‘Kanuknuk Kom Make Kin Meanwõd’
“Kanuknuk kom make kin yokwe . . . im meanwõd.”—DRI KOLOSSE 3:12, NW.
1. Kwalok bwebwenato in juõn joñok eo emõn kin meanwõd.
RÉGIS, eo ej jokwe ilo tueañ turear ilo France, ear oktak im juõn Ri Kennan an Jehovah ke ear baptais ilo 1952. Ilo elõñ yiõ ko lio ibben ear kõmman jabdewõt joñan wõt an maroñ ñan an bõprae jibadbad ko an leo ñan an karejar ñan Jehovah. E ar kajeoñ rupe rubber in neen wan ettõr eo wan leo ñan kabõjrak jen an bed ilo kwelok ko, im juõn ien ear anõklok leo ke leo ear kwalok nan jen ennan ko ilo Bible jen kejam ñan kejam, kajirere kake leo ke ej konono ñan armij ro imoko kin news eo emõn kin Ailiñ eo. Meñe ear ekkã an walok jumae in, Régis ear etal wõt im meanwõd. Kin menin, Régis ej juõn joñok emõn ñan Christian ro otemjej, ke Jehovah ej aikwiji ri kabuñ ro an otemjej bwe ren meanwõd ilo wãwen air kõmman ñan ro jet.
2. Ta melelen nan in Greek eo kin “meanwõr,” im ta eo nan in ej kwalok kake?
2 Nan in Greek eo kin “meanwõd” melelen “aetok in jitõb.” Book in English eo New World Translation joñoul alen air ukõt nan in “meanwõd,” jilu alen “jab kijoror,” im juõn alen “jerbal in jab kijoror.” Kajin kein jimor Hebrew im Greek ilo air ukõt “meanwõd” ekoba lemnak eo kin jab kijoror, inemõn im rumij in illu.
3. Kalmenlokjen eo an Christian kin meanwõd ewi wãwen an einjuõn jen eo an Ri Greek ro ilo ebeben eo kein kajuõn?
3 Meanwõd Ri Greek ro ilo ebeben eo kein kajuõn rar jab lemnak kake einwõt juõn men emõn. Nan in make ri kabel in Greek ro etto rejañin kin kajerbale. Ekkar ñan Bible scholar eo William Barclay, meanwõd “ej oktak jen emõn ilo Greek,” eo ej menin kemjãje ibwiljin men ko jet einwõt “makoko in kile jabdewõt menin kainebata ak kõmetak.” Ej ba: “Ñan Ri Greek ro armij eo elap kar leo ear kõmman jabdewõt ñan idenwõne. Ñan Christian armij eo elap ej armij eo, meñe ej maroñ idenwõne, ej makoko in kõmman eindein.” Ri Greek ro remaroñ kar watõk meanwõd bwe ej juõn kakõllan mõjno, ak ijin, einwõt ilo wãwen ko jet, “juõn menin bwebwe an Anij ej menin meletletlok jen armij, im juõn mõjno an Anij ekajurlok jen armij.”—1 Corinthians 1:25, NW.
Joñok eo An Christ kin Meanwõd
4, 5. Ta joñok eo emõn kin meanwõd Jesus ear letok?
4 Kein karuo wõt ñan Jehovah, Christ Jesus ear likit juõn joñok emõn kin meanwõd, im bwe joñok in ej kein karuo wõt ñan joñok eo an Jehovah. Ke ear bed iumin elap ijjibed, Jesus ear kwalok debdeb eo ekabwilõñlõñ. Kar kanan kin e: “Ar kõtaik E, a ke ar kaiñtan E, E ar jab walõñi loñin; einwõt juõn lam rej tellok e ñõn mij, im einwõt juõn sip ej ikõñ iman ro dri mijbare, ein drein E ar jab walõñi loñin.”—Aiseia 53:7.
5 Juõn meanwõd ekabwilõñlõñ Jesus ear kwalok ilo aolepen ien kwalok nan eo an ion lal! E ar kijenmij ilo kajitõk ko retao an ri kijirãt ro an im kajirere ko an ri jumae ro. (Matu 22:15-46; 1 Piter 2:23) E ar jokõmman wõt ibben ri kalor ro an, meñe rar etal wõt im iakwelel kin wõn eo elaptata. (Mark 9:33-37; 10:35-45; Luk 22:24-27) Im juõn menin nebar ilo an kar Jesus kwalok an jokane wõt ilo joten eo ke Peter im John rar karmijeteik e im kiki elikin kar jiroñ ir bwe ren “ekil” wõt!—Matu 26:36-41.
6. Ewi wãwen an kar Paul bõk tokjen jen meanwõd eo an Jesus, im ta eo jej katak kake jen menin?
6 Elikin an mij im jerkakbiji, Jesus ear etal wõt im meanwõd. Ri jilek Paul ear lap an lemnak kin menin, ke e mokta kar juõn eo ear matõrtõre Christian ro. Paul ear je: “Remol nan kein im emõn eoroñ wõt, bwe Kraist Jisõs e ar itok ñõn lõl bwe En lomoren ro dri jerawiwi, im ña eo elaptata iair. A kin men in, Anij e ar tiriamokake iõ, bwe Kraist Jisõs en kwalok ilo ña mokta meanwõr otemjej, kin joñok ñõn ro re naj liki E tokelik ñõn mour in drio.” (1 Timote 1:15, 16) Jabdewõt ialin mour eo ad mokta, elañe jej likit ad tõmak ilo Jesus, enaj meanwõd ibbed—ke ej watõk ad kõmman “jerbal ko rekar ñõn ukwelok.” (Jerbal 26:20; Dri Rom 2:4) Ennan ko Christ ear jilkinlok ñan congregation ko jiljilimjuõn ilo Asia Minor rej kwalok bwe ke ej meanwõd, ej kõtmene an wõr wõnmanlok ilo mwil.—Reveles̃õn, chapter 2 im 3.
Juõn Leen Jitõb
7. Ta kõtan eo ikõtan meanwõd im jitõb kwojarjar?
7 Ilo chapter eo kein ka 5 in letter eo an ñan Ri Galetia, Paul ej keidi jerbal in kanniek ko ibben ko leen jitõb. (Dri Galetia 5:19-23) Ke meanwõd ej juõn ian jinekjej ko an Jehovah, kadkad in ear ejaak jen ibben im ej juõn leen jitõb eo an. (Exodus 34:6, 7) Emol, meanwõd ej lajrak eo kein kemen ilo an Paul kwalok kake kin leen jitõb eo, koba ibben “yokwe, lõñliñ, ainemõn, . . . joij, lejokmen, tiljek, inemõn, jadõr.” (Dri Galetia 5:22, 23) Kin menin, ñe ro ri karejaran Anij rej kalikar joij im jab kijoror eo Anij ej kalikare, ak meanwõd, rej kõmman eindein iumin kareelel eo an jitõb kwojarjar.
8. Ta eo enaj jibañ kij kalbwin leen jitõb eo, ekoba meanwõd?
8 Bõtab, ejjab melelen menin, bwe Jehovah ej iun jitõb eo an ion juõn armij. Jej aikwij mõnõnõ in lelok kij ñan kareelel eo an jitõb eo. (2 Dri Korint 3:17; Dri Epesõs 4:30) Jej kõtlok an jitõb eo jerbal ilo mour ko ad ilo ad kalbwin leen ilo men ko otemjej jej kõmmani. Elikin an kilajrake jerbal ko an kanniek im leen jitõb eo, Paul ear kobaiktok: “Elañe jej mour kin Jitõb, jen bareinwõt etetal kin Jitõb. Komin jab bwid; Anij e jab likit bwe ren kajirere kake E: bwe jabrewõt eo armij ej jeor e, men in e naj bareinwõt marmir e; bwe eo ej jeor ñõn kõniekin, jen kõniekin e naj marmir wabõnbõn; a eo ej jeor ñõn Jitõb, jen Jitõb e naj marmir mour in drio.” (Dri Galetia 5:25; 6:7, 8) Bwe jen maroñ lo tõbrak ilo kalbwin meanwõd, jej aikwij bareinwõt kalbwin leen eo ej walok ilo Christian ro ikijen jitõb kwojarjar.
“Yokwe Ej Meanwõr”
9. Etke emaroñ kar eindein, bwe Paul ear jiroñ Christian ro bwe “yokwe ej meanwõd”?
9 Paul ear kwalok bwe juõn kõtan eo einjuõn ej bed ikõtan yokwe im meanwõd ke ear ba: “Yokwe ej meanwõr.” (1 Dri Korint 13:4) Juõn ri etale Bible, Albert Barnes, ej kwalok an lemnak bwe Paul ear kalikar menin ilo kalimjek keojaljal im akwel eo ear walok ilo congregation eo an Christian ilo Corinth. (1 Dri Korint 1:11, 12) Barnes ej jitõñlok: “Nan eo ijin rar kajerbale [ñan meanwõd] ej oktan jidimkij an buñkõlwan ilo an illu im ñan kũtõtõ. Ej kwalok ijo lemnak eo ej bed ie eo emaroñ debij wõt jen an illu ñe rej jibede, kalluiki.” Yokwe im meanwõd elap ijo kunair ñan ainemõn eo an congregation eo an Christian.
10. (a) Ilo wãwen et eo yokwe ej jibañ kij bwe jen meanwõd, im ta nan in kakabilek eo ri jilek Paul ej letok ilo menin? (b) Ta ennan eo juõn ri katak kin Bible ear kwalok kake kin meanwõd im joij eo an Anij? (Lale footnote eo.)
10 “Yokwe ej meanwõr im e joij. Yokwe . . . e jab mõke kimjãje, e jab jua.” Eindein, ilo elõñ wãwen ko, yokwe ej jibañ kij ñan meanwõd.a (1 Dri Korint 13:4, 5) Yokwe ej kamaroñ kij ilo ad jelmae don im kememej bwe kij otemjej armij jab wãppen im ewõr ad likjap. Ej jibañ kij ñan watõk im jolok bwid. Ri jilek Paul ej kakajur kij ñan ad etetal “kin etã otemjej kab inemõn, kin ejelok burokaru, meanwõr, ilo yokwe, im kate kom in kejbãrok an Jitõb kõmõnmõn buru wõt juõn ilo liab in ainemõn.”—Dri Epesõs 4:1-3.
11. Etke elap tokjen elaptata ñan meanwõd ibben Ri Kennan ro ilo bukwon ko?
11 Meanwõd eo kin ro uair ej kõmmane ijo kunan ñan ainemõn im mõnõnõ eo an kumi ko an Christian rej jerbal, katak, ak jokwe ilo juõn jikin, meñe congregation ko, jikin ko an Bethel, moko imõn missionary, kumi in ekkal ko, ak school ko an Christian. Kinke ekajjo wãwen kadkadiir, nememe, katak, kien inemõn, meñe erreo, wãwen melejoñ ko remaroñ jarjar jen ien ñan ien. Menin ej bareinwõt mol ibben family ko. An rumij illu elap tokjen. (Jabõn Kennan Ko 14:29; 15:18; 19:11) Meanwõd—kijenmij ilo jab kijoror, ilo kejatdikdik eo kin juõn oktak ñan emõnlok eo—ej menin aikwij ñan ijo kunan aolep.—Dri Rom 15:1-6.
Meanwõd ej Jibañ Kij Kijenmij
12. Etke meanwõd elap tokjen ilo ien ej walok melejoñ ko?
12 Meanwõd ej jibañ kij kijenmij ilo wãwen melejoñ ko einwõt ejelok jemlokair ak ilo an ejelok jabdewõt mejelan eo emõkaj. Menin ear mol ibben Régis, eo kar kwalok kake ilo jinoin. Ilo elõñ yiõ ko, lio ibben ear jumae jibadbad ko an ñan karejar ñan Jehovah. Bõtab, juõn ran lio ear itok ñan ibben ilo an toor dennin kemjalal in mejen im ban: “I jelã ej mol eo. Jibañ iõ. I kõnan katak Bible.” E ar etal em baptais einwõt juõn Ri Kennan. Régis ej ba: “Menin ej kamol bwe Jehovah ear kajerammõn yiõ in kakkõt ko, jab kijoror, im kijenmij.” Meanwõd eo an kar nawõnãn.
13. Ta eo ear kamaroñ Paul ñan an kijenmij, im ewi wãwen an joñok eo an maroñ jibañ kij kijenmij?
13 Ilo ebeben eo kein kajuõn C.E., ri jilek Paul kar juõn joñok emõn in meanwõd. (2 Dri Korint 6:3-10; 1 Timote 1:16) Lok ñan jemlokin ien mour eo an ke ear lelok nan in kakabilek ñan likao dikdik eo rejetan Timothy, Paul ear kakkõl e bwe Christian ro otemjej renaj jelmae melejoñ ko. Paul ear jitõñlok ñan joñok eo an make im kwalok bwe ej bedbedin kadkad ko kadkadin Christian ro rej menin aikwij ñan kijenmij kaki. E ar je: “A kwe, kw’ar lorlok aõ katakin, kõmõnmon, lemnok, tõmak, meanwõr, yokwe, kijenmij, matõrtõr ko, im iñtan ko, men ko r’ar itok ñõn iõ i Antiok, i Aikoniõm, i Listra; matõrtõr rot I ar niknik kaki: im jen ir otemjej Iroij e ar kõtlok iõ. Aet, im ro otemjej re kõnan mour im kwojarjar ilo Kraist Jisõs, naj matõrtõr ir.” (2 Timote 3:10-12; Jerbal 13:49-51; 14:19-22) Ñan maroñ kijenmij, kij otemjej jej aikwij tõmak, yokwe, im meanwõd.
Kanuknuk Kin Meanwõd
14. Ta eo Paul ear kõkkar ñane bwe ej einlok wõt kadkad ko kadkadin Anij einwõt meanwõd, im ta nan in kakabilek eo ear lelok ñan Christian ro ilo Colosse?
14 Ri jilek Paul ear kõkkar kin meanwõd im kadkad ko jet kadkadin Anij ñan nuknuk ko Christian ro rej aikwij kõnaki elikin air wutik manit ko rej kwalok kadkadin “armij eo mokta.” (Dri Kolosse 3:5-10) E ar je: “Inem, einwõt Anij e ar kãlet kom, rokwojarjar im jitenburu, komin kõnõk buruen tiriamo, joij, etã, buru, inemõn, jejanunoij; im komin meamiwõr ñõn dron, im jeorilok nana jen dron, elañe iben jabrewõt iami eor ruõn iben bar juõn: im einwõt Kraist e ar jeorilok ami nana, en ein drein bareinwõt ami kõmõn ñõn dron. Ak ion men kein otemjej komin kõnõk yokwe, eo ken lukwõj ej kowãppemi.”—Dri Kolosse 3:12-14.
15. Ta tokjen ko rar walok ke Christian ro rar ‘kanuknuk ir make’ kin meanwõd im kadkad ko jet kadkadin Anij?
15 Ñe ro uan juõn congregation rej ‘kõkõnak ir make’ kin lõjokmen, joij, etã buru, inemõn, meanwõd, im yokwe, rej maroñ lo mejelan abañ ko im wõnmanlok wõt ilo burukuk ilo jerbal eo an Jehovah. Christian overseer ro elaptata rej aikwij meanwõd. Emaroñ wõr ien ko ñe rej aikwij kauwe bar juõn Christian, ak elõñ wãwen ko reinjuõn jen don ilo kõmmane menin. Paul ear kwalok lemnak eo emõntata ke ear jeje ñan Timothy: “Kowe kin meanwõr otemjej im katakin.” (2 Timote 4:2) Aet, sheep ro an Jehovah ren meanwõd ñan ir ien otemjej, kautiej, im yokwe.—Matu 7:12; 11:28; Jerbal 20:28, 29; Dri Rom 12:10.
“Meanwõd Ñan Armij Otemjej”
16. Ta eo emaroñ walok ñe jej “meanwõd ñan ro jet”?
16 Meanwõd eo an Jehovah ñan armij ej likit kij iumin juõn eddo in mour erreo ñan “meanwõr ñõn armij otemjej.” (1 Dri Tessalonika 5:14) Melelen menin jab burukadu ibben ro uan family eo im rejjab Ri Kennan, ro ri turud, ro mõttad ilo jikin jerbal, ri school ro ilo class eo ad. Elõñ kalijeklok ko Ri Kennan ro rej ellã jeni ro, jet ien ilo elõñ yiõ ko, rej kate ir nae nan in kajirere ko ak jumae ko rejedmatmat jen armij ro rej tel air ibbeir ilo jikin jerbal ak ilo school. (Dri Kolosse 4:5, 6) Ri jilek Peter ear je: “Im en ekar ami ber im kõmõn ilo bwiljin dri ailiñ ko; bwe, ilo men eo rej konono nae kom kake einwõt dri kõmõn nana, ren kaibujuij Anij ilo ran eo ran in joij, kin ami jerbal ko remõn rej loi.”—1 Piter 2:12.
17. Ewi wãwen ad maroñ kajeoñe yokwe im meanwõd eo an Jehovah, im etke jej aikwij kõmman eindein?
17 Meanwõd eo an Jehovah enaj melelen lomor ñan million armij. (2 Piter 3:9, 15) Elañe jej kajeoñe yokwe im meanwõd eo an Jehovah, jenaj ilo jab burukadu wõnmanlok wõt im kwalok nan kin news eo emõn kin Ailiñ in Anij im katakin ro jet ñan lelok ir ñan iroij eo an Christ ilo Ailiñ eo. (Matu 28:18-20; Mark 13:10) Elañe jenaj kar bõjrak jen ad kwalok nan, enaj kar einwõt ñe jej kõnan kõmman joñan meanwõd eo an Jehovah im likjap in kile un eo an, eo ej ñan bõktok armij ro ñan air ukwelok.—Dri Rom 2:4.
18. Ta eo Paul ear jar kake ñan Ri Colosse ro?
18 Ilo letter eo an ñan Christian ro ilo Colosse, Asia Minor, Paul ear je: “Kin men in kim bareinwõt, jen ran eo kim ar roñjake, e jab jokwõr am jar im kajitõk kin kom, im kõnan bwe komin obrõk kin jela ankil An ilo meletlet otemjej im lolãtãt jen Jitõb, bwe ami etetal en tellokõn Iroij im kabuñburuen ilo men otemjej, im bwe komin jebar leen ilo jerbal ko remõn otemjej, im edreklok ilo jela Anij, ke emwij kakajur kom kin kajur otemjej ekar ñõn maroñ in aibujuij eo An, ñõn kijinmij otemjej im meanwõr ilo lõñliñ.”—Dri Kolosse 1:9-11.
19, 20. (a) Ewi wãwen ad maroñ bõprae ad lemnak kin an Jehovah etal wõt im meanwõd bwe ej einwõt juõn melejoñ? (b) Ta tokjen ko renaj itok jen meanwõd?
19 An Jehovah etal wõt im kwalok an meanwõd, ak jab kijoror, ejamin juõn menin melejoñ ñan kij elañe jej “obrõk kin jela ankil An,” bwe “e kõnan lomoren armij otemjej, im bwe ren iten jela mol.” (1 Timote 2:4) Jenaj etal wõt im “jebar leen ilo jerbal ko remõn otemjej,” elaptata eo kin jerbal in kwalok nan kin “news eo emõn kin ailiñ eo.” (Matthew 24:14, NW) Elañe jej etal wõt im tiljek ilo ad kõmmane menin, Jehovah enaj kõmman bwe jen “kakajur kij kin kajur otemjej,” kamaroñ kij “ñõn kijinmij otemjej im meanwõr ilo lõñliñ.” Ñe jej kõmman eindein, jenaj “tellokin etetal eo an Jehovah,” im enaj wõr ad ainemõn eo ej itok jen ad jela bwe jej “kabuñburuõn.”
20 Jen lukkun tõmak kin meletlet in meanwõd eo an Jehovah. Ej jerbal ñan lomor eo ad im ñan lomor eo an ro rej roñjake jerbal in kwalok nan im katakin eo ad. (1 Timote 4:16) Kaddek leen jitõb eo—yokwe, joij, lejokmen, inemõn, im jadõr—renaj jibañ kij ñan ad meanwõd ilo lañliñ. Enaj emõnlok ad maroñ mour ilo ainemõn ibben ro uan family eo ad bareinwõt ro jeid im jatid maan im kõrã iloan congregation eo. Meanwõd enaj bareinwõt jibañ kij jab kijoror ibben ri jerbal ro mõttad ak ri school ro ilo class eo ad. Im meanwõd eo ad enaj wõr juõn unin, bwe en lomoren ro rej kõmman nana im ñan kaibujuij Anij in meanwõd eo, Jehovah.
[Kamelele ko itulal]
a Ilo an kwalok an lemnak ilo nan kein an Paul bwe “yokwe ej meanwõr im e joij,” ri etale Bible eo Gordon D. Fee ej je: “Ilo tõmak in eo an Pauline theology [meanwõd im joij] rej jutak kin ruo bed in lemnak in kwojarjar eo kin armij (cf. Rm. 2:4). Ilo juõn wãwen, yokwe in jenliktak eo an Anij ej alikar ikijen an debij illu eo an ñan jumae eo an armij; ilo wãwen eo juõn, joij eo an jej loe ilo thousand alen ko rej kwalok kin tiriamokake eo an. Kin menin menin kalikar eo an Paul kin yokwe ej ijjino ibben mõttan ko ruo rej kwalok kin Anij, eo ikijen Christ ear kwalok e make bwe ej jenliktak im joij ñan ro tellokin bõk ekajet eo an.”
Kwomaroñ Ke Kamelele?
• Ilo wãwen et ko Christ ej juõn joñok emõn kin meanwõd?
• Ta eo enaj jibañ kij kaddek meanwõd?
• Ewi wãwen an meanwõd jibañ family ko,
bukwon ko an Christian, im elder ro?
• Ad meanwõd ewi wãwen an naj bõktok tokjen ko
ñan kij make im ñan ro jet?
[Pija eo ilo peij 28]
Meñe iumin elap ijjibed, Jesus ear kõmmanwa wõt ibben ri kalor ro an
[Pija eo ilo peij 29]
Christian overseer ro rej bõk kõketak ñan likit juõn joñok emõn in meanwõd ilo jerbal ibben ro jeiir im jatiir.
[Pija eo ilo peij 30]
Elañe jej kajeoñe yokwe eo an Jehovah im meanwõd, jenaj etal wõt im kwalok nan kin news eo emõn
[Pija eo ilo peij 31]
Paul ear jar bwe Christian ro ren “meanwõd kin lañliñ”