Ñe Jesus Ej Itok Ilo Aibujuij In AIliñ Eo

“Jet ian ro rej jutõk ijin . . . rejamin edjoñ mij, ñõn ien eo re naj lo Nejin armij ej itok ilo An ailiñ.”​—MATTHEW 16:28.

1, 2. Ta eo ear walok elikinlok wõt Pentecost eo ilo 32 C.E., im ta kar karõk eo kin wãwen eo?

JIDIK WÕT ien elikin Pentecost eo ilo 32 C.E., jilu ian ri jilek ro an Jesus Christ rar lo juõn vision renaj kememeje. Ekkar ñõn jeje in kakõrmol eo, “Jesus ej añintok Piter im Jemes im Jon jãtin, im añinliñlok ir ñõn tol eutiej rej mõke wõt. Im ej kejakilkil iman mejeir.”​—Matthew 17:1, 2.

² Vision in kejakilkil eo ear itok ilo juõn ien eo ebin. Jesus ear jino jiroñ ri kalor ro an bwe ear etal ñõn an iñtan im mij ilo Jerusalem, ak ear bin air melele nan ko an. (Matthew 16:21-23) Vision eo ear kabinlok tõmak eo an ri jilek rein jilu ilo air kabojak ñõn mij eo an ej itok im bareinwõt ñõn yiõ ko enaj lap jerbal ie im melejoñ eo enaj kar itok ilokantok ñõn congregation in Christian eo. Kij rainin jemaroñ ke katak jen vision in? Aet, kinke men eo ear annañelok ej lukkun walok ilo ien kein ad.

3, 4. (a) Ta eo Jesus ear ba jiljino ran ko moktalok jen an ukõt mõran? (b) Kwalok ta eo ear walok ilo ien kejakilkil eo.

³ Jiljino ran mokta jen an ukõt mõran, Jesus ear jiroñ ri kalor ro an: “Bwe Nejin armij e naj itok ilo wuj in Jemen iben enjel ro an, inem E naj lelok jinekjij ñõn armij rõn im einwõt air kõmõnmõn.” Nan kein enaj jejjet kitieir ilo “jemlokin jukjuk im bed in.” Jesus ear etal wõt im ba: “Emol Ij ba ñõn kom, Jet ian ro rej jutõk ijin, re jamin erjoñ mij, ñõn ien eo re naj lo Nejin armij ej itok ilo An ailiñ.” (Matthew 16:27, 28; 24:3, New World Translation; 25:31-34, 41; Daniel 12:4) Ukõt mõran eo ear walok ilo kajejjet kitien nan kein tok elik.

⁴ Lukkun ta eo ri jilek ro jilu rar loe? Ijin tok ilokan ej wãwen eo Luke ear kwalok kake: “Ke Ej [Jesus] jar, wãwen turin mejen juõn im nuknuk ko An emouj im jatõltil. Im lo! ruo armij rej konono iben, irro Moses im Elaija. Rej weaktok ilo wuj, im konono kin An mij eo E naj mij kake i Jerusalem.” Inem, “juõn kõro ej itok, im kalur ir [ri jilek ro]. Im rej lelñoñ ke rej dreloñ ilo kõro eo. Im juõn ainiken ej itok jen kõro eo, im ba: ‘E in Nejiõ, Eo Ij kãlet E. Komin karoñjake.’”​—Luke 9:29-31, 34, 35.

Tõmak Ekajurlok

5. Kejakilkil eo ear jelet ri jilek Peter ilo wãwen et eo?

⁵ Ri jilek Peter ededelok an kile Jesus einwõt “Dri Kraist, Nejin Anij emour.” (Matthew 16:16) Nan ko an Jehovah jen lõñ rar kamol air kile, im vision eo kin an Jesus kar ukõt mõran kar juõn menin wanjoñok kin itok eo an Christ ilo kajur im wuj in Ailiñ eo, im tokelik ñõn ekajete armij. Elõñlok jen 30 yiõ ko elikin an ukõt mõran, Peter ear je: “Bwe kim ar jab kajeoñwe bwebwenato wan ko an dri kabel, ke kim ar kajelaik kom kajur im itok an ar Iroij Jisõs Kraist, a kim ar dri kalimjek An wuj potata. Bwe E ar bõk jen Anij Jemen nebar im aibujuij, ke ainiken eo e ar itok ñõn E jen wuj eo emõn potata, ‘E in Nejiõ jitenburu iba, im Eo ij buñburuõ kake.’ Im ainiken in kim ar roñjake itok jen lõñ, ke kim ar ber iben ilo tol ekwojarjar.”​—2 Peter 1:16-18; 1 Peter 4:17.

6. Ewi wãwen an kar wãwen ko walok elikin kejakilkil eo?

⁶ Rainin, tõmak eo ad bareinwõt ej kajurlok kin men eo ri jilek ro jilu rar loe. Bwebota, men ko rej etal wõt im walok jen 32 C.E. eo. Yiõ eo tok ilokan, Jesus ear mij im kar kajerkakbijiki, im wõnliñlok ñõn anbwijmaroñin pein Jemen. (Jerbal 2:29-36) Ilo Pentecost eo ilo yiõ eo, “Israel an Anij” ekãl ear jutak, im juõn karelel in jerbal in kwalok nan ear ijjino, jino ilo Jerusalem im tokelik jededlok ñõn jabõn ko jabõn lõl. (Galetia 6:16; Jerbal 1:8) Ilo enañin ejja ien eo wõt tõmak eo an ri kalor ro an Jesus kar melejoñe. Ri jilek ro rar kalbuji ir im lap air deñõt ir kinke rar makoko in bõjrak jen air kwalok nan. Ejjabto rar urore Stephen. Inem James, juõn ri kamol kin mejen kin kar ukõt mõran eo, rar mane. (Jerbal 5:17-40; 6:8–​7:60; 12:1, 2) Bõtab, Peter im John, rar mour wõt ñõn air karejar ñõn Jehovah ilo tiljek iumin elõñ yiõ ko. Ilo mol, ilo jemlokin lok ebeben eo kein kajuõn C.E., John ear bar jeje kin vision in aibujuij eo an Jesus ilõñ.​—Revelation 1:12-20; 14:14; 19:11-16.

7. (a) Ñãt eo vision in kejakilkil eo ear jino jejjet kitien? (b) Ñãt eo Jesus ear nawõnãn jet ekkar ñõn mwiliir?

⁷ Jen jinoin “ran eo ran an Iroij” ilo 1914, elõñ wõt ian vision ko John ear loi ear jejjet kitieir. (Revelation 1:10) Ak ta kin ‘itok eo an Jesus ilo aibujuij eo an Jemen’ einwõt kar annañelok ilo an kar ukõt mõran? Vision in ear jino jejjet kitien ilo ien lotak eo an Ailiñ in Anij ilõñ ilo 1914. Ke Jesus, einwõt juõn iju ran, ear walokliñtak ijoko otemjej ilõñ einwõt juõn Kiiñ eo ekãl emwij an bõk an throne, menin kar, ilo nan in kõkkar, jorantak in juõn ran ekãl ak “ran eo an Iroij.” (2 Peter 1:19; Revelation 11:15; 22:16) Ilo ien eo Jesus ear nawõnãn ke jet ekkar ñõn mwiliir? Aet. Ewor menin kamol bwe elikinlok wõt ien eo, jerkakbiji eo ñõn lõñ an Christian ri kabit ro ear ijjino.​—2 Timothy 4:8; Revelation 14:13.

8. Ta men ko renaj kakõlleik tukajur in an jejjet kitien vision in kejakilkil eo?

⁸ Ejjabto, Jesus enaj itok “ilo wuj eo an, im enjel ro otemjej iben” ñõn ekajete armij ro otemjej. (Matthew 25:31) Ilo ien en, enaj kalikar e make ilo aolepen joñan aibujuij eo an im ñõn lelok ñõn “kajjojo armij” wõnãn kin mwilin. Ro einwõt sheep renaj jolete mour indio ilo Ailiñ eo kar kaboje ñõn ir, im ro einwõt goat renaj illok ñõn “jako indio.” Enaj juõn jemlok ekabwilõñlõñ ñõn an jejjet kitien vision in kejakilkil eo!​—Matthew 25:34, 41, 46; Mark 8:38; 2 Tessalonika 1:6-10.

Ro Rejtan Jesus Emwij Kaibujuij Ir

9. Jej aikwij ke kõtmene kin Moses im Elijah ñõn air bed ibben Jesus ilo jejjet kitien eo kin vision in kejakilkil eo? Kamelele.

⁹ Jesus ear jab make ian ilo ukõt mõran eo. Rar lo Moses im Elijah ibben. (Matthew 17:2, 3) Rar lukkun bed ke? Jab, bwe lõmarein jimor etto wõt ke rar mij im rar kiki ilo buñalñal im kõtar juõn jerkakbiji. (Ecclesiastes 9:5, 10; Hebrew 11:35) Ren waloktok ke ibben Jesus ñe ej itok ilo aibujuij eo ilõñ? Jab, kinke Moses im Elijah rar mour mokta jen an kejatdikdik eo ñõn mour ilõñ ear bellok ñõn armij. Renaj mõttan “jerkakbiji eo kin . . . ro rewãnik” ion lõl. (Jerbal 24:15, NW) Inem waloktok eo air ilo vision in kejakilkil eo ej juõn kakõlle. Kin ta?

10, 11. Wõn eo Elijah im Moses rar pijaiki ilo melele ko reoktak?

¹⁰ Ekkar ñõn melele ko jet, Moses im Elijah rej annañ ilo kanan. Einwõt ri kilajrak in bujen Kien eo, Moses ear annañelok Jesus, Ri Kilajrak eo an bujen eo ekãl. (Deuteronomy 18:18; Galetia 3:19; Hebrew 8:6) Elijah ear annañelok John Ri Baptist, juõn eo ear itok imanlok Messiah eo. (Matthew 17:11-13) Bareinwõt, ekkar ñõn melele eo ilo Revelation jebta 11, Moses im Elijah rej annañe bwen ri kabit ro ilo ien eo ien jemlokin. Ewi wãwen ad jela menin?

¹¹ Eokwe, eliklok ñõn Revelation 11:1-6. Ilo eon 3 jej konono: “I naj lelok ñõn Aõ dri kennan ruo, im re naj drikanij iomin juõn tausan rubuki im jiljinoñoul ran, im nuknuk ko air nuknuk kol.” Kanan in ear jejjet kitien ion bwen Christian ri kabit ro ilo Tarinae eo an Lõl Kein Ka I.a Etke ruo ri kennan ro? Kinke bwen ri kabit ro rej kõmmõni jerbal ko me, ilo juõn wãwen ilo jitõb, rej einwõt Moses im Elijah. Eon 5 im 6 rej etal wõt im ba: “Elañe jabrewõt armij ekõnan kokkure ir [ri kennan rein ruo], kijeek ej ilok jen loñir, im kõñi ro dri kijirãte ir; Im elañe jabrewõt armij ekõnan kokkure ir, ein drein emõn mõn e. Ibeir maroñ in kili lõñ bwe en jab wut iomin ran ko an drikanij eo air, im maroñ ibeir ion dren ko, bwe ren kõmõn ir erom bõtõktõk, im bwe ren mõn lõl kin jabrewõt men in kaiñtan, emakijkij einwõt air kõnan.” Kin men in, jej bõk kakememej kin menin bwilõñ ko Elijah im Moses rar kõmmõni.​—Bwinbwin 16:31-34; 1 Kiiñ 17:1; 2 Kiiñ 1:9-12.

12. Ilo melele eo kin kejakilkil eo, wõn ro Moses im Elijah rej pijaiki?

¹² Inem, wõn eo Moses im Elijah rar annañe ilo kamelele eo kin ukõt mõran eo? Luke ej ba bwe rar walok tok ibben Jesus “kin aibujuij.” (Luke 9:31) Ealikar, rar annañe Christian ro emwij kabit ir kin jitõb kwojarjar einwõt “ri jolet” ibben Jesus im ro emwij air bõk kejatdikdik eo emõn ilo air “jimor aibujuij” ibben. (Rome 8:17) Ri kabit rein emwij air jerkakbiji renaj bed ibben Jesus ñe ej itok ilo aibujuij eo an Jemen ñõn “nawõnãn kajjojo armij ekkar ñõn mwilin.”​—Matthew 16:27.

Ri Kennan ro Einwõt Moses im Elijah

13. Ta men ko rej kakõlleik Moses im Elijah bwe rõkwon ñõn pija in kanan ko kin ri kabit ri jolet ro rej bõk air aibujuij ibben Jesus?

¹³ Elõñ wãwen ko realikar rej kakõlleik Moses im Elijah einwõt pija in kanan ko rõkwon ñõn ri jolet ri kabit ro an Jesus. Moses im Elijah jimor rar jerbal einwõt ri konono ro an Jehovah iumin elõñ yiõ ko. Irro jimor rar jelmae illu eo an juõn iroij. Ilo juõn ien aikwij, kajjojo iairro ear bõk jibañ jen juõn family ilo ene ko rar ruamaejet ie. Irro jimor rar kanan ilo beran ñõn king ro im rar jutak bin nae ri kanan wan ro. Moses im Elijah jimor rar lo wanjoñok ko kin kajur eo an Jehovah ion Tol Sinai (bareinwõt naetan Horeb). Irro jimor rar jitõñ ro rar bõk jikiir iturear in Jordan. Im ilo ien ko air jimor Moses (ibben Joshua) im Elijah (ibben Elisha) ej make wõt im kar lõñ oran menin bwilõñ ko rar kõmmõni, ijellokin wõt ko rar walok ilo ien mour eo an Jesus.b

14. Ewi wãwen an ri kabit ro jerbal einwõt ri konono ro an Jehovah, einwõt Moses im Elijah?

¹⁴ Aolepen menin ejjab kakememej kij ke kin Israel eo an Anij? Aet, ej lukkun. Jesus ear jiroñlok ri tõmak ri kalor ro an: “Inem komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar, im katakin ir bwe ren bokake nan ko otemjej I ar jiroñ kom. Im, lo! Ij ber ibemi ien otemjej ñõn jemlokõn lõl.” (Matthew 28:19, 20) Ilo bokake nan kein, Christian ri kabit ro rar jerbal einwõt ri konono ro an Jehovah jen Pentecost 33 C.E. eo tok ñõn kiõ. Einwõt Moses im Elijah, rar jelmae illu eo an ri tel ro im rar kwalok nan ñõn ir. Jesus ear jiroñ ri jilek ro an 12: “Im re naj añinlok kom ñõn iroij ro im kiñ ro kin Ña, kin men in kennan ñõn ir im dri ailiñ ko.” (Matthew 10:18) Nan ko an emwij an jejjet kitieir elõñ alen ilo bwebwenato eo an congregation eo an Christian.​—Jerbal 25:6, 11, 12, 24-27; 26:3.

15, 16. Ta men ko eierlok wõt ikõtan ri kabit ro ijo tu-rãjet im Moses im Elijah ilo eo juõn ikijen air (a) jutak kin mol eo ilo jab lelñoñ? (b) bõk jibañ jen ro rejjab ri Israel?

¹⁵ Bareinwõt, Christian ri kabit ro joñan air jab mijak wõt kar Moses im Elijah ilo air jutak kin mol eo nae kabuñ wan eo. Kememej wãwen an kar Paul kananaik ri kanan wan eo an ri Jew ro Bar-Jesus im ilo jela kilen ak bin ear kajedmatmat anij wan ko an ri Athen ro. (Jerbal 13:6-12; 17:16, 22-31) Kememej, bareinwõt, bwe ilo ran kein bwen ri kabit ro rar ilo beran kajedmatmat Christendom im kain kennan rot in ear kaiñtan e.​—Revelation 8:7-12.c

¹⁶ Ke Moses ear ko jen illu eo an Pharaoh, ear lo jikin kone ilo mweo imõn juõn armij ejjab ri Israel, Reuel, rar bareinwõt kiri etan Jethro. Ilo juõn ien tokelik, Moses ear bõk kakabilek aorõk jen Reuel, eo leo nejin Hobab ear tel Israel ilujen ene jemaden eo.d (Exodus 2:15-22; 18:5-27; Bwinbwin 10:29) Ro uan Israel eo an Anij emwij ke air bõk jibañ ilo wãwenin lok wõt jen ro rejjab uan ri kabit ro an Israel eo an Anij? Aet, rej bõk jibañ jen “jar eo elap” in “sheep ro jet,” ro rej waloktok ijin ilo ran kein eliktata. (Revelation 7:9; John 10:16; Isaiah 61:5) Ilo kar kanan kake kin jibañ in yokwe eo emãnãn “sheep” rein renaj kar lelok ñõn ri kabit ro jein im jatin, Jesus ear ba ñõn ir ilo kakõrmol: “Bwe I ar kwuli, im kom ar najirik Iõ: I ar maro, im kom ar kairak Iõ. I ar drua maijet, im kom ar kadreloñ Iõ: Ejelok aõ nuknuk, im kom ar naballiõ. I ar nañinmij, im kom ar item lale Iõ. I ar ber ilo prisõn, im kom ar itok ñõn iba. . . . Emol Ij ba ñõn kom, Ilo ami kõmõnmõn jabrewõt ñõn juõn ian rein ro jãtiõ eriktata, kom ar kõmõnmõne ñõn Iõ.”​—Matthew 25:35-40.

17. Ewi wãwen an kar ri kabit ro iion wãwen eo einlok wõt eo Elijah ear iione ion Tol Horeb?

¹⁷ Bareinwõt, Israel eo an Anij ewor juõn men eo ear iione einlok wõt eo Elijah ear iione ion Tol Horeb.e Einwõt Elijah ilo ien eo ear ko jen Queen Jezebel, bwen ri kabit ro relelñoñ rar lemnak bwe jerbal eo air ear dedelok ilo jemlokin Tarinae eo an Lõl Kein Ka I. Inem, einwõt Elijah, rar ilo ejelok kõtmene kake jelmae Jehovah, eo ear itok in ekajete dolul ko rar ba bwe rej “mweo imõn Anij.” (1 Peter 4:17; Malachi 3:1-3) Ke Christendom rar lo an likjap, bwen ri kabit ro rar kile ir einwõt “dri korijer eo e tiljek im meletlet” im kar jitõñe kin eddo eo ion men ko otemjej mweien Jesus ilõl. (Matthew 24:45-47) Ilo Horeb, Elijah ear roñ “juõn ainiken erik im emera” im kar kamol bwe kar ainikien Jehovah, eo ej lelok elõñlok jerbal ñõn an kõmmõni. Ilo tõre eo ear lur im jokane ilo yiõ ko moktalok jen tarinae eo, ri kabit ri karejar ro retiljek an Jehovah rar roñjake ainikien jen alen ko ilo Bible eo. Ir bareinwõt rar melele bwe ear wor juõn air jerbal ñõn air kajejjet kitien.​—1 Kiiñ 19:4, 9-18; Revelation 11:7-13.

18. Ewi wãwen an menin kalikar ko remõn kin kajur eo an Jehovah itok ikijen Israel eo an Anij?

¹⁸ Eliktata, ear wor ke menin kalikar ko kin kajur eo an Jehovah rar itok ikijen Israel eo an Anij? Elikin mij eo an Jesus, ri jilek ro rar kõmmõn elõñ menin bwilõñ ko, ak men kein rar etal im bõjrak. (1 Korint 13:8-13) Ilo ran kein, jejjab lo menin bwilõñ ko ilo juõn wãwen eo jej lo kin mejed. Ijo tu-rãjet, Jesus ear ba ñõn ri kalor ro an: “Emol, emol, Ij ba ñõn kom, Eo ej liki Ña, jerbal ko Ij kõmõnmõni; e naj kõmõni bareinwõt; im jerbal ko relap jen kein e naj kõmõni.” (John 14:12) Menin ear jino jejjet kitien ke ri kalor ro an Jesus rar kwalok nan kin news eo emõn ilujen aolepen Jukjuk im Bed eo an ri Rome ilo ebeben eo kein kajuõn. (Rome 10:18) Meñe jerbal ko relaplok emwij kõmmõni rainin ke bwen ri kabit ro rej bõkmanlok wõt jerbal in kwalok nan eo kin news eo emõn “i aolepen lõl kin men in kennan ñõn ailiñ otemjelok.” (Matthew 24:14) Kin tokjen et eo? Ebeben in kein ka 20 ear lo aintok eo elaptata in oran ri karejar ro retiljek an Jehovah, emwij air wujleplok, ilo bwebwenato. (Revelation 5:9, 10; 7:9, 10) Juõn menin kamol ekabwilõñlõñ kin kajur eo an Jehovah!​—Isaiah 60:22.

Ro Jein im Jatin Jesus Rej Itok ilo Aibujuij

19. Ñãt eo ri kabit ro jein im jatin Jesus rej lo ir ibben ilo aibujuij?

¹⁹ Ke bwen ri kabit ro jein im jatin Jesus rej kajemlok ialin mour eo air ilõl, rej bõk aibujuij ibben. (Rome 2:6, 7; 1 Korint 15:53; 1 Tessalonika 4:14, 17) Kin menin rej erom king im priest ro reban wabanban ilo Ailiñ in lõñ. Inem ibben Jesus, renaj “iroij ioir kin mãl wãwen alal, einwõt ñe e kanuij rup jãbi ko an dri potter.” (Revelation 2:27; 20:4-6; Psalm 110:2, 5, 6) Ibben Jesus, renaj jijet ion throne ko in ekajete “joñoul im ruo bwijin Israel.” (Matthew 19:28) Menin kõmõnmõn eo ej liejlol ej kijoror in kõtar wãwen kein, ko rej mõttan “kwalok ro nejin Anij.”​—Rome 8:19-21; 2 Tessalonika 1:6-8.

20. (a) Ikijen jerammõn et eo kejakilkil eo ear kakajurlok tõmak eo an Peter? (b) Ewi wãwen an kejakilkil eo kakajurlok Christian ro rainin?

²⁰ Paul ear konono kin revelation eo an Jesus ilo ien “iñtan eo elap” ke ear je: “E naj itok bwe En aibujuij ilo rokwojarjar ro An, im bwe En men in bwilõñ ilo ro otemjej r’ar tõmak.” (Matthew 24:21; 2 Tessalonika 1:10) Ej juõn menin bwilõñ in jerammõn elap ñõn Peter, James, John, im Christian ri kabit ro otemjej ilo jitõb! Kejakilkil eo ear kakajurlok tõmak eo an Peter. Emol, ad konono kake ej kakajurlok tõmak eo ad bareinwõt im kabin liki eo ad bwe Jesus ejjabto enaj “nawõnãn kajjojo armij ekkar ñõn mwilin.” Christian ri kabit ro retiljek me rar mour mantak ñõn rainin rej lo an bin liki eo air bwe renaj bõk aibujuij ibben Jesus. Sheep ro jet rej kakajurlok tõmak eo air ilo jelalokjen eo bwe enaj lomoren ir lok ñõn jemlokin jukjuk im bed in enana ñõn loan lõl eo ekãl eaibujuij. (Revelation 7:14) Juõn menin kõketak ñõn jutak bin wõt ñõn jemlokin! Im vision in emaroñ laplok an katakin kij, einwõt ad naj loe ilo katak in tok juõn.

[Kamelele ko itulal]

Kwoj Kememej Ke?

◻ Wõn ro rar waloktok ibben Jesus ilo ien eo ear ukõt mõran?

◻ Ewi wãwen an kar kejakilkil eo kakajurlok tõmak eo an ri jilek ro?

◻ Ke Moses im Elijah rar waloktok “kin aibujuij” ibben Jesus ilo ien kejakilkil eo, wõn ro rar pijaiki?

◻ Ta men ko eierlok wõt ikõtan Moses im Elijah ijo turãjet im Israel eo an Anij ilo eo juõn rãjet?

[Pija eo ilo peij 10]

Kejakilkil eo ear kakajurlok tõmak eo an Christian ro ilo ien ko remotlok im ilo ien in