Jen Aolep Jibañ Don

1. Ta jerammõn eo ejej uan overseer ro rej itoitak rej letok ilo ien lotok ko?

¹ Ri jilek Paul ear jejelok ñan congregation eo ilo Rome: “Kinke ekanuij lab aõ kõnan lo kom, bwe in kakajur kom kin menin jerammõn in jitõb. Melele eo aõ eñin: bwe jen jimor jibañ dron; aõ tõmak en jibañ kom, im ami tõmak en jibañ iõ.” (Rom. 1:11, 12) Lotok ko an overseer ro rej itoitak ilo ran kein rej letok jerammõn ko einlok wõt in kin jibañ don.

2. Etke emõkaj air kejelã kin lotok eo an circuit overseer eo?

² Congregation eo: Ekkã air kejelã kin ien lotok eo an circuit overseer eo jilu alliñ ko moktalok. Menin ej letok ien ñan ad karõk lajrak ak makitkit ko ad bwe jen maroñ bõk tokjen ko relap jen ien in. (Ep. 5:15, 16) Elañe kwoj jerbal, bõlen kwomaroñ kajitõk ien am kakije ñan am maroñ bõk kunam ilo jerbal in kwalok nan ilo week eo. Jet rej karõk ñan auxiliary pioneer ilo alliñ eo enaj kõmman lotok eo ie. Elañe emwij am kar kõmman karõk ñan etal ñan bar juõn jikin, kwomaroñ ke kõmman oktak ko bwe kwon maroñ bed ilo week eo?

3. Ta ko kar rejañ kij kaki bwe jen kõmmani ilo ien lotok eo ñan ad bõk kõketak?

³ Un eo elaptata unin lotok eo an circuit overseer eo ej ñan letok jibañ im kaminene ilo jerbal in kwalok nan eo. Kwomaroñ ke kajitõk ñan jerbal ibben ak kõrã eo belen elañe ej juõn ri belele? Circuit overseer eo ej mõnõnõ in jerbal ibben kajjojo ri kwalok ro, ekoba ro me emaroñ jidik wõt air iminene ak rekõnan bwe en emõnlok wãwen air jerbal in kwalok nan. Aolep remaroñ katak jen wãwen an kwalok nan im jerbale jabdewõt nan in rejañ ko me emaroñ litoki. (1 Kor. 4:16, 17) Ñe kwoj kirtok e ñan juõn ien mõñã ibbam enaj kabellok bar juõn ien emõn kin kamao ko rekõketak. (Hib. 13:2) Kinke katak ko an kar eiki ekkar ñan aikwij ko an congregation eo, jen lukkun roñjaki.

4. Ewi wãwen ad maroñ kõketak circuit overseer eo ad?

⁴ Circuit Overseer Eo: Ri jilek Paul ear jab oktak jen ro jein im jatin ear jerbal ibbeir ilo an kar iion abañ im inebata ko im ear lap an aikwiji im kamolol kin nan in kõketak ko. (2 Kor. 11:26-28) Ke congregation eo ilo Rome ear jelã bwe Paul, kiõ ej juõn ri kalbuj, ej bojak in etal ñan ijo, jet rar etal ñan Jikin wia eo ilo Appius ñan air iion e​​—joñan etolokin ej 46 mile ko! “Ke Paul ej lo ir, ej kamolol Anij im e beranlok.” (Jerb. 28:15) Kwomaroñ bareinwõt kõketak circuit overseer eo am. Kwomaroñ kwalok ñan e “koutiej” ikijen am kijejeto in rejetak ien lotok eo an. (1 Tim. 5:17) Kwalok im kalikar kamolol eo am emol kin kate ko an kin kwe. E im kõrã eo belen renaj mõnõnõ ñe rej lo tõmak, yokwe, im kijenmij eo am.​​—2 Tes. 1:3, 4.

5. Etke kij aolep jej aikwij nan in rejañ rainin?

⁵ Ilo “ien [kein] renana,” wõn iad ejjab aikwij nan in rejañ? (2 Tim. 3:1) Bebe kiõ ñan am bõk kunam ilo week in jerbal in ejej uan ibben circuit overseer eo. Kij aolep​​—overseer ro rej itoitak im ri kwalok ro jimor​​—maroñ bõk kunad ilo ad mõnõnõ in jibañ don. Ilo wãwen in jenaj bareinwõt “kainemõne dron, im kalek dron.”​​—1 Tes. 5:11.