“Emõnõnõ Armij eo Ej Kijenmij Ilo Melejoñ”
1 Ri Christian ro aolep rej aikwij jelmae melejoñ ko. (2 Tim. 3:12) Melejoñ ko remaroñ itok ilo wãwen ko ekajju wãweir einwõt nañinmij, abañ kin jabwe money ñan kabwe aikwij ko, kabo ko renana, matõrtõr ak bar wãwen ko jet. Unin an Satan kõmman melejoñ ko ej ñan kabwer kij, ñan kadiklok kunad ilo jerbal in kwalok nan, ak kabõjrak kij jen ad karejar ñan Anij. (Job 1:9-11) Ewi wãwen ad kijenmij iumin melejoñ ko ej tellok ñan ad mõnõnõ wõt?—2 Pit. 2:9.
2 Bojak ñan Jelmae Melejoñ Ko: Jehovah emwij an letok Nan eo an emol, ekoba juõn lokbook kin mour eo an Jesus im katak ko an. Ikijen ad bokake nan ko an Jesus im jerbale, jej likit juõn foundes̃õn ekajur ñan jelmae melejoñ ko. (Luk 6:47-49) Bareinwõt jemaroñ bõk kajur jen karõk ko jet—ro jeid im jatid ilo jitõb, kwelok ko ilo congregation, im katak ko me rej bedbed ion Bible jen ri karejar eo etiljek im meletlet. Ekkeini ad kajerbal men in letok eo kin jar jen Anij.—Mat. 6:13.
3 Jehovah ear bareinwõt letok ñan kij juõn kejatdikdik. Ñe jej kakajur ad tõmak ilo kallimur ko an Jehovah, kejatdikdik eo ad enaj erom einwõt “ankõr in ar, ebin im e jamin makõtkit.” (Hib. 6:19) Ilo ien ko an Bible eo, tima ko rar jab jeraklok jen manwab elañe ejelok ankõr ibbeir, meñe emõn lañ. Elañe juõn lañ elap an nana ear walok ilo jidimkij, ekkã air kar jolallok ankõr nan kejbãrok tima eo jen an eotõk im jorrãn. Ej eindein, kalek tõmak eo am ilo kallimur ko an Anij kiõ, enaj kabin ad tõmak ñe melejoñ ko renaj walok. Abañ ko remaroñ walok ilo jidimkij. Meñe jerbal in kwalok nan eo an Paul im Barnabas kar emõn ilo jinoin im armij ro ilo bukwon in Lystra rar lañliñ ibbeir ro, ilo idiñ ear lukkun oktak ke Ri Jew ro rar tõbar jikin eo im jino jumae ir.—Jerb. 14:8-19.
4 Kijenmij ej Bõktok Mõnõnõ: Ad kate kij ñan wõnmanlok ilo jerbal in kwalok nan meñe jej ion jumae ej bõktok ainemõn ilo lolãtãt. Jej lañliñ ñe rej likit kij bwe jen tellokin bõk eñtan kin Christ. (Jerb. 5:40, 41) Ad kijenmij iumin melejoñ rej jibañ kij ñan kaddek kadkad ko kadkadin eta buru, bokake, im kijenmij elaplok jen mokta. (Dut. 8:16; Hib. 5:8; Jem. 1:2, 3) Men in ej katakin kij ñan atartar ion Jehovah, ñan liki ilo kallimur ko an, im ebake einwõt juõn jikin kone.—Ken. 18:10.
5 Jej jelã bwe melejoñ ko ejjab to air bed. (2 Kor. 4:17, 18) Melejoñ ko rej letok ien ñan ad kwalok ewi joñan mũlalin yokwe eo ad ibben Jehovah. Ikijen ad kijenmij iumin melejoñ ko, jemaroñ uake nan in kinaak ko an Satan. Inem, jej jab ebwer! “Emõnõnõ armij eo ej kijenmij ilo melejoñ: bwe ñe emwij kamol e enaj bõk belin mour eo.”—Jem. 1:12.