Ewi Wãwen Ad Maroñ Kijenmij Nae Eñjake Ko Renana

● Asaph ear aol: “Emol ejelok tokjen aõ karreo buruõ, im amini peiõ ilo jab ruõ. Bwe iomin aolepen ran ar kaiñtan iõ, im ilo jiboñ otemjej emwij kajeik iõ.”​​—⁠Sam ko 73:​13, 14.

● Baruch ear iññũr: “Wo, kiõ, ñan iõ, bwe Jehovah ear kobatok buromõj ñan eñtan eo aõ! Iar mõk kin aõ liãjlol, im iar jab lo juõn jikin-kakije.”​​—⁠Jeremiah 45:​3, New World Translation.

● Naomi ear liãjlol: “Eo Ekajur potata E ar kõmõn men eo e kanuij meo ñõn iõ. I ar ilok im bõptoa, ak Jeova e ar ãñintok iõ ñõn kabijukniõ im lemõjor; etke komin likit eta Neomai ke Jeova e ar kennan nae iõ, im Eo Ekajur potata E ar kejorran iõ.”​​—⁠Ruth 1:​20, 21.

BIBLE eo eobrak kin wanjoñok ko kin ri kabuñ ro retiljek an Jehovah ro rar lukkun buromõj im ebwer. Emol bwe einwõt armij ro rejjab wãppen kij aolep jej bõk kain eñjake kein jen ien ñan ien. Jet iad emaroñ laplok ad buromõj​​—⁠bõlen buromõj kin kij make​​—⁠jen ro jet kin ad jelmae abañ ko rekanuij nana.

Bõtab, elañe jejjab kejbãrok kij, eñjake kein remaroñ kokkure kõtan eo ad ibben ro jet im ibben Jehovah Anij. Juõn Christian kõrã eo ekkã an buromõj kin emake ele jen joñan ear ba: “Iar jab kobalok ibben armij ro jet ilo makitkit ko air ke rar kir iõ kinke iar lemnak bwe ear jab tellokũ bwe in kobalok ibben ro jet ilo congregation eo.” Ej juõn eñjake ekaburomõjmõj ñan mour eo an juõn armij! Ta eo kwomaroñ kõmmane ñan bõpraiki?

Ruaktok ñan Jehovah

Ilo Sam 73, Asaph ear je ilo ejelok kalijeklok kin an bwilõñ im jab melele. Ke ear keidi wãwen mour eo an ibben tõbrakin mour eo an ri nana ro remweie, ear jino kamoik ir. Ear lo bwe ro rejjab tõmak rar utiej burueir im lej, im kar einwõt rar jab bõk kaje. Asaph ear kwalok bere eo an kin tokjen an jibadõk ial in mour eo ejimwe.​​—⁠Sam ko 73:​3-​9, 13, 14.

Baj kwe, einwõt Asaph, kwar ke kalimjek tõbrakin mour eo an ri nana ro rej jualõñlõñ kin bwid ko air? Ewi wãwen Asaph ear anjo ion eñjake ko renana an? Ear wõnmanlok: “Ke I ar lemnok, ekijkan I naj maroñ in jelã kake men in, e ar men in jorran ilo meja. Mae ien aõ ilok ñõn jikin kwojarjar an Anij, im kalomõnlokjen kin jemlokir.” (Sam ko 73:​16, 17) Asaph ear bebe jimwe ilo an reilok ñan Jehovah ilo jar. Ñan kajerbal nan ko ri jilek Paul ear kajerbale, Asaph ear jibede “armij eo ilo kanniek” ilo an kworuje “armij eo ilo jitõb” iloan emake. Kin juõn vision ear kõkãle ilo jitõb, ear melele bwe Jehovah ear dike nana im bwe ien eo ejejjet ri nana ro renaj bõk kaje.​​—⁠1 Dri Korint 2:​14, 15.

Elap an aorõk bwe Bible eo en jibañ yuk ñan kalimjek wõt mol in mour eo! Jehovah ej kakememej kij bwe ejjab bilo kin ta eo ri nana ro rej kõmmane. Bible eo ej katakin kij: “Komin jab bwir; Anij e jab likit bwe ren kajirere kake E: bwe jabrewõt eo armij ej jeor e, men in e naj bareinwõt marmir e. . . A jen jab mõk ilo kõmõn emõn.” (Dri Galetia 6:​7-9) Jehovah enaj “likit ir ilo jikin jirlok ko”; enaj kõmman bwe ren buñlok ñan “kokkure.” (Sam 73:18) Ekajet eo ekwojarjar enaj lo tõbrak ilo jemlokin.

Juõn program ejjab bõjrak in mõñã ilo jitõb jen table eo an Jehovah im juõn kamao emõn ibben armij ro an Anij enaj jibañ yuk ñan kakajur tõmak eo am im ellã jen eñjake ko jet rekin kaburomõj im kabwer yuk. (Dri Hibru 10:25) Einwõt Asaph, ilo am bed ebak ñan Anij, kwomaroñ lo wãwen an yokwe im jurake yuk. Asaph ej wõnmanlok wõt im ba: “Ij ibõm ien otemjej; Kw’ar drebij anbijmaroñiõ. Kwo naj bakajen aõ ial kin Am bebe, im tokelik bõk iõ ñõn aibujuij.” (Sam 73:​23, 24) Juõn ri Christian eo ear bed ilo jorrãn ke ear dik ear katak jen nan kein remeletlet. “Kebak wõt congregation eo,” ear ba, “ear kwalok bar juõn wãwen mour. Iar lo ilo alikar bwe Christian elder ro rar lukkun kwalok yokwe, rar jab einwõt policemen ro ak rej einwõt shepherd ro.” Aet, Christian elder ro rej yokwe ewõr kunair eaorõk ñan jolok eñjake ko rej kajorrãn armij.​​—⁠Aiseia 32:​1, 2; 1 Dri Tessalonika 2:​7, 8.

Bõk Nan in Kakabilek eo an Jehovah

Baruch, secretary eo an ri kanan Jeremiah, ear buromõj kinke ear inebata kin jerbal eo an. Bõtab, ilo joij Jehovah ear jitõñlok Baruch ñan mol in unin an buromõj. “Ak kin kwe, kwoj kabukõt wõt men ko relap ñan kwe make. Kwon jab etal wõt im bukõte. Bwe ij bõktok jerata ion armij otemjej, Jehovah ej ba, im Inaj lewõj am einwõt juõn men in rakim ijoko otemjej kwoj ilok ielok.”​​—⁠Jeremiah 45:​2-5, New World Translaton.

Ilo kajin ekajju Jehovah ear kamelele bwe jibadbad ko rekibbon an Baruch kar unjen buromõj eo an. Baruch ear jab maroñ lo lañliñ ilo jerbal eo an Anij ear lelok ñan e im ilo ejja ien wõt kabukõt men ko relap an make. Kwe bareinwõt kwomaroñ lo bwe juõn wãwen elap tokjen ñan anjo ion buromõj ej ñan bõprae kij jen men ko renana rej kamade kij im bõk ainemõn ilo lemnak eo ej itok jen jokane eo ekwojarjar.​​—⁠Dri Pilippai 4:​6, 7.

Naomi eo ejako belen ear jab kõtlok bwe buromõj en kadebijik e ilo Moab ke leo belen im likao ro ruo nejin rar mij. Bõtab, ewõr men ko rar kamol bwe ear inebata iumin jidik wõt ien kin emake im limaro ruo belen lõmaro nejin. Ke ear jilkinlok erro, Naomi ear ba: “I kanuij buromõj kin kom, bwe pein Jeova e ar iten jumae iõ.” Bar juõn ien ke ear tõbar Bethlehem, ear kate wõt im ba: “Komin jab naeta Neomai [“Mõnõnõ eo Aõ”], komin likit eta Mera; bwe Eo Ekajur potata E ar kõmõn men eo e kanuij meo ñõn iõ.”​​—⁠Rut 1:​13, 20.

Bõtab, Naomi, ear jab kamakeiklok ian im buromõj wõt​​—⁠ejenolok jen Jehovah im armij ro an. Ilo Moab ear roñ bwe “Jeova ear lolok ro dron im lelok ñõn ir bred.” (Rut 1:⁠6) Ear melele bwe jikin eo emõntata en bed ie ej ibben armij ro an Jehovah. Naomi ear kobalok ibben Ruth lio nejin, im rar jeblak ñan Judah im ilo juõn wãwen ekabel ear tel Ruth kin kilen emmakit iman mejen Boaz eo ear nukiiro im eo ear maroñ wiaik ir.

Einlok wõt rainin, ro retiljek rar luji ro mõttair ilo mij rej lo tõbrak ilo air kijenmij ilo buromõj eo air ilo air boub wõt ilo Christian congregation eo. Einwõt Naomi, rej wõnmanlok im jerbale men ko lor jitõb ñan ir, konono Nan in Anij ran otemjej.

Tokjen ko Jen Jerbale Meletlet eo Ekwojarjar

Katak ko an Bible rej letok jelãlokjen kin ewi wãwen juõn armij emaroñ kijenmij kin men ko rej walok jen eñjake ko renana. Asaph ear kabukõt jibañ ilo temple eo an Jehovah im Jehovah ear roñjake e ilo meanwõd. Baruch ear jerbale nan in kakabilek eo im kejbãrok e jen mweiuk ko rar maroñ kamade. Naomi ear boub wõt ibben armij ro an Jehovah, keboje jiroñ eo Ruth ñan bõk jerammõn ko an ñan kabuñ ñan Anij eo emol.​​—⁠1 Dri Korint 4:7; Dri Galetia 5:​26; 6:⁠4.

Kwomaroñ anjo ion buromõj im eñjake ko jet renana ilo am kalmenlokjen kin anjo ko rekwojarjar Jehovah ear lelok ñan armij ro an, einwõt juõn dolul im ñan kajjojo iair. Kin men in, kwon kalmenlokjen kin jerbal in yokwe eo elaptata an Jehovah ilo an lelok juõn binmour kin kwe. Kwon kwalok am kamolol kin yokwe eo emol in jimjãn jimjatin eo an Christian. Kwon likit mour eo am ion lal eo ekãl an Anij ej bed iman im ej ebak. Im am uak en einwõt an Asaph: “A emõn iba bwe in kebakwoj ñõn Anij; I ar kõmõn Anij Jeova, aõ likepijñõk bwe in kennan kake jerbal ko Am otemjej.”​​—⁠Sam 73:⁠28.