Ewõr Jinekjej ñan Ro Rej Kijenmij
1 “Ilo ami kijenmij kom naj jibarek ami mour.” (Luk 21:19) Nan kein, me rej mõttan kanan eo an Jesus kin “jemlokin jukjuk im bed in,” rej kalikar bwe ilo ad kejbãrok ad tiljek, jej aikwij bojak in jelmae elõñ melejoñ ko. Ak ilo kajur eo an Jehovah, kij kajjojo jemaroñ ‘kijenmij ñan jemlokin’ im bõk “mour.”—Mat. 24:3, 13; Pil. 4:13.
2 Matõrtõr, abañ ko kin ejmour, abañ ko kin jããn, im eñtan ko ilo eñjake rej kõmman bwe mour kajjojo ran en juõn melejoñ. Bõtab, jen jab meloklok bwe Satan ej kajeoñ in rupe tiljek eo ad ñan Jehovah. Kajjojo ran ñe jej tiljek ñan Jemed ej bar juõn ran jaar bõk kunad in uake aitwerõk eo an eo ej kinaaklok Jehovah. Elap an kajuburu ñan jelã bwe Anij ejjab meloklok “dren in kemjalal ko” ad ñe jej jelmae melejoñ ko! Raorõk ñan Jehovah, im tiljek eo ad ej kamõnõnõik buruen!—Sam 56:8; Ken. 27:11.
3 Kar Karreoiki kin Melejoñ ko: Abañ ko remaroñ kwalok juõn mõjno ilo tõmak ak juõn likjap ilo kadkad ko kadkadin, einwõt utiej buru ak jaje meanwõd. Jen am kajeoñ in bõprae ak kabõjrak melejoñ ko ikijen wãwen ko rejjab errã ibben Bible eo, jej aikwij bokake nan in kakabilek eo ilo Nan eo an Anij ñan kõmman bwe “en wãppen an kijenmij jerbal.” Etke? Kinke ilo ad kijenmij kin melejoñ ko ilo tiljek enaj jibañ kij bwe jen “wãppen im eyu im enjelok [ad] aikwij.” (Jem. 1:2-4) Kijenmij emaroñ jibañ kij ñan kaddeklok kadkad ko raorõk, einwõt kõmmanwa, jelã eñjake ko an ro jet, im tiriamokake.—Rom 12:15.
4 Tõmak eo Emwij Melejoñe: Ñe jej kijenmij kin melejoñ ko, jej bõk juõn tõmak emwij melejoñe me eaorõk iman mejen Anij. (1 Pit. 1:6, 7) Tõmak rot in ej kamaroñ kij ñan jutak bin iumin melejoñ ko ilo ran ko renaj itok. Bareinwõt, jemaroñ eñjake an Anij buñburuen kake kij, im men in ej kakajurlok kejatdikdik eo ad, im kõmman bwe en laplok an mol ñan kij.—Rom 5:3-5.
5 Jinekjej eo emõntata kin kijenmij ej alikar ilo Jemes 1:12, ijo ej ba: “Emõnõnõ armij eo ej kijenmij ilo melejoñ: bwe ñe emwij kamol e, e naj bõk belin mour.” Kin men in, jen bin wõt ilo ad tiljek ñan Jehovah, im liki bwe enaj kajerammõn “ro rej yokwe e.”