don.

² Ro emwij air jelã kin Jehovah eoktak air lemnak. Rej mõnõnõ in lor ialin tel ko ilo Jeje ko kinke rej yokwe Jehovah im kõnan kamõnõnõik e. Rej kile bwe Jehovah ej yokwe ir im lelok ialin tel eo ej ñan emõn eo air, ialin tel eo enaj mol an wõr tokjen ñan ir im kõmman bwe ren mõnõnõ. (Aiseia 48:17) Ke Anij ej Unjen mour, emenin kõmmanwa bwe rej aikwij reilok ñane ñan bõk ialin tel ilo wãwen air kajerbal enbwiniir, elaptata ilo wãwen in im elap an ebaklok ial eo ñan ejaake mour.

Juõn Menin Letok Jen Juõn Ri Kõmanman eo ej Yokwe

3. Ta eo elõñ ro ilo Christendom emwij katakin ir kake kin kõtan babu ko ibben don, im ewi wãwen menin ñe keidi ibben men eo Bible ej katakin kake?

³ Ilo an einjuõn jen lal in rainin, jet ilo Christendom rar katakin armij bwe kõtan babu ko an likao im jiroñ ibben don rekajookok, ejerawiwi im bwe “jerawiwi eo jinointata” ilo jikin kallip eo ilo Eden kar kin an Eve kareel Adam ñan airro babu ibben don. Lemnak rot in eoktak jen men eo Jeje ko rekakõrmol rej ba kake. Jeje eo ilo Bible ej jitõñlok ñan armij ri belele ro jinointata einwõt “leo kab lio belen.” (Jenesis 2:​25) Anij ear jiroñlok irro bwe en wõr nejiir ajiri, ke ej ba: “Komin timon im orlok, im kobrõk lõl.” (Jenesis 1:​28) Ejamin kar juõn men ejimwe ñan an Anij jiroñlok Adam im Eve ñan keotak nejiir ajiri inem kaje ir kin air wõnmanlok kin nan in jiroñ kein.​—Sam 19:8.

4.Etke Anij ear lelok ñan armij maroñ ko ñan babu ibben don?

⁴ Ilo nan in jiroñ in kar lelok ñan jemed im jined ro jinointata, eo kar elijlok ñan Noah im lõmaro nejin, jej lo un eo elap ilo kõtan babu ko ibben don: ñan keotak ajiri ro. (Jenesis 9:1) Bõtab, Nan in Anij ej kwalok bwe ri bebe ro ri karejaran rejjab bed iumin eddo eo ñan babu ibben don ñan jibadbad ko wõt ñan keotak nejiir ajiri. Kõtan rot in emaroñ ilo jimwe katõbrak aikwij in eñjake im enbwin ko ñan juõn unjen kamõnõnõ ñan ri belele ro ruo. Ej juõn wãwen ñan air kwalok yokwe eo emũlal ñan don.​—Jenesis 26:​8, 9; Jabõn Kennan Ko 5:​18, 19; 1 Dri Korint 7:​3-5.

Debdeb ko Rekwojarjar

5. Ta men ko remo Anij ear likit ion mantin babu ibben don ko an armij?

⁵ Ke babu ibben don ej juõn menin letok jen Anij, jej aikwij jelã kilen debdeb. Nan in kaiñi in ej jerbal bareinwõt iloan karõk in belele eo. (Dri Epesõs 5:​28-​30; 1 Piter 3:​1, 7) Ilikin belele eo, kõtan babu ko ibben don rej kamoiki. Bible eo ej lukkun kalikar wãwen in. Ilo Kien eo Anij ear lelok ñan ailiñ in Israel, ear ba: “Kwon jab lũñ.” (Exodus 20:14) Tokelik, Jesus ear kobaik “lũñ” im “lejen” ibben “lemnok ko renana” rej jino jarjar ilo buru im katton juõn armij. (Mark 7:​21, 22) Ri jilek Paul kar kakõrmole ñan kõketak Christian ro ilo Corinth: “Komin ko jen lũñ.” (1 Dri Korint 6:​18) Im ilo letter eo an ñan Ri Hebrew ro, Paul ear je: “Armij otemjej ren koutiej belele im en kwojarjar jikin babu: bwe E ar ba, Anij e naj ekajet ro dri lejen im dri lũñ otemjelok.”​—Hebrews 13:​4, New World Translation.

6. Ilo Bible, ta eo nan in “lũñ” ej kitibuj kake?

⁶ Ta melelen nan in “lũñ”? Ej itok jen nan in Greek eo por·neiʹa, eo jet ien ej jerbal ñan kõtan babu ko ibben don ikõtan armij ro rejjab ri belele. (1 Dri Korint 6:9) Ijoko jet, einwõt ilo Matu 5:​32 im Matu 19:9, kajin in elaplok belakin ilo melelen im ej jitõñlok im kobaiktok ñan lejen, kõpa eo an armij ro ebak nukin don eo air, im mantin menin mour ko. Mantin babu ibben don ko jet ikõtan armij ro rejjab belele ibben don, einwõt oral im anal sex im ikkure ilo jõkkar kin enbwinin eo juõn rej bareinwõt likit einwõt por·neiʹa. Aolep manit kein renana​—ilo an lukkun alikar ak ikijen kwalok kake​—ilo Nan in Anij.​—Livitikõs 20:10, 13, 15, 16; Dri Rom 1:​24, 26, 27, 32.a

Bõk Tokjen Jen Kien Mour Erreo ko An Anij

7. Ewi wãwen ad bõk tokjen jen ad kejbãrok mour erreo?

⁷ Ñan bokake ialin tel eo an Jehovah kin mwilin babu ibben don eo emaroñ juõn menin aitwerõk ñan armij jab wãppen. Ri kabel in Ri Jew eo Maimonides ilo ebeben eo kein ka 12 ear je: “Ejelok mo ilo aolepen Torah [Kien eo Anij ear lelok ñan Moses] joñan an bin kejbãrok wõt einwõt kien ko nae kõpa im kõtan belele eo ejjab jimwe.” Ak, elañe jej bokake ialin tel eo an Anij, elap ad bõk tokjen. (Aiseia 48:18) Ñan wanjoñok, bokake ilo wãwen in ej jibañ ñan kejbãrok kij jen nañinmij ko rekabobo jen babu ibben don, ko jet iair ejelok mour jeni im remaroñ kõmman mij.b Jej bõk kejbãrok jen bõroru ko rej itok jen mour in ãjãj. Jerbale meletlet eo an Anij ej bareinwõt wõr kunan ñan juõn bõklikit erreo. Ad kõmman eindein ej kalaplok ad kautiej kij make im bõk kautiej eo an ro jet, ekoba ro nukid, ri belele ro mõttad, ajiri ro nejid, im Christian ro jeid im jatid maan im kõrã. Eindein ej kalaplok ilo kij juõn lemnak jimwe, im erreo kin babu ibben don eo ejimwe im ewõr kunan ñan mõnõnõ ilo belele. Juõn kõrã in Christian ear je: “Mol eo in Nan in Anij ej menin kejbãrok eo emõntata. Ij kõttar in mare, im ñe inaj belele enaj utiej buruõ in jiroñlok leo ej ri Christian ij mareiki bwe I ar bed wõt im jab babu ibben bar juõn.”

8. Ilo wãwen et eo an emõn mwilid emaroñ kalaplok kabuñ eo erreo?

⁸ Ilo ad kejbãrok mwil emõn im erreo, emaroñ bareinwõt lap ijo jej kõmmane ñan ukõtlok lemnak ko rewan kin kabuñ eo emol im kaal armij ro ñan Anij eo jej kabuñ ñane. Ri jilek Peter ear je: “Im en ekar ami ber im kõmõn ilo bwiljin dri ailiñ ko; bwe, ilo men eo rej konono nae kom kake einwõt dri kõmõn nana, ren kaibujuij Anij ilo ran eo ran in joij, kin ami jerbal ko remõn rej loi.” (1 Piter 2:​12) Meñe ro rejjab karejar ñan Jehovah rej likjap in kile ak kowãppen mwil eo emõn mwilid, jemaroñ tõmak bwe Jemed ilañ ej loe, kowãppen, im bareinwõt lañliñ ilo jibadbad ko ad ñan lor ialin tel eo an.​—Jabõn Kennan Ko 27:11; Dri Hibru 4:​13.

9. Etke jej aikwij liki ilo ialin tel eo an Anij, meñe jemaroñ jab lukkun melele un ko an? Kwalok juõn wanjoñok.

⁹ Tõmak ilo Anij ekoba liki bwe ejelã ta eo emõntata ñan kij, meñe jejjab lukkun kile aolep un ko unin an tel kij ilo wãwen eo ej kõmmane. Lemnak kin juõn wanjoñok jen Kien eo ikijen Moses. Juõn kien ikijen imõn kabbed ko an ri tarinae ear aikwiji bwe ren kallip kũbwe ilikin camp eo. (Duteronomi 23:13, 14) Bõlen Ri Israel ro rar kajitõk ilo burueir kin un eo ñan ialin tel rot in; jet remaroñ kar lemnak bwe ear jab menin aikwij. Bõtab, jen ien eo, medical science ear etal im kile bwe kien in ear jibañ kejbãrok unjen den ko jen air etton im lelok kejbãrok jen elõñ nañinmij ko menin mour ko redik rej tõbalbal im kãke rej bõkto-bõktak. Eindeinlok, ewõr un ko ilo jitõb, ibben don, eñjake, enbwin, im un ko unin an Anij kar kõmman joñan ñan kõtan babu ibben don ko ilo jikin babu in belele eo. Jen kiõ etale jejjo wanjoñok ko kin ro rar debij wõt mour erreo.

Joseph​—Kar Kajerammõn E kin Mwil Erreo eo An

10. Wõn eo ear kajeoñ in kabo Joseph, im ewi wãwen an kar uak?

¹⁰ Bõlen ewõr am jelã kin joñok eo ilo Bible kin Joseph, leo nejin Jacob. Ilo ien eo 17 yiõ dettan, ear erom juõn ri kamakoko ñan Potiphar, kapen in ri waj ro an Pharaoh Ri Egypt eo. Jehovah ear kajerammõn Joseph, im tokelik kar jitõñ e ion aolepen mweo imõn Potiphar. Tok ñan ien eo ear tõbar 20 yiõ dettan, Joseph ear oktak im “wulio ilo nememen im wulio ilo baotokin.” Lio belen Potiphar ear reel ibben, im ear kajeoñ kabo e. Joseph ear kalikar ijo ej jutak ie, im kamelele bwe ñan an errã ejamin juõn menin an karmijeteik wõt master eo an ak bareinwõt juõn “jerawiwi nae Anij.” Etke Joseph ear kõmmanwa ilo wãwen eo ear kõmmane?​—Genesis 39:​1-9, NW.

11, 12. Meñe ear ejelok kien eo ekwojarjar emwij kar je im letok im ej kamo lũñ im lejen, etke Joseph ear kõmmanwa einwõt an kar kõmman?

¹¹ Ealikar, bebe eo an Joseph ear jab bedbed ion mijak eo ñe armij ro ren kar loe. Family eo an Joseph rar jokwe ettolok, im jemen ear lemnak ear mij. Elañe Joseph ear bõk kunan ilo mour etton in lũñ, family eo an ejamin kar jelã. Juõn jerawiwi eo einwõt in emaroñ kar bareinwõt nojak jen Potiphar im maan ro ri karejaran, ke ekin wõr ien ko rekin jab bed imweo. (Jenesis 39:11) Ak, Joseph ear jelã bwe mwil rot in ear jab maroñ nojak jen Anij.

¹² Joseph emaroñ kar kõmmanwa kin men eo ear jelã kake kin Jehovah. Ejelok bere ear jelã ta eo Jehovah ear keañ kake ilo jikin kallip eo ilo Eden: “Kin men in leo e naj likit jemen im jinen, im edrep na iben lio belen: im irro naj juõn wõt kõniek.” (Jenesis 2:​24) Bareinwõt, Joseph ear einwõt wõr an jelã kin ta eo Jehovah ear jiroñ juõn king in Philistine eo ear kabo Sarah lio jibũn Joseph. Jehovah ear jiroñlok king eo: “Lo, kwe armij emij, kin kõra eo kwar bõke; bwe e belen juõn eman. . . . Im Ña, I ar drebij yuk jen am jerawiwi nae Iõ: kin men in I ar jab likit bwe kwon uñir lio.” (Jenesis 20:​3, 6) Inem ke Jehovah ejañin kar lelok juõn kien eo emwij je, eñjake ko an kin belele rar alikar. Eñjake in mour erreo eo an Joseph, koba ibben kõnan eo an ñan kamõnõnõik Jehovah, ear kõmman menin an kajekdon mour in lũñ.

13. Ilo mol, etke Joseph ear jab maroñ bõprae an iion lio belen Potiphar?

¹³ Bõtab, lio belen Potiphar, ear jab bõjrak, ear akwelap ñan e “ran otemjej” bwe en babu ibben. Etke Joseph ear jab baj bõpraiki wõt lio? Eokwe, einwõt juõn ri kamakoko, ear wõr eddo ko an ñan an kõmmani im ear jab maroñ ukõt wãwen eo an. Menin kamol eo jen katak ko kin mour ko an armij ro etto ej kwalok bwe wãwen eiki moko imõn Ri Egypt ro etto ear kõmman bwe en juõn menin aikwij ñan an ilok ibulõn mõttan eo elap ilo mweo ñan an tõbar room ko rej likit men ko na ie. Kin men in, Joseph ear jab maroñ bõpraiki lio belen Potiphar.​—Jenesis 39:10.

14. (a) Ta eo ear walok ñan Joseph elikin an kar ko jen lio belen Potiphar? (b) Ewi wãwen an kar Jehovah kajerammõn Joseph kin tiljek eo an?

¹⁴ Ear itok ran eo ke rar make ilo mweo. Lio belen Potiphar ear kõtõbarlok Joseph im lamõj: “Kwon babu iba!” Leo ear ko. Ke ear ilbõk kin an leo kajekdon e, lio ear naruõn kin kajeoñ in ankamejuri. Ta tokjen ko rar walok? Jehovah ear mõkaj ke im nawõnãn kin ialin tiljek eo an? Jab. Rar likit Joseph ilo prisõn im liãbe. (Jenesis 39:12-​20; Sam 105:18) Jehovah ear lo bwid in ekajet eo im ear leliñlok Joseph jen juõn prison ñan juõn jikin king. Ear oktak im armij eo kein karuo elap an kajur ilo Egypt im kar kajerammõn e kin juõn belen im ajiri ro. (Jenesis 41:14, 15, 39-​45, 50-​52) Bareinwõt, bwebwenato eo kin tiljek eo an Joseph rar je 3,500 yiõ ko remotlok ñan an ro ri karejaran Anij lemnak kake jen ien eo. Jerammõn ko remõn kin eddeb wõt ñan kien ko rewãnik an Anij! Eindeinlok, kij rainin jemaroñ jab ien otemjej lo tokjen ko remõkaj kin ad debij wõt tiljek eo kin mour erreo, ak jemaroñ liki bwe Jehovah ej loe im naj kajerammõn kij ilo ien eo ejejjet.​—2 Kronikel 16:9.

‘Bujen Ibben Mejen’ Job

15. Ta kar ‘bujen ibben mejen’ Job?

¹⁵ Bar juõn ri kejbãrok tiljek kar Job. Ilo ien melejoñ ko rar itok ion jen Devil eo, Job ear etale mour eo an im make keañ kin e bwe enaj mõnõnõ in bõk kaje eo elap elañe ear rupe kien, ibwiljin men ko jet, nan in kaiñi eo an Jehovah kin mour erreo ilo babu ibben don. Job ear ba: “I ar kõmõn juõn bujen iben meja; inem ekijkan aõ maroñ in reilok ñõn juõn virjin?” (Job 31:1) Ilo menin, melele eo an Job ej bwe ilo bebe eo an ñan kejbãrok tiljek ñan Anij, ear aikwij kõmman mejelan an bõprae an kalimjek enbwinin juõn kõrã. Bwebõta, enaj lo kõrã ro ilo mour eo ran otemjej im enaj jibañ ir elañe rej aikwij jibañ. Ak ikijen an lale ilo wãwen eo ñan jibadõk kõtõbar ko ñan mour in jiroñ im likao, ear jab kõtlok e make ñan an kõmmane menin. Mokta jen an kar ijjino melejoñ ko an, e kar juõn emaan eo ear lap an mweie, “elaptata ian ro otemjej nejin rear.” (Job 1:3) Bõtab, ear jab, kajerbal kajur in mweie eo an ñan kaal elõñ kõrã ro. Alikar, ear jab ikkure kin jerammõn eo ñan kajju buruen ilo kõtan babu ibben don ko rejjab emõn ibben kõrã jodikdik ro.

16. (a) Etke Job ej juõn joñok emõn ñan Christian ro ri belele? (b) Ewi wãwen kar mwilin maan ro ilo ran ko an Malachi kanuij einjuõn jen eo an Job, im ta kin rainin?

¹⁶ Kin menin, ilo ien ko remõn im bareinwõt ien ko rebin, Job ear kwalok tiljek ilo mour erreo. Jehovah ear lo menin im ear kajerammõn e. (Job 1:​10; 42:12) Job ej juõn joñok emõn ñan Christian ri belele ro, maan im kõrã jimor! Ejelok bwilõñ elap an Jehovah yokwe e! Ilo keidi, rainin elõñ ro mantiir elaplok an einlok wõt men eo ear walok ilo ran ko an Malachi. Ri kanan in ear kananaik wãwen eo elõñ maan ro ri belele rej ilok jen ro rejetair, ñan belek kõrã jodikdik ro. Lokatok eo an Jehovah kar kalibubu kin den in kemjalal an kõrã ri belele ro rar ilok jen ir, im Anij ear kananaik ro ear “etao air jerbal” ibben ro rejetair.​—Malachi 2:​13-​16.

Juõn Kõrã Jodikdik eo Emõn Mwilin

17. Ewi wãwen an Ri Shulem eo kar einwõt “juõn jikin kallip e kilik”?

¹⁷ Ri kejbãrok tiljek eo kein kajilu kar juõn kõrã jodikdik in Shulem eo ejañin kar belele. Ke ear jodikdik wõt im deeo, ejjab juõn ladik in shepherd eo wõt ear reel ibben ak bareinwõt juõn king emweie in Israel, Solomon. Ilo aolepen bwebwenato eo emõn kar jiroñ kake ilo Al eo an Solomon, Ri Shulem eo ear bed wõt ilo an emõn mwilin, im kin menin ear bõk kautiej eo an ro ibelakin. Solomon, meñe kõrã eo ear kajekdon e, Anij ear kakõrmol e ñan an je bwebwenato eo an kõrã eo. Shepherd eo kõrã eo ear yokwe ear bareinwõt kautiej e kin an emõn mwilin. Ilo juõn point leo ear ba bwe Ri Shulem eo kar einwõt “juõn jikin kallip e kilik.” (Al eo an Solomon 4:​12) Ilo Israel eo etto, jikin kallip ko raibujuij ewõr juõn kamõnõnõ ie kin bwilikõn mõñã ko rej eddek ion bũdej im ekajjo wãweiir, ut ko, im wijki ko reutiej. Jikin kallip rot in rekin worwore im rej maroñ deloñe wõt ikijen juõn kejam eo emwij lake. (Aiseia 5:5) Ñan shepherd eo, mour erreo im yokwe eo an Ri Shulem eo kar einwõt juõn jikin kallip rot in aibujuij eo an ejeja. Kõrã eo ear lukkun emõn mwilin. Yokwe eo an naj kar ñan wõt leo belen ilo ien ko tokelik.

18. Bwebwenato ko kin Joseph, Job, im Ri Shulem eo rej kakememej kij kin ta?

¹⁸ Ilo tiljek ilo mour erreo, ledik in Shulem eo ear likit juõn joñok emõn ñan Christian kõrã ro rainin. Jehovah ear lo im kamolol kin mwilin ledik in Shulem eo im ear kajerammõn e einwõt an kar kajerammõn Joseph im Job. Ñan ialin tel eo ad, kõmman ko air kin tiljek emwij jei ilo Nan in Anij. Ke jibadbad ko ad ñan kejbãrok tiljek rainin rejjab jei ilo Bible eo, Jehovah ewõr juõn an “book in ememej” ñan ro rej bukõt air kõmanman ankil an. Jen jab meloklok bwe Jehovah ej “lale” im lañliñ ke jej kate kij ilo ad tiljek in kejbãrok mour erreo.​—Malachi 3:​16, NW.

19. (a) Ewi wãwen ad aikwij lemnak kin mour erreo? (b) Ta eo naj konono kake ilo katak in tok juõn?

¹⁹ Meñe ro ejelok air tõmak remaroñ kajirere, jej lañliñ ilo bokake eo ad ñan Ri Kõmanman eo ad ej yokwe. Ewõr juõn ad mour eutiejlok, juõn mour erreo eo an Anij. Juõn menin utiej buru kake, juõn men ñan kaorõke. Ad debij wõt juõn jutak in mour erreo, jemaroñ mõnõnõ ilo kajerammõn eo an Anij im maroñ debij wõt juõn kejatdikdik eo emõn kin jerammõn ko ejelok jemlokair ilo ien ko rej itok. Ak ilo juõn wãwen emõn, ta eo jemaroñ kõmmane ñan ad bed wõt ilo mour erreo? Katak in tok juõn enaj konono kin kajitõk in elap tokjen.

[Kamelele ko itulal]

Kwo Maroñ ke Kamelele?

• Ta eo Bible ej katakin kake kin mantin babu ibben don?

• Ta eo nan in “lũñ” ej kitibuj kake ilo Bible eo?

• Ewi wãwen ad bõk tokjen jen ad bed wõt ilo mour erreo?

• Etke Joseph, Job, im ledik in Shulem eo rej joñok ko remõn ñan Christian ro rainin?

[Pija]

Joseph ear ko jen mour in lũñ

[Pija]

Ledik in Shulem eo kar einwõt “juõn jikin kallip e kilik”

[Pija]

Job ear kõmmane ‘juõn bujen ibben mejen’