Meñe Elõñ Melejoñ Ko, Kwon Eddeb Ñõn Tõmak Me Am!

“Komin likit e men in lõñliñ otemjej ñe melejoñ kaju wãweir rej kabol kom.”​—JAMES 1:2.

1. Jekdon ta eo ro don Jehovah rej karejar ñõn e ilo tõmak im kin juõn “buru emõnõnõ”?

ARMIJ ro an Jehovah rej jerbal einwõt Ri Kennan ro an kin tõmak ilo e im “lõñliñ ilo burueir.” (Deuteronomy 28:47; Isaiah 43:10) Rej kõmmõn men in meñe rej jelmae elõñ melejoñ ko. Meñe rej bed ilo abañ ko air, rej bõk kainemõn jen nan ko: “Komin likit e men in lõñliñ otemjej ñe melejoñ kaju wãweir rej kabol kom; Bwe kom jela men in kamol ami tõmak ej jerbale kijenmij.”​—James 1:2, 3.

2. Ta eo jej jela kake kin ri jeje letter eo an James?

² Nan kein James, jatin Jesus Christ, ear jei ilo 62 C.E. (Mark 6:3) James kar juõn elder ilo congregation eo ilo Jerusalem. Emol, e, Cephas (Peter), im John rar “einwõt jur ko”​—rekajur im bin an congregation eo. (Galetia 2:9) Ke rar bõkmantak kajitõk eo kin mwijmwij ñõn “dri jilik im elder ro” ilo 49 C.E., James ear kwalok juõn lemnak ej bedbed ion Bible me jar in governing body eo ilo ebeben eo kein kajuõn rar kowãppen e.​—Jerbal 15:6-29.

3. Kar ta jet ian abañ ko ri Christian ro ilo ebeben eo kein kajuõn rar jelmaeki, im ewi wãwen jemaroñ bõk tokjen eo elaptata jen letter eo an James?

³ Einwõt juõn shepherd ilo jitõb im ewor an yokwe, James ear ‘jela bwij ko bwijin ekijkan air bed.’ (Jabõn Kennan 27:23) Ear kile bwe ri Christian ro rar jelmae melejoñ ko. Jet ian ri Christian ro rar aikwij kõkãle lemnak ko air, rar kwalok kalijeklok ñõn ro ri mweie. Ñõn elõñ ri Christian ro, kabuñ kar juõn wãwen mour bajjõk. Jet iair rar kajorrãn armij kin lo ko renana loir. Juõn jitõb in lõl in ear ijjino in kokkure armij, im elõñ iair rar jab kwalok jitõb in meanwõd im jar. Ilo mol, nañinmij ilo jitõb ear jelet jet Christian ro. Letter in James ej kamelele kin men in ilo juõn wãwen ekakajuror, im nan in kakabilek ko an ewor tokjen ñõn ran kein einwõt kar ilo ebeben eo kein karuo C.E. Jenaj bõk tokjen elap elañe jej watõke einwõt juõn letter kar je ñõn kij make.a

Ñe Jej Bed Ilo Melejoñ Ko

4. En ewi wãwen ad watõk melejoñ ko?

⁴ James ear kwalok wãwen eo jej aikwij watõk melejoñ ko. (James 1:1-4) Meñe ear jab kwalok kin kõtan eo an ibben Nejin Anij, ilo etã buruen ear naetan emake einwõt juõn ri “korijeran Anij im Iroij Jisõs Kraist.” James ear jejelok ñõn “bwij ko joñoul im ruo” bwijin Israel ilo jitõb “jibliklik ilo ene ko,” ilo jinoin kin an kar wor matõrtõr. (Jerbal 8:1; 11:19; Galetia 6:16; 1 Peter 1:1) Einwõt ri Christian ro, kij bareinwõt jej bõk matõrtõr, im “melejoñ kaju wãweir rej kabol kij.” Ak elañe jej kememej bwe kijenmij iumin melejoñ ko emaroñ kakajur tõmak eo ad, jenaj “lõñliñ” kake ñe jej jelmaeki. Elañe jej tiljek wõt ñõn Anij iumin melejoñ ko, men in enaj kamõnõnõik kij ñõn indio.

5. Ta eo melejoñ ko ad remaroñ kitibuj, im ta eo ej walok ñe jej lo tõbrak in kijenmij kaki?

⁵ Melejoñ ko rej koba abañ ko ekkã air walok ñõn armij ro. Ñõn wanjoñok, nañinmij emaroñ kaiñtan kij. Anij ejjab kamadmõde nañinmij ko kiõ, ak ej etal wõt im uake jar ko ad kin meletlet im kajur eo jej aikwiji bwe jen kijenmij wõt ilo nañinmij ko ad. (Psalm 41:1-3) Jej iñtan wõt kin wãnik einwõt Ri Kennan ro an Jehovah rej bed ilo matõrtõr. (2 Timothy 3:12; 1 Peter 3:14) Ñe jej anjo ion melejoñ ko, men in ej kabin tõmak eo ad, einwõt juõn “men in kamol.” Im ñe tõmak eo ad ej bõk anjo, enaj “jerbale kijenmij.” Ñe melejoñ ko rej kabin tõmak eo ad men in enaj jibañ kij bwe jen anjo ion melejoñ ko rej bed imad.

6. Ewi wãwen “en wãppen an kijenmij jerbal,” im ta buñten ne ko rekeie jemaroñ bõki ñe jej bed iumin melejoñ ko?

⁶ “A,” James ej ba, “en wãppen an kijenmij jerbal.” Elañe kwoj kõtlok an juõn melejoñ wonmanlok wõt im jab kajeoñ in rupe kien ko an Bible ñõn kajemlok e ilo mõkaj, kijenmij enaj “jerbal” ñõn kõmmõn bwe jen wãppen wõt im eyu einwõt ri Christian ro, ejelok likjap ilo tõmak. Emol, elañe melejoñ eo enaj kalikar juõn likjap ibbed, jej aikwij bukõt jibañ jen Jehovah ñõn anjo ion. Ta elañe melejoñ eo ej ñõn kõmmõn mour in ãjãj? Jej aikwij jar kin abañ in im jerbal ekkar ñõn jar eo ad. Bõlen jemaroñ aikwij in ukõt jikin jerbal eo ad ak bukõt wãwen ko jet ñõn kejbarok wõt ad tiljek ñõn Anij.​—Genesis 39:7-9; 1 Korint 10:13.

Jerbal in Bukõt Meletlet

7. Ewi wãwen jemaroñ bõk jibañ ñõn anjo ion melejoñ ko?

⁷ James ej kwalok ñõn kij kin ta eo jej aikwij kõmmõne elañe jejjab jela kin wãwen eo jemaroñ anjo ion juõn melejoñ. (James 1:5-8) Jehovah ejamin kauwe kij kin an jabwe meletlet ibbed im ilo ad jar ilo tõmak kin men in. Enaj jibañ kij bwe jen bõk juõn lemnak ejimwe kin juõn melejoñ im ñõn kijenmij kake. Ri tõmak ro mõttad ak ilo ien katak Bible ibbed make ak ilo kwelok ko remaroñ jitõñlok kij ñõn jet eon ko ilo Bible. Wãwen ko me Anij ear kabelloki remaroñ kalikar ta eo jej aikwij kõmmõne. Jitõbõn Anij emaroñ tel kij. (Luke 11:13) Ñõn bõk men in jibañ kein, alikar jej aikwij bed ebak ñõn Anij im armij ro an.​—Jabõn Kennan 18:1.

8. Etke eo ej bere ejamin bõk jabdewõt jen Jehovah?

⁸ Jehovah ej letok ñõn kij meletlet ñõn kijenmij ilo melejoñ ko elañe jej “kajitõk ilo tõmak im jab berre.” Eo ej bere ej “einwõt no in lometo e makõtkit im limajnono.” Elañe jaar jab jokkin wõt juõn ilo jitõb, jej aikwij ‘jab lemnõk bwe e naj bõk jabrewõt jen Iroij [Jehovah].’ Jen jab einwõt “armij buruen ruo” im “bororo” (bbõruru) ilo jar ak wãwen ko jet. Jen men in, jej aikwij tõmak ilo Jeho-vah, eo ej Unjen meletlet.​—Jabõn Kennan 3:5, 6.

Ro Ri Mweie im Jeramel Jimor Remaroñ Lõñliñ

9. Etke ewor unin ad lõñliñ einwõt ri kabuñ ro an Jehovah?

⁹ Meñe jeramel ej juõn ian melejoñ ko ad, jej aikwij kememej wõt bwe ri Christian ro remweie im jeramel jimor remaroñ lõñliñ. (James 1:9-11) Mokta jen air kar erom ri kalor ro an Jesus, enañin aolep ri kabit ro mokta rar jab mweie im ri lõl in rar dike ir. (1 Korint 1:26) Ak rar maroñ lõñliñ kin “aibujuij” eo ñõn jutak einwõt ri jolet ro an Ailiñ eo. (Rome 8:16, 17) Oktan men in, ro rar utiej einwõt ri mweie mokta kiõ rej iion “kajirere” einwõt ri kaloran Christ. (John 7:47-52; 12:42, 43) Bõtab, einwõt ri karejar ro an Jehovah, kij aolep jemaroñ lõñliñ kinke mweie an lõl im juõn ãt ebuñbuñ ilo lõl ejelok tokjen ñõn jidik ñe keiri ibben mweie ilo jitõb im jej lõñliñ kaki. Im elap ad kamolol bwe ibwilijid ejelok jikin ñõn kautiej burued ñõn jidik kin juõn ãt ebuñbuñ iman mejen ro ri lõl in!​—Jabõn Kennan 10:22; Jerbal 10:34, 35.

10. En ewi wãwen an juõn ri Christian watõk mweie ilo kanniek?

¹⁰ James ej jibañ kij ñõn lo bwe aetokin mour eo ad ejjab bedbed ion mweie im tõbrak ko ilo lõl in. Einwõt jejjab maroñ bõprae bwe “bwil eurur” jen al en kameraik aibujiuj eo an juõn wũt, eindein men ko remweie an juõn armij eban kaetoklok mour eo an. (Psalm 49:6-9; Matthew 6:27) Emaroñ mij ñe ej jibadõk “ial ko an,” bõlen ilo business. Kin men, men eo eaorõktata ej bwe jen “mweie ñõn Anij” im ñõn kamãt ad maroñ ñõn kalaplok jerbal eo an Ailiñ eo.​—Luke 12:13-21; Matthew 6:33; 1 Timothy 6:17-19.

Emõnõnõ Ro Rej Kijenmij ilo Melejoñ

11. Ta kejatdikdik ko rej ñõn ro rej bin wõt ilo air tõmak ñe rej wõnmae melejoñ ko?

¹¹ Mweie ak jeramel, jemaroñ mõnõnõ elañe jej kijenmij ilo melejoñ ko wõt. (James 1:12-15) Elañe jej kijenmij ilo melejoñ ko im tõmak wõt, jemaroñ mõnõnõ, kinke ewor lõñliñ ilo ad kõmmõn men eo ejimwe iman mejen Anij. Ilo air tiljek wõt ñõn mij, ri Christian ro emwij an jitõb eo kabit ir renaj bõk “belin mour,” mour in jabwabõnbõn ilõñ. (Revelation 2:10; 1 Korint 15:50) Elañe ewor ibbed kejatdikdik eo ñõn mour ion lõl im tõmak wõt ilo Anij, jenaj maroñ reimanlok ñõn bõk mour indio ilo juõn paradise ion lõl. (Luke 23:43; Rome 6:23) Elap an emõn Jehovah ñõn aolep ro rej jerbale tõmak ilo e!

12. Ñe jej wõnmae abañ ko, etke jen jab ba: “Anij ej kabo iõ”?

¹² Emaroñ ke bwe Jehovah ej melejoñwe kij kin melejoñ ko? Jaab, jen kar jab ba: “Ñe kabo e Anij ej kabo iõ.” Jehovah ejjab melejoñwe kij bwe jen jerawiwi ak ekõnan jibañ kij im kakajur kij ñõn kijenmij iumin melejoñ ko elañe jej tiljek wõt ñõn e. (Pilippai 4:13) Anij ekwojarjar, inem ejamin likit kij ilo wãwen ko me renaj kar kamõjnoik maroñ eo ad ñõn bõprae ad jerawiwi. Elañe jej bo im jerawiwi, jejjab kõnan naruen, “bwe men ko renana re ban kabo Anij, im Ej kabo ejelok armij.” Meñe Jehovah emaroñ kõtlok juõn melejoñ ñõn kajimwe kij bwe en wor tokjen ñõn kij, ejjab melejoñwe kij kin juõn lemnak ejakkar. (Hebrew 12:7-11) Sa-tan emaroñ kabo kij ñõn kõmmõn bwid, ak Anij emaroñ kanemkwoj kij jen ri nana eo.​—Matthew 6:13.

13. Ta eo emaroñ walok elañe jejjab jolok juõn kõnan enana?

¹³ Jej aikwij jar kinke juõn ial emaroñ tellok ñõn bõk juõn lemnak ebwid im men in emaroñ kabo kij ñõn jerawiwi. James ej ba: “Emwij kabo jabrewõt armij ñe mõm ko an rej karel buruen im kamej e.” Jejjab maroñ naruen Anij kin jerawiwi ko ad elañe jej kõtlok bwe mõm ko ad ren deloñlok na iloan burued. Elañe jejjab jolok mõm ko ad, inem enaj ‘etta,’ ilo burued, im enaj “keutak jerawiwi.” Alikar, jej aikwij kejbarok burued im bõprae kõnan ko rejerawiwi. (Jabõn Kennan 4:23) Kar lelok ñõn Cain nan in kakkil eo bwe enaj kar jerawiwi, ak ear jab kõnan roñjake. (Genesis 4:4-8) Inem, ta elañe jej iten deloñlok ilo ial eo ejakkar nae Bible eo? Emol jej aikwij mõnõnõ elañe ri Christian elder ro rej kajeoñ in kajimwe kij bwe jen jab jerawiwi nae Anij.​—Galetia 6:1.

Anij​—Unjen Men Ko Remõn

14. Ilo wãwen et eo jemaroñ ba bwe men in letok ko an Anij rej “wãppen”?

¹⁴ Jej aikwij kememej bwe Jehovah ej Unjen, jab melejoñ ko, ak men ko remõn. (James 1:16-18) James ej naetan ri tõmak ro mõttan einwõt “ro jatiõ jitenburu iba” im kwalok bwe Anij ej ri Letok ‘men in letok emõn im wãppen otemjelok.’ Men in letok ko ilo jitõb im kanniek an Jehovah rej “wãppen,” ak eyu, ejelok likjap ibben. Rej “jen lõñ,” jen jikin jokwe an Anij ilõñ. (1 Kings 8:39) Jehovah ej “Jemen meram jen lõñ”​—al eo, aliñ, im iju ko. (Psalm 43:3; Jeremiah 31:35; 2 Korint 4:6) Jab einwõt al eo ej ukõt annañ ko an men ko ñe ej emmakit im bed lõñtata ilõñ ñe eloliñ al wõt, Anij ej bojak wõt ien otemjej ñõn lelok men ko remõntata. Emol enaj kaboj kij ñõn anjo ion melejoñ ko elañe jej bõk aolep men in letok ko ilo jitõb ear letok ikijen Nan eo an im “dri korijer e tiljek im meletlet.”​—Matthew 24:45.

15. Ta juõn ian men in letok ko remõntata an Jehovah?

¹⁵ Kar ta juõn ian men in letok ko remõntata Anij ear letoke? Keutak ro nejin ilo jitõb ikijen jitõb kwojarjar, ekkar ñõn news eo emõn, ak “nan in mol.” Ro rar lotak ilo jitõb kar “jomõkõj jen men in kõmõnmõn ko,” emwij kãlet ir jen lõl bwe ren juõn “ailiñ im priest ro” ilõñ. (Revelation 5:10; Epesõs 1:13, 14) James emaroñ kar lemnak kin jomõkõj in barley rar katok ilo Nisan 16, eo kar ejja ran eo wõt Jesus ear jerkakbiji, im kin katok eo kin ruo bread in wheat ko ilo ran in Pentecost, ke jitõb kwojarjar kar lutok e ion armij. (Leviticus 23:4-11, 15-17) Elañe eindein, inem Jesus enaj kar jomõkõj eo im ri jolet ro mõttan rar einwõt “jomõkõj in men in kõmõnmõn ko an.” Ta elañe kejatdikdik eo ad ej ñõn mour indio ion lõl? Eokwe, ilo ad kememej wõt kin men in enaj jibañ kij ñõn debij wõt tõmak eo ad ilo Ri Letok eo kin “men in letok ko remõn,” eo ear kõmmõn bwe en wor mour indio iumin iroij eo an Ailiñ eo.

Kwon juõn ‘Ri Kõmõnmõn Nan eo’

16. Etke jej aikwij ‘mõkõj [ad] roñjake ak rumij [ad] konono im illu’?

¹⁶ Jekdon elañe jej jelmae melejoñ ko kiõ ak jab, jej aikwij “dri kõmõnmõn (ak jerbale) nan eo.” (James 1:19-25) Ej aikwij “mõkõj [ad] ronjake” nan in Anij, einwõt ri kõmõnmõn ro rekiblie. (John 8:47) Ijo turãjet, ej aikwij “rumij [ad] konono,” ilo ad kejbarok ta eo jej ba. (Jabõn Kennan 15:28; 16:23) James ear rejañ kij bwe jen jab mõkaj in ba bwe Anij ej melejoñwe ak kabo kij. Bareinwõt ear kakabilek bwe “en rumij [ad] illu; bwe illu an armij e jab jerbale kwojarjar an Anij.” Elañe jej illu kin ta eo juõn armij ej ba, jej aikwij jab ‘burokadu’ im jab uak ilo lej. (Epesõs 4:26, 27) Juõn jitõb elej me emaroñ kabañ kij im melejoñwe armij ro jet ejjab maroñ jebar men eo tõmak ilo Anij eo ad ewãnik ej aikwiji jen kij. Ijellok men in, elañe elap an wor “jelalokjen” ibbed, enaj “rumij [ad] illu,” im ro jeer im jatid renaj ruaktok ñõn kij.​—Jabõn Kennan 14:29.

17. Ta tõbrak eo enaj walok ilo ad jolok nana jen burued im lolãtãt eo ad?

¹⁷ Jej aikwij karreoik kij jen “etton otemjej”​—men otemjej Anij ej jõjõik im rej kowõnmanlok illu. Bareinwõt, jej aikwij ‘jolok nana.’ Kij aolep jej aikwij jolok etton otemjej ilo kanniek ak jitõb jen kij. (2 Korint 7:1; 1 Peter 1:14-16; 1 John 1:9) Jolok nana jen burued im lolãtãt eo ad enaj jibañ kij “bõk nan” in mol eo. (Jerbal 17:11, 12) Jekdon ewi toan ad jutak einwõt ri Christian ro, jej aikwij kalaplok ad kadeloñ nan in mol eo jen Bible eo ilo kij. Etke? Kinke ikijen jitõbõn Anij, nan eo jaar kadeloñe ilo kij enaj jebar “armij eo ekãl” eo ej tellok ñõn mour indio​—Epesõs 4:20-24.

18. Ewi wãwen juõn ri roñjake nan eo ej einjuõn jen juõn ri kõmõnmõn nan eo?

¹⁸ Ewi wãwen jej kwalok bwe nan eo ej tel kij? Ilo ad kiblie im “dri kõmõnmõn nan eo, im jab dri roñjake wõt.” (Luke 11:28) “Dri kõmõnmõn ro” ewor tõmak rot eo me ej jebar jerbal ko rekijejeto ilo jerbal in Christian im keini air bed ilo kwelok ko ibben armij ro an Anij. (Rome 10:14, 15; Hebrew 10:24, 25) Juõn ri roñjake nan eo ej einwõt “armij eo ej lo mejen ilo kabjur.” Ej baj lale wõt, inem illok im meloklok kin ta eo ej aikwiji ñõn kajimwe turin mejen. Einwõt “dri kõmõnmõn nan eo,” jej katak im bokake “kien wãppen” eo an Anij, ekoba men otemjej ekõnan bwe jen kõmmõni. Anemkwoj eo jej mõnõnõ kaki im ej oktan kamakoko in jerawiwi im mij, ej tellok ñõn mour indio. Inem jej aikwij ‘linõre kien in anemkwoj eo e wãppen,’ im bar etale im bokake. Im baj lemnak mõk! Einwõt ‘dri kõmõnmõn jerbal eo, jab dri roñjake ro remeloklok,’ jenaj mõnõnõ kin buñburu eo an Anij.​—Psalm 19:7-11.

Elaplok Jen Ad Baj Ri Kabuñ Ro Wõt

19, 20. (a) Ekkar ñõn James 1:26, 27, ta eo kabuñ eo erreo ej aikwiji jen kij? (b) Ta jet ian wanjoñok ko kin kabuñ eo erreo?

¹⁹ Elañe jekõnan bõk jerammõn jen lõñ, jej aikwij kememej bwe kabuñ eo emol ejjab juõn wãwen bajjek ilo mour. (James 1:26, 27) Jemaroñ watõk kij make einwõt ‘dri kabuñ ro’ Jehovah ej buñburuen kaki, ak watwat eo an kin kij ej men eo eaorõktata. (1 Korint 4:4) Juõn likjap elap ej abañ eo ñõn ‘drebdribije loin.’ Jenaj mone kij make elañe jaar lemnak bwe Anij ej buñburuen kin kabuñ eo ad elañe jej kananaik armij ro jet, riap, ak kajerbal loed ilo wãwen ko jet rejakkar. (Leviticus 19:16; Epesõs 4:25) Emol, jejjab kõnan bwe “men in kabuñ eo” ad en “ejelok tokjen” ibben Anij kin jabdewõt un.

²⁰ Meñe James ejjab kamelele kin aolep wãwen kabuñ eo erreo, ej ba bwe ej kitibuj ad lale ‘ro atajinemjen im kõra ejoko beleir ilo air jorran.’ (Galetia 2:10; 6:10; 1 John 3:18) Congregation eo an ri Christian ro elap an kwalok an itoklimo ñõn lelok jibañ ñõn kõra ro ejako beleir. (Jerbal 6:1-6; 1 Timothy 5:8-10) Ke Anij ej Ri Kejbarok limaro ejoko beleir im ro atajinemjen, jen jibañ E ilo ad jibañ ir joñan wõt ad maroñ ilo jitõb im kanniek. (Deuteronomy 10:17, 18) Bareinwõt kabuñ erreo ej melelen “jab lipjinjin kin lõl in,” jukjuk im bed eo enana an armij eo ej bed iumin kajur eo an Satan. (John 17:16; 1 John 5:19) Kin men in jen kamakelok iad jen mwil eo enana an lõl in bwe jen maroñ kaibujuij Jehovah im bwe en wor tokjed ilo jerbal eo an.​—2 Timothy 2:20-22.

21. Ikijen letter eo an James, bar ta kajitõk ko jej aikwij uaki?

²¹ Nan in kakabilek eo an James ej kab mwij ad katak kake en kar jibañ kij ñõn kijenmij iumin melejoñ ko im bin wõt ilo tõmak eo ad. En kar kalaplok kamolol eo ad kin Ri Letok eo ej yokwe kin men in letok ko remõn. Im nan ko an James ear jibañ kij ñõn jerbale kabuñ eo erreo. Bar ta eo ej bõkmantak? Bar ta eo jej aikwij kõmmõne ñõn kamole tõmak eo ad emol kin Jehovah?

[Kamelele eo itulal]

Ewi Wãwen Kwonaj Kar Uak?

◻ Ta eo enaj jibañ kij ñõn kijenmij ilo melejoñ ko?

◻ Meñe ewor melejoñ ko, etke ri Christian ro remaroñ lõñliñ?

◻ Ewi wãwen jemaroñ ri kõmõnmõn nan eo?

◻ Ta eo kabuñ erreo ej kitibuj?

[Pija eo ilo peij 6]

Ñe jej bed iumin melejoñ, jej aikwij jerbale tõmak ilo kajur eo an Jehovah ñõn uake jar ko

[Pija ko ilo peij 7]

“Dri Kõmõnmõn nan ro” rej kwalok nan kin Ailiñ eo an Anij ibelakin lõl