“Komin Mõke Kamol Kom”

“Komin mõke melejoñ kom elañe kom ber ilo tõmak; komin mõke kamol kom.”​—2 DRI KORINT 13:5.

1, 2. (a) Ewi wãwen bere kin tõmak ko ad emaroñ jelet kij? (b) Ta wãwen eo ear walok ilo Corinth ilo ebeben eo kein kajuõn ear kõmman bwe jet ren bere kin ial et eo ren etal ie?

JUÕN emaan ej itoitak ilo ene eo im ej tõbar juõn ial ruo miãñõn. Kinke ejaje ial et eo enaj tel e ñan jikin eo ekõnan etal ie, ej kajitõk jibañ jen armij ro ak ej bõk melele ko rej idaptõk ibben don. Kin an bwok, ejjab maroñ wõnmanlok ilo ial eo an. Emaroñ eindein an jelet kij elañe ewõr bere kin tõmak ko ad. Bere rot in emaroñ kautameik maroñ eo ad ñan kõmman bebe ko rejimwe kin ial et eo jen etal ie.

² Juõn wãwen einlok wõt in ear walok ñan armij ro ilo congregation eo ilo Corinth, Greece ilo ebeben eo kein kajuõn. “Dri jilik reutiejtata” rar jumae maroñ eo an ri jilek Paul, ilo air ba: “Bwe letter ko an, re ba, eor kobair im re kajur; a an enbwinin ber e mõjino, im an konono jekron.” (2 Dri Korint 10:7-12; 11:5, 6) Juõn lemnak rot in emaroñ kar kõmman bwe jet ilo congregation in Corinth ren bere kin ial et eo ren etal ie.

3, 4. Etke jej aikwij itoklimo kin nan in kakabilek eo an Paul ñan Ri Corinth ro?

³ Paul ear kajutak congregation in Corinth ke ear lolok ilo 50 C.E. Ear bedwõt ie iumin “juõn yiõ im jiljino aliñ, im katakin ir kin nan in Anij.” Emol, “elõñ ian dri Korint, ke rej roñjake, rej tõmak im baptais.” (Jerbal 18:5-11) Paul ear itoklimo kin kajur in tõmak eo an ri tõmak ro mõttan ilo Corinth. Bareinwõt, ro ilo Corinth rar jeje ñan Paul im kajitõk kin nan in tel kin jet men ko. (1 Dri Korint 7:1) Inem ear lelok nan in kakabilek ko remõn ñan ir.

⁴ “Komin mõke melejoñ kom elañe kom ber ilo tõmak eo,” Paul ear je, “komin mõke kamol kom.” (2 Dri Korint 13:5) Ilo air jerbale nan in kakabilek in enaj kejbãrok brother ro ilo Corinth jen air bere ial et eo ren etal ie. Emaroñ eindein an kejbãrok kij ilo ran kein. Inem, ewi wãwen jemaroñ lor nan in kakabilek eo an Paul? Ewi wãwen jemaroñ melejoñe tõmak eo ad? Im ta eo ej kitibuj ilo ad make kamol kij?

“Komin Mõke Melejoñ Kom Elañe Kom Ber ilo Tõmak eo”

5, 6. Ta eo jej kajerbale ñan melejoñ kij elañe jej bed ilo tõmak, im etke ejejjet?

⁵ Ñe jej melejoñe juõn men, ekkã an wõr juõn men rej melejoñe, im ewõr juõn kien ak kein joñjoñ rej kajerbale. Men eo rej melejoñe ejjab tõmak eo ak katak ko jej tõmaki. Kij kajjojo ej men eo rej melejoñe. Ewõr ibbed juõn kein joñjoñ ewãppen ñan kõmmane melejoñ in. Juõn al me ri jeje sam David ear kine ej ba: “Kien Jeova e wãppen im ej karol an; nan in katak an Jeova e bin im ej kameletlet ro re jaje. Nan ko nan in kaiñi an Jeova re jime im re kalõñliñ buruer: kien ko an Jeova rerreo im rej kamramlok mejer.” (Sam Ko 19:7, 8) Ilo Bible ewõr kien ko rewãppen, nan in katak ko rewãnik, nan in kaiñi ko rejimwe, im kien ko rerreo an Jehovah. Ennan eo iloan ej kien eo ejejjet ñan kõmmane melejoñ in.

⁶ Ikijen ennan in ekakõrmol an Anij, ri jilek Paul ej ba “Bwe nan in Anij ej mour im jerbal wõt, im ekõñ jen jabrewõt jãji ruo mejen, im ej wie im bukwe an armij im jitõb, im mokwõj ko im nononmej, im e mõkõj an kili lemnok ko im bebe ko an buru.” (Dri Hibru 4:12) Aet, Nan in Anij emaroñ melejoñ buruõd. Ewi wãwen jemaroñ jerbale ennan in ekõñ im kajur ilo mour eo ad? Ri jeje sam ej kalikar ta eo men in ej kitibuji. Ear al: “Emõnõnõ armij eo ... ej lõñliñ ilo kien Jeova; im ej lemnok kin kien eo ran im boñ.” (Sam Ko 1:1, 2) Jemaroñ lo “kien Jeova” ilo Bible eo. Jej aikwij mõnõnõ in readi Nan eo an Jehovah im kalmenlokjen kake. Ñe jej kõmmane, jej aikwij kõtlok bwe men eo emwij je iloan en melejoñe kij.

7. Ta wãwen eo elaptata ñan melejoñ elañe jej bed ilo tõmak?

⁷ Inem, wãwen eo elaptata ñan melejoñ elañe jej bed ilo tõmak ej ñan read im kalmenlokjen kin Nan eo an Anij im etale ewi wãwen mwilid ej errã ibben ta eo jej katak kake. Jemaroñ mõnõnõ bwe elõñ kein jibañ ñan melele kin Nan eo an Anij.

8. Ewi wãwen book ko an “dri korijer e tiljek im meletlet” remaroñ jibañ kij etale elañe jej bed ilo tõmak?

⁸ Jehovah ear letok katak ko im nan in jiroñ ko ikijen book ko rej kamelele kin Bible jen “dri korijer e tiljek im meletlet.” (Matu 24:45) Ñan wanjoñok, lemnak kin box eo etan “Questions for Meditation (Kajitõk ko ñan Kalmenlokjen)” ilo tu-jemlokin enañin aolep chapter ko ilo book eo Draw Close to Jehovah (Ruaklok ñan Jehovah).a Mõttan eo ilo book in ej letok elõñ ien ko remõn ñan kalmenlokjen! Elõñ katak ko ilo magazine in Imõniaroñroñ im Awake! rej bareinwõt jibañ kij ñan etale elañe jej bed ilo tõmak. Ikijen katak ko kin book in Jabõn Kennan Ko ilo magazine ko kiõ kin The Watchtower (Imõniaroñroñ), juõn Christian kõrã ear ba: “Katak kein relukkun keie. Rej jibañ iõ ñan etale elañe nan ko aõ, mwiliõ, im lemnak eo aõ rej ekkar ñan kien ko rewãnik an Jehovah.”

9, 10. Ta men in letok ko Jehovah ear litoki ñan melejoñe kij elañe jej bed ilo tõmak?

⁹ Jej bareinwõt bõk nan in tel im rejañ jen kwelok ko an congregation eo, assembly ko, im convention ko. Erkein jet ian men in letok ko Anij ear kõmmani ñan ro me Aiseia ear kanan kaki: “Im ilo ran ko eliktata, tol in imõn Jeova naj kabin e ilo jabõn tol ko, im naj koutiej e ilõñin tol ko redrik; im ro dri ailiñ ko re naj ibweptok ñõn e. Im elõñ dri ailiñ re naj ilen ba, Komin itok, im jen wõnliñlok ñõn tol an Jeova, ... im E naj katkin kij kin ial ko An, im je naj etetal ilo ial ko An.” (Aiseia 2:2, 3) Emol ej juõn jerammõn ñan bõk nan in jiroñ rot kein kin ial ko an Jehovah.

¹⁰ Bar juõn wãwen ñan melejoñ kij make ej ikijen nan in kakabilek ko an Christian elder ro. Ikijen ir, Bible ej ba: “Ro jãtiõ, elañe emwij erãtik juõn armij ilo jabrewõt bwir, komeo kom ilo Jitõb komin kajime eo ein drein ilo inemõn; im mõke lale kwe, ñe ab bareinwõt kabo yuk.” (Dri Galetia 6:1) Elap ad kamolol kin men in letok in ñan kajimwe kij!

11. Melejoñ eo ñan lale elañe jej bed ilo tõmak ej kitibuj ta?

¹¹ Book ko ad, kwelok ko an Christian, elder im ministerial servant ro​—rej men in letok ko remõn jen Jehovah. Bõtab, ñan lale elañe jej bed ilo tõmak ej melelen bwe jej aikwij melejoñ kij make. Inem ñe jej readi book ko ad ak roñjake nan in kauwe ko jen Bible, jej aikwij kajitõk ibbed make: ‘Men in ej kwalok ke kin iõ? Ij kõmmane ke men in? Ij bokake ke katak ko an Christian?’ Lemnak eo ad kin melele ko jej bõki jen men in letok kein rej bareinwõt jelet kajur in tõmak eo ad. “A armij kin biktokin e jab bõk men ko an Jitõb õn Anij: bwe re men in bwebwe iben,” Bible eo ej ba. “A eo jen Jitõb ej ekajet men otemjej.” (1 Dri Korint 2:14, 15) Jej aikwij kejbãrok juõn lemnak ejimwe kin ta eo jej readi ilo book im magazine ko ad im ta eo jej roñjake ilo kwelok ko ad im jen elder ro.

“Komin Mõke Kamol Kom”

12. Ad make kamol kij, ta eo ej kitibuji?

¹² Ñan kamol bwe jej mour einwõt Ri Christian, men in ej kitibuj ad etale kij make. Aet, jemaroñ jelã mol eo, ak ewi joñan tõmak eo ad? Ej bareinwõt kitibuj ad kamol bwe je ritto ilo mour in Christian im kwalok ad kamolol kin men in letok ko jen Anij.

13. Ekkar ñan Dri Hibru 5:14, ta eo ej kamol bwe je ritto ilo mour in Christian?

¹³ Ta men in kamol eo ej kwalok bwe je ritto ilo mour in Christian? Ri jilek Paul ear je: “A ekõn ko rebin rej ekar ñõn ro re ridto, aet, ñõn ro kin air minene rej maroñ in jela kajen emõn im nana.” (Dri Hibru 5:14) Jej kamol bwe je ritto ilo ad kamineneik maroñ eo ad ñan jelã emõn im nana. Ñan wanjoñok, elañe juõn ri ikkure ekõnan bwe en tijemlok, ej aikwij kamineneik muscle ko ilo enbwinin ilo an kajerbali. Eindein ad aikwij kamineneik maroñ in jelã eo ad, ikijen ad jerbale nan in kakabilek ko ilo Bible.

14, 15. Etke jej aikwij kate kij ñan katak men ko remũlal ilo Bible eo?

¹⁴ Ak, mokta jen ad maroñ kamineneik maroñ in jelã eo ad, jej aikwij bõk jelãlokjen. Ñan kõmman men in, jej aikwij tiljek ilo ad katak Bible ibbed make. Ñe jej ekkeini ad katak ibbed make​—elaptata kin men ko remũlal ilo Nan in Anij​—jej kakõmanmanlok maroñ in jelã eo ad. Ilo ien ko remotlok, elõñ katak ko remũlal rar etali ilo magazine in Imõniaroñroñ. Ta eo jej kõmmane ñe ej walok katak ko remũlal? Ekkã ke ad jab etale kinke ewõr jet katak ko “rebin kin melele kaki”? (2 Piter 3:16) En jab eindein, jen kate kij ñan melele kaki.—Dri Epesõs 3:18.

¹⁵ Ta elañe ebin ad katak ibbed make? Eaorõk bwe jen kaddeklok juõn kõnan ñan kõmmane.b (1 Piter 2:2) Bwe jen ritto ilo mour in Christian ej melelen bwe jej aikwij bõk kakajur jen mol ko remũlal ilo Bible. Elañe jab, enaj dik wõt ad melele kin katak ko an Anij. Bõtab, ejjab bwe ad baj jelã wõt emõn im nana ñan kamol bwe je ritto ilo mour in Christian. Ran otemjej jej aikwij kajerbal jelãlokjen eo jaar bõke jen ad katak ibbed make.

16, 17. Ta nan in kauwe eo ri kalor eo Jemes ear kwaloke ikijen ad “dri kõmõnmõn nan eo”?

¹⁶ Jerbal ko ad rej bareinwõt kamol bwe jej juõn Christian. Ñan kwalok juõn wanjoñok kin etale kij make, ri kalor eo Jemes ear ba: “A komin dri kõmõnmõn nan eo, im jab dri roñjake wõt ro rej mõke mon ir. Bwe elañe jabrewõt armij ej dri roñjake nan, im jab dri kõmõne, ej einwõt armij eo ej lo mejen ilo kapjur: Bwe ej mõke lale e, im ej ilok im emõkõj an meloklok ie ein. A eo ej ber im liñõre kien in anemkwoj eo e wãppen, im jab dri roñjake eo ej meloklok, a e dri kõmõn ej jerbale, armij eo e naj mõnõnõ ilo an kõmõn.”—Jemes 1:22-25.

¹⁷ Jemes ej ba: ‘Wõnmanlok im kalimjek kapjur eo, Nan in Anij, im etale kwe make. Inem, kwon jab mõkaj in meloklok ta eo kwar loe. Kõmman kajimwe ko kwoj aikwij kõmmani.’ Ak jet ien ebin am lor nan in kakabilek in.

18. Etke ebin ad lor nan in kakabilek eo an Jemes?

¹⁸ Ñan wanjoñok, lemnak kin men in aikwij eo ñan bõk kunad ilo jerbal in kwalok nan kin Ailiñ eo. “Bwe armij kin buruen ej tõmak ñõn wãnik,” Paul ear je, “im kin loñin ej kwalok ñõn mour.” (Dri Rom 10:10) Ñan elõñ iad ebin ad bõk kunad ilo jerbal in kinke jej aikwij kõmman elõñ oktak ko. Bwe jen ri kwalok ro rekijejeto im ñan likit bwe jerbal in en moktata ilo ad mour, elõñlok oktak ko jej aikwij kõmmani. (Matu 6:33) Ak ñe jej erom ri kõmanman jerbal in Anij ear letoke, jej mõnõnõ kinke ej bõktok nebar ñan Jehovah. Inem, jej ri kwalok ro rekijejeto ke kin Ailiñ eo?

19. Jerbal ko ad einwõt juõn Christian ekoba ta?

¹⁹ Jerbal ko ad einwõt Christian ekoba ta? Paul ear ba: “Men ko kom ar katak, im bõki, im roñjaki, im lo ilo ña, komin kõmõnmõn men kein: im Anij in ainemõn e naj ber ibemi.” (Dri Pilippai 4:9) Jej kamol bwe jej juõn Christian ilo ad jerbale men ko jaar katak kaki, bõki, roñjaki, im loi​—aolep men ko jej aikwij kõmmani ñan erom juõn ri kalor eo emwij an baptais. “Eñin ial eo, komin etetal iloan,” Jehovah ej ba ikijen ri kanan eo Isaiah.—Aiseia 30:21.

20. Kain armij rot rej juõn jerammõn elap ñan congregation eo?

²⁰ Maan im kõrã ro me rej tiljek in katak Bible, rej kijejeto in kwalok kin news eo emõn, im rej tiljek ilo air jurake Ailiñ eo, rej juõn jerammõn elap ñan congregation eo. Tõmak eo air ej kakajur congregation eo rej bed ie, elaptata kinke rej aikwij jibañ elõñ ro rekãl. Ñe jej bõk ñan buruõd nan in kakabilek eo an Paul ñan ad ‘make melejoñ kij elañe jej bed ilo tõmak, im ñan kamol kij,’ jenaj juõn men in kakajur ñan ro jet.

Mõnõnõ in Kõmanman Ankil an Anij

21, 22. Ewi wãwen jemaroñ mõnõnõ in kõmanman ankil an Anij?

²¹ “I lõñliñ in kõmõnmõn ankil Am,” King David ilo Israel eo etto ear al, “kiõm ej ber iloan buruõ.” (Sam Ko 40:8) David ear mõnõnõ in kõmanman ankil an Anij. Etke? Kinke kien Jehovah ear bed ilo buruen. David ear jab bere kin ial et eo ej aikwij etetal ie.

²² Ñe kien Anij ej bed ilo buruõd, jenaj jelã ial et eo jen etetal ie. Jej mõnõnõ in kõmanman ankil an Anij. Inem, jen ‘kate kij’ ñe jej karejar ñan Jehovah jen buruõd.—Luk 13:24.

[Kamelele ko itulal]

Kwoj Kememej ke?

• Ewi wãwen jemaroñ melejoñe kij elañe jej bed ilo tõmak?

• Ta eo ej kitibuj ilo ad kamol bwe jej mour einwõt juõn Christian?

• Ta eo ej kamol bwe je ritto ilo mour in Christian?

• Ewi wãwen jerbal ko ad rej jibañ kij etale kij make?

[Pija eo ilo peij 9]

Kwoj jelã ke wãwen eo elaptata ñan melejoñ elañe kwoj bed ilo tõmak?

[Pija eo ilo peij 10]

Jej kamol bwe je ritto ilo mour in Christian ilo ad jerbale maroñ in jelã eo ad

[Pija ko ilo peij 11]

Jej kamol bwe jej tõmak ilo ad erom ‘jab dri roñjake ro rej meloklok, ak dri kõmõnmõn nan eo’