MOURIN KŨRJIN
“Paul Ear Kam̦m̦oolol Anij im Peranl̦o̦k”
Ke eklejia eo ilo Rom rar roñ bwe Paul enaaj tõkeakl̦o̦k, elõñ iaaer rar etal ilo ial̦ eo aer l̦o̦k me 40 jim̦a m̦ail̦ aetokin ñan juon jikin me remaroñ iioone e ie. Ewi wãween an kar yokwe in aer jelõt Paul? “Ke Paul ear lo er ear kam̦m̦oolol Anij im peranl̦o̦k.” (Jrb 28:15, UBS) Meñe ekkã an kar Paul kõkajoor eklejia ko ñe ej lol̦o̦k er, ak ilo iien eo ke ej juon ri-kalbuuj, e eo kiiõ ear aikuj bwe ro jet ren kõkajoore.—2Ko 13:10, UBS.
Ilo raan kein, em̦m̦aan ro rej itoitak im lol̦o̦k eklejia ko kajjojo rej kõkajoore rũttõmak ro jeier im jatier. Ãinwõt aolep ro doon Anij, ewõr iien rein rej bar m̦õk, inepata, im bũrom̦õj. Kõn men in, bwe jen jim̦or maroñ kõkajoor doon, ta ko jemaroñ kõm̦m̦ani ñan kaperan em̦m̦aan rein kab kõrã ro pãleer ñe renaaj bar lotok kõj?—Rom 1:11, 12, UBS.
Pãd ilo iien kweilo̦k in kwal̦o̦k naan ko. El̦ap an kõketak em̦m̦aan ro rej lol̦o̦k eklejia ko ñe ri-kwal̦o̦k naan ro rej kaarmejjeteik er make bwe ren maroñ lukkuun bõk tokjãn jãn m̦akũtkũt ko ilo wiik in lotok eo. (1Te 1:2, 3, UBS; 2:20, UBS) Bõlen kwõmaroñ kajjioñ akjel̦õri bainier ilo allõñ eo enãj lowaj eklejia eo am̦. Bareinwõt, kwõmaroñ ke kõm̦m̦an karõk ñan kwal̦o̦k naan ippãn em̦m̦aan eo ej lol̦o̦k eklejia eo im kõrã eo pãleen ak bõk juon iaaerro ippam̦ ñan juon iaan rũkkatak ro am̦? El̦ap aer m̦õn̦õn̦õ ñe rej jerbal ippãn kajjojo ri-kwal̦o̦k ro, ekoba ro rekããl im ro me rekõn̦aan kal̦apl̦o̦k aer jel̦ã kilen kwal̦o̦k naan.
Kwal̦o̦k karwainene. Kwõmaroñ ke kõpel̦l̦o̦k m̦weo im̦õm̦ bwe ren kiki ie ak kõm̦m̦an iien ñan m̦õñã ippãerro? Am̦ kõm̦m̦ane men in ej kaalikkar ñan em̦m̦aan eo ej lol̦o̦k eklejia ko im kõrã eo pãleen bwe kwõj yokwe er im kea kake er. Ijoke, erro jim̦or rejjab kõtmãne an lõñ ak l̦ap men ko jej kõm̦m̦ani ñan er.—Lk 10:38-42, UBS.
Roñjake im jerbale naanin tõl kab naanin kauwe ko an. Ilo yokwe, em̦m̦aan eo ej lol̦o̦k eklejia ko ej jipañ kõj ñan kile ta ko jemaroñ kõm̦m̦ani ñan kakõm̦anm̦anl̦o̦k wãween ad karejar ñan Jeova. Jet iien, emaroñ letok naanin kauwe ko rekajoor. (1 Ko 5:1-5, UBS) Ñe jej pokake im kõttãik kõj, men in ej kalañlõñ bũruon.—Hi 13:17, UBS.
Kwal̦o̦k kam̦m̦oolol. Kwal̦o̦k ñan em̦m̦aan eo ej lol̦o̦k eklejia kõn wãween aerro kõrã eo pãleen kar jipañ eok. Kwõmaroñ kõm̦m̦ane men in ilo am̦ kepaake er ak ilo am̦ jeje juon lõta ak kaat ñan erro.—Kol 3:15.