Wãwen An Traveling Overseer Ro Jerbal Einwõt Ri Kõmõñã Ro Retiljek
“Einwõt jabrewõt iami ear bõk menin lewoj, en jibõñ dron kake, einwõt dri kõmñã remõn an joij an Anij, elõñ wãwen.”—1 PETER 4:10.
1, 2. (a) Ewi wãwen am naj kar kameleleik nan in “ri kõmõñã”? (b) Wõn ro rekoba ibwiljin ri kõmõñã ro Anij ej kajerbal ir?
JEHOVAH ej kajerbal Christian ri tiljek ro einwõt ri kõmõñã ro. Juõn ri kõmõñã ekkã an juõn ri jerbal eo ej bõk eddon armij ro ilo mweo. Emaroñ bareinwõt bõk eddon jerbal in business ko an master eo an. (Luke 16:1-3; Galetia 4:1, 2) Jesus ear naetan jar in ri kabit ro retiljek ion lõl “ri kõmõñã eo etiljek.” Ñõn ri kõmñã in emwij an lelok “men ko otemjej an,” ekoba makitkit in jerbal in kwalok nan eo an Ailiñ eo.—Luke 12:42-44; Matthew 24:14, 45.
2 Ri jilek Peter ear ba bwe aolep Christian rej ri kõmõñã ro kin joij eo an Anij rej kalikari ilo elõñ wãwen ko. Kajjojo Christian ewor juõn jikin eo emaroñ kõmmõne juõn jerbal in ri kõmõñã etiljek ie. (1 Peter 4:10) Christian ri kabit elder ro rej ri kõmõñã, im ibwiljier rej traveling overseer ro. (Titus 1:7) En ewi wãwen ad lemnak kin traveling elder rein? Ta kadkad ko im mejenkajjik ko ej aikwij wor ibbeir? Im ewi wãwen air maroñ kõtõbrak men eo emõntata?
Kamolol kin Jerbal eo Air
3. Etke jemaroñ naetan traveling overseer ro “ri kõmõñã ro remõn”?
3 Ilo an kar jeje ñõn juõn traveling overseer im kõrã eo belen, juõn Christian ri belele ear ba: “Kimij kõnan kwalok am kamolol kin aolep ien ko im yokwe eo kwar letok ñõn kim. Einwõt juõn family, kim ar bõk elap tokjen jen aolep kakajur im kakabilek ko. Kim jela bwe kimij aikwij wõnmanlok wõt ilo eddeklok ilo jitõb, ak kin jibañ eo an Jehovah im kin jimjen jimjatin maan im kõrã ro einwõt kwe, inebata im abañ ko rej kõmmõn menin air bidodolok.” Nan ko einwõt kein ekkã air walok kinke traveling overseer ro rej bõk juõn itoklimo ibbeir kin ri tõmak ro mõttair, einwõt juõn ri kõmõñã eo emõn ej kejbarok aikwij ko an armij ro ilo mweo. Jet rej ri konono ro emõn air konono. Elõñ elaplok air tijemlok ilo jerbal in kwalok nan, ke ro jet rej jela kake ir kin okmãnãn im yokwe eo air. Ilo air kaddeklok im kajerbal kain menin letok rot in ilo kwalok nan ñõn ro jet, traveling overseer ro emaroñ jimwe naetair “ri kõmõñã ro remõn.”
4. Ta kajitõk eo naj lemnak kake kiõ
4 “Men eo jej lale ilo ri kõmõñã ro ej bwe ren lo an juõn emaan tiljek,” ri jilek Paul ear jeje. (1 Korint 4:2 NW) Jerbal im lelok jibañ Christian ro mõttad ilo bar juõn congregation jen week ñõn week ej juõn men eo einjuõn im jerammõn eo ekalõñliñ. Mekarta, ej bareinwõt juõn eddo elap. Inem, ewi wãwen an traveling overseer ro maroñ tiljek im lo tõbrak ilo jerbal in kõmõñã eo air?
Lo Tõbrak ilo Jerbal in Kõmõñã eo air
5, 6. Etke jar eo ej atartar ion Jehovah elap an aorõk ilo mour eo an juõn traveling overseer?
5 Jar eo ej atartar ion Jehovah elap tokjen ñõn an traveling overseer ro rej ri kõmõñã lo tõbrak. Kin schedule eo air im elõñ eddo ko, jet ien remaroñ eñjake air mõk. (Keiri 2 Korint 5:4.) Inem rej aikwij jerbal ekkar ñõn al eo an ri jeje psalm: “Kwon jolok inek eo am ion Jeova, im E naj baur yuk. E jamin likit ro remõn bwe ren makõtkit.” (Psalm 55:22) Kainemõn, bareinwõt, rej nan kein an David: “Jerammõn ñõn Jehovah, eo ej ineke ine eo ñõn kij ran otemjej”—Psalm 68:19.
6 Ia eo Paul ear bõk an kajur ñõn kejbarok eddo ko an ilo jitõb? “I maroñ in kõmmõn men otemjej ilo Eo ej kakajur iõ,” ear jeje. (Pilippai 4:13) Aet, Jehovah Anij kar e eo unjen kajur eo an Paul. Ilo wãwen in lok, Peter ear kakabilek: “Elañe jabrewõt armij ej konono, en konono einwõt nan ko an Anij; elañe jabrewõt ej korijer en korijer kin kajur eo Anij ej lelok bwe ilo men otemjej ren kaibujuij Anij kin Jisos̃ Kraist.” (1 Peter 4:11) Juõn brother eo ear juõn traveling overseer iumin elõñ yiõ ko ear kalikar aikwij eo ñõn atartar ion Anij, ke ej ba: “Ien otemjej reilok ñõn Jehovah ilo jerbale abañ ko, im bukõt jibañ eo an dolul eo an.”
7. Ewi wãwen an jokkin wõt juõn ej jelet jerbal eo an juõn traveling overseer?
7 Jokkin wõt juõn ej menin aikwij ñõn juõn traveling overseer eo ej lo tõbrak. Einwõt Christian ro jet, ej kate e ñõn an “lukkun lale men ko elaplok tokjeir.” (Pilippai 1:10)a Ñe ewor an elder ro ilo bukwon eo kajitõk kin juõn men, ej menin meletlet ñõn air bõk kakabilek ibben circuit overseer eo ej lolok ir. (Jabõn Kennan 11:14; 15:22) Einwot jemaroñ kõtmene kake, etale ko an rejokkin wõt juõn im kakabilek ko an ekkar ñõn Jeje ko enaj mol an lap air jibañ ke elder ro rej wõnmanlok wõt im jerbale wãwen eo elikin an illok jen congregation eo. Kobalok ibben lemnak ko eirlok wõt kein, Paul ear jiroñ Timothy: “Im men ko kw’ar roñ jen ña iman mejen elõñ dri kennan, men kein kwon likiti na ibben armij retiljek, ro renaj bareinwõt maroñ in katakin ro jet.”—2 Timothy 2:2.
8. Etke katak Bible, etale, im kalmenlokjen kake elap tokjen?
8 Katak Jeje ko, etali, im kalmenlokjen kaki rej menin aikwij ilo lelok kakabilek eo emõn. (Jabõn Kennan 15:28) Juõn district overseer ear ba: “Ñe ij kwelok ibben elder ro, kim traveling overseer kimij jab aikwij mijak in kwalok bwe kimij jab jela uak eo ñõn juõn kajitõk.” Bõk jibadbad eo ñõn tõbar “lemnak eo an Christ” ilo juõn men ej kõmmõn an maroñ lelok kakabilek eo ej bedbed ion Bible bwe enaj jibañ ro jet loor ankilan Anij. (1 Korint 2:16) Jet ien juõn traveling overseer ej aikwij jeje ñõn Watch Tower Society ñõn ial in tel. Ilo elõñ wãwen ko, liki Jehovah im yokwe mol eo elaplok aorõkiir jen men eo jej kabwilõñ ak karel ro jet kaki. Jen an kar itok kin “juõn konono im meletlet,” Paul ear jino jerbal in kwalok nan eo an ilo Korint “ilo mõjino im mijak, im ilo wurirrir.” Menin ear kõmmõn ke menin an jab bolemen? Ilo lale, menin ear jibañ ri Korint ro bwe en wor air tõmak, “jab ilo meletlet in armij, a ilo kajur an Anij.”—1 Korint 2:1-5.
Kadkad ko Jet Reaorõk
9. Etke lemnak kin ro jet ej menin aikwij ñõn traveling elder ro?
9 Lemnak kin ro jet ej jibañ traveling overseer ro ñõn tõbar tokjen ko remõn. Peter ear rejañ aolep Christian ro bwe ren ‘kwalok eñjake eo an eo mõttair,’ ak “ettã buru.” (1 Peter 3:8, footnote) Juõn circuit overseer ej eñjake aikwij eo bwe ‘en itoklimoen ilo jabdewõt armij ilo congregation eo im bwe en mol an lale ir.’ Kin juõn jitõb eo einlok wõt in, Paul ear je: “Komin lõñliñ ibben ro rej lõñliñ; im jañ ibben ro rej jañ.” (Rome 12:15) Lemnak rot in ej kammakit traveling overseer ro ñõn air kate ir jibadõk air jela abañ ko im wãwen ko an ri tõmak ro mõttair. Inem remaroñ lelok kakabilek in Jeje ko rej menin kalek ko rej maroñ emõn air lukkun kõtõbrak elañe rej jerbale. Juõn circuit overseer eo elaplok an kwalok an lemnak kin ro jet ear bõk juõn letter jen juõn congregation iturin Turin, Italy: “Elañe kwo kõnan bwe en wor itoklimo, en itoklimoõm ilo ro jet; elañe kwoj kõnan bwe kwon kamõnõnõ, kwon mõnõnõ; elañe kwoj kõnan bwe ren yokwe yuk, kwon yokwe; elañe kwoj kõnan bõk jibañ, kwon bojak in jibañ. Eñin men eo kim ar katak jen yuk circuit overseer!”
10. Ta eo circuit im district overseer ro rar ba kake kin ettã buru, im ta joñok eo Jesus ear kõmmõne ikijen menin?
10 Ettã buru im bidodo kebake ej jibañ traveling overseer ro ñõn kõmmõn elap emõn. Juõn circuit overseer ear loe: “Elap an aorõk ñõn debij wõt juõn buru ettã.” Ear kakkil traveling overseer ro rekãl: “Jab kõtlok bwe en lap ami rel ibben brother ro elaplok kilan air karelel kin men eo remaroñ kõmmõne ñõn kom, ak kõmmõn joñan jimjera eo ami ñõn rein, ak kate kom aolep ien ñõn jerbal ibben ro jet ilo ejelok kalijeklok.” (2 Kronikel 19:6, 7) Im juõn traveling overseer eo emol an ettã buruen ejamin wor juõn lemnak in burolap kin aorõk eo an make einwõt juõn eo ej itok ikijen Society eo. Juõn district overseer ear jimwe an kwalok an lemnak: “Kwon ettã buru en im mõnõnõ in roñjake brother ro jet. Aolep ien en bidodo kebake.” Einwõt armij eo elaptata ear mour ion lõl, Jesus Christ emaroñ kar kõmmõn bwe en jab emõn eñjake ko an armij ro, ak ear ettã buru im bidodo kebake bwe meñe ajiri ro rar jokõmmõn ilo an bed. (Matthew 18:5; Mark 10:13-16) Traveling overseer ro rej kõnan bwe ajiri ro, jodikdik ro, ro reritto—emol jabdewõt im kajjojo armij ilo congregation eo—ñõn eñjake air anemkwoj ñõn kebak ir.
11. Ñe ej menin aikwij, ta eo emaroñ walok kin juõn jolok bwid?
11 Bwebota, “bwe ilo elõñ men ko jej otemjej tibñil,” im ejelok traveling overseer ej deod jen an kõmmõn bwid. (James 3:2) Ñe rej kõmmõn bwid, juõn jolok bwid eo emol ej lelok juõn joñok emõn kin ettã buru ñõn elder ro jet. Ekkar ñõn Jabõn Kennan 22:4, “wõnãn ettã buru im mijõk Jeova, mweiuk im nebar im mour.” Im ro otemjej ri karejaran Anij rejjab aikwij in ‘ettã buru ilo air etetal ibben Anij eo air ke’? (Micah 6:8, 1960 Edition) Ke kar kajitõk ibben kain kakabilek rot eo enaj kar lelok ñõn juõn traveling elder eo ekãl, juõn circuit overseer ear kwalok an lemnak: “En lap kile im kautiej aolep brother ro, im watõk ir einwõt remõnlok jen kwe. Enaj lap am katak jen brother ro. Bed wõt ilo ettã buru. Kwon kwe wõt. Jab lemnak in utiej.” —Pilippai 2:3.
12. Etke kijejeto ñõn jerbal eo an Christian elap tokjen?
12 Kijejeto kin jerbal in kwalok nan eo an Christian ej kalaplok melelen nan ko an juõn traveling overseer. Ilo mol, ñe e im kõrã eo belen rej kwalok joñok ko in kijejeto ilo jerbal in kwalok nan eo, elder ro, kõrã ro beleir, im aolep ro jet ilo congregation eo rej bõk kakajur ñõn kalikar kijejeto ilo jerbal in kwalok nan eo air. “Kijejeto ñõn jerbal eo,” juõn circuit overseer ear kaketak. Ear kobaiktok: “Iar lo bwe, an laplok kijejeto ilo juõn congregation ilo jerbal in kwalok nan, eietlok abañ ko rej iioni.” Bar juõn circuit overseer ear ba: “Ij tõmak bwe elañe elder ro rej jerbal ilo jerbal in kwalok nan eo ibben maan im kõrã ro jimjen jimjatin im jibañ ir lo lõñliñ ilo jerbal in kwalok nan eo, menin enaj walok tokjen ilo ainemõn in lemnak im lap juburu ilo karejar ñõn Jehovah.” Ri jilek Paul ear ‘beranlok ilo an Anij bwe en konono kin gospel an Anij ñõn ri Tessalonika ilo niknik elap.’ Ejelok bwilõñ rar lo ememlokjen in ien lolok ko an im makitkit in kwalok nan eo an im rar kõnan bar lo e!—1 Tessalonika 2:1, 2; 3:6.
13. Ta eo juõn traveling overseer en likit ilo an lemnak ñe ej jerbal ibben Christian ro mõttan ilo kwalok nan?
13 Ñe ej jerbal ibben Christian ro mõttan ilo jerbal in kwalok nan, juõn traveling overseer en lemnak kin wãwen ko air im joñan maroñ ko air. Meñe lemnak ko an remaroñ jibañ, e jela bwe jet remaroñ ikkũmkũm ñe rej kwalok nan ibben juõn elder eo ewor an iminene. Kin menin, ilo jet wãwen ko, nan in kakajur emaroñ laplok an jibañ jen nan in kakabilek. Ñe ej etal ibben ri kwalok ro ak pioneer ro ñõn juõn katak Bible, remaroñ kõnan bwe e eo en kõmmõne katak eo. Menin ej einlok wõt ñõn kamineneik ir kin jet wãwen ko ñõn kakõmõnmõnlok kilen air katakin.
14. Etke jemaroñ ba bwe traveling overseer ro ewor air kijejeto menin ej lujur ro jet?
14 Traveling overseer ro ewor air kijejeto rej kaketak ro jet bwe ren bar kijejeto. Juõn circuit overseer ilo Uganda ear etetal ibwiljin bukun wijki eo emejal iumin juõn hour bwe en illok ibben juõn brother lok ñõn juõn katak Bible eo jidik wõt an wor wõnmanlok ie. Ilo ien eo rej etetal joñan an lap an wũt ke rar tokeaklok rar kanuij moujlep lok ñõn kiliir. Ke family eo jiljino uan rar jela bwe ri lolok eo kar juõn traveling overseer, rar kanuij in bwilõñ. Rar jela bwe ri kaki ro in kabuñ eo air rejamin kar kwalok kain itoklimo rot in ilo bwij eo. Ilo Sabbath eo tok juõn, rar bed ilo kwelok eo air jinointata im kwalok air kõnan oktak bwe ren Ri Kennan ro an Jehovah.
15. Ta wãwen eo emõn juõn circuit overseer eo ewor an kijejeto ilo Mexico ear lõñliñ kake?
15 Ilo Mexico ilo bukwon in Oaxaca, juõn circuit overseer ear kõmmõne juõn jibadbad eo ejelok kar lukkun kõtmene kin e kake. E ar kõmmõn karõk ñõn an bed wõt ilo juõn jikin kalbuj iumin emen boñ ñõn an maroñ lolok juõn kumi in jiljilimjuõn ri kalbuj ro rar oktak im ri kwalok ro an Ailiñ eo. Iumin elõñ ran ko ear illok ibben ri kalbuj rein ke rej kwalok nan jen juõn cell ñõn bar juõn cell ilo jikin kalbuj eo im kõmmõn katak Bible. Kin itoklimo eo ear kwalok, jet ian ri katak rein ear emõn air etal wõt ñõn lukkun boñen eo. “Ilo jemlokin ien lolok eo, ri kalbuj ro im ña kim ar eñjake am obrak kin lõñliñ itok jen wãwen kakajur eo,” circuit overseer in ewor an kijejeto ej jeje.
16. Etke elap tokjen ñe traveling overseer ro im kõrã ro beleir rej lelok kakajur?
16 Traveling overseer ro rej kajeoñ bwe ren kakajur. Ke Paul ear lolok congregation ko ilo Macedonia, ear ‘kakajur ir kin elõñ nan.’ (Jerbal 20:1, 2) Nan in kakajur ko emaroñ lap air jibañ ilo tel ro redik im ritto jimor ñõn mejenkajjik ko ilo jitõb. Ilo juõn branch office elap an Watch Tower Society, juõn etale kar kõmmõne ear kalikar bwe circuit overseer ro rar kaketak iturinlok 20 percent in volunteer ro ñõn air bõk jerbal in full-time. Ikijen joñok eo emõn an kõrã eo einwõt juõn full-time ri keañ an Ailiñ eo, lio belen traveling overseer eo ej bareinwõt kamol an juõn unjen elap ilo kaketak.
17. Ewi wãwen an juõn circuit overseer eo eritto eñjake kin jerammõn eo an ilo an lelok jibañ ñõn ro jet?
17 Ro reritto im ro emõjno air elaptata air aikwij kakajur. Juõn circuit overseer eo eritto ej jeje: “Uan jerbal eo aõ im ej ejaake juõn lõñliñ elap eo ituloa ej jerammõn eo ñõn lelok jibañ ñõn ro rej jowan im ro remõjno kin air ritto ibwiljin bwij eo an Anij. Nan ko ilo Rome 1:11, 12 ewor melele eo einjuõn ie ñõn ña, ke ij bõk kaketak im kajur eo elap im ilo ejja ien eo wõt ke ij ‘lelok menin lelok eo ilo jitõb ñõn armij rot in ñõn air maroñ kõmmõn bwe ren bin.’”
Ãjinkij ko Kin Jerbal eo Air Ekalõñliñ
18. Ta mejenkajjik ko ilo Jeje ko ewor ibben traveling overseer ro?
18 Traveling overseer ro ebed ibbeir itoklimo ko remõntata ilo burueir ñõn jibañ ri tõmak ro mõttair. Rej kõnan kakajurlok congregation ko im kalek ir ilo jitõb. (Jerbal 15:41) Juõn traveling overseer ej kate jerbal “ñõn lelok kakajur, lelok kaemlolo, im kalaplok juõn kõnan ñõn kajejjet kitien jerbal in kwalok nan eo im etal wõt im jerbale nan in kaiñi ko ilo Bible.” (3 John 3) Bar juõn ej bukõt bwe en kom̃mõn bwe en jokkin wõt juõn ri tõmak ro mõttan ilo tõmak eo. (Kolosse 2:6, 7) Kememej bwe traveling overseer eo ej juõn “mõttad eo emol,” im jab juõn master ion tõmak eo an ro jet. (Pilippai 4:3; 2 Korint 1:24) Lolok eo an ej juõn ien ñõn kakajur im jerbal ko relaplok, bareinwõt juõn ien emõn ñõn jar in elder ro ñõn eliji wõnmanlok eo ej kõmmõn im lemnak kin mejenkajjik ko ñõn ien ko rej itok. Ikijen nan ko an im joñok eo an, ri kwalok ro an congregation eo, pioneer ro, ministerial servant ro, im elder ro remaroñ kõtmene ñõn kalek ir im lujur ir ñõn an jerbal eo ebed iman. (Keiri 1 Tessalonika 5:11.) Inem, kin aolepen buruem jurake lotok ko an circuit overseer eo, im bõk aolepen tokjen jerbal eo district overseer eo ej letok.
19, 20. Ewi wãwen an traveling overseer ro im kõrã ro beleir bõk ãjinkij kin jerbal in tiljek eo air?
19 Traveling overseer ro im kõrã ro beleir remweie kin ãjinkij eo kin jerbal eo air etiljek, im remaroñ liki bwe Jehovah enaj kajerammõn ir kin jerbal eo emõn rej kõmmõne. (Jabõn Kennan 19:17; Epesõs 6:8) Georg im Magdalena rej ruo ri belele reritto ro rar jerbal iumin elõñ yiõ ko ilo jerbal in itoitak. Ilo juõn kwelok elap ilo Luxembourg, Magdalena juõn armij ear kebak e eo ear kwalok nan ñõn e elõñlok jen 20 yiõ ko lok iman. Itoklimo eo an kõrã in ri Jew in ilo mol eo ear jarjar jen Bible literature eo Magdalena ear likiti ibben, im ilo ien ko tokelik kõrã eo ear baptais. Georg juõn sister ilo jitõb ear kebak e eo ej kememej lolok eo an ñõn mweo imõn enañin 40 yiõ ko remotlok. An emõn an kar jarõk kamelele eo an kin news eo emõn menin ear tel irro jimor kõrã eo im leo belen ñõn air bõk mol eo. Ilo jab maroñ ba, irro jimor Georg im Magdalena ear ellã jen joñan airro lõñliñ.
20 Jerbal in kwalok nan eo ekouwa an Paul ilo Epesõs ear bõktok elap lõñliñ ñõn e im emaroñ kar kamakit e ñõn an eliji nan ko an Jesus: “Mõnõnõ in lelok elap jen bõk.” (Jerbal 20:35) Ke jerbal in itoitak eo emakijkij an koba lelok, ro rej bõk kwunair ie rej lo mõnõnõ, elaptata ñe rej etal im kile tokjen ko remõn rej walok jen jerbal eo air. Juõn circuit overseer eo ear jibañ juõn elder eo ear ebwer kar jiroñ e ilo juõn letter: “Kwe kwar juõn ‘jibañ in kakajur’ elap ilo mour in jitõb eo aõ—elaplok jen am jela. . . . Kwo jamin lukkun jela ewi joñan am kar jibañ juõn Asaph eo ilo ran kein, eo ‘neen rar nañin jir.’”—Kolosse 4:11; Psalm 73:2.
21. Etke kwo maroñ kar ba bwe 1 Korint 15:58 ej jerbal ñõn makitkit ko an traveling overseer ro?
21 Juõn Christian eo eritto eo ear bed ilo jerbal in circuit iumin elõñ yiõ ko e kõnan lemnak kin 1 Korint 15:58, ijo Paul ear rejañ: “En rim buruemi, im kibria, im en wor tokjemi ien otemjej ilo jerbal eo an Iroij.” Traveling overseer ro emol elap air jerbal ilo jerbal eo an Iroij. Im elap ad kamolol bwe rej jerbal ilo elap lõñliñ einwõt ri kõmõñã ro retiljek in joij eo an Jehovah!
[Kamelele eo itulal]
a Lale katak eo “Kwo Maroñ Ke Mõnõnõ Kin Joñan eo Elap ñõn Am Kõmmõne?” ilo Imõniaroñroñ eo, May 15, 1991, peij 28-31.
Ewi Wãwen Am Naj Kar Uak?
◻ Etke jemaroñ lemnak kin traveling overseer ro bwe rej einwõt “ri kõmõñã ro remõn”?
◻ Ta jet ian men ko rej jibañ circuit im district overseer ro ñõn kõtõbrak elap emõn?
◻ Etke ettã buru im kijejeto ekanuij lap tokjeir ñõn ro rej bõk kwunair ilo jerbal in itoitak?
◻ Ta mejenkajjik ko remõn ewor ibben traveling overseer ro?
[Pija eo ilo peij 27]
Traveling overseer ro rej jibadõk air kakajur ri tõmak ro mõttair
[Pija ko ilo peij 28]
Dik im ritto jimor remaroñ bõk tokjen jen air tel air ibben traveling overseer ro im kõrã ro beleir
[Pija eo ilo peij 29]
Kijejeto eo an traveling overseer eo ilo jerbal in kwalok nan ej kalaplok kijejeto ilo ro jet