“Komin Kate Kom Kin Tõmak Eo”!

“Komin kate kom kin tõmak eo emwij lelok ñõn rokwojarjar alen wõt juõn kin otemjej.”​—JUDE 3.

1. Ilo wãwen et eo Christian ro remol rainin rej bed ilo tarinae?

RI TARINAE RO ilo tarinae ien otemjej ebin air mour. Kalmenlokjen kin am aikwij kõnak aolep kein tarinae ko im kwoj maaj manlok iumin mile im bar mile im einwõt ejelok jemlokin im ilo aolep kain lañ, ilo am bõk kaminene eo ekaeñtan ilo kajerbal kein tarinae, ak ñan jojomare yuk make nae aolep wãwen ko rekauwatata ñan mour ke emaroñ bõktok mij ak kinejnej. Bõtab, Christian ro remol, rejjab bõk kunair ilo tarinae ko an ailiñ ko. (Isaiah 2:2-4; John 17:14) Bõtab, jej aikwij jab meloklok bwe kij aolep jej bed ilo juõn wãwen tarinae ilo jitõb. Satan eobrak kin kijirãt nae Jesus Christ im ri kalor ro an ion lal. (Revelation 12:17) Ro otemjej rej beek ñan air karejar ñan Jehovah Anij rej, ilo mol, lajrak einwõt ri tarinae ro rej tarinae ilo jitõb.​—2 Korint 10:4.

2. Ewi wãwen an Jude kwalok kake tarinae eo an Christian, im ewi wãwen an letter eo an maroñ jibañ kij kijenmij?

² Ilo jejjet, Jude leo jein im jatin Jesus ej je: “Kom jitenburu, ke I ar kaiur iõ bwe in jejewoj ñõn kom kin men in lomorer, e ar walok ñõn iõ bwe emõn in jejewoj im kowe kom, bwe komin kate kom kin tõmak eo emwij lelok ñõn rokwojarjar alen wõt juõn kin otemjej.” (Jude 3) Ke Jude ear rejañ Christian ro ñan “kate kom,” ear kajerbal juõn kajin eo ewõr kõtan ñan nan in “eñtan.” Aet, tarinae in emaroñ bin, meñe kaeñtan! Jet ien kwoj lo ke an bin kijenmij ilo tarinae in? Letter in an Jude ekadu ak ekajur emaroñ jibañ kij. Ej rejañ kij bwe jen jumae mour etton, kautiej kajur in iroij rõn, im ñan kejbãrok kij make ilo yokwe eo an Anij. Jen lale ewi wãwen jemaroñ jerbale nan in kakabilek in.

Jumae Mour Etton

3. Ta wãwen eo ej menin ekaiuriur ear jelmae congregation eo an Christian ilo ran ko an Jude?

³ Jude ear maroñ lo bwe ejjab aolep Christian ro rejetan rar wini tarinae eo nae Satan. Juõn menin ekaiuriur ear jelmae bwij eo. Emaan ro renana rar “deloñtok ilo etino,” Jude ej je. Maan rein rar kalaplok mour etton. Im ilo jelã kilen kõmman bwe jerbal ko air en einwõt wõr kõmmanwa ie, “ukot joij an ar Anij ñõn ejej.” (Jude 4) Bõlen, einwõt jet armij in Gnostic ro etto, rar lemnak bwe elak laplok an juõn jerawiwi, enaj laplok an bõk joij eo an Anij​—inem, ear emõnlok ñan an laplok jerawiwi! Ak bõlen rar lemnak bwe juõn Anij eo ejoij ejamin kajeik ir. Ilo jabdewõt wãwen, rar bwid.​—1 Korint 3:19.

4. Ta wanjoñok ko jilu ilo Jeje ko kin ekajet ko an Jehovah ilo ien ko mokta Jude ej kwalok kaki?

⁴ Jude ej kabwid unin kõmmanwa ko air rebwid ilo an jitõñlok ñan jilu wanjoñok ko kin ekajet ko an Jehovah ilo ien ko remotlok: nae ri Israel ro rar “jab tõmak”; nae “enjel ro me . . . r’ar illok jen jikiir” bwe ren jerawiwi ibben kõrã ro; im nae armij in Sodom im Gomorrah ro, “r’ar lor ejej eirwõt, im ilok im bukot kõniek eo juõn.” (Jude 5-7; Genesis 6:2-4; 19:4-25; Bwinbwin 14:35) Ilo kajjojo wãwen kein, Jehovah ear bõktok juõn ekajet nae ri jerawiwi ro.

5. Jude ej eliji nan ko an ri kanan in etto et eo, im ewi wãwen an kar kanan in kalikar an naj kar lukkun mol an jejjet kitien?

⁵ Tokelik, Jude ej jitõñlok ñan juõn ekajet eo elaplok an ettolok tõbare. Ej eliji juõn kanan an Enoch​—juõn ennan eo jejjab loe ijoko jabdewõt ilo Jeje ko rekakõrmol.a (Jude 14, 15) Enoch ear kanan kin juõn ien eo ñe Jehovah enaj kar ekajete ro otemjej renana im jerbal ko air renana. Ekaitoktoklimo, bwe Enoch ear konono ilo kajin ien eo emotlok, bwe ekajet ko an Anij rar lukkun mol im einwõt ñe ededelok air walok. Armij ro remaroñ kar kajirere kin Enoch im tokelik kin Noah, ak ri kajirere rein rar aolep jakolok ilo ibwijleplep eo an lal.

6. (a) Kin ta eo Christian ro ilo ran ko an Jude rar aikwij kakememej ir kake? (b) Etke jej aikwij bõk nan in kakememej ko an Jude ñan buruõd?

⁶ Etke Jude ear jeje kin ekajet kein rekwojarjar? Kinke ear jelã bwe jet ian ro rar kobalok ibben congregation ko an Christian ilo ran ko an make rar kõmman jerawiwi ejja einwõt an etton im wõr rueir einwõt ro rar naunin ekajet ko ilo ien eo emotlok. Kin menin, Jude ej je bwe congregation ko rej aikwij bõk kakememej kin jet bedbed in mol ko ilo jitõb. (Jude 5) Alikar rar meloklok bwe Jehovah Anij ear lo men eo rar kõmmane. Aet, ñe ro ri karejaran rej rupe kien ko an, im katton ir make im ro jet, ej loe. (Jabõn Kennan 15:3) Kõmman rot kein rej mũlal an kametak e. (Genesis 6:6; Psalm 78:40) Ej juõn lemnak ekabwilõñlõñ bwe kij armij jemaroñ jelet eñjake ko an Iroij Kajur Bõtata eo an ijoko otemjelok. Ej kalimjek kij ran otemjej, im ñe jej kõmman joñan wõt ad maroñ in anõk jenkwon neen Nejin, Jesus Christ, inem mwilid ej kamõnõnõik buruen. Inem, jej jab jumae nan in kakememej rot in einwõt Jude ej letoke ak jen bõki ñan buruõd.​—Jabõn Kennan 27:11; 1 Peter 2:21.

7. (a) Etke ej menin aikwij elap ñan ro rej lorak ilo kõmmani bwid ko relap bwe ren mõkaj in bukõt jibañ? (b) Ewi wãwen kij aolep jemaroñ bõprae mour etton?

⁷ Jehovah ejjab lo wõt ak ej jerbale. Ke ej juõn Anij in ekajet jimwe, ej bõktok kaje ion ro ri kõmman nana​—ilo ien eo an emwij an kajejjete. (1 Timothy 5:24) Ro rej lemnak bwe ekajet ko an rej ñan men ko an ien ko remotlok im bwe ejjab lemnak kin men ko renana rej kõmmani rej kabwebweik ir make. Ej juõn menin bebe elap tokjen ñan jabdewõt armij rainin ro rej lorak ilo mour etton ñan bukõt jibañ kiõ wõt jen Christian elder ro! (James 5:14, 15) Kij otemjej jemaroñ ekkõl wõt kin kauwatata eo me mour etton ej likit ion tarinae eo ad ilo jitõb. Yiõ otemjej ej wõr jorrãn​—armij ro rej bukwelok ir jen bwiljid, im elõñ wõt iair kin air kõmmani manit ko retton im rejjab ukwelok. Jej aikwij bin ilo ad beek ñan jumae jabdewõt kabo ko rej jino iten tellok kij ilo kain ial rot in.​—Keidi Matthew 26:41.

Kautiej Kajur in Iroij Rõn

8. Kar wõn “ro raibujuij” rej kwalok kake ir ilo Jude 8?

⁸ Bar juõn abañ eo Jude ej kwalok kake ej jabwe kautiej kajur in iroij rõn. Ñan wanjoñok, ilo eon 8 ej naruõn ejja armij ro wõt renana kin air “konono nana nae ro raibujuij.” Kar wõn rein “ro raibujuij”? Ir kar armij ro rar jab wãppen, ak ear wõr air eddo emwij an jitõb kwojarjar eo an Jehovah likit ioir. Ñan wanjoñok, congregation ko ear wõr elder ro ie, ro rar bõk eddo in shepherd e bwij eo an Anij. (1 Peter 5:2) Ear wõr overseer ro rej ito-itak bareinwõt, einwõt ri jilek Paul. Im kumi in elder ro ilo Jerusalem rar jerbal einwõt juõn governing body, im kõmmani bebe ko rej jelet congregation eo an Christian einwõt juõn dolul. (Jerbal 15:6) Jude ear lap an inebata bwe jet ilo congregation eo rar konono nana, ak blasphem nae maan rein.

9. Ta wanjoñok ko kin jab kautiej maroñ eo Jude ej kwalok kake?

⁹ Ñan kananaik kain konono rot in ejelok kautiej ie, ilo 11 eon, Jude ej kwalok bar jilu wanjoñok ko einwõt menin kakememej: Cain, Balaam, im Korah. Cain ear kajekdon kakabilek in yokwe eo an Jehovah im ear jibadõk wõt ilo ial eo an make kin kijirãt im uror. (Genesis 4:4-8) Balaam ear elijinmen an bõk nan in kakkõl eo ejelok kajitõk ear itok jen juõn unjen eutiejlok​—meñe ass eo an make ear konono ñan e! Ak Balaam ilo kibbon ear etal wõt im kõmman karõk nana nae armij ro an Anij. (Bwinbwin 22:28, 32-34; Deuteronomy 23:5) Korah ear wõr an eddo make, ak ear jab ju buruen. Ear jarõk jumae nae leo ettã tata buruen ion lal, Moses.​—Bwinbwin 12:3; 16:1-3, 32.

10. Ewi wãwen an jet armij rainin wõtlok iloan aujid in “konono nana nae ro raibujuij,” im etke kain konono rot in jej aikwij bõprae?

¹⁰ Wanjoñok kein me elap tokjeir rej katakin kij bwe jen eoroñ nan in kakabilek ko im kautiej ro Jehovah ej kajerbale ir ilo bõk eddo! (Hebrew 13:17) Ekanuij bidodo ñan lo likjap ko ibben elder ro emwij kabit ir, kinke ir rej armij jab wãppen, einwõt kij otemjej jejjab wãppen. Ak elañe jej kalimjek wõt likjap ko air im kajekdon ad kautiej ir, jen maroñ ke “konono nana nae ro raibujuij”? Ilo 10 eon, Jude ej kwalok kin ro “rej kajirere nae men ko jabrewõt re jaje kaki.” Jet renaj, ilo jet ien, notaiki juõn bebe eo kõmman in juõn kumi in elder ro ak juõn committee in ekajet. Ak, rejjab jelã kin tibdik ko otemjej me elder ro rej aikwij lemnak kaki ñan air tõbar juõn bebe. Inem etke rej konono nana kin men ko rejjab lukkun jelã kaki? (Jabõn Kennan 18:13) Ro ekkã air konono wan rot in remaroñ kõmman an wõr jebelbel ilo congregation eo im bõlen maroñ watõk ir einwõt “ejman ko retino” ilo ibben don ko an ri tõmak ro mõttair. (Jude 12, 16, 19) Jen aikwij jab kõnan jarõk juõn menin kauwatata ilo jitõb ñan ro jet. Ak, kajjojo iad jen beek ñan ad kamolol kin maan ro rej bõk eddo kin jerbal eo air ebin im tiljek ñan bwij eo an Anij.​—1 Timothy 5:17.

11. Etke Michael ear jenliktak jen an bõktok ekajet ilo kajin ko renana nae Satan?

¹¹ Jude ej kwalok juõn wanjoñok in juõn eo ear kautiej kajur in iroij. Ej je: “A Maikeel arkenjel eo, ke e ar jumae devil im aituerõk kin enbwinin Moses, e ar mijõk in konono nae im ekajete, a e ar ba, ‘Iroij en bõprae yuk.’” (Jude 9) Bwebwenato in ekabwilõñlõñ, Jude wõt ear je ilo Jeje in kakõrmol ko, ej katakin kin ruo katak ko. Juõn, ej katakin kij bwe jen likit ekajet ko ibben Jehovah. Alikar Satan ear kõnan kajerbal ilo jab jimwe enbwinin ri tõmak eo Moses ñan an kalaplok kabuñ wan. Elukkun nana! Ak, Michael ilo ettã buru ear jenliktak jen an bõktok juõn ekajet, bwe Jehovah wõt ewõr maroñ in ibben. Inem, en ewi joñan laplok ad aikwij in jenliktak jen ad ekajete maan ri tõmak ro rej kajeoñ in karejar ñan Jehovah.

12. Ta eo ro rej bõk eddo ilo congregation eo an Christian remaroñ bõk air katak kake jen joñok eo an Michael?

¹² Ijo turãjet, ro ewõr juõn joñan maroñ ibbeir ilo congregation eo remaroñ bareinwõt katak juõn katak jen Michael. Eokwe, meñe Michael kar “arkenjel” eo, eo eutiejtata ian enjel ro otemjej, a ear jab kajerbal kajur eo an ilo nana, meñe iumin lõkatip. Elder ro retiljek rej anõk joñok in, ilo air kile bwe kajerbal maroñ eo air ilo nana ej menin jab kautiej kajur bõtata eo an Jehovah. Letter eo an Jude elap ijo ej ba kake kin maan ro rej bõk kautiej ilo congregation ko ak rej kajerbal kajur eo air ilo jõkkar. Ñan wanjoñok, ilo eon 12 ñan 14, Jude ej je juõn nan in kanana ekajur kin “s̃eperd ro re jab mijõk im mõke najirik ir.” (Keidi Ezekiel 34:7-10.) Ilo bar juõn wãwen ba, itoklimo eo air moktata kar tokjen ko ñan ir make, jab ñan bwij eo an Jehovah. Elder ro rainin emaroñ lap air katak jen kain joñok kein rewan. Emol, nan kein an Jude emwij unoki ilo juõn pija eo ealikar kin men eo jejjab kõnan oktak ñane. Ñe jej ajelok kij ñan kibbon, jejjab maroñ ri tarinae an Christ; elap ad boub ilo tarinae ñan tokjen ko ñan kij make. Jen an eindein, kij otemjej jen mour ekkar ñan nan ko an Jesus: “Mõnõnõ in lelok elap jen bõk.”​—Jerbal 20:35.

“Kejbãrok Kom ilo Yokwe an Anij”

13. Etke kij otemjej jej aikwij kõnan bed wõt ilo yokwe eo an Anij?

¹³ Lok ñan jemlokin letter eo an, Jude ej letok nan in kakabilek in jen okmãnãn in buru: “Kejbãrok kom ilo yokwe an Anij.” (Jude 21) Ejelok jabdewõt men enaj jibañ kij ilo tarinae eo an Christian elaplok jen menin, bed wõt ilo yokwe eo an Jehovah Anij. Bwe, yokwe ej kadkad eo elap kadkadin Jehovah. (1 John 4:8) Paul ear jeje ñan Christian ro ilo Rome: “Bwe ij lemnok e jab mij ak mour, e jab enjel rõn ak jiõb ro, e jab men ko kiõ ak men ko re naj itok, e jab kajur ko, E jab utiej ak imlõl, ak jabrewõt bar juõn men in kõmõn, e naj maroñ in kijbil kij jen yokwe an Anij, eo ilo Kraist Jisõs ar Iroij.” (Rome 8:38, 39) Ak, ewi wãwen ad bed wõt ilo yokwe in? Lale jilu menin joñok ko jemaroñ bõki, ekkar ñan Jude.

14, 15. (a) Ta melelen kalek kij make ion “tõmak ekwojarjar otem kwojarjar” ad? (b) Ewi wãwen ad maroñ etale wãwen eo ilo kein tõrak in tarinae eo ad ilo jitõb?

¹⁴ Moktata, Jude ej jiroñ kij ñan etal wõt im kalek kij make ilo “tõmak ekwojarjar otem kwojarjar” ad. (Jude 20) Einwõt ad kar loe ilo katak eo lok iman, menin ej juõn men eo ej wõnmanlok wõt. Kij jej einwõt em ko rej aikwiji elaplok worwor in kejbãrok ko nae wãwen ko rej nanalok. (Keidi Matthew 7:24, 25.) Inem jen lale bwe en jab tarjen joñan ad liki kij. Jen an eindein, jen lale ia eo jemaroñ kalek kij make ion bedbed in tõmak eo ad, im erom ri tarinae ro an Christ elaplok ad kajur im tiljek. Ñan wanjoñok, jemaroñ lemnak kin mõttan kein tarinae ko ad ilo jitõb rej kwalok kaki ilo Epesõs 6:11-18.

¹⁵ Ta wãwen eo ilo kein tõrak eo ad make ilo jitõb? “Kein tõrak eo elap in tõmak” eo ad ebin ke einwõt an aikwij in bin? Ñe jej reiliklok ilo yiõ ko kiõ rej kab motlok, jej lo ke jet kakõlle in jenliklik, einwõt jerwane bed ilo kwelok, luji kijejeto eo ilo jerbal in kwalok nan, ak jakolok itoklimo eo ad ilo ad katak Bible ibbed make? Kakõlle rot kein rekauwatata. Jej aikwij jerbal kiõ ñan kalek im kakajurlok kij make ilo mol eo.​—1 Timothy 4:15; 2 Timothy 4:2; Hebrew 10:24, 25.

16. Ta melelen jar ilo jitõb kwojarjar, im ta juõn men eo jej aikwij ekkeini ad kajitõk ibben Jehovah?

¹⁶ Wãwen eo kein karuo ñan bed wõt ilo yokwe eo an Anij ej ñan etal wõt im “jar ilo Jitõb Kwojarjar.” (Jude 20) Melelen menin ñan jar iumin kareelel eo an jitõb eo an Jehovah im ilo burukuk ibben Nan eo an emwij kakõrmole. Jar ej juõn wãwen eo eaorõk ñan ebaklok ñan Jehovah im kalikar tiljek eo ad ñan e. Jej aikwij jab kajekdon jerammõn in emõn! Im ñe jej jar, jemaroñ kajitõk​—ilo mol, kajitõk wõt​—kin jitõb kwojarjar eo. (Luke 11:13) Ej kajur eo ekajurtata ewõr ñan kij. Kin kain jibañ in, jemaroñ ien otemjej bed wõt ilo yokwe eo an Anij im kijenmij einwõt ri tarinae ro an Christ.

17. (a) Etke joñok eo an Jude ikijen tiriamokake elap an kabwilõñlõñ? (b) Ewi wãwen an kajjojo iad maroñ etal wõt im kwalok tiriamokake?

¹⁷ Kein kajilu, Jude ej rejañ kij ñan etal wõt im kwalok tiriamokake. (Jude 22) Wanjoñok eo an make ikijen menin ej menin kabwilõñlõñ. Eokwe, ear jimwe an inebata kin nana, mour etton, im buñ jen tõmak eo ear deloñetok loan congregation eo an Christian. Mekarta, ear jab ebwer im lelñoñ, bõk lemnak in bwe ien ko ear lap air kauwatata ñan kwalok juõn kadkad eo “emeoeo” einwõt tiriamokake. Jaab, ear rejañ ro jein im jatin ñan kwalok tiriamokake jabdewõt ien remaroñ, kõmmanwa ilo joij ibben ro rej eñtan jen bere ko im meñe ‘lomorir im kwotak ir jen kijeek’ ro rej jebwãbwe im rej ebaklok jerawiwi eo elap. (Jude 23; Galetia 6:1) Juõn menin kõketak emõn ñan elder ro ilo ien eñtan ko! Ir bareinwõt rej kate ir ñan kwalok tiriamokake jabdewõt ien ewõr bedbed ñane, ilo air bin wõt ñe ej menin aikwij. Ilo wãwen in lok wõt kij otemjej jekõnan kwalok ad tiriamokake ñan don. Ñan wanjoñok, jen ad inebata kin men dikdik ko, jemaroñ kwalok joij ilo ad jolok bwid.​—Kolosse 3:13.

18. Etke jemaroñ lukkun liki bwe jenaj anjo ilo tarinae eo ad ilo jitõb?

¹⁸ Tarinae eo jej tarinae ie ejjab juõn eo ebidodo. Einwõt an Jude ba, jej aikwij “kate kij.” (Jude 3) Ri kijirãt ro ad rekajur. Ejjab Satan wõt ak lal in enana im jab wãppen eo ad make rej aolep men ko rej jumae kij. Ak, jemaroñ lukkun liki ñan anjo! Etke? Kinke jej bed ijo ibben Jehovah. Jude ej kajemlok letter eo an kin juõn nan in kakememej bwe Jehovah ejimwe bwe en tellokin “aibujuij, utiejtata, maroñ potata im kajur, mokta jen ien otemjej, im ien in, im in drio.” (Jude 25) Menin ejjab juõn lemnak eo ekakõrmol ke? Inem, emaroñ ke wõr kajitõk kake, bwe ejja Anij in wõt “ej maroñ in kejbãrok kom jen buñ”? (Jude 24) Emol ejelok! Kajjojo iad en beek ñan ad etal wõt im jumae mour etton, im kautiej kajur in iroij ro, im ñan kejbãrok kij make ilo yokwe eo an Anij. Ilo wãwen in, jenaj lañliñ ibben don kin juõn anjo eaibujuij.

[Kamelele eo itulal]

Kajitõk ko ñan Elij

◻ Ewi wãwen an letter eo an Jude katakin kij ñan jumae mour etton?

◻ Etke elap tokjen ñan kautiej kajur in iroij rõn?

◻ Etke elap an kauwatata ñan kajerbal ilo bwid maroñ ko ilo congregation eo?

◻ Ewi wãwen ad maroñ jerbal ñan bed wõt ilo yokwe eo an Anij?

[Pija eo ilo peij 27]

Ilo oktak jen ri tarinae ro an ri Rome, Christian ro rej tarinae kin juõn tarinae ilo jitõb

[Pija eo ilo peij 30]

Christian shepherd ro rej jerbal, jab kin kibbon, ak kin yokwe