Jodikdik Ro—Katakin Kajur Ko In Jelãlokjen Eo Ami!
“A ekõn ko rebin rej ekar ñõn ro re ridto, aet, ñõn ro kin air minene rej maroñ in jela kajen emõn im nana.”—DRI HIBRU 5:14.
1, 2. (a) Ewi wãwen eo ad rainin ilo ad keidi ñan eo an Christian in Epesõs ro etto? (b) Ta maroñ ko remaroñ kejbãrok yuk jen kauwatata, im ewi wãwen am maroñ ejaaki?
“INEM komin kanuij lale ekijkan ami etetal, jab einwõt dri jaje, a einwõt dri meletlet; Im wiaik ien, bwe ran ko renana.” (Dri Epesõs 5:15, 16) Ke ri jilek Paul ear je nan kein ruo thousand yiõ ko remotlok, ‘armij renana im ro dri jela mon re naj laplok ilo air nana.’ Jej mour ilo “ien ko renana im bin mour ie,” ak einwõt an bar juõn ri ukok ukõte, ien ko “reobrak kin kauwatata.”—2 Timothy 3:1-5, 13; Phillips.
2 Bõtab, kwo maroñ bõprae am jorrãn jen kauwatata ko remaroñ ittino ilo ial eo am, ilo am ejaake “meletlet, . . . jelalokjen im maroñ kili.” (Jabõn Kennan Ko 1:4) Jabõn Kennan Ko 2:10-12 ej ba: “Bwe meletlet e naj dreloñ na ilo buruõm, im jelalokjen e naj men in mõnõnõ ilo am; Lolokjen emõn e naj lale yuk, jelalokjen e naj kejbãrok yuk: Bwe en lomorõm jen ial e nana, jen armij rej konono men ko re ankeke.” Ak ewi wãwen am maroñ ejaake maroñ rot kein? Dri Hibru 5:14 ej ba: “A ekõn ko rebin rej ekar ñõn ro re ridto, aet, ñõn ro kin air minene rej maroñ in jela kajen emõn im nana.” Einwõt kin jabdewõt kabel, ñan jelã kajerbal kajur in jelãlokjen ko an juõn ej aikwij katak. Nan in Greek eo Paul ear kajerbale ej melelen ‘emwij an katak einwõt juõn ri kaminene ilo gymnastic.’ Ewi wãwen am jino kain katak rot in?
Katakin Kajur in Jelãlokjen ko Am
3. Ewi wãwen am maroñ kajerbal kajur in jelãlokjen ko am ñe rej kir ñan am kõmmane juõn bebe?
3 Lale bwe kajur in jelãlokjen ko am—maroñ eo am ñan jelã jimwe jen bwid—rej katak “ikijen jerbale.” Ñe kwoj aikwij kõmmane juõn bebe, kajidede in lemnak, emmakit ilo idiñ, ak baj lor wõt jar in armij ro enaj jeja an walok tokjen ilo juõn kãlet eo emeletlet. Ñan kõmman bebe ko remeletlet, kwoj aikwij kajerbal kajur in jelãlokjen ko am. Ewi wãwen? Moktata, ikijen an bolel am etale wãwen eo im bõk aolep mol ko ie. Kajitõk kin kajitõk ko elañe ej menin aikwij. Etale ta wãwen ko jet rej am. Jabõn Kennan Ko 13:16 ej ba: “Jabrewõt armij e jela bebe, ej jerbal kin jelalokjen.” Jeltokin, kajeoñ etale kien et ko ak nan in kaiñi et ko ilo Bible rej kwalok kin unintel in konono eo. (Jabõn Kennan Ko 3:5) Bwebõta, ñan kõmmane menin, ej aikwij wõr juõn am jelãlokjen kin Bible eo. Eñin unin Paul ej rejañ kij bwe jen bõk “ekõn ko rebin”—ñan katak “drilpen, im aitokõn, im mũlõlin, im utiejen” mol eo.—Dri Epesõs 3:18.
4. Etke juõn jelãlokjen eo kin nan in kaiñi ko an Anij elap tokjen?
4 Ad kõmman eindein ej menin aorõk, ke jejjab wãppen, jej itok wõt in jerawiwi. (Jenesis 8:21; Dri Rom 5:12) “Buruõn armij elaplok an jelã kilen etao jen jabdewõt men im elap an kate,” Jeremiah 17:9, New World Translation ej ba. Elañe ejelok nan in kaiñi ko rekwojarjar ñan tel kij, jemaroñ mone kij make ñan ad lemnak bwe juõn men eo enana ej emõn—kin wõt an kaniekid lap an kõnan. (Keidi Aiseia 5:20.) Ri jeje Sam ear je: “Kin ta juõn likao e naj karreoik ial eo an? Kin an kanuij lale ial eo ekar ñõn Am in nan. Kin nan in katak ko Am ij bõk meletlet; inem I jõjõik ial in mon otemjej.”—Sam Ko 119:9, 104.
5. (a) Etke jet jodikdik rej lor ial ko rewan? (b) Ewi wãwen an kar juõn jodikdik ledik kõmman bwe mol eo en an make?
5 Etke jet jodikdik ro kar kakajiririk ir ilo imõn Christian ro rar lor ial in mon ko? Emaroñ ke bwe rein rar jañin ‘melejoñ ta ankil an Anij emõn im kabuñburuen im wãppen’? (Dri Rom 12:2) Jet remaroñ bed ilo kwelok ko ibben jemeir im jineir im maroñ elij jet ian bedbed in katak ko ilo Bible. Ak ñe rej kajitõk bwe ren lelok kamol in tõmak ko air ak kameleleik jet ian men ko remũlal ilo Nan in Anij, jelãlokjen eo air ej kamol an bejbej. Jodikdik rot in emaroñ bidodo air tel biloik ir. (Dri Epesõs 4:14) Elañe mol eo in kin kwe, etke kwoj jab kõmman mejelan ñan kõmman oktak ko? Juõn sister edik ej kememej: “I ar etale katak ko. I ar kajitõkin iõ make, ‘Ewi wãwen aõ jelã bwe kabuñ eo emol in? Ewi wãwen aõ jelã bwe ewõr juõn Anij eo etan Jehovah?’”a An kar lukkun etale Jeje ko menin ear kamol ñan e bwe men ko ear katak jen jemen im jinen rar lukkun eindein!—Keidi Jerbal 17:11.
6. Ewi wãwen am maroñ lukkun “melejoñ men eo ej kabuñburuen Iroij,” Jehovah?
6 Am bojak kin juõn jelãlokjen eo kin nan in kaiñi ko an Jehovah, enaj laplok an kabidodolok am “melejoñ men eo ej kabuñburuen Iroij.” (Dri Epesõs 5:10) Ak ta elañe kwoj jab lukkun jelã kin ial in meletlet eo ñan am bõke ilo juõn wãwen eo ejenolok? Jar ñan Jehovah kin ial in tel. (Sam Ko 119:144) Kajeoñ konono kin wãwen ko ibben jemõm im jinõm ak ibben juõn Christian eo eritto. (Jabõn Kennan Ko 15:22; 27:17) Ial in tel eo ej menin jibañ jemaroñ bareinwõt loe ilo ad etale Bible eo im ilo publication in Watch Tower Society ko. (Jabõn Kennan Ko 2:3-5) Elak laplok am kajerbal kajur in jelãlokjen ko am, renaj oktak im laplok air ekañ.
Kwalok Jelãlokjen ilo Menin Kamõnõnõ
7, 8. (a) Ewi wãwen am maroñ kajerbal kajur in jelãlokjen ko am ilo beek ñan am bed ilo juõn kuktok ibben don ak jab? (b) Ta lemnak eo ilo Bible kin menin kamõnõnõ?
7 Kiõ jen lale wãwen am maroñ kajerbal kajur in jelãlokjen ko am ilo jet wãwen ko reinjuõn. Kalmenlokjen, ñan wanjoñok, bwe rar kir yuk ñan juõn kuktok ibben don. Kwo maroñ kar bõk juõn paper in kir in kareelel ñan kuktok eo ibben don. Rej jiroñ yuk bwe juõn oran eo elap in jodikdik in Ri Kennan ro renaj bed ijo. Ak juõn wõnãn ñan kõllã expense ko naj aini. Kwon aikwij ke bed ie?
8 Eokwe, kajerbal jelãlokjen in maroñ ko am. Moktata, bõk mol ko. Ewi naj joñan lap in kuktok ibben don in? Wõn ro renaj bed ijo? Ñããt eo enaj ijjino? Ñããt eo enaj jemlok? Ta makitkit ko rej karõki? Ewi wãwen naj bõk eddo in lale? Jeltokin, kõmman jet etale ko, lale “Kuktok Ibben Don ko,” im “Menin Kamõnõnõ ko” ilo Watch Tower Publications Index ko.b Ta eo etale eo am emaroñ kalikare? Juõn men, ej bwe Jehovah ejjab kananaik kuktok ibben don ñan bõk juõn ien emõn ekamõnõnõ. Ilo mol, Ekklisiastis 8:15 ej ba bwe kobatok ibben elap jerbal, “armij ejelok iomin al emõnlok jen bwe en mõña, im irak, im mõnõnõ.” Eokwe, Jesus Christ make ear bed ilo jet ien mõñã ko im ilo juõn belele. (Luk 5:27-29; Jon 2:1-10) Bed wõt ilo jokkin wõt juõn, kobatok ibben don emaroñ wõr tokjen.
9, 10. (a) Ta jet kauwatata ko jet kuktok ibben don ko remaroñ kõmmani? (b) Ta kajitõk ko kwo maroñ kajitõkin yuk make mokta jen am beek elañe kwon bed ilo juõn kuktok ibben don ak jab?
9 Mekarta, kuktok ibben don ko renana remaroñ kõmman jorrãn. Ilo 1 Dri Korint 10:8, jej konono kin wãwen kobatok ibben don ko rejjab meletlet rej tel ñan lũñ im rar mõn “ilo juõn ran roñoul im jilu tausan [ri Israel ro rar jab tiljek].” Bar juõn menin kakkõl eo emõn jej lo ilo Dri Rom 13:13: “Jen etetal ejime einwõt ilo ran, jab ilo airwaro im karek, jab ilo lũñ im mijkaiye, jab ilo akwail im junmare.” (Keidi 1 Piter 4:3.) Emol, ejelok joñan oran jemaroñ karõke ñan jete remaroñ bed ilo juõn kuktok ibben don. Ak men eo emwij loe ej kwalok bwe elak laplok kuktok eo ibben don, ekõmman an binlok lale im bõk eddon. Elak diklok, emõn lale im bõk eddon kuktok ibben don ko im ebin an naj oktak ñan “party ko rawia.”—Galetia 5:21, Byington.
10 Etale eo am ejelok bere enaj jarõk elõñlok kajitõk ko, einwõt: Jet ian Christian ro reritto ren bed ke ilo kuktok eo ibben don? Emol, wõn eo ej bõk eddon? Un eo ñan kuktok eo ej ñan kalaplok emõn in kobatok eo ke ak ñan kõmman an wõr orlokin ñan juõn armij ke? Ewõr ke jabdewõt joñan ikijen wõn emaroñ bed ie? Elañe kuktok eo ej ilo jemlokin week eo, en jemlok ke ilo juõn ien eo ewõr joñan bwe ro rej bed ie ren maroñ bõk kunair ilo jerbal in kwalok nan eo an Christian ilo ran eo tok juõn? Elañe enaj wõr kajañjañ im al im eb, en kwon ke ibben kien ko an Christian? (2 Dri Korint 6:3) Kajitõkin kain kajitõk rot in emaroñ jab bidodo. Ak Jabõn Kennan Ko 22:3 ej kakkõl: “Juõn dri meletlet ej lo nana eo, im tilekek; a ro dri bwebwe, rej etal wõt im jorrãn kake.” Aet, kwo maroñ bõprae wãwen ko rekauwatata ilo am kajerbal kajur in jelãlokjen ko am.
Kwalok Jelãlokjen ilo Am Karõk Ijo Kwoj Bõk Am Jelãlokjen ie
11. Ewi wãwen an jodikdik ro maroñ kajerbal kajur in jelãlokjen ko air ilo air kõmman karõk ñan ilju eo air?
11 Bible eo ej ba bwe ej menin meletlet ñan karõk ñan ran ko rej itok. (Jabõn Kennan Ko 21:5) Emwij ke am konono ibben jemõm im jinõm kin ilju eo am? Bõlen kwoj karõk ñan am delõñ ilo jerbal in kwalok nan full-time einwõt juõn pioneer. Emol, ejelok kãlet ñan jikin jerbal emaroñ bõktok elaplok juburu. Elañe kwoj ejaake manit ko remõn ñan katak im kalek kabel ko ilo jerbal in kwalok nan, kwoj kebojak ñan jerbal in ekairujruj. Emwij ke am lemnak kin wãwen am naj jurake yuk make ilo jerbal in kwalok nan in? Elañe, ilo ran ko rej itok, kwoj kãlet ñan am ejaake juõn family, kwon maroñ ke kejbãrok eddo in ej kobawõj? Kõmman bebe ko rej jokkin wõt juõn im keie kin men rot kein ej aikwij kajerbal maroñ in jelãlokjen ko.
12. (a) Ewi wãwen an kar jet family kãlet ñan bõk oktak in wãwen eo kin economy? (b) Bõk jet katak ko reinjuõn ilo school ej kabañ ke ñan bõk jerbal in pioneer einwõt juõn mejenkajjik? Kamelele.
12 Ilo jet jikin ej wõr wõt maroñ ñan bõk kaminene ñan jikin jerbal ilo juõn jerbal in kabel eo ewõr tokjen. Elõñ jodikdik ro rej katak business eo an family eo ak bõk katak jen ro jerair reritto im ewõr air business. Ro jet rej bõk katak ko ilo school ko enaj wõr tokjeir ilo air eojikin ir make ilo mour eo air tokelik. Ijo me ejelok kain kein ie, elikin air lukkun lemnak kake, jemen im jinen remaroñ karõk ñan an ajiri ro nejiir bõk bar jet katak elikin high school. Kõmman karõk lok iman ilo wãwen in einwõt ñan kejbãrok eddo ko an ritto im elaptata ñan maroñ in bõk kunair ilo jerbal in pioneer ilo juõn ien eo eaetok menin ej uanlok wõt bukõt mokta Ailiñ in Anij. (Matu 6:33) Im jibañ eo ejenolok ikijen bõk jelãlokjen jen jikin jelãlokjen eo ejjab jolok jerbal in pioneer. Juõn Ri Kennan jodikdik, ñan wanjoñok, etto an kar kõnan pioneer. Elikin an kajemlok high school, jemen im jinen—ir make rej regular pioneer—rar karõk ñan an bõk jet katak rejenolok ilo school. E ar maroñ pioneer wõt ke ear school, im kiõ ewõr juõn an kabel eo me ej kajerbale ñan jurake e make ke ej etal wõt im pioneer.
13. Ewi wãwen an family ko aikwij bwine wõnãn katak ko reinjuõn ilo school?
13 Ilo wãwen eo kin bõk katak eo ejenolok ilo school, kajjojo family ewõr an jimwe im eddo ñan kõmman an make bebe. Ñe emõn air kãlet kain katak rot in, emaroñ jibañ. Ak, emaroñ juõn aujid. Elañe kwoj lemnak kin kain school rot in, ta mejenkajjik eo am? Ej ke ñan am keboj yuk make ñan jerbale eddo ko an ritto ilo juõn wãwen kautiej? Ak kwoj “bukõt ke men ko relap ñan kwe make”? (Jeremiah 45:5, NW; 2 Dri Tessalonika 3:10; 1 Timote 5:8; 6:9) Ak ta kin jibadõk katak eo ejenolok ilo school eo ettolok jen mweo imõm, bõlen jokwe ilo juõn campus? En menin meletlet ke ilo lemnak kin nan in kakkõl eo an Paul bwe “kõmao ko renana rej kakõt manit ko remõn”? (1 Dri Korint 15:33; 2 Timote 2:22) Bareinwõt, kememej, bwe “e karu ien jen kiõ.” (1 Dri Korint 7:29) Ewi joñan ien eo kwo naj lelok ñan school rot in? En bõk ke elap ien ilo yiõ in jodikdik ko am? Elañe eindein, ewi wãwen am naj jerbale nan in rejañ eo ilo Bible ñan “kememej Eo Dri Kõmõnmõn yuk ilo ran ko ñe emõn ridtõm”? (Ekklisiastis 12:1) Bareinwõt, katak ko kwoj bõki ren kõtlok ke ien ñan kain makitkit ko an Christian elap tokjeir einwõt bed ilo kwelok ko, kwalok nan jen em ñan em, im katak ibbam make? (Matu 24:14; Dri Hibru 10:24, 25) Elañe kajur in jelãlokjen ko am rekañ, kwo jamin luji lolokjen in mejenkajjik ko ilo jitõb bwe kwe im jemõm im jinõm komij karõk ilju eo am.
Kejbãrok Ien Lo Don eo Bwe en Wõr Kautiej Ie
14. (a) Ta nan in kaiñi ko rej aikwij tel armij ro rej lo don ke rej kwalok yokwe ñan don? (b) Ewi wãwen an jet ri belele kwalok bebe eo emõjno ilo wãwen in?
14 Bar juõn jikin eo kajur in jelãlokjen ko am rej aikwiji ie ej ilo ien lo don eo. Kar baj eindein wõt ñan kõnan kwalok yokwe ñan juõn eo kwoj kea kake. Ri belele ro ilo Al eo an Solomon alikar ear wõr jet menin kalikar ko kin yokwe mokta jen air kar belele. (Al eo An Solomon 1:2; 2:6; 8:5) Rainin, jet ro rej lo don in iten belele remaroñ eindein lok air eñjake bwe jibwe pein don, mejenmaik don im jiburlepe don rej men ko rekkar, elaptata ñe belele eo ebak an ijjino. Ak kememej: “Eo ej liki buruen wõt, e dri bwebwe.” (Jabõn Kennan Ko 28:26) Ilo jorrãn, elõñ oran ri belele ro rar kwalok air jab kajerbal jelãlokjen ilo air likit ir make ilo wãwen ko remaroñ kabo ir ñan karmijete nan in kaiñi ko an Christian. Kwalok yokwe ej oktak im rejjab maroñ bebek; kõmman ko rejjab erreo rej walok im wõnmanlok ñan mour in lũñ.
15, 16. Ta menin kejbãrok ko ewõr tokjeir ri belele ro remaroñ bõke ñan lukkun kamol bwe lo don eo airro enaj bed wõt ilo kautiej?
15 Elañe kwoj etal ibben juõn eo kwoj loe, kwon meletlet im bõprae am makelok iam ibben eo kwoj loe ilo wãwen ko rejjab ekkar. Inem emaroñ emõntata ñan lañliñ ilo ami ibben don ilo an ro jet bed ibbemi ak ilo jikin ko an bwijin armij. Jet ri belele rej karõk ñan an wõr juõn eo eritto ñan an bõk eddo. Bareinwõt, lemnak kin nan ko ilo Hosea 4:11, NW: “Wain im wain eo etõñal rej men ko rej jolok eñjake eo emõn.” Alcohol emaroñ kabañ bebe eo emõn im tellok ñan an ruo ri belele jerbal ilo juõn wãwen eo renaj ajlok kake tokelik.
16 Jabõn Kennan Ko 13:10 ej ba: “Kin jua, ej itok akwail wõt; a iben ro remõn mwiliir, eor meletlet.” Aet, ‘bõk an don lemnak’ im konono kin wãwen ami naj jerbale mwilimi make. Likit joñan ko rej kwalok air yokwe, im kajjojo en kautiej eñjake im bõklikit eo an eo juõn. (1 Dri Korint 13:5; 1 Dri Tessalonika 4:3-7; 1 Piter 3:16) Konono kin unintel in konono in emaroñ bin ilo jinoin, ak emaroñ bõprae abañ ko relap jen air ejaak tokelik.
Bõk Katak ‘Jen Ien Ajiri Manlok’
17. Ewi wãwen an kar David kõmman bwe Jehovah ej ‘an men in liki jen ke ear ajiri,’ im ta katak eo ewõr ilo menin ñan jodikdik ro rainin?
17 Bõprae aujid ko an Satan enaj aikwiji am ekkeini wõt kijejeto kin ijo kunam—im jet ien, elap beran. Eokwe, jet ien kwo maroñ lo yuk make ilo am jab errã, jab ibben ro mõttam wõt, ak ibben aolepen lal in. Ri jeje Sam David ear jar: “Bwe Kwe aõ kejatrikrik, O Iroij Anij, im aõ men in liki jen ke I ar ajiri. O Anij, kw’ar katakin iõ ien aõ ajiri, im ñõn ien in I ar kwalok kõmõn ko Am, re men in bwilõñ.” (Sam Ko 71:5, 17)c David rej jelã kake kin an beran. Ak ñããt eo ear ejaake? Ke ear juõn jodikdik! Meñe mokta jen buñbuñ eo an kin jumae eo an ibben Goliath, David ear kwalok elap beran ilo an kejbãrok bwij eo an jemen—ear mõn juõn lion im juõn bear jimor. (1 Samuel 17:34-37) Bõtab, David ear lelok aolepen nebar eo ñan Jehovah kin jabdewõt beran eo ear kwalok, im kir e “aõ men in liki jen ke I ar ajiri.” Maroñ eo an David ñan atartar ion Jehovah ear kõmman an joñan wõt juõn ñan jabdewõt melejoñ ear jelmae. Kwe bareinwõt kwo naj lo bwe elañe kwo naj atartar ion Jehovah, enaj lewõj ñan yuk beran im kajur ñan am ‘anjo ion lõl.’—1 Jon 5:4.
18. Ta nan in kõketak eo rej lelok ñan jodikdik ro rej liki Anij rainin?
18 Thousand jodikdik ro einwõt kwe emwij air bõk juõn jutak eo eberan im kiõ rej jerbal einwõt ro emwij air baptais im rej ri kwalok nan kin news eo emõn. Jej kamolol Anij kin tõmak im beran eo ami kom jodikdik ro! Bed wõt ilo bebe eo ami ñan ko jen nana eo an lal in. (2 Piter 1:4) Debij wõt ami kajerbal katak eo jen Bible kin kajur in jelãlokjen ko ami. Ami kõmmõn eindein enaj kejbãrok kom kiõ jen jorrãn im naj lukkun kõmman bwe lomor eo ami en mol. Emol, einwõt an naj katak eo ad eliktata kwalok, kwo naj kõmman bwe mour eo am en lo jerammõn.
[Kamelele ko itulal]
a Lale bwebwenato eo “Young People Ask . . . How Can I Make the Truth My Own?” (Jodikdik ro Rej Kajitõk..Ewi Wãwen Aõ Maroñ Kõmman bwe Mol eo en Aõ Make?) ilo October 22, 1998, in Awake!
b Katak eo “Social Entertainment—Enjoy the Benefits, Avoid the Snares” (Ibben don ilo Menin Kamõnõnõ—Mõnõnõ kin Tokjen ko, Bõprae Aujid ko) ej walok ilo August 15, 1992, (February 1, 1993 in Imõniaroñroñ) in The Watchtower eo ewõr juõn melele emõn ie kin unintel in.
c Sam 71 ej walok einwõt ej bõkmanlok wõt Sam 70, eo ej alikar ilo jeje ko einwõt juõn Sam an David.
Kajitõk ko ñan Elij
◻ Ewi wãwen an juõn jodikdik katakin kajur in jelãlokjen ko an?
◻ Ewi wãwen an juõn jodikdik maroñ kajerbal kajur in jelãlokjen ko an ñe ej itok ñan bed ilo kuktok ibben don ko an Christian?
◻ Ta mol ko juõn emaroñ lemnak kaki ilo an karõk ñan an school?
◻ Ewi wãwen an ruo ro rej lo don bõprae aujid in mour in lũñ?
[Pija eo ilo peij 23]
Katak ñan kõmman etale enaj jibañ yuk katakin kajur ko in jelãlokjen eo am