Kajeoñe Jehovah Ne Kwoj Katakin Ajiri Ro Nejim

“Ejjab aolep jemen im jinen ajiri ro rej kajimwe ro nejiir ke?”​—HERBEWS 12:​7, Contemporary English Version.

1, 2. Etke ewõr abañ ilo an jemen im jinen ajiri ro kakajiririk ajiri ro nejiir rainin?

JUÕN EKKATAK kar kõmmane ilo Japan jejjo yiõ ko remotlok ear kalikar bwe enañin jimettan in ritto ro rar kajitõkin ir rar eñjake bwe ear kanuij jabwe konono ikõtan jemen im jinen ajiri ro im ajiri ro nejiir im bwe ear lap an jemen im jinen ajiri ro kõtlok kõnan ko an ajiri ro nejiir. Ilo bar juõn ekkatak ilo ailiñ en, iturinlok juõn mõttan emen in ro rar uak rar kamol bwe rar jaje kilen jerbal ibben ajiri ro nejiir. Wãwen in ejjab jeja ilo ailiñ in orient kan wõt. “Elõñ jemen im jinen ajiri ro ilo Canada rar kamol bwe rar eñjake air jab jelã wãwen eo bwe ren jemen im jinen ro remõn,” The Toronto Star, ear report. Ijoko otemjej, jemen im jinen ajiri ro rej lo bwe ebin kakajiririk ajiri ro nejiir.

² Etke jemen im jinen ajiri ro rej lo abañ ilo air kakajiririk ajiri ro nejiir? Juõn un eo elap ej kin ad mour ilo “ran ko eliktata,” im “ien ko renana” rej bed. (2 Timote 3:⁠1) Bareinwõt, Bible ej ba bwe “e nana lemnok in buruen armij jen an inono.” (Jenesis 8:​21) Im jodikdik ro elaptata air bellok ñan nitbwil ko an Satan, eo ej einwõt “laiõn e rorror” ej abãde ro ejelok air iminene kin mour. (1 Piter 5:⁠8) Christian ro jemen im jinen ajiri ro rej jelmae elõñ abañ ko ñe rej jino kakajiririk ajiri ro nejiir “ilo kaje im kowe an Iroij [Jehovah].” (Dri Epesõs 6:⁠4) Ewi wãwen an ro jemen im jinen maroñ jibañ ro nejiir ñan rittolok im ri kabuñ ro an Jehovah, im wõr air maroñ in jelã kajjen “emõn im nana” jimor?​​—⁠Dri Hibru 5:​14.

3. Etke katakin im tel eo an jemen im jinen ajiri ro eaorõk ñan lo tõbrak in kakajiririk ajiri ro nejiir?

³ King eo emeletlet Solomon ear kile bwe “E lukjõk men in bwebwe ilo buruen juõn ajiri.” (Jabõn Kennan Ko 13:1; 22:15) Ñan jolok bwebwe rot in jen burueir, ro redik rej aikwij bõk kajimwe ko ewõr yokwe ie jen jemeir im jineir. Ak, ejjab aolep ien jodikdik ro rej mõnõnõ in bõk kajimwe. Ilo mol, ekkã air dike nan in kakabilek jekdon wõn eo ej lelok ñan ir. Kin menin, ro jemen im jinen rej aikwij katak ñan “kibel juõn ajiri ilo ial eo en etal ie.” (Jabõn Kennan Ko 22:⁠6) Ñe ajiri ro rej bõk katak rot in, emaroñ melelen mour ñan ir. (Jabõn Kennan Ko 4:​13) Elap an aorõk bwe jemen im jinen ren jelã ta eo ekoba ilo katakin ro nejiir redik!

Kauwe​​—⁠Ta Melelen

4. Ta melele eo moktata in “kowe” einwõt air kajerbale ilo Bible?

⁴ Kin air mijak kin narueir kin kõmman ko renana ilo​​—⁠enbwin, nan, ak eñjake​​—⁠jet jemen im jinen rej bõjrak jen air kajimwe ajiri ro nejiir. Ej aikwij jab wõr kain mijak rot in ibbed. Nan in “kouwe” einwõt air kajerbale ilo Bible ejjab melelen jabdewõt kain kõmman ko renana ak lej. Nan in Greek eo kin “kouwe” elaptata an jerbal ñan nan in katakin, jelãlokjen, kajimwe im, jet ien, kaje ilo juõn wãwen ekijñeñe ak ewõr yokwe ie.

5. Etke ewõr tokjen ñan etale wãwen eo Jehovah ear kajerbale ibben armij ro an?

⁵ Ilo lelok kain kauwe rot in, Jehovah Anij ear likit joñok eo ewãppen. Ilo an keidi Jehovah ñan juõn jemen armij, ri jilek Paul ear je: “Jemen im jinen ajiri ro ir aolep rejjab kajimwe ajiri ro nejiir ke? Armij ro jemed im jined rej kajimwe kij iumin juõn ien ekadu, im rej kõmmane ilo wãwen eo rej lemnake bwe emõntata. Ak Anij ej kajimwe kij ñan emõn eo ad make, kinke ekõnan bwe jen kwojarjar.” (Hebrews 12:​7-​10, Contemporary English Version) Aet, Jehovah ej kauweik armij ro an kin un eo bwe ren kwojarjar, ak erreo. Emaroñ lap ad katak kilen katakin ajiri ilo ad etale wãwen eo Jehovah ear kibel armij ro an.​​—⁠Duteronomi 32:4; Matu 7:​11; Dri Epesõs 5:⁠1.

Yokwe​​—⁠Kajur eo Ilikin

6. Etke emaroñ bin an ro jemen im jinen ajiri ro kajeoñe yokwe eo an Jehovah?

⁶ “Anij yokwe,” ri jilek John ej ba. Inem, katak eo Jehovah ej letok ien otemjej ej lujur ikijen yokwe. (1 Jon 4:8; Jabõn Kennan Ko 3:​11, 12) Melelen menin ke bwe jemen im jinen ro rej yokwe ajiri ro nejiir renaj lo bwe ebidodo kajeoñe Jehovah ilo menin? Ejjab melelen menin. Yokwe eo an Anij ej bedbed ion kien. Im juõn ri meletlet in Greek ej kalikar bwe yokwe rot in “ejjab ien otemjej atartarlok ibben eñjake ko biktokin armij.” Anij ejjab kõtlok bwe eñjake ko ren telbiloik e. Ien otemjej ej lemnak kin ta eo emõntata ñan armij ro an.​​—⁠Aiseia 30:20; 48:⁠17.

7, 8. (a) Ta joñok in kien yokwe eo Jehovah ear likiti ilo an jerbal ibben armij ro an? (b) Ewi wãwen an jemen im jinen ajiri ro maroñ kajeoñe Jehovah ilo air jibañ ajiri ro nejiir ñan ejaake maroñ eo ñan lor kien ko ilo Bible?

⁷ Lemnak kin yokwe eo Jehovah ear kwalok ilo an jerbal ibben Ri Israel ro. Moses ear kajerbal ilo juõn wãwen eaibujuij ñan kalikar yokwe eo an Jehovah ñan ailiñ in Israel. Jej konono: “Einwõt igõl ej biuktõk el eo an, ej bikbik ilõñin kon ko nejin, E ar erlokwe pein, E ar bõk ir, E ar baur ir ion pã ko pein. Jeova wõt e ar tel e [Jacob].” (Duteronomi 32:​9, 11, 12) Ñan katakin kon ko nejin kelok, igõl eo jineir ej ‘biuktõke el eo an,’ bikbik im erlokwe pã ko pein ñan kõketak kon ko nejin bwe ren kelok. Ñe juõn kon ej kab iten kelok jen el eo, eo ekkã an bed ion juõn jirimle eutiej, jinen igõl eo ej “bikbik ilõñin” kon eo nejin. Elañe kon eo ej einwõt iten buñõt lal, jinen ej kelok iumin, im ‘baur e ion pã ko pein.’ Ilo yokwe Jehovah ear lale ailiñ eo ekãl ailiñ in Israel ilo juõn wãwen eo einlok wõt in. E ar lelok ñan armij ro Kien eo ikijen Moses. (Sam 78:​5-7) Inem Anij ear kanuij kejbãrok ailiñ eo, bojak ñan kadeod ir ke armij ro an rar ion abañ ko.

⁸ Ewi wãwen an Christian ro jemen im jinen ajiri ro maroñ kajeoñe yokwe eo an Jehovah? Mokta, rej aikwij katakin ajiri ro nejiir kien ko rej loi ilo Nan in Anij. (Duteronomi 6:​4-9) Mejenkajjik eo ej ñan jibañ ro redik ñan katak kõmman bebe ko rej errã ibben kien ko ilo Bible. Ilo air kõmman menin, ro jemen im jinen ewõr air yokwe rej bikbik ilõñin ro nejiir ilo nan in kõkkar, im lale wãwen eo rej jerbale nan in kakabilek ko rar katak. Ke ajiri ro rej rittolok im jidik kin jidik bõk anemkwoj, jemeir im jineir rej bojak in “kelok iumin” im ‘baur nejiir ion pã ko peiir’ jabdewõt ien ñe ewõr kauwatata. Kain kauwatata rot?

9. Ñan kauwatata et eo elaptata jemen im jinen ro rej yokwe rej aikwij bojak ñane? Wanjoñok.

⁹ Jehovah Anij ear kakkõl Ri Israel ro kin tokjen kamao ko renana. (Bwinbwin 25:​1-​18; Ezra 10:​10-​14) Kamao ibben armij ro renana ej bareinwõt juõn menin kauwatata rainin. (1 Dri Korint 15:33) Christian ro jemen im jinen ajiri rej aikwij kajeoñe Jehovah ilo menin. Juõn jiroñ 15-yiõ dettan etan Lisa ear oktak im itoklimoen ibben juõn ladik eo ear jab bõk ejja kien mour erreo ko wõt im raorõk ilo jitõb an family eo. “Jema im jinõ rar mõkaj in lo juõn oktak ilo lemnak eo aõ im kwalok air inebata,” Lisa ej ba. “Jet ien rar kajimwe iõ, im ilo ien ko jet rar rejañ iõ ilo yokwe.” Rar jijet ibben Lisa im roñjake ilo meanwõd, im kin menin jibañ e ñan jerbale men eo rar kile bwe ear juõn abañ​​—⁠kõnan eo ñan kabuñburuen ro dettan wõt.a

Kejbãrok Bwe En Bellok Wõt Ial in Konono ko Ibben Don

10. Ilo wãwen et ko Jehovah ear likit juõn joñok emõn ilo konono ibben Ri Israel ro?

¹⁰ Bwe en wõr tõbrak ilo katakin ajiri ro, jemeir im jineir rej aikwij kate ir kejbãrok bwe en bellok wõt ial in konono eo ibben ajiri ro nejiir redik. Jehovah, meñe ejelã ta e ej bed ilo buruõd, ej rejañ kij ñan ad konono ibben. (1 Kronikel 28:⁠9) Elikin an lelok Kien eo ñan Ri Israel ro, Jehovah ear karõk bwe Ri Levi ro ren katakin ir, im ear jilkinlok ri kanan ro bwe ren kõmmanwa ibbeir im kajimwe ir. E ar bareinwõt kwalok an mõnõnõ in roñjake jar ko air.​​—⁠2 Kronikel 17:​7-9; Sam 65:2; Aiseia 1:​1-3, 18-​20; Jeremiah 25:​4, NW; Dri Galetia 3:​22-​24.

11. (a) Ewi wãwen an jemen im jinen ajiri ro maroñ kalaplok konono eo emõn ibben ajiri ro nejiir? (b) Etke elap tokjen bwe jemen im jinen ajiri ro ren ri roñjake ro remõn ñe rej konono ibben ajiri ro nejiir?

¹¹ Ewi wãwen an jemen im jinen ajiri ro maroñ kajeoñe Jehovah ñe rej konono ibben ajiri ro nejiir? Mokta im aorõktata, rej aikwij karõk ien ñan bed ibbeir. Emõn bareinwõt bwe jemen im jinen ajiri ro ren bõprae nan in kajirere ko, einwõt, “Eñin ke aolepen men eo ejelok tokjen ej kabõnõnõik yuk? I ar lemnak kar juõn men eo elap tokjen”; “Menin bwebwe”; “Eokwe, ta eo kwoj kõtmene? Kwe juõn ajiri wõt.” (Jabõn Kennan Ko 12:18) Ñan rejañ ajiri ro bwe ren kwalok burueir, ro jemeir im jineir remeletlet rej kate ir bwe ren ri roñjake ro remõn. Ro jemen im jinen me rej kajekdon ro nejiir ñe rej dik remaroñ lo bwe ro nejiir renaj kajekdon ir ñe rej rittolok. Jehovah ien otemjej ej mõnõnõ in roñjake armij ro an. Ej roñjake ro ilo ettã buru rej oktaklok ñan e ilo jar​​—⁠Sam 91:15; Jeremiah 29:​12, NW; Luk 11:​9-​13.

12. Ta kadkad ko jemen im jinen ajiri ro remaroñ kalikar im renaj kabidodolok ñan an ajiri ro nejiir kebak ir?

¹² Lemnak bareinwõt kin jet wãwen kadkad ko kadkadin Anij im rar kõmman bwe en bidodo an armij ro an kebake ilo anemkwoj. Ñan wanjoñok, King David in Israel eo etto ear kõmman juõn jerawiwi elap ke ear lũñ ibben Bath-sheba. Ke ear juõn armij jab wãppen, David ear kõmman jerawiwi ko jet relap ilo mour eo an. Ak, ear jab likjap in kebak Jehovah im bukõt an jeorlok bwid im kaje. Ejelok bere, tiriamokake eo an Anij ear kabidodolok ñan an David jeblak ñan Jehovah. (Sam 103:⁠8) Ilo kwalok kadkad ko rekwojarjar einwõt joij im tiriamokake, jemen im jinen ajiri ro remaroñ jibañ kejbãrok wõt ial in konono eo ibben ajiri ro meñe rej kõmman bwid.​​—⁠Sam 103:13; Malachi 3:⁠17, NW.

Kwon Kõmmanwa

13. Ta eo kõmmanwa ej kobaiki?

¹³ Ñe rej roñjake ro nejiir, jemeir im jineir rej aikwij kõmmanwa im kwalok “meletlet jen lõñ.” (Jemes 3:​17) “Ami kamanwa en walok ñõn armij otemjej,” ri jilek Paul ear je. (Dri Pilippai 4:⁠5) Ta melelen kõmmanwa? Juõn kamelele kin nan in Greek eo rej ukõt “kõmmanwa” ej bwe “rejjab aikwij kijñeñe in lor tibdikin kien eo.” Ke rej debij wõt kien mour erreo ilo kanniek im jitõb, jemen im jinen ajiri ro ewi wãwen air maroñ kõmmanwa?

14. Ewi wãwen an kar Jehovah kwalok kõmmanwa ilo an kar jerbal ibben Lot?

¹⁴ Jehovah ej likit juõn joñok emõn ilo kõmmanwa. (Sam 10:17) Ke ear rejañ Lot im family eo an bwe ren ilok jen jikin kwelok in Sodom eo emwij liakelok, Lot “e rumij.” Tokelik, ke enjel eo an Jehovah ear kajitõk ibben bwe en ko ñan tol ko, Lot ear ba: “I ban ko ñõn tol en . . . lo, kiõ, jikin kwelok en [Zoar] ebak bwe in ko ñõn e, im erik. O, in ko ñõn ijo​​—⁠e jab erik ke?” Ewi wãwen an kar Jehovah emmakit ñan menin? E ar ba: “I ar bareinwõt eoroñ yuk kin men in, bwe In jab kokkure jikin kwelok en kwar konono kake.” (Jenesis 19:​16-​21, 30) Jehovah ear mõnõnõ in uak kajitõk eo an Lot. Aet, jemen im jinen ajiri ro rej aikwij lore kien ko Jehovah Anij ej likiti ilo Nan eo an, Bible eo. Ak, remaroñ kõtlok kõnan ko an ro redik ñe kien ko ilo Bible rejjab bed ilo kauwatata.

15, 16. Ta katak eo jemen im jinen ajiri ro remaroñ katak jen wanjoñok eo jej lo ilo Aiseia 28:​24, 25?

¹⁵ Kõmmanwa ekitibuj keboj buruen ajiri ro bwe ren bojak in bõk nan in kakabilek. Ilo juõn wãwen kõkkar, Isaiah ear keidi Jehovah ñan juõn ri kallip im ba: “Eo ej plau bwe en jeor, ej plau ien otemjej ke? im kabellok im tõblõle brij eo an ien otemjej ke? Ke emwij an kõmõne im eorãke, e jab jolok ie fig ko, im kijibliklok kummin eo, im likit wit ilo lajrõk ko, im barli ilo jikin e pojõk, im spelt ilo torerein ke?”​​—⁠Aiseia 28:​24, 25.

¹⁶ Jehovah “ej plau bwe en jeor” im “kabellok im tõblõle brij eo an.” Ilo wãwen in ej keboj buruen armij ro an mokta jen an kauweik ir. Ilo air kajimwe ajiri ro nejiir, ewi wãwen an jemeir im jineir maroñ tõbar buruen ajiri ro nejiir? Juõn jemen ajiri ear anõk Jehovah ke ear kajimwe ladik eo nejin emen an yiõ. Ke ladik eo nejin ear ire ibben juõn ladik ri turin, jemen ear roñjake mokta kamelele eo an nejin. Inem, einwõt ñan tõbar buruen ladik eo nejin, jemen ear kwalok juõn bwebwenato kin juõn ladik eo ear lap an kar eñtan jen pein juõn ladik elej. Elikin an roñjake bwebwenato eo, ladik eo ear emmakit im ba bwe rar aikwij kauweik ladik eo elej. Jerbal in ‘tõbar’ rot in ear keboj buruen ladik eo im kabidodo ñan an lo bwe an kar ire ibben ladik eo ri turin kar juõn jerbal an armij elej im ear juõn men ebwid.​​—⁠2 Samuel 12:​1-​14.

17. Ta katak eo ilo jerbal in kajimwe eo jemen im jinen ajiri ro rej kõmmane im Aiseia 28:​26-​29 ej letok?

¹⁷ Isaiah ear keidi kajimwe eo an Jehovah ñan bar juõn jerbal in kõmman jikin kallip​​—⁠deñdeñ ñan kajenolok ine ko jen men in eddek eo. Juõn ri kallip ej kajerbal kajjo kain kein jerbal in kajenolok ine ko ekkar ñan joñan an bin kilin ine eo. Rej kajerbal juõn joñan ñan ine ko rebidodo ine in black cumin im juõn alal ñan ine in cumin ko, ak rej kajerbal juõn sledge ak wheel in cart ñan ine in grain ko ebin kiliir. Bõtab, ejamin noe ine in grain ko rebin ñan joñan eo rej jorrãn. Eindein, ñe Jehovah ej kõnan kamakit jabdewõt men eo ejjab emõn ibben armij ro an, ej kajerbal kajjo kain kilen ko rekkar ñan aikwij ko im wãwen ko. Ejjab kajerbal maroñ eo an ilo juõn wãwen ejjab jimwe ak lej. (Aiseia 28:​26-​29) Jet ajiri rej emmakit ñe jemeir ak jineir rej kalimjek wõt ir, im ejelok bar juõn men rej aikwij kõmmane. Ro jet rej aikwij eliji nan in kakememej ko, ke ro jet rej aikwij kauwe ko rekajurlok. Jemen im jinen ro rej kõmmanwa renaj lelok kajimwe ekkar ñan aikwij ko an kajjojo ajiri.

Kõmman Bwe Konono Ko An Family eo Ren Kalañliñ

18. Ewi wãwen an jemen im jinen ajiri ro maroñ bõk ien ñan ekkeini katak Bible eo an family?

¹⁸ Ibwiljin wãwen ko remõntata ñan katakin ajiri ro nejimi rej ekkeini katak Bible eo an family eo im etale Jeje ko ran otemjej. Juõn katak Bible an family eo elap an bolemen ñe rej ekkeini. Elañe ej wawa ion an ejelok karõk ak ion juõn bebe ejidimkij, ekkã an naj jeja an walok. Inem ro jemen im jinen rej aikwij ‘wiaik ien’ ñan katak. (Dri Epesõs 5:​15-​17) Kãlet juõn ien ekwon ñan aolep emaroñ juõn menin aitwerõk. Juõn bõran family ear lo bwe ke ajiri ro rar rittolok, schedule ko air kajjojo ear kõmman an binlok an aolepen family eo koba ibben don. Ak, ien otemjej family eo ear ibben don ilo jotenin kwelok ko an congregation. Kin menin jemen family eo ear karõk bwe katak eo an family eo en walok ilo juõn ian joten kein. Karõk in ear emõn an bolemen. Aolep ajiri ro jilu rej ri karejaran Jehovah ro emwij air baptais.

19. Ewi wãwen an jemen im jinen ajiri ro maroñ kajeoñe Jehovah ñe rej kõmmane juõn katak an family eo?

¹⁹ Bõtab, ejjab bwe ñan baj etale wõt jet katak jen Jeje ko ilo ien katak eo. Jehovah ear katakin Ri Israel ro rar jeblak ikijen priest ro, ro rar ‘kameleleik’ Kien eo, “lelok kamelele ilo air read.” (Nihimaia 8:⁠8) Juõn jemen ajiri ear lo tõbrak ilo an jibañ aolep ajiri ro nejin jiljilimjuõn ñan yokwe Jehovah ien otemjej ear deloñ ilo room eo an mokta jen an family eo katak bwe en kebojak, karõk katak eo ñan aikwij ko an kajjojo ajiri. E ar kõmman bwe katak eo an menin kalañliñ ñan ajiri ro nejin. “Ien otemjej katak eo ear kalañliñ,” juõn ian ladik ro nejin eritto ear kememej. “Elañe kim ar ikkure kin ball inabõj im rar kir kim ñan katak eo an family eo, ilo mõkaj kim ad kakone ball eo im ettõr im deloñ ñan katak eo. Kar juõn ian joten ko elaptata air kalañliñ ilo week eo.”

20. Ta abañ eo emaroñ walok ilo kakajiririk ajiri ro jej aikwij wõt in naj etale?

²⁰ Ri jeje sam ear keañ: “Lo! ajiri rõn men in jolit jen Jeova, im leen lojien kõra men in letok jen E.” (Sam 127:⁠3) Katakin ajiri ro nejid ej bõk ien im jibadbad, ak ad kõmman eindein ilo jimwe emaroñ melelen mour indio ñan ro nejid redik. Juõn jinekjej elap an emõn! Inem, jen kajeoñe Jehovah ñe jej katakin ajiri ro nejid. Bõtab, ke jemen im jinen ajiri ro emwij kabbeik ir kin eddo in “kakajiririk [ajiri ro] ilo kaje im kowe an Iroij [Jehovah],” ejjab melelen renaj lo tõbrak. (Dri Epesõs 6:⁠4) Meñe kin kilen kakajiriri eo emõntata, juõn ajiri emaroñ oktak im jumae im bõjrak jen an karejar ñan Jehovah. Ta eo ej aikwij kõmman ilo juõn wãwen eo einwõt in? Eñin men eo naj etale ilo katak in tok juõn.

[Kamelele ko itulal]

Ta Uak Eo Am?

• Ewi wãwen an jemen im jinen ajiri ro maroñ kajeoñe yokwe eo an Jehovah rej kwalok kake ilo Duteronomi 32:​11, 12?

• Ta eo emwij am katak jen wãwen eo Jehovah ear konono ibben Ri Israel ro?

• Ta eo an Jehovah kar eoroñ eowor eo an Lot ej katakin kij?

• Ta katak eo ilo kajimwe ajiri ro emwij am katak jen Aiseia 28:​24-​29?

[Pija eo ilo peij 20, 21]

Moses ear kõkkar kin katak eo an Jehovah kin armij ro an ñan wãwen ko juõn igõl ej kõmmane ibben kon ko nejin

[Pija eo ilo peij 22]

Jemen im jinen ajiri ro rej aikwij bõk ien ibben ajiri ro nejiir

[Pija eo ilo peij 24]

“Ear juõn ian joten ko elaptata air kalañliñ ilo week eo”