KATAK 44
Aolep Raan ko Rel̦l̦ap im Holiday ko Rej ke Kabuñbũruon Anij?
Jeova ekõn̦aan bwe jen m̦õn̦õn̦õ kõn mour im ñan bar m̦õn̦õn̦õ ilo iien iiãio ko. Bõtab aolep raan ko rel̦l̦ap im holiday ko rej ke kabuñbũruon Jeova? Ewi wãween jemaroñ kwal̦o̦k yokwe eo ad ñan Jeova ikijjeen men in?
1. Etke elõñ iaan raan ko rel̦l̦ap im holiday ko rejjab kabuñbũruon Jeova?
Kwõmaroñ nãj bwilõñ bwe elõñ iaan raan ko rel̦l̦ap im holiday ko rej n̦ae katak ko ilo Baibõl̦ eo ak rej itok jãn m̦antin ri-peikan. Iien kein remaroñ bar ekkejell̦o̦k ippãn kabuñ ko reriab. Remaroñ ekkejell̦o̦k ñan anijnij ak remaroñ pedped ioon l̦õmn̦ak eo bwe ewõr juon an ippãn armej me eban mej. Jet iaan raan ko rel̦l̦ap im holiday ko rej pedped ioon anijnij ak tõmak eo bwe Anij ej karõk men otemjej. (Aiseia 65:11, UBS) Jeova ej kakkõl ri-karejar ro an im ba: “Kõjenolo̦k kom̦ make . . . im bõjrak jãn ami jibwe men eo ettoon.”—2 Korint 6:17.a
2. Ewi wãween an Jeova eñjake kõn raan ko rel̦l̦ap im holiday ko me rej lel̦o̦k nõbar eo ejjab tõllo̦kũn an armej bõke?
Jeova ej kakkõl kõj bwe jen jab po ilo aujiid eo kõn ad “lõke armej.” (Riit Jeremaia 17:5.) Ewõr jet raan ko rel̦l̦ap rej ñan kautiej ak nõbar ri-tõl ro ak rũttarin̦ae ro. Jet raan rej kautiej men ko rej jutak kõn juon aelõñ ak kõn an kar juon aelõñ jutak im makel̦o̦k iaan. (1 Jon 5:21) Ak ewõr raan ko jet rej ñan kowõnm̦aanl̦o̦k m̦akũtkũt ko an kien ak m̦akũtkũt ko an armej. En kar ewi wãween an Jeova eñjake el̦aññe etarjen joñan ad lel̦o̦k kautiej ñan juon armej ak doulul, el̦aptata ñe rej kowõnm̦aanl̦o̦k l̦õmn̦ak ko me rej jum̦ae karõk ko an Anij?
3. M̦anit ta ko rej kõm̦m̦an an iien iiãio ko jab em̦m̦an?
Baibõl̦ ej kõmo̦ “idaak l̦e jãn joñan, pãd ilo iien iiãio ko robrak kõn m̦anit nana, [im] koba ippãn doon ñan baj kadek wõt.” (1 Piter 4:3) Ilo jet iien iiãio ko, ewõr ro rej kwal̦o̦k aer jaje irooj ioer make im rej kõm̦m̦ani m̦anit ko rettoon. Bwe jen dãpij wõt jem̦jerã eo ad ippãn Jeova, jej aikuj in lukkuun kattol̦o̦ke kõj jãn m̦anit kein rettoon.
KAM̦WILAL̦L̦O̦K AM̦ MEL̦EL̦E
Lale ewi wãween kwõmaroñ kabuñbũruon Jeova ikijjeen am̦ kõm̦m̦ani pepe ko remãlõtlõt kõn raan ko rel̦l̦ap im holiday ko.
4. Jab bõk kun̦aam ilo raan ko rel̦l̦ap ak holiday ko me rejjab kautiej Jeova
Riit Epesõs 5:10, innem bwebwenato kake kajjitõk kein:
Ta eo jej aikuj in lukkuun lale ñe jej pepe el̦aññe jenaaj kobal̦o̦k ilo juon holiday?
Raan ta ko rel̦l̦ap ak holiday ko me rebuñbuñ ilo jikin eo kwõj jokwe ie?
Kwõl̦ak lale holiday kein rej ke kabuñbũruon Jeova?
Ñan waanjoñak, kwõnañin ke kar l̦õmn̦ak kõn wãween an Anij l̦õmn̦ak kõn birthday ko? Baibõl̦ ejjab kwal̦o̦k ñan jidik kõn an ri-karejar ro an Jeova kõm̦m̦ani raanin birthday ko aer. Ijoke, ej kwal̦o̦k kõn ruo armej me rar jab karejar ñan Jeova im rar kõm̦m̦ani raanin birthday ko aer. Riit Jenesis 40:20-22 im Matu 14:6-10. Innem bwebwenato kake kajjitõk kein:
Ta ko rej ãinl̦o̦kwõt juon ilo iien birthday kein ruo?
Ekkar ñan bwebwenato kein ilo Baibõl̦, kwõl̦ak lale ewi wãween an Jeova eñjake kõn birthday?
Meñe ãindein, ak kwõmaroñ l̦õmn̦ak wõt ippam̦ make, ‘M̦ool ke Jeova ej kea el̦aññe ij kobal̦o̦k ilo iien birthday ko ak holiday ko jet me rej n̦ae katak ko ilo Baibõl̦?’ Riit Exodus 32:1-8. Innem kõjo̦e PIJAIN ALWÕJ eo innem bwebwenato kake kajjitõk kein:
Etke jej aikuj in kaalikkar ñan kõj make ta men ko rej kabuñbũruon Jeova?
Ewi wãween jemaroñ kõm̦m̦ane men in?
Wãween bwe jen jel̦ã el̦aññe juon raan el̦ap ak holiday ejjab kabuñbũruon Anij
Ej ke pedped ioon katak ko rej n̦ae Baibõl̦ eo? Bwe kwõn jel̦ã, kõm̦m̦an etale ko ñan lale ia eo holiday eo ak raan eo el̦ap ear jebar im wal̦o̦k jãne.
Etarjen joñan ke an kautiej armej, doulul ko, ak annañ ko rej jutak kõn juon aelõñ? Jej nõbar im kautiej Jeova ilõñin jabdewõt men ak armej, im jej lõke e ñan n̦amejal̦an aolep apañ ko ilo lal̦ in.
M̦anit im imminene ko an raan in ak holiday in rej ke jum̦ae kien ko ilo Baibõl̦? Jej aikuj in erreo ilo wãween ad l̦õmn̦ak, kõm̦m̦an, im kõnono.
5. Jipañ ro jet ñan kautiej tõmak eo am̦
Emaroñ pen ñan ba jaab ñe ro jet rej iuun eok ñan kobal̦o̦k ilo raan ko rel̦l̦ap im holiday ko me rejjab kabuñbũruon Jeova. Kõmel̦el̦eik pepe eo am̦ ilo juon wãween me ej kwal̦o̦k meanwõd im ejouj. Ñan lale juon waanjoñak kõn wãween eo kwõmaroñ kõm̦m̦ani men in, kõjo̦e PIJAIN ALWÕJ eo.
Riit Matu 7:12, innem bwebwenato kake kajjitõk kein:
Ekkar ñan eoon in, kwõj aikuj ke ba ñan baam̦le eo am̦ me rejjab rũttõmak bwe rejjab maroñ bõk kun̦aaer ilo raan ko rel̦l̦ap im holiday ko?
Ta ko kwõmaroñ kõm̦m̦ani ñan kaenõm̦m̦an im kaalikkar ñan baam̦le eo am̦ bwe meñe kwõjjab bõk kun̦aam ilo raan ko rel̦l̦ap im holiday ko, ak kwõj yokwe im kaorõk er?
6. Jeova ekõn̦aan bwe jen m̦õn̦õn̦õ
Jeova ekõn̦aan bwe jen m̦õn̦õn̦õ ilo iien iiãio ko ippãn baam̦le ko ad im ro m̦õttad. Riit Ekklisiastis 8:15, innem bwebwenato kake kajjitõk in:
Ewi wãween an eoon in kwal̦o̦k bwe Jeova ekõn̦aan bwe jen m̦õn̦õn̦õ?
Jeova ekõn̦aan bwe armej ro an ren limo im m̦õn̦õn̦õ ilo aer iiãio ippãn doon. Kõjo̦e PIJAIN ALWÕJ eo ñan lale ewi wãween an alikkar men in ilo kweilo̦k ko ammim rel̦l̦ap.
Riit Galetia 6:10, innem bwebwenato kake kajjitõk kein:
Jej aikuj in ke bõk kun̦aad ilo raan ko rel̦l̦ap im holiday ko rebuñbuñ ñan “kõm̦m̦an em̦m̦an” ñan ro jet?
Ta eo enaaj l̦apl̦o̦k an kam̦õn̦õn̦õiki eok: Ñe kwõj aikuj in lel̦o̦k menin lel̦o̦k eo kõnke ej juon holiday ke, ak ñe kwõj lel̦o̦k menin lel̦o̦k eo kõnke kwõj m̦õn̦õn̦õ in lel̦o̦k?
Jãn iien ñan iien elõñ Ri-Kõnnaan ro an Jeova rej kõm̦m̦ane iien kam̦õn̦õn̦õ ko ñan ajri ro nejier, im jet iien rej bar lel̦o̦k mennin lel̦o̦k ko ñan er. El̦aññe ewõr nejũm̦, ta jet iaan men ko rekam̦õn̦õn̦õ kwõmaroñ kõm̦m̦ani ñan er?
JET ARMEJ REJ BA: “Ejjab aorõk ia eo raan ko rel̦l̦ap im holiday ko rar ejaak im wal̦o̦k jãne. Men eo wõt eaorõk ej ad m̦õn̦õn̦õ ippãn baam̦le ko ad im ro m̦õttad.”
Ta eo kwõn kar ba?
TARLEP IN KATAK EO ILO TUKADU
Jeova ekõn̦aan bwe jen limo im m̦õn̦õn̦õ ippãn baam̦le ko ad im ro m̦õttad. Bõtab ebar kõn̦aan bwe jen jab bõk kun̦aad ilo raan ko rel̦l̦ap im holiday ko me rejjab kabuñbũruon.
Ãlij
Ta kajjitõk ko jemaroñ kajjitõk ippãd make ñan lale el̦aññe juon raan el̦ap ak holiday ejjab kabuñbũruon Jeova?
Ewi wãween jemaroñ jipañ baam̦le eo ad im ro m̦õttad ñan mel̦el̦e kõn pepe ko ad ikijjeen holiday ko?
Ta eo ej kam̦ool ñan eok bwe Jeova ekõn̦aan bwe jen lo m̦õn̦õn̦õ im limo kõn men ko jej kõm̦m̦ani?
KAL̦APL̦O̦K AM̦ MEL̦EL̦E
Lale jet iaan raan ko rel̦l̦ap im holiday ko Kũrjin ro rejjab bõk kun̦aaer ie.
“Why Don’t Jehovah’s Witnesses Celebrate Certain Holidays?” (Katak eo ilo online)
Lale emãn un ko unin kõmij tõmak bwe birthday ko rejjab kabuñbũruon Anij.
“Why Don’t Jehovah’s Witnesses Celebrate Birthdays?” (Katak eo ilo online)
Lale wãween an ajri ro me rej yokwe Jeova maroñ kabuñbũruon ilo iien holiday ko.
Elõñ milien Kũrjin ro em̦õj aer pepe ñan jab Kũrijm̦õj. Ta aer l̦õmn̦ak kõn pepe in rar kõm̦m̦ane?
“They Found Something Better” (The Watchtower, December 1, 2012)
a Lale Kõmel̦el̦e 5 ñan katak ta ko kwõmaroñ kõm̦m̦ani ilo raan ko rel̦l̦ap im holiday ko.