Kaddeklok Maroñ in Jelã ko Am
1 Ran kein eliktata im rekabwerer, ijo jej bed ie kiõ, rar bõktok elõñlok kain ijjibed ko im melejoñ ko ion armij ro an Anij ijoko otemjej. (2 Tim. 3:1-5) Kij aolep aikwij bõk rejañ ñan jutak bin ilo tõmak. (1 Kor. 16:13) Jemaroñ kõmmane ikijen jibañ jen Jehovah ñe jej wõnmanlok im keini ad bõk ekan ko lor jitõb jen Nan eo an, atartar ion jitõb eo an, im bed ebak ñan dolul eo an.—Sam 37:28; Rom 8:38, 39; Rev. 2:10.
2 Kin un emõn, rar kameleleiklok unin tel eo “Ilo Lolãtãt Komin Ridto Ro” ilo program in special assembly day eo ilo yiõ eo lok. Ear bedbed ion 1 Korint 14:20, ijo jej read nan ko an ri jilek Paul: “Ro jãtiõ, komin jab ajiri ilo lolãtãt: a ilo junmare komin niñniñ, a ilo lolãtãt komin ridto ro.” Ta kar lemnak eo am kin program eo?
3 “Elap an kar kõketak kij!” “Eñin men eo jaar aikwiji!” Erkein kar ruo wõt nan ko an armij. Juõn armij eo ejjab juõn Ri Kennan eo ear itok ñan special assembly day eo ñan lale an ledik eo nejin 12 yiõ dettan baptais ear ba bwe ear bwilõñ kin program eo im ear kile wãwen eo ear maroñ wõr tokjen ñan family eo an. Ej eindein ke lemnak eo am? Jen kememej jet ian point ko relap jen program eo.
4 Jelãlokjen eo Ejimwe Ej Men in Aikwij eo ñan Kaddeklok Kajur in Jelãlokjen eo Ad: Ilo katak eo mokta, “Kalaplok Kajur in Meletlet eo Am Kiõ,” ta eo ri konono eo ear kwalok bwe ej men in aikwij ñan jelmaik aitwerõk ko rainin? Elaplok ad aikwij jen an wõr maroñ in lemnak wõt ibbed. Jej aikwij kaddeklok im kamũlallok kajur eo ad in melele Bible eo, elañe jejjab kõnan bwe nana ko jej jerwawa ñan i en anjo iod. Melele in ej aikwij ad bõk tel eo an Anij. Einwõt ri jeje psalm, jej aikwij kajitõk ibben Jehovah ñan jibañ kij melele kien ko im nan in kakememej ko an bwe jen maroñ karejar ñan e kin aolepen buruõd.—Sam 119:1, 2, 34.
5 Ilo katak in tok juõn, circuit overseer eo ear kwalok bwe Jehovah, ikijen Nan eo an im dolul eo an, ear letok ñan kij “Men in Jibañ Ko ñan Rittolok ilo Meletlet kin Bible eo.” Melele eo rar kameleleiki einwõt “maroñ eo ñan lo juõn men im kile wãwen ejaakin ilo an jelã wãwen mõttan ko an ewõr kõtair ñan eyu in, im ilo wãwen in melele kake.” Wõn eo emaroñ jibañ kij ñan kaddeklok maroñ in? Jehovah ear letok ñan kij men in letok ikijen armij ñan jibañ kij kõmman wõnmanlok ko ilo jitõb. (Ep. 4:11, 12) Dolul eo an ion lal ej rejañ kij ñan read Nan in Anij ran otemjej im ñan keini ad bed ilo aolep kwelok ko an congregation eo. (Sam 1:2) Rej katakin kij kilen kajerbal Bible eo im book in Christian ko ad ilo ad katak ibbed make im ibben family eo im bareinwõt ñan kebojak ñan kwelok ko im jerbal in kwalok nan. Kwar kortokjen ke aolep men in letok kein? Kwoj kejbãrok ke juõn program in keini am read Bible? Men in eaorõk elañe jekõnan kejbãrok kij jen ad bo im lore men ko rebuñbuñ, lemnak ko, im kilan ko retao an lal in.—Kol. 2:6-8.
6 Jej Aikwij Kamineneik Maroñ in Jelã ko Ad: Ilo katak eo an mokta, etan “Kejbãrok Mour in Jitõb eo ilo Am Kamineneik Maroñ eo Am in Jelã Kajjen Emõn im Nana,” ri lotok ri konono eo ear kamelele bwe ro ilo lal in rejjab maroñ kile kõtan eo ikõtan jimwe im bwid. (Ais. 5:20, 21) Men in ej walok kinke rej makoko in kile im lore kien ko rewãnik an Anij. Ilo an oktak, kij ro jaar bõk kaminene ilo jitõb jen dolul eo an Jehovah jej kile aorõkin kien ko an Anij, eo ej tel makitkit ko ad im mwilid. Ilo wãwen in, jenaj maroñ kamol ñan kij make ta eo emõn im kabuñburuen iman mejen Jehovah im ej ekkar ñan ankil an ewãppen.—Rom 12:2.
7 Ñan kejbãrok kij jen lemnak ko rebwok an lal im leen ko renana tokjen men in, jej aikwij wõnmanlok im kamineneik maroñ in jelã ko ad. Ewi wãwen ad maroñ kõtõbrak men in? Einwõt emwij je ilo Dri Hibru 5:12-14, ri jilek Paul ear kalikar aikwij eo ñan mõñã jab “milk” wõt kin nan eo. Jej aikwij ekan ko rebin, einwõt jej bõke ilo katak eo kin kanan eo an Isaiah ilo Congregation Book Study. Inem jej aikwij mõkaj im jerbale men ko jej katak kaki ilo ad mour. Ñe jej kõmmane, ej kamol ñan kij jimwe eo an kien ko an Jehovah. Men in ej kamineneik maroñ in jelã ko ad ñan kile ilo alikar jimwe im bwid.
8 Ekaburomõj, bwe jet rar tibbok ilo jitõb. Etke? Rar jab kalimjek wõt men eo emõn im mol iman mejen Jehovah. Tokjen men in, rar bo ibben program ko ilo radio im television me rej kwalok katak ko rejakkar ñan Jeje ko, ñan kajañjañ ko retton, ak ñan kamao ko renana ilo computer chat room ko. Ilo ad jerbal ilo meletlet, jejamin kõtlok bwe armij ro retton, bwebwe, ak nana ren jelet kij.—Ken. 13:20; Gal. 5:7; 1 Tim. 6:20, 21.
9 Jodikdik ro “Ilo Junmare Komin Niñniñ”: Ilo program eo ekar walok ruo katak ko me rar rejañ jodikdik ñan kaddeklok maroñ in jelã ko air. Ri konono ro rar kwalok bwe “ilo junmare komin niñniñ” ej melelen air bed wõt im jab bõk kaminene, einwõt ba, jajelokjen einwõt niñniñ ro, ikijen men ko retton iman mejen Jehovah. (1 Kor. 14:20) Rar rejañ kij aolep ñan lukkun lale wãwen eo jej kajerbal ien eo ad bwe jen jab kajerwawaik kij ñan nana ko otemjej im bõprae ad jorrãn kaki. (Ep. 5:15-17) Rar rejañ kij ñan bwine joñan ien eo jej jolok ñan read men ko rejjab kalaplok melele eo ad kin men ko lor jitõb. Kwar kõmmane ke men in? Ta eo tokjen ko rar kalikare? Ijellokin ad read Bible ran otemjej, en bin bebe eo ad ñan read aolep katak ko me dolul eo ej litoki. Ad kõmman men in enaj jibañ kij aolep, ekoba ro redik, ñan “jibarek jelalokjen.”—Ken. 4:7-9.
10 “Bõk Tokjen Jen Ad Jerbale Kien ko an Bible kin Jelãlokjen”: Eñin kar unin tel eo an katak eo eliktata ilo special assembly day program eo. Ri lotok ri konono eo ear kamelele bwe Jehovah ej Unjen melele eo ej letok mour, eo ej utiejlok jen ko an aolep armij. Lemnak kin maroñ eo am ñan bõk jen melele eo an Jehovah! Ej leloke ñan ro emol air bukõte im kajitõk kake ilo tõmak. (Ken. 2:3-5, 9; 28:5) Kwoj kortokjen ke men in lelok in?
11 Rar rejañ kij ñan katak kilen kile kakabilek ko ñe jej read Bible. (2 Tim. 3:16, 17) Lukkun katak kaki ñan bõk melele eo ejimwe kin ta eo Jehovah ej ba. Bõk ien ñan kalmenlokjen kin nan in kakabilek kein im kabini ilo lemnak eo am im buruõm. Men in enaj kamineneik maroñ in jelã ko am bwe kwon maroñ lo tõbrak ñe kwoj kõmman bebe ko ilo am mour. (Josh. 1:8) Jen etale jet wãwen ko me elõñ rej jelmaiki im lale ewi wãwen ad jerbale nan in kakabilek ko ilo Bible emaroñ jibañ kij ñan lo tõbrak.
12 ‘In bõk ke juõn style in nuknuk im wãwen baotokiõ?’ Nuknuk im baotok ko rebuñbuñ ilo lal in ekkã air kwalok juõn jitõb in jumae. Juõn jitõb rot in ej jibed armij bwe en jabde im jab aibujuij nuknuk ko rej kõnaki ak nuknuk ko ñan kareel ro jet. Nan in kakabilek ta ko rejejjet ilo Bible remaroñ jibañ kij ñan jumae kõnan rot kein. Ilo ad kar kamineneik maroñ in jelã ko ad, jenaj etale nan in kakabilek eo ilo 1 Timote 2:9, 10, bwe “ren kõkõmõnmwin im jejairunoij . . . , eo ekar ñõn [armij] ro rej kwalok air tõmak.” Nan in kakabilek ko jet me rej jerbal ekoba ko ilo 2 Korint 6:3 im Dri Kolosse 3:18, 20.
13 ‘Ta eo I maroñ kõmmane ñan kakajurlok lukluk in family eo aõ?’ Eaorõk bwe ro uan family eo ren bwebwenato ibben don. Jemes 1:19 ej jiroñ kij: “A jabrewõt armij en mõkõj an roñjake, en rumij an konono, en rumij an illu.” Ro uan family eo rej aikwij roñjake im bareinwõt konono ñan don kinke bwebwenato an family eo ej einwõt juõn ial ewõr ruo wãwen ettõr ie. Meñe men eo jej ba emol, elañe jej kwaloke ilo juõn wãwen elej, jãjjãj, ak jab kea, enaj laplok an kõmman jorrãn jen emõn. Inem meñe jej juõn leo ak lio ri belele, juõn jemen ak jinen ak juõn ajiri, jej aikwij kõmman bwe ad konono en “joij im en emwij kejãtok e kin salt.”—Kol. 4:6.
14 ‘Arõk mweiuk ej ke jelet iõ?’ Arõk mweiuk ej juõn ijjibed an lal in me ej kabwok mour an juõn armij. Ejjab kabellok kejam eo ñan mõnõnõ. (Ekkl. 5:10; Luk 12:15; 1 Tim. 6:9, 10) Ñan jibañ kij bõprae aujid in arõk mweiuk, Jesus ear katakin kij nan in kakabilek in eaorõk: En emõn mejem ak kwon kõmman bwe en kalimjek juõn wõt men. Ad mour ilo juõn wãwen ejokkin wõt juõn im diklok an bwok ej kitibuj ad kalimjek wõt men ko an Ailiñ eo, im kõmman bwe men ko otemjej ren kein karuo.—Mat. 6:22, 23, 33.
15 Ta eo En Ad Mejenkajjik: Nan in Anij ej juõn unjen emol ñan bõk kakabilek ko rewãnik ñan tel kij ñe jej kõmman bebe ko. Jej aikwij katak kin kakabilek kein, kalmenlokjen kaki, im melele wãwen eo jemaroñ jerbali ilo ad mour. Ilo ad ‘kamineneik maroñ in jelã eo ad ñan kile jimwe im bwid,’ jenaj make bõk tokjen im kaibujuij Jehovah.—Hib. 5:14.