Ta eo Ilju im Jekl̦aj eo Am̦ ej Lukkuun Wawa Ioon?

MEN KO ELÕÑ REJ TÕMAKI

JEDJED IJU: Jet armej rej tõmak bwe ilju im jekl̦aj ko aer rej pedped ioon wãween an iju ko ekkar ilo iien eo juon ej l̦otak. Rej kõjerbal jaat in iju ko ñan jel̦ã ta ko renaaj wal̦o̦k ñan er ilju im jekl̦aj, innem rej kõm̦m̦ani elõñ men ko bwe ren maroñ bõbrae aer iioon jorrããn ak ñan lo jeraam̦m̦an.

FENG SHUI: Jet rej tõmak bwe wãween eo ñan aer maroñ lo tõprak ej ilo aer karõki m̦õko im̦weer ilo juon wãween me ejejuwaan me ejejjet ekkar ñan kajoor ko jejjab maroñ loi. Lo Wing,a eo ej jokwe ilo Hong Kong, ej ba: “Juon eo me elukkuun tijem̦l̦o̦k ilo juon kain wãween anijnij etan feng shui ear ba ñan ña bwe el̦aññe inaaj likũt juon crystal me ejejuwaan ilo juon jikin ilo m̦õn wia eo aõ, men in enaaj jipañ bwe en lõñl̦o̦k tõprak in jããn ko ij loi.”

KABUÑ ÑAN RO JIBWIER IM JIM̦M̦AER ME RAR MEJ ILO IIEN KO ETTO: Ewõr jet rej l̦õmn̦ak bwe rej aikuj in kam̦õn̦õn̦õik ro jibwier im jim̦m̦aer me rar mej ilo iien ko etto ak elõñ iaan anij ko jet bwe ren maroñ bõk kõjparok ak kõjeraam̦m̦an ko jãn er. Van, eo ej jokwe ilo Vietnam, ej ba: “Iar tõmak bwe ilo aõ kwal̦o̦k kautiej ñan ro jibũ im jim̦m̦aõ me em̦õj aer mej ilo iien ko etto, men in enaaj kõm̦m̦an bwe en em̦m̦anl̦o̦k wãween mour eo aõ im bwe ña im ajri ro nejũ kõmin bõk juon ilju im jekl̦aj me eaenõm̦m̦an im ejokwane.”

BAR L̦OTAK IM MOUR ILO JUON ÃNBWIN EKÃÃL: Elõñ rej tõmak bwe ñe juon armej ej mej, ej bar l̦otak im mour ilo juon ãnbwin ekããl, im men in ejjel̦o̦k jem̦l̦o̦kin an wõnm̦aanl̦o̦k. Rej tõmak bwe men ko rem̦m̦an im renana me rej iiooni kiiõ rej itok jãn men ko rar kõm̦m̦ani ilo kar bar juon mour m̦oktal̦o̦k.

Bõtab, elõñ rej watõk men kein bwe rej jerbalin anijnij. Meñe ãindein ak rej wõnm̦aanl̦o̦k wõt im kõm̦m̦ani men ko ãinwõt, etal ippãn ro rej riiti lo̦piden pein armej, lale jaat in iju ko, kõjerbal juon kein iukkure etan Ouija^® board, kõjerbal kaaj ko me ewõr pija ie, im men ko ãierl̦o̦kwõt. Rej l̦õmn̦ak bwe bõlen men rot kein remaroñ jipañ er ñan jel̦ã kõn ilju im jekl̦aj ko aer.

TA KO RAR WAL̦O̦K?

Ro me rar tõmak ilo men kein rar ke lo juon mour eo em̦m̦an im juon ilju im jekl̦aj eo eaenõm̦m̦an im ejokwane?

L̦õmn̦ak kõn ta eo Hào, juon em̦m̦aan me ej jokwe ilo Vietnam, ear iioone. Ear kajjioñ kõjerbal kein jedjed iju ko, feng shui, im kabuñ ñan ro jibwin im jim̦m̦aan me rar mej ilo iien ko etto bwe ren maroñ tõle im jipañe. Ear ke lo tõprak? Hào ej ba, “Ear jorrããn peejnej eo aõ, ear l̦ap aõ m̦uri, iar iioon apañ ippãn ro ilowaan baam̦le eo aõ, im ear l̦e jãn joñan aõ inepata im lukkuun nana aõ mour.”

Qiuming, eo ej jãn Taiwan, ear bar tõmak ilo men ko ãinwõt jedjed iju, an juon eo emej bar l̦otak im mour ilo juon ãnbwin ekããl, tõmak bwe ewõr kajoor ko renaaj kããlõt ta ko renaaj wal̦o̦k ilo mour eo am̦, feng shui, im kabuñ ñan ro jibwid im jim̦m̦aad me rar mej ilo iien ko etto. Ãlikin an kar lukkuun etale tõmak kein, ej ba: “Iar kile bwe kain katak ak m̦anit rot kein rar jab errã ippãn doon im rar kapokpok. Iar kile bwe ekkã an jab jejjet men ko rej ba renãj wal̦o̦k ñe rej jedjed iju. Im ikijjeen tõmak eo bwe juon eo ear mej emaroñ bar l̦otak im mour ilo juon ãnbwin ekããl, eokwe ñe ejjel̦o̦k am̦ ememej kõn juon mour me kwaar mour ie m̦oktal̦o̦k, enãj ewi wãween am̦ maroñ kõm̦m̦an oktak im kakõm̦anm̦anl̦o̦k mour eo am̦ ilo mour eo tok juon?”

Ãinwõt an kar Hào im Qiuming im elõñ bar ro jet kile, ilju im jekl̦aj eo ad ejjab pedped ak wawa ioon kajoor ko me rej kããlõt ta ko renãj wal̦o̦k ilo mour ko ad, iju ko, ro jibwid im jim̦m̦aad me rar mej ilo iien ko etto, ak ad mej im bar l̦otak im mour ilo juon ãnbwin. Innem men in ej ke mel̦el̦ein bwe ejjel̦o̦k ad maroñ ioon ilju im jekl̦aj eo ad?

Elõñ rej l̦õmn̦ak bwe wãween eo bwe en wõr juon aer ilju im jekl̦aj eo em̦m̦an ej ilo aer jibadek jikuul̦ ko reutiej ak kõttõpar bwe ren m̦weiie. Ta ko rar wal̦o̦k ñan ro rar kããlõt ñan jibadek men kein?