Kwoj tõmak ke ilo reincarnation?
“KWOJ kememej ke ledik eo ear jokwe iturin mweo imwed me kwar loe im yokwe ke kwar rittolok ijin ilo India?” Mukundbhai ear jeje ñõn ñõn leo nejin, juõn ri school in university ilo United States. “Kõrã eo ej bojak in belele iloan wõt jejjo week ko. I ar lemnak kwoj aikwij jela.”
Etke jemen ear kajelaik leo nejin kin news in? Ke, Mukundbhai ear kajemlok yokwe in lo don in jodikdik eo airro elõñ yiõ ko remotlok. Ijellokin, leo nejin ear bed ilo United States in jibadõk jelalokjen eo eutiejlok iumin jiljino yiõ ko. Ear jab jeje letter ak konono ibben ledik eo ilo aolepen ien in, im Mukundbhai ear jela menin.
Inem, etke kar lemnak kake menin? Kinke Mukundbhai ear tõmak ilo reincarnation, ak bar lotak.a Elañe yokwe in jodikdik eo ikõtan rein ruo ear walok jen airro kar belele ilo mour ko airro mokta, enaj kar juõn menin lej ñõn kijibel ir jen don kiõ ke reritto ñõn air belele. Mukundbhai ear baj kõnan bwe leo nejin en wor an jela kin belele eo mokta jen an ledik eo oktak im belen bar juõn ilo mour in.
Lemnak kin bar juõn wãwen. Juõn ledik emen yiõ dettan ear lõñ alen an kin bed im iñtan ilo juõn hospital ilo Mumbai, India. Nañinmij eo an kar juõn eke ejorrãn ilo menono eo an. Jemen im jinen me rar mweie rar inebata ke rej lo an ajiri eo iñtan. Ak rar lemnak: “Jej aikwij bõk mol in bwe ewor juõn nejid ajiri eo ejjab ejmour. Bõlen ewor men en ear kõmmõne ilo mour eo an mokta ñõn an tellokin bõk menin.”
Tõmak ilo reincarnation ewor kilan ilo juõn jerbal eo elap tokjen ilo mour ko an million armij ro ilo Hinduism, Buddhism, Jainism, Sikhism, im bar kabuñ ko jet rar jino ejak ilo India. Bwebwenato ko ilo mour—jen lo don ilo yokwe ñõn iñtan—rej lemnak kaki einwõt tokjen jerbal ko ilo juõn mour ak mour ko mokta.
Elõñ ilo ailiñ ko Iturilik ebar wor kabwilõñlõñ ie ibben tõmak eo kin reincarnation. Ri kõmmõn theater in American eo Shirley MacLaine ej kamol an tõmak ilo reincarnation. Ri jeje eo Laurel Phelan eo ej bed ilo Vancouver, British Columbia, Canada, ej ba bwe ewor ememej ko an kin 50 mour ko lok mokta ak reincarnations. Ilo juõn etale eo ilo 1994 ilo news ko an CNN/USA Today, elõñlok jen 270 in 1,016 ritto ro rar kajitõkin ir rar kamol bwe rej tõmak ilo reincarnation. Tõmak ilo reincarnation ej bareinwõt juõn mõttan emmakit eo an Ebeben eo Ekãl. Ak ta menin kamol eo ej rejtak tõmak in?
“Men ko rej kememeji jen juõn mour eo mokta!” ri tõmak ro ilo reincarnation rej uak. Kin menin, ke jilu yiõ dettan Ratana ilo Bangkok ear jino “kememej mour eo an ilo ien ko remotlok einwõt juõn kõrã in kabuñ eo ear mij ke ej 60 yiõ dettan,” elõñ wõt rar bõk kamelele eo an einwõt menin kamol kin reincarnation.
Bõtab, elap bere ilo menin. Im kamelele ko jet kin men ko rej kememeji kin kar mour ko mokta menin emaroñ.b Ilo book eo an Hinduism: Its Meaning for the Liberation of the Spirit (Melele eo ie ñõn Kanemkwoj Jitõb eo), philosopher in Hindu eo Nikhilananda ej ba bwe ‘bwebwenato ko elikin mij rejjab maroñ kameleleiki ikijen kammanwa.’ Ak ej kamol bwe “tõmak eo kin bar lotak elaplok an maroñ jen an jab maroñ.”
Ak Bible eo ej rejtak ke katak in? Im ta kejatdikdik eo kin ro remij Nan in kakõrmol eo an Anij ej letok?
[Kamelele ko itulal]
a “Reincarnation,” The New Encyclopædia Britannica ej ba, ej melelen “bar lotak eo an aan juõn armij ilo juõn ak lõñlok alen ilo kar mour ko an mokta, ko remaroñ kar mour in armij, menin mour, ak, ilo jet ien ko, menin eddek ko.” Kajin in “bar lotak” ej bareinwõt jerbal ñõn kalikar wãwen in, ak nan in “reincarnation” ekkã kajerbale. Elõñ dictionary ko ilo kajin India rej kajerbal nan kein bar lotak im reincarnation ilo juõn wõt melele.
b Lale peij 5-7 ilo June 8, 1994, Awake! eo
[Pija ko ilo peij 4]
Kõrã eo ej bõk ke kaje kin jerawiwi ko ear kõmmõni ilo juõn mour eo moktalok