Wõn Enaj Kejebel Kij Jen Yokwe Eo An Anij?
“Jej yokwe bwe E ar yokwe kij mokta.”—1 JON 4:19.
1, 2. (a) Etke ad jelã bwe rej yokwe kij elap tokjen ñan kij? (b) Yokwe eo an wõn eo elaptata ad aikwiji?
EWI aorõkin ñan kwe ñan am jelã bwe rej yokwe yuk? Jen ke rej ajiri ñan ñe reritto, armij rej ebbõl ion yokwe. Emwij ke am lo an juõn niñniñ eo jinen ej atbõkwõje ilo pein kin yokwe? Jekdon ta eo ej walok ibelakin, ekkã an niñniñ eo kalimjeklok mejen jinen an ettõñdikdik, im ej eñjake an jokõmmõn, ilo ainemõn ilo pein jinen eo ej yokwe. Ak kwoj kememej ke ewi kar wãwen eo am ilo yiõ ko rebin ke kwoj jino ritto? (1 Dri Tessalonika 2:7) Ilo jet ien, kwo maroñ kar jab jelã to eo kwar kõnan ak meñe melele wãwen am eñjake, ak ear lap tokjen ñan jelã bwe jemõm im jinõm rar yokwe yuk! Ear jab menin jibañ ke ñan jelã bwe kwar maroñ kebak ir kin jabdewõt abañ ak kajitõk? Emol, ilo aolepen ien mour eo, juõn ian menin aikwij ko ad elaptata ej bwe ren yokwe kij. Kain yokwe rot in ej kamol ñan kij bwe ewõr ad menin aorõk.
2 Kijenmij in yokwe eo an jemen im jinen juõn armij emol elap ijo kunan ñan ejaake eo ejimwe im jokkin wõt juõn. Ak, ad liki bwe Jemed ilañ, Jehovah, ej yokwe kij elaplok tokjen ñan mour in jitõb im eñjake eo ad emõn. Jet ro rej read i magazine in emaroñ kar jab wõr jemeir im jineir eo ear mol air kejbãrok ir. Elañe menin ear mol ilo wãwen eo am, kwon elloetak. Meñe yokwe eo an jemen ak jinen ear jako ak elañe ear jabwe, yokwe eo etiljek an Anij ej bõk jikin.
3. Ewi wãwen an Jehovah kar kamol ñan armij ro an kin yokwe eo an ñan ir?
3 Ikijen ri kanan eo an Isaiah, Jehovah ear kalikar bwe juõn jinen emaroñ “meloklok” niñniñ eo nejin, ak e jamin meloklok armij ro an. (Aiseia 49:15) Ilo wãwen in lok wõt, David ilo liki ear ba: “Bwe jema im jinõ r’ar illok jen ña, a Jeova e naj bõk iõ.” (Sam 27:10) Ej juõn menin kamol! Jabdewõt wãwen ko kwoj bed ie, elañe emwij am itok ñan loan juõn kõtan wujleplok ibben Jehovah Anij, kwoj aikwij kememej ien otemjej bwe yokwe eo an ñan yuk ellã lok jen eo an jabdewõt armij!
Kejbãrok Yuk Make ilo Yokwe An Anij
4. Ewi wãwen an Christian ro ilo ebeben eo kein kajuõn kar bõk kamol kin yokwe eo an Anij?
4 Ñããt eo kwar jino itok im jelã yokwe eo an Jehovah? Bõlen, wãwen eo kwar ione einlok wõt eo an Christian ro ilo ebeben eo kein kajuõn. Chapter eo kein kalalem ilo letter eo an Paul ñan Ri Rom ro emõn an kalikar wãwen an ri jerawiwi ro, juõn ien rar ruwamaejet jen Anij, rar oktak im jelã kin yokwe eo an Jehovah. Ilo 5 eon, jej konono: “Bwe emwij lutõk yokwe an Anij ilo buruer kin Jitõb Kwojarjar, Eo ar letok ñõn kij.” Ilo 8 eon, Paul ej kobaiktok: “A Anij ej kwalok karkarin An yokwe ñõn kij, ilo men in, ke j’ar dri jerawiwi, Kraist e ar mij kin kij.”
5. Ta eo ear jibañ yuk ñan melele im kamolol kin joñan yokwe eo an Anij?
5 Ilo juõn wãwen eo einlok wõt, ke mol eo jen Nan in Anij kar lewõj ñan yuk im kwar jino jerbale tõmak, jitõb kwojarjar eo an Jehovah ear jerbal ilo buruõm. Ilo wãwen in kwar jino am kamolol im melele kin delban im utiejen men eo Jehovah ear kõmmane ilo an jilkintok Nejin jitenburu bwe en mij kin kwe. Kin menin Jehovah ear jibañ yuk bwe en wõr am jelã kin joñan an lukkun yokwe armij. Ñe kwoj kile menin, meñe kwar lotak einwõt juõn ri jerawiwi im ruwamaejet jen e, Jehovah ear kabellok ial eo ñan armij bwe ren keañ wãnik ibben jerammõn eo kin mour eo ejelok jemlokin, menin ear jab menin kamakit buruõm ke? Kwar jab eñjake ke juõn yokwe ñan Jehovah?—Dri Rom 5:10.
6. Etke jet ien jemaroñ eñjake ad ettolok jen Jehovah?
6 Ke kin yokwe emwij am ruaklok ñan Jemõm ilañ im kõmman oktak ilo mour eo am bwe en emõn ibben, kwar wujleplok mour eo am ñan Anij. Kiõ kwoj lañliñ kin ainemõn ibben Anij. Ak, ilo jet ien kwoj eñjake ke am einwõt ettolok jen Jehovah? Menin emaroñ walok ñan jabdewõt iad. Ak ien otemjej kememej bwe Anij ejjab oktak. Yokwe eo an joñan emakijkij in im an etal in wõt juõn ej einwõt al, eo ejjab bõjrak in jilkintok koon meram eo an emãnãn ñan lal. (Malachi 3:6, NW; Jemes 1:17) Ilo wãwen eo juõn, jemaroñ oktak—meñe ñan jidik wõt ien. Ke lal in ej errolol, jimettan in iju in ej oktak im libobo kin marok. Eindeinlok, elañe jej oktaklok jen Anij, meñe ilo juõn joñan, jemaroñ eñjake juõn molo ilo kõtan eo ad ibben. Ta eo jemaroñ kõmmane ñan kajimwe wãwen in?
7. Ad etale kij make ewi wãwen an maroñ jibañ kij ñan bed wõt ilo yokwe eo an Anij?
7 Elañe jej eñjake ad jebellok jen yokwe eo an Anij, jej aikwij kajitõkin kij make: ‘I ar baj bõk wõt yokwe eo an Anij ke? I ar etal ke em oktaklok jen Anij eo emour im ej yokwe, im kwalok ilo elõñ wãwen ko juõn mõjno in tõmak? I ar lemnak ke kin “men ko an kõniek”?’ (Dri Rom 8:5-8; Dri Hibru 3:12) Elañe jaar kejebellok kij make jen Jehovah, jemaroñ bõk buñten nee ko ñan kajimwe wãwen ko, jeblak ñan juõn kõtan eo ebak im mãnãn ibben. Jemes ej kõketak kij: “Komin druaklok ñõn Anij, im E naj druakwoj ñõn kom.” (Jemes 4:8) Bõk ñan buruõm nan kein an Jude: “A komeo, ro jitenburu, komin mõke kalek kom ion ami tõmak ekwojarjar otem kwojarjar, komin jar ilo Jitõb Kwojarjar, im kejbãrok kom ilo yokwe an Anij.”—Jud 20, 21.
Wãwen Ko Rej Oktak Rejjab Jelet Yokwe An Anij
8. Ta oktak ko emaroñ idiñ air walok ilo mour ko ad?
8 Mour eo ad ilo jukjuk im bed in ej tellokin ion elõñ ukoktak ko. King Solomon ear loe bwe “a ien im men in walok rej itok ñõn ir [kij] otemjej.” (Ekklisiastis 9:11) Ejjabto, mour eo ad emaroñ oktak aolepen. Juõn ran jej ejmour, ran eo tok juõn jemaroñ lukkun nañinmij. Juõn ran jikin jerbal eo ad emaroñ einwõt etal in wõt juõn, ran eo tok juõn emwij kabõjrak ad jerbal. Ilo idiñ, juõn eo jitenburu emaroñ mij. Christian ro ilo juõn ailiñ remaroñ lañliñ kin wãwen ainemõn ko iumin jet ien, inem ilo idiñ, matõrtõr ej walok. Bõlen rej naruõd ilo jab mol, im kin menin, jej bõk eñtan kin jemlokin ekajet bwid. Aet, mour ejjab jokkin wõt juõn ak lukkun jokane.—Jemes 4:13-15.
9. Etke ej menin kakabilek ñan etale juõn mõttan Dri Rom chapter 8?
9 Ñe menin kaburomõjmõj ko rej walok ñan kij, jemaroñ jino eñjake ad make iad, meñe antonelok bwe yokwe eo an Anij ñan kij emwij an diklok. Ke kij otemjej tellokin ion kain wãwen rot kein rej walok, emõn bwe jen kanuij etale nan in kainemõn ko an ri jilek Paul emwij jei ilo Dri Rom chapter 8. Nan ko kar kwaloki ñan Christian ri kabit ro ilo jitõb. Ak, ilo nan in kakabilek rej bareinwõt jerbal ñan sheep ro jet, ro emwij keañ kake ir wãnik einwõt ro jeran Anij, einwõt kar Abraham ilo ien ko mokta jen ien Christian—Dri Rom 4:20-22; Jemes 2:21-23.
10, 11. (a) Ta menin naruõn ko ri kijirãt ro jet ien rej kõmmani nae armij ro an Anij? (b) Etke naruõn rot kein Christian ro rejjab lukkun watõki?
10 Konono Dri Rom 8:31-34. Paul ej kajitõk: “Elañe Anij ej ber iber, wõn ej jumae kij?” Emol, Satan im lal eo an enana rej jumae kij. Ri kijirãt ro remaroñ naruõd ilo jab mol, meñe ilo jikin ekajet eo ilo ene eo. Jet Christian jemen in jinen ajiri rar narueir kin dike ajiri ro nejiir kin air jab kõtlok air bõk kamadmõd in doctor ko rej rupe kien eo an Anij ak jab kõtlok air bõk kunair ilo kemem ko an pagan. (Jerbal 15:28, 29; 2 Dri Korint 6:14-16) Christian ri tõmak ro jet rej narueir ilo jab mol kin jumae kien kinke rejjab mõnmõn armij ro mõttair ilo tarinae ko ak bõk kunair ilo jerbal in kien. (Jon 17:16) Jet ri jumae rar kajeeded ruruwe ko reriap ilo news ko, meñe naruõn Ri Kennan ro an Jehovah ilo jab mol bwe ej juõn dolul in kabuñ ekauwatata.
11 Ak jab meloklok bwe ilo ran ko an ri jilek ro, rar ba: “Bwe kin jar in, kim jela ijo ko otemjej rej konono nae e.” (Jerbal 28:22) Naruõn ko rejjab mol ejjab men eo elaptata tokjen ke? Ej Anij eo ej keañ kin Christian ro remol rewãnik, bedbed ion tõmak eo air ilo katok in binmour eo an Christ. Etke Jehovah enaj bõjrak jen an yokwe ri kabuñ ro an elikin an lelok ñan ir menin letok eo elap an aorõk ear maroñ letok—jitenburu eo Nejin make? (1 Jon 4:10) Kiõ ke emwij kajerkak Christ jen mij im likit e ilo anbijmaroñ in Anij, ej jerbal im jojomar ak jurake, Christian ro im einwõt ñe ilo juõn jikin ekajet in kien. Wõn emaroñ jimwe an kariap jojomar eo an Christ kin ri kalor ro an ak wõn emaroñ lo tõbrak ilo an jumaiki ekajet eo an Anij kin ri tõmak ro an? Ejelok juõn!—Aiseia 50:8, 9; Dri Hibru 4:15, 16.
12, 13. (a) Ta wãwen ko rejjab maroñ kejebel kij jen yokwe an Anij? (b) Ta jibadbad eo an Devil eo ilo an kõmman abañ ñan kij? (c) Etke Christian ro rej bõk anjo?
12 Konono Dri Rom 8:35-37. Ijellokid kajjojo, ewõr ke jabdewõt armij ak jabdewõt men emaroñ kejebel kij jen yokwe eo an Jehovah im Nejin, Christ Jesus? Satan emaroñ kajerbal agent ro an ilo lal ñan kõmman elap abañ ñan Christian ro. Ilo ebeben eo ej motlok, elõñ ian Ri Christian ro jeid im jatid maan im kõrã rar ion kaeñtan ilo elõñ ene ko. Ilo jet jikin ko rainin, ro jeid im jatid rej jelmae abañ in money ran otemjej. Jet rej ion eñtan in kwuli ak jabwe nuknuk. Ta jibadbad eo an Devil ilo an kõmmani wãwen kein rej menin kaeñtan? Juõn ian mõttan jibadbad eo an ej ñan kabwer kabuñ eo emol an Jehovah. Satan ekõnan kõmmane kij bwe jen tõmak bwe yokwe eo an Anij emwij an mololok. Bõtab, ej wãwen eo in ke?
13 Einwõt Paul, eo ear elij Sam 44:22, emwij ad katak Nan in Anij eo emwij je. Jej melele bwe kin tokjen eo ñan etan Anij men kein rej walok ñan kij, “sheep” ro an.” Kokwojarjar eo kin etan Anij im jojomar eo kin kajur bõtata eo an ijoko ilañ rejelet wãwen in. Ej kin kain menin konono rot kein relap eo Jehovah ear kamelim melejoñ ko, ejjab kinke ejako an yokwe kij. Jekdon ta wãwen men kein kaeñtan eo emaroñ walok, jej liki bwe yokwe eo an Jehovah ñan armij ro an, ekoba kajjojo iad, ejjab oktak. Jabdewõt men eo einwõt ejjab menin anjo im jemaroñ eñtan kake enaj oktak im juõn anjo elañe jej kejbãrok wõt tiljek eo ad. Jej bõk kakajur im bed wõt kin mol in yokwe eo an Anij eban rup mejaljal.
14. Etke Paul ear liki yokwe eo an Anij meñe ewõr abañ ko Christian ro remaroñ eñtan kaki?
14 Konono Dri Rom 8:38, 39. Ta eo ear kõmman an Paul liki bwe ejelok jabdewõt men emaroñ kejebel Christian ro jen yokwe eo an Anij? Ejelok bere jelã im iminene eo an Paul ilo jerbal in kwalok nan ear kabinlok liki eo an bwe menin kaeñtan ko rejamin jelet yokwe eo an Anij ñan kij. (2 Dri Korint 11:23-27; Dri Pilippai 4:13) Bareinwõt, Paul ear jelã kin karõk eo ej indio an Jehovah im men ko ear jerbali ibben armij ro an ilo ien ko remotlok. Mij make emaroñ ke tarinaik yokwe eo an Anij ñan ro rej karejar ñan e ilo tiljek? Ejjab ñan jidik! Armij rot rein rej tiljek ñe remij renaj mour ilo ememej wãppen eo an Anij, im enaj kajerkakbijeik ir ilo ien eo ejejjet.—Luk 20:37, 38; 1 Dri Korint 15:22-26.
15, 16. Bar bwine jet men ko me reban maroñ kõmman menin an Anij kabõjrak an yokwe ro ri karejaran retiljek.
15 Jabdewõt men eo mour in jerata eo rainin emaroñ bõktok ñan kij—elañe juõn lanwõtwõt eo ej kõmman mõjno, ak juõn nañinmij ej kebaktok juõn jemlok, ak juõn jorrãn in jabwe money—ejelok jabdewõt emaroñ jolok yokwe eo an Anij ñan armij ro an. Enjel ro rekajur, einwõt enjel eo ekiblia eo ear oktak im Satan, ejjab maroñ kareel Jehovah bwe en kabõjrak an yokwe ri karejaran ro retiljek. (Job 2:3) Kien ko remaroñ kabõjrak, kalbuji, im jerbal nana ñan ro ri karejaran Anij im remaroñ kakõlleik ir “persona non grata.” (1 Dri Korint 4:13) Kain kijirãt rot in ejjab ekkar an ailiñ ko remaroñ jibed armij ro ñan air oktak nae kij, ak ejjab ukõtlok Kajur Bõtata eo an ijoko otemjelok ilañ ñan an ilok jen kij.
16 Einwõt Christian ro, jej aikwij jab mijak bwe jabdewõt men eo Paul ear naetan “men ko kiõ ijin”—men ko rej walok, wãwen ko, im men ko ilo jukjuk im bed in—meñe “men ko rej itok” ilo ran ko rej itok rejjab maroñ rupe ekkeijak eo an Anij ñan armij ro an. Meñe jitõb ko rekajur im nana ilal im ilañ rej bõk kunair ilo tarinaik kij, yokwe in tiljek eo an Anij ebed ijo ñan debij kij. Jekdon “utiejen ak mũlalin” ejjab bõprae yokwe eo an Anij, einwõt an Paul kalikare. Aet, ejelok jabdewõt men emaroñ kabwer kij, ak jabdewõt men ej iten jerbale juõn kareelel eo ekajur iod, emaroñ kejebel kij jen yokwe eo an Anij ak jabdewõt menin kõmanman emaroñ rupe kõtan eo an Ri Kõmanman eo ibben ri karejar eo an retiljek. Yokwe eo an Anij eban likjap; ej ñan indio.—1 Dri Korint 13:8.
Kaorõk Yokwe Im Joij eo An Anij ñan Indio
17. (a) Etke an wõr yokwe eo an Anij “emõnlok jen mour”? (b) Ewi wãwen ad kalikar bwe jej kaorõk yokwe im joij eo an Anij?
17 Ewi aorõk in yokwe eo an Anij ñan yuk? Kwoj eñjake ke einwõt kar David, eo ear je: “Bwe Am joij emõn jen mour, tiõ re naj nebar Yuk. Ein drein I naj kamolol Yuk ke ij mour; I naj kwotõke peiõ ilo etõm”? (Sam 63:3, 4) Ilo mol, ewõr ke jabdewõt men mour eo ilo lal in ej letok im emõnlok jen lañliñ kin kõtan jimjera in yokwe im tiljek eo an Anij? Ñan wanjoñok, jibadõk juõn jikin jerbal eo elap bõk wõnãn ie emõnlok ke jen lemnak eo ewõr ainemõn im mõnõnõ ie im ej walok tokjen jen juõn kõtan eo ebak ibben Anij? (Luk 12:15) Jet Christian rej jelmae kãlet eo kin karmijeteik Jehovah ak jelmae mij. Menin ear walok ñan elõñ Ri Kennan ro an Jehovah ilo camp in kalbuj ko an Nazi ilo Tarinae eo an Lal Kein Ka II. Ibben jejjo wõt ro reinjuõn, Christian ro jeid im jatid rar kãlet ñan air bed wõt ilo yokwe eo an Anij, ilo mõnõnõ in jelmae mij elañe ear menin aikwij. Ro rej tiljek ilo air bed wõt ilo yokwe eo an remaroñ liki ñan air bõk jen Anij juõn ilju eo ej indio, juõn men eo lal in ejjab maroñ letok ñan kij. (Mark 8:34-36) Ak elõñlok men ej ekkeijak jen baj mour indio wõt.
18. Etke mour indio elap ad kõnan?
18 Meñe ejelok maroñ ñan mour indio elañe ejako Jehovah, kajeoñ kalmenlokjen kin enaj kar ewi wãwen juõn mour eo ekanuij in aetok elañe ejako Ri Kõmanman eo ad. Enaj kar ejelok jabdewõt, ejelok karõk eo emol. Jehovah emwij an letok ñan armij ro an jerbal eo ewõr juburu ie ñan kõmmane ilo ran kein eliktata. Inem jemaroñ liki bwe ñe Jehovah Eo Elap eo ej kajejjet kitien karõk eo an, ej letok mour indio, enaj obrak kin kabwilõñlõñ, men ko ewõr tokjeir ñan kij ñan katak im kõmmani. (Ekklisiastis 3:11) Jekdon ewi joñan ad maroñ katak millennium yiõ ko rebed iman, jenaj jab maroñ tõbar ñeñen “imlõl in mweien meletlet im jela an Anij.”—Dri Rom 11:33.
Jemed Ewõr An Yokwe ñan Kom
19. Ta menin kamol eo ilo ilok eo an Jesus Christ ear lelok ñan ri kalor ro an?
19 Ilo Nisan 14, 33 C.E., ilo joten eo an eliktata ibben 11 ri jilek ro an retiljek, Jesus elõñ men ko ear ba ñan kakajur ir ñan men eo ebed iman. Rar aolep bed ibben Jesus ilo aolepen ien melejoñ ko an, im ir kajjo rar eñjake yokwe eo an ñan ir. (Luk 22:28, 30; Jon 1:16; 13:1) Inem Jesus ear kamol ñan ir: “Bwe Jema ej mõke yokwe kom.” (Jon 16:27) Nan kein remaroñ kar jibañ ri kalor ro ñan kile eñjake ko remeoeo ear wõr ibben Jemeir ilañ ñan ir!
20. Ta eo kwoj beek ñan am kõmmane, im ta eo kwo maroñ liki?
20 Elõñ ro kiõ remour rar karejar ñan Jehovah ilo tiljek iumin ebeben ko. Ejelok bere, mokta jen jemlokin jukjuk im bed in enana, jenaj jelmae elõñlok melejoñ ko. Jab kõtlok bwe kain melejoñ kein ak kaeñtan ren kõmman menin am bere yokwe in tiljek eo an Anij ñan kwe. Eban maroñ ellãlok jen joñan kalikar bwe Jehovah ewõr an yokwe ñan kom. (Jemes 5:11) Kõtlok bwe kajjojo iad en wõnmanlok wõt im kõmmane ijo kunad, lale kien ko an Anij ilo tiljek. (Jon 15:8-10) Jen kajerbal jabdewõt ien emõntok ñan wijtake etan. Jej aikwij kakajurlok bebe eo ad ñan etal wõt im kebaklok kij ñan Jehovah ilo jar im katak Nan eo an. Jabdewõt ta eo ilju eo emaroñ bõktok, elañe jej kõmman joñan wõt ad maroñ ñan kamõnõnõik Jehovah, jenaj bed wõt ilo ainemõn, lukkun liki yokwe eo an ejjab likjap.—2 Piter 3:14.
Ewi Wãwen Am Naj Kar Uak?
• Ñan debij wõt jokkin wõt juõn eo ad ilo jitõb im eñjake, yokwe eo an wõn eo elaptata ad aikwiji?
• Ta men ko reban maroñ kõmman menin an Jehovah kabõjrak an yokwe ro ri karejaran?
• Etke jelã kin yokwe eo an Jehovah “emõnlok jen mour”?
[Pija ko ilo peij 7]
Elañe jej eñjake ad jebel jen yokwe eo an Anij, jemaroñ jerbal ñan kajimwe wãwen ko
[Pija eo ilo peij 9]
Paul ear melele unin an kar bõk matõrtõr